Kejadian 13
13
Abram Lot e’birek ’bogoligisa wene
1At Abram o Mesir ukpoluk, o Kanaan ik o’butmu hegitsogo weigoluk ebela yema akhit en waga. Wagalat ugwe emin, di a’ge yu a’ge ’berlegat emin, woluk wagoma at Lot ano ogo e’berlik wagayat. 2Abram uam e, domba emin, kambing emin, sapi emin, ye, uang e, helep e’gen ’gela’ge, o’go a’bik a’ge onuk perak emin, emas emin, modok a’bigatma re, ebe ’gain at welaga. 3-4Asogo wagalat, o Betel laigoluk, o agaikhenma en e, agaikhenma ’gwiselat til waga. Asogo waga lagarik, o Betel hegitsogo lagarik e, naduk o tabo sum owi weregeitik, di a’ge yu a’ge Allah paget wusogo odouk narlik obogulomma ebale helep wusogo hele’gegeimu ano lagarik, Allah at erliktegei.
5Ye, at Lot ogo re, eiyagai emin, eragam a’ge emin, uam domba emin, kambing emin, sapi emin, o tabo sum owi emin, welagayat. 6Is e’birek onuam modok a’bik welaga ai en, e’gela weiyatma re, enemin mesikmu wolom mia aga. 7Ai en e, at Abram osi wam di a’ge yu a’ge o’gonogu legesa a’ge emin, Lot osi wam di a’ge yu a’ge o’gonogu legesa a’ge emin, enemin wene ’baligisa. (O eria hegit is aphwami o Kanaan a’ge emin, Feris a’ge emin, o ebayat welegesa.)
8Onosi asogo wene ’balogu legesema, at Abram en Lot disogo mo’gulesi.
“Nis ne’birek nak e, nare nemin op a’geat de, hat hosi emin, an nosi emin, wene asogo ’balu mia o. 9Ai en e, nis nonomu-nonomu ’bogoluok o. Hat en ’gwiang yema nene’gik ’bekhit akhit eik epegen holuk e, an hware akhit eik en e, laigat o. Ye, hat en ’gwiang hware akhit eik epegen holuk e, an ’gwiang nene’gik ’bekhit akhit eik en e, laigat o,” oluk mo’gulesi.
10 #
Kej. 2:10
Asogo mo’gulesimu, at Lot il eragam o’gwe yethesirik, ik Yordan do’go hwerli o kota Zoar hwerli yethesi ’gal e, ik modok a’bik, Nenaik ’gain Onuk Logo a’ge agan e’gen yabukmu ’gela’ge emin, o Mesir ’gela’ge emin, oruakma yethesi. (O eba Nenaik ’gain Onuk Logo a’ge en o kota Sodom emin, Gomora emin, owan perlengsogo waronobu erlak oruakhwe, o orogole op modok asogo welaga ai o.) 11At Lot asogo il yethesirik, o Yordan do’go eba ’berlegat pulhwerlesirik e, Abram emin ’bogulogo at Lot o mo orlu ago hegit eba laga. 12Lagarik, o tabo o kota mesik oruakma weriselat, mesik oruakma weriselat, o Yordan do’go eba ’berlegat da werik ya werik lasu lagarik, o Sodom hegit eba akhit lai lasukhwe, at Abram nak e, o Kanaan ebayat welaga. 13O kota Sodom eba re, aphwami Allah ilem enebabut modok wiak togu legesa a’ge welegesa.
Abram o Hebron laga wene
14At Lot arat lagama, at Allah en Abram disogo mo’gulesi,
“Hat hebe edik welegenma eriayat edik welat, hil etleba akhit, yema akhit, erabu akhit, orogobu akhit, ’berlegat yethomup o. 15#Per. 7:5’Gwiang hat hil yethagun a’ge eba ’berlegat hat hebe emin, hat en dogo’gwe a’ge emin, eiye oroguptik modok-modok wolorogup en wokhentaik o. 16An en e, hat en dogo’gwe a’ge enebe modok a’bik, ulage ’gwiangma ene’gik wenaru modok mia welago ai ’gela’ge, henebe ene’gik wenaru modok mia ai ’gela’ge takhenebaik o. 17’Gwiang eba ’berlegat hat wokheik ai en e, hil erabu akhit en, orogobu akhit en, etleba akhit en, yema akhit en, ’gogolil lak o,” oluk mo’gulesi. 18Asogo mo’gulesimu, at Abram en o tabo weregei a’ge ano woluk, e Allah agan aphwami en Allah paget togulomma eragam onuk Mamre ai re, o Hebron eragam horogatma re, eba wosu agarik, di a’ge yu a’ge Nenaik ’gain Onuk Logo a’ge paget wusogo narlogulomma ebale helep uak wusogo hele’gegei.
Zvasarudzwa nguva ino
Kejadian 13: Wul
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda