Máakúsʉ 13
13
Yěso lâʼ ghíʼ pə́ táa vǒghʼ ndə̂ Sê Yelúsalêm
(Mat 24.1-3; Lks 21.5)
1Yěso pə̂ fû ndə̂ Sê* nkwǎr, cǒ ngaŋə-jyêʼ-no* yé lâʼ lə́ zʉ́ ngô: «Cícye, jwó mbə̂u məghǒ mi pə́ lə lǎghʼ ńkə́r ndə̂ yo! Ndə̂ yo pə́ mə́u gháʼate.» 2Yěso pwôr lə́ zʉ́ ngô: «Koo nâŋ pə́ mbə̂u yi pə́ lə lǎghʼ ńkə́r ə ghûʼ mbóu mbǒŋ lə̂. Ə́ táa pə́ có leʼé, pə nâa mvǒghʼ tə ləghǒ kə́ mbyér nzápə yé lə̂ có po.»
Yěso pə̌ ndaʼ no ńté tághʼə́ yi a táa kwǎr
3Ə́ lə pə́ ghíʼ a lə nyáŋ sê ndəu ləkôr mətʉ̌ olîvə yi ə́ ŋwě ndə̂ Sê*, Pyêh gháp Jâghʼ, ə́ ngʉ̌ Jâŋ gháp Ndeléya faghʼ mbəʉ záp, ə́ ntó ńtúŋú yé ngô: 4Lǎʼ wághʼ mpfu yi yo no táa pəutə́, ə́ mbǒu ndáʼ wághʼ ləiʼi yi pə́ táa lǎghʼ jí ńgó ə́ pə́ mə́ ngwo mbəutə́ wó?
5Yěso jî lə̂ ndáʼ gháp ngô: «Pei laghʼə́ tû zéi, ə́ mbáa ŋuu lə̂ fútə́ wéi. 6Pye tə nzáa táa lǎghʼ ləjôghʼ zâa pfú mbi, wǒwó lə́ páp lâʼ ńgó: “Mə̂ŋ Nzaʼ-nkʉ yi Sê lə ghʉ̌ ndaʼá mə́u lə̂ ngʉ́ ŋə́*”, ə́ lǎʼ yə́rə́ lǎghʼ futə́ lələʉ pye. 7Pei lə̌i ntáa nzúʼ pə́ pə̂ ndeʼtə məntso cər məlâʼ mi ə́ páatə́ wéi, kəʉ mi ə́ pə́ ndǐ təsə, koo pei pôghʼ. Ə́ pə́ ntúŋu ńgó mêi məzə̂u tsə́mbi ndêitə́, lə́ ə̂ kə́ ndághʼ ḿbə́ yé ńgó nzʉ̂ me po. 8Ə lâʼ táa lěsê lwóʼo có, fou lesê ńdwóʼo cǒ, ndesé táa cʉʼʉ́ lə̂ məyʉʼ tə nzáa, wáʼ póu ngwʉ̌. Ə̂ lághʼ ḿbə́ pə̂ ləjitə́ ngwôʼ, lə́ ə́ mbə́ pə́ ghíʼ môu jitə lə̂ ndə́u məngyě shuŋú lə̂. 9Ə́ ngwǒ lə́ pei, pei laghʼə́ tû zéi ńté ńgó pə́ táa lǎghʼ wéi wǒ yʉʼ yi pə́ feʼ məno wó; pə́ ghʉ̌ sə́u wéi cər məndə̂ cûʼtə pəyúda*. Pə́ ghʉ̌ lǎghʼ wéi wǒ mbi pəngə́mnaa gháp pə pəfou məlâʼ ńté ghâa, pei lêitə́ mə́u ndǎʼ gháp no zâa. 10Ə́ pə́ ntúŋu ńgó pə tsəmbi ntsə́tə́ Nkəʉ Shʉʼʉ mbó məlâʼ mə́tsəm. 11Pə́ lə̌i ntáa ngôu wéi lə̂ ngwó fěʼ wéi, koo pei pûʼ mbəʉ zéi ńgó pei wo kə́u yʉʼ wó ə́ lǎʼ ńgó ho! Sê ghʉ̌ kə́u yʉʼ wó mpfu wêi, ə́ cóghʼ no ntsʉ pei, pei láʼ. Ə́ pə̂ yé yi ə́ fú tû pei po; Zəghʼə Ndêi-lěi lə̂ cʉ́ʼ ntsâr lə̂ zéi yʉʼ. 12Pəfə̌r táa féi pəfə̌r páp ńŋə́ pə jwítə́, pətə́ kə́ ngʉ̂ záp pə́ yə́rə́ lə̂ ghəpə́ záp. Ghəpə́ táa shərə́ cʉ́ʼ pəghaŋə mbəu pətə́ páp, ə́ ghʉ̌ pə jwítə́ gháp. 13Ŋuu tsəm táa pǎa wéi ńté ghâa, lə́ ŋuu yi a shə̌ghʼ tə́ kâa tə nkə́u ləlyəghʼtə́ táa ncwór.»
Yěso tsətə́ ngwôʼ njwǐ yi ə pə̌ ntó
(Mat 24.15-31; Lks 21.20-28; 17.23-24)
14«Pei lə̌i ntáa njwó Ngaŋə-ndou yi pə́ tsʉʉ yé tsʉ̌ʉ lə̂, ghíʼ a tə̌ʉ yʉʼ yi káa a ghwo yé lə̂ ntə́ʉ wó. Ńgó ŋuu yi a fûŋ yʉʼ ŋwaʼa yo lû lə̂ ntsúŋú ńzúʼ zěi! Ə pye pi gháp pə́ Yudêi khʉ́ ńdə̌r lə̂ məkôr. 15Koo ŋuu yi a ghʉ̌ pə́ lə́ tətáa yi tʉ́ lâʼ ńgó a wo shiʼ kə́u ndə̂ pyé zə̂u poŋə́ khʉ̌. 16Ŋuu yi a táa pə́ nkâʼ, a páa lə̂ ndâʼ ńgó a wo pə̌ʉ ndə̂ zʉ́ pyé ndǐ fwôghʼ ye! 17Pəndʉʉ-tə́poŋ táa pə́ pəngyě shuŋú, mbaa pi gháp pə́ nóŋə ghəpə́ lə́ mêi məleʼé. 18Pei sʉ́ʉtə́ Sê ńgó koo yo no táa ngí tó, ə́ pə̂ mpfu caghʼ-caghʼ mbʉŋ. 19Ńté no ə́ táa pə́ lə̂ məleʼé mêi, ə ngwôʼ yi pə́ laa kə́ jwô yé có yə́rə́ tə fú ghíʼ Sê lə tsuŋú ngoŋ ńtó ńkə́u mpfu wo pə́ wó, lə́ pə láʼ nkə́ mbóu njwô yé cǒ yə́rə́ po. 20Nde lə yaa ndə̌iʼ cwótə́ məleʼé mêi, pó mə́i káa cǒ ŋuu láʼ mvûʼ yé. Lə́ a lə cwótə ńté pye pi a lə tsóʼ gháp, ə́ ndaghʼ ńgʉ́ pye pé. 21Ə́ pə̂ yə́rə́, ə́ mbə́ yi ŋuu lə̌i ndâʼ lə́ pei ngô: “Jwô, Nzaʼ-nkʉ wo yaʼa!” kəʉ pə́ ngô: “Â yi yiʼi!” koo pei pə̂i. 22Ńté no pəcó pətáŋ-mə́laa táa kwatə́, cǒ ghí pə́ lâʼ ńgó â Nzaʼ-nkʉ, cǒ pə́ ndâʼ ńgó â ntsətə-nkəʉ Sê*. Gháp táa ghʉ̌ mənkəʼə-məno gháp pə məndǎa-jwô-mə́no lə̂ ndághʼ ńfutə́ pye, tə ə́ pə̌i lǔ lə̂ fútə́ mbaa pye pi Sê lə tsóʼ gháp ńdaghʼ ńgʉ́ pye pé. 23Ə́ ngwǒ lə́ pei, pei laghʼə́ tû zéi, n nzâʼ nzʉ̂ ndaʼ wéi.»
Môu Ŋuu táa pə̌ʉ nzəm
24Lə́ ə́ táa pə́ lə́ mêi məleʼé, ə́ mpfu yi ngwôʼ njwǐ zei yo lei mə́, pə jwó
mə́nəu shə́rə́ shʉ́ŋ, mə́saŋ kə́ mbyér nkêʼ yé yʉʼ po. 25Pəcwôʼ-saŋ fú lə́faŋ mpfúŋtə́ sê,
mətəʉ mi ə́ pə́ lə́pû nâa ntághʼə́. 26Ə̂ pə́ yə́rə́, pei jwó Môu Ŋuu* pə́ cər məlâm, ə́ mə́ ntô, ə́ ngwǒ ləghûʼ tə mbaa tə́koʼ mətəʉ. 27Ə́ tə́u pəcwôʼ Sê*, gháp kə̂itə́ pye pé pi a lə tsóʼ gháp cər nzʉ̂ məsaghʼə́ ləkwo tə fú sǎʼ-nəu ńgwó ńkə́u ntsǒ-nəu.
Ə ləiʼi yi ə́ nyarə ńgó Môu ŋuu pə mə́ ntó
28Pei pyé fəiʼ lə̂ tʉ̌-məfúʼú. Pei lə̌i ndéi tə njwó məfu měi kúrə́, pei jî ńgó ləu pə́ mə́ ntó. Ə́ mbou njwó, ə́ lei tə ntáp, pei jî ńgó cû pə́ mə́ nkwó. 29Ə́ kə́ mbə́ ndʉŋ-ndʉŋ ghíʼ pei lə̌i ndáʼ ńjwó mwo məno jî lə̂ nkwátə́, pei jî ńgó mpfu yi Môu Ŋuu* wo tó, paatə́ mə́, ńgó a pəi mə́ ncʉ́ʼ ntə́ʉ pə́ ntsʉ ndə̂. 30Məŋ ndaʼ wéi kwaʼ lə́nə́ʉ, ləwěi pye pi ə́ pə́ cər nzʉ̂ mpfu wo, táa nkwʉ́tə́ gháp tə mě, tə́ ghó mwo məno mə́tsəm pəutə́ mə́ po. 31Ləfaŋ gháp ndesé táa mě, lə́ ə́ tsâr zâa láʼ mê yé po.
32Lə́ ə́ ngwo lə́ leʼé, mbaa mpfu yi mwo məno táa kwatə́, mə́i káa cǒ ŋuu jí, mbaa pə́ pəcwôʼ Sê* tʉ̌-lə́pû, tə mbaa pə́ Môu Sê. Tǎa zə́ghʼə́-zʉ́ lə̂ pə̌ jí. 33Pei laghʼə́ tû zéi! Koo pei lê. Ńté no káa pei pə́ njî wéi mpfu yi mêi məno táa tó. 34Ə́ táa pə́ ghíʼ no ŋuu yi a lə pə́ ngwô ləŋəi, ə́ nyér ndə̂ ye mbó ngaŋə-faʼ yé, ə́ ŋə́ faʼ yi wǒwó wo cʉ́ʼ pə́ fǎʼ, ə́ ncʉ́ʼ nkə́ ndáʼ lə́ ŋuu yi a pâp ntsʉ nkâʼ ńgó koo a wáʼa mbəʉ ye ndé. 35Tə mbaa pei zéi, koo pei wáʼa mbəʉ zéi. Ńté no káa pei pə́ njî wéi mpfu yi ngaŋə nzeʼ wo kwó. Kəʉ a wo kwó pə́ mpfu ngwʉ̂? Kəʉ pə́ lə̂ twûʼ? Kəʉ pə́ ntôŋ-nkhwoʼ? Kəʉ pə́ mbaʼa-mbaʼ? 36Pei páa lə́ pə́ yi mboʼ a woghʼə́ woghʼə́ ńtó mpfu yi pei pə̌ ndé. 37Ə no yi məŋ ndaʼ lə́ pei lo, məŋ ndâʼ mbaa lə́ maa ŋuu ntsəm. Pei páa lə̂ ndé!
Zvasarudzwa nguva ino
Máakúsʉ 13: NLA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda