Genesis 4
4
Cain atherr, Abel atherr
1Adam-then Eve-then ratherr awey akely atnyenek. Awey akely ikwerenh itnan Cain. Eve angkek, “Atha renh itnewey Cain, INGKARTelarl awey akely ayenh anthek.” Itna Cain angka ikwerenh-angkwarr aynteyel, “INGKARTel ampa anthek INGKART-they renh inek.” 2Ikwer-penhan, Eve ra awey ingwer-anemarl atnyenek. Amelikw renh itnewek Abel. Ratherr ilkwerrek-anem. Abel yep-yep arntarnt-arenh-arenh, Cain ran amern atherrkarl ingwerek-ingwer lyapelhelenh. 3Ingwer-ingeran Cain ra amern INGKART-anemarl tyenkerr anthek. 4Abel ra yep-yep akwerrk atwemel, INGKART ra tyenkerr anthek arrpemarl. Yep-yep akwerrk lyertenyankarl atnyenek. Abel-el aker atwek, ra INGKART renh tyenkerr anthetyek. Aker ikwer-penh ra tyelk mwerr-rnemant rlwanemel INGKART renh tyenkerr anthetyek, mpwerrkenty anter-akngerr. INGKART Abel ikwerant inkwerelhek, renharl ra tyenkerr anthekek. 5Cain-ekan ra inkwerelheyangarl. Cain ra artwerrety-anem anenh, ahelirremel.
6INGKARTel Cain renh ilek, “Ilekek ngarl aneyel artwerretyan? 7Ntwarl ayenh tyenkerr arraty-angkwarr anthek-penh, ngarl irrkngerney-anem anetyek. Ngarl mwerr-angkwarr anem, ngap irrkngerneyarl aneman. Ngarl mwerr-angkwarr anem, ngap irrkngerneyarl aneman.” INGKARTel renh ilek, “Ngap apmwelhelekerr, nga mwantyel iterretyek.”
8Cain-el ayteyikw ikwerenh irrtyelherl-alhek, “Mpa, ayla awangk alhey arrkent, peleyn ilkwewarl.” Irrtyelherl-alhek ratherr arrkent alhetyek-arrpantey irrtywerremel, renh ra atnwenhek akwerr-warl, ra atwey-alhetyek renh. Cain-el renh atwek, ipmek-antey.
9INGKARTel Cain renh ayernek, “Abel-alew? Ayteyengkw ngkwenh-alew?” Cain-el renh irrtywerremel tyernek, “Inpa, ayeng arlarl.”
10INGKARTel renh ilek, “Ntwa atwek ayteyengkw ngkwenh. Arrknga thelhelek ikwer-they ahern-warl. Atha ngenh apmer nhethey irrentem, ntwarl ayteyengkw atwek, rarl arrknga thelhelek apmer nhel. 11Ahern nhekan amernan nthakenh ntwa intwelheleyang-anemarl. Arrkngarl ayteyikw thelhelek-kety.” 12INGKARTel renh ilek, “Nhenhekan amern atherrk intwelheley-angenh. Apmer nhelan nga aney-angenh-anemarl arrangkw. Nga alhayntant-anem.”
13-14Cain-el renh ilek, “Ntwa atyeng angka awerr arrernek. Apmer nhetheyarl apmer ingwerel-anem ayeng anayntem. Apmer-wenyengarl ayenh ingwerentyel atwetyek alhewer, mentyan.”
15INGKARTel renh ilek, “Ingwerel ngenh atwenty, atha renh arntety anthem. Ingwerel ngenh atwekerr, atha ngkweng-warl impaty arrernem.” 16Apmer Nod-warl ra alpek, Eden-they akngerrakw. Cain aney-alpek intem-antey INGKART ikwerety, angkepirreyang arrangkw, ikwerenh-rnem-warl. Ingwer-kenh apmer-itwek aney-alpek. ...
Zvasarudzwa nguva ino
Genesis 4: aly
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2020, Wycliffe Bible Translators, Inc. All rights reserved.