Yohani 10
10
Umudimʼumwinza
1Nalyoli lyoli nkuvavuzyʼine nkuti: Uno wengʼatakutuha mushilyango ukwinjila mwiviji lya ngʼonzi, uno wengʼakupongola paluvazu, we mwiva, we mfumfu. 2Nkandʼuno wengʼakutuha mushilyango ukwinjila, we mudimangʼonzi wuyo. 3Wʼakumwigulila numusungashilyango, Zyope ningʼonzi zikwiṿwʼizwi lyakwe. Izyenʼizyakwe ingʼonzi zyʼakuzyita namazina, akuzifumwa. 4Ilelo lwʼazifumizye ingʼonzi zyakwe zyonti, pʼakuzilongolela kwilongolela. Ilelo pʼingʼonzi zikumulandata, she zimanyilʼizwi lyakwe. 5Uwa vwelele we zitakumulandata ndali, zikumushimbila, she zitamanyilʼizwi lya va vwelele. 6Zyʼahayanga mwe mumivi uYesu zinizi lwʼakuvavuzya, avene nyene vahapotwa ukuzyaganya zyʼahavapanjilaga.
7PʼuYesu ahayanga ahati: Nalyoli lyoli nkuvavuzyʼine nkuti: Ne shilyango sha kungʼonzi nenene. 8Vonti ve vatalisile kwilongolela kukwane ukwinza vali viva, vali mfumfu, izyene ingʼonzi nyene zihasitʼukuviṿwa. 9Ne shilyango nenene. Uno wengʼalituha mumwane ukwinjila, wʼalipona. Uwene aliyinjila, alifuma, nilisyo alilyaga. 10Uwenʼumwiva lwʼakwinza pʼakuti nivaje, mbolaje, nangaje mpela vovulo. Nkandʼine ninzile ukuti zivanje nuvulanzi, ukuti zitangalilwe ṿwonti.
11Ne mudimi umwinza nenene. Uwenʼumudimʼumwinza akuzifwilʼuvulanzi vwakwe ingʼonzi zyakwe. 12Uwenʼuwamwone nyene, wʼate mudimʼuwene, wʼingʼonzi zite zyakwe wuyo, wʼakwagʼimpumpi yinzile, pʼakutagʼizyene ingʼonzi, akushimbila. Ilelo pʼimpumpi yikwinza ukulema ingʼonzi, nukuzinyampanya. 13Uwene akushimbila she wamwone vwelele, shʼatakuziviha mumwoyo ingʼonzi akuti zyashi. 14Ne mudimi umwinza nenene. Nane nzimanyile izyane, havili Zyope zyane zimanyilʼine, 15inza she wope nuTata amanyile, havili nane imumanyilʼuTata. Nuvulanzi vwane nkuziswila ingʼonzi. 16Zyope nizinji ingʼonzi ndi nazyo, zye zite zya mwiviji linili. Zyope pakuti nzilete. Zyope zilimanyʼizwi lyane, pe likuva lidimilo lyoka lyene numudimi woka mwene. 17Zye zizyo ankunzitʼine uTata, shʼuvulanzi vwane nkuvutaga ukuti ninze mbusende nohavili. 18Numo atakuvufwula kukwane ndali, nkuvutaga nene neka. Ndi namaha ga kuvutaga, ndi namaha ga kuvusenda nohavili. Zye zizyo andajizizyʼuTata zinizi. 19PʼavaYuda vahatapunkana nohavili pamazwi ganaga. 20Vamʼavinji mwe vavaliye vahati: Ali nimpepʼimbivi, umwoyo akumupota. Mukumwiṿwa shonu? 21Avamwavo vahati: Amazwi gʼakuyanga gate ga mpepʼimbivi ndali. Yope nimpepʼimbivi amwʼimanyilʼukwigulʼaminso ga wantonko? UYesu pachaka wa kukumbushilʼukufinjila utempeli mu-Yelusalemu 22Ilelo pʼahinzʼuchaka wa kukumbushilʼukufinjilʼutempeli mu-Yelusalemu, mwali mwe mulupepo. 23UwenʼuYesu ahajendanga mwa tempeli mumanda ya Solomoni. 24Pe vahamuzinganila avaYuda vahamuvuzya vahati: Ukuleha shali zinizi zyʼukwembelezya amoyo gitu? Inga we Chilisiti nalyoli iwe pʼutuvuzye apazelu. 25PʼuYesu ahavavuzya ahati: Mbavuzizye, nkandi mutitisile. Imbombo zye nkuvomba mwizina lya Tata, zye zinizi zye zikunkomeshezya. 26Nkandʼimwe mutakwitiha, she mute mwe va mungʼonzi zyane. 27Izyene ingʼonzi zyane zimanyilʼizwi lyane, nane nzimanyile izyene. Izyene zikundandatʼine. 28Ine nkuzipʼuvulanzi vwa shimashima, shimashima zitalitega nalumo, numo atalizifwula munyove zyane. 29UwenʼuTata wʼampiyʼine, we mupiti kuli vonti; numo atalizifwula munyove zya Tata. 30Nane nuTata tuli woka mwene.
Ahapaka ha vaYuda
31PʼavaYuda vahasevʼamavwe vahati tumutinze. 32PʼuYesu ahavamula ahati: Mbapeleye imbombo inyinza zye nyinji lwe mukwenya, zye nkapela mumaha ga Tata. Shinishi mukuntinzila mbombo vuli namavwʼiga? 33AvenʼavaYuda vahamula vahati: Tutakukutinzila mbombʼinyinza zyʼupezilʼiwe ndali, nkandi shʼukuyanga izya musamu, shʼukuyipelʼukuva we Mulungu nashenga we muntu vwelele. 34UwenʼuYesu ahavamula ahati: Munkomelezyo zyinyu amwe litasimṿilwe lye likuti: Njanzile ntili namwe mwe valungu? 35Apene lelo inga vope navala ve livinziyʼizwi lya Mulungu inga vope avayanjiye ukuva ve valungu, she zye zisimṿilwe zye zitakuvindulwa nalumo, 36pʼine, ne uTata ampiyʼuvufinjile, nʼantumile munsʼumu, —pʼine mukunjanjila vuli lelo mukuti: Ukuyangʼizya musamu, she ntili ne Mwana wa Mulungu? 37Inga munazilʼukuti ntakuvombʼimbombo zya Tata ine pe ndali ukunitiha. 38Nkandʼinga nkuzivomba nalyolʼine, inga mutakunitiha ine, pe muzyitihaje zizyo zye nkuvomba, pe muliyaga mulimanyinsanya ukuti uTata ali mumwanʼine, havili nane ukuti ndi mwa Tata. 39Havili avene vahavuyizya vahati tumuleme, uwene ahaleguha inyove zyavo. 40Pʼahalambʼijenje lya Yolidani, ahavalʼisyila lila kwʼalʼu-Yohani ahavozyagʼavantu ulutanzi lula. Pʼahadila. 41Pe vahavalʼavinji avantu pupo pʼali vahati: UwenʼuYohani atapezile nashimʼishimanyilo, nkandi zyʼuYohani ayanzile pali wununo zye zya nalyoli. 42Pe vahamwitiha avinji ava mumwo.
Zvasarudzwa nguva ino
Yohani 10: NYi1965
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Nyiha New Testament © British and Foreign Bible Society, 1965.