Luka 13
13
Pfyehuzani mama ambu munafwa
1Makisa wantu wangine wamudzia Yesu na wamumpa maagu ya Wagalilaya wayagijweo ni liwali Pilato wepfowakipfiika waḍondo wa kuyavya mvuugiya kwa Muungu. 2Yesu kawambukuya kamba, “Munat̯ara kwamba awa Wagalilaya wayagijweo ni wanabvise kuchia Wagalilaya wangine? 3Sivyo hat̯a! Mukitsapfyehuza mama, nanywi pia munafwa tswee dzao. 4Ehe awaḍe wantu kumi na wanane wa Siloamu, wafwiyeo wepfogwijwa ni huḍe munara? Munat̯ara kwamba ni wazuka kuchia wantu wangine wonse wa Yerusalemi? 5Sivyo hat̯a! Ela nyakumwambiani kwamba, mukitsapfyehuza mama nanywi nyonse munafwa dzao.”
Inganyo ḍya mutini usiwovyaa
6Makisa Yesu kawambia hiḍi inganyo, “Muntu mumodza ewa kat̯ora muhi wa mutini nkondeni mwakwe. Ela kula akidza kulachani matunda nkekiona kintu. 7D̯ubva kamwamba huyu muima nkondeye, ‘T̯ayowa, isakuwa myaka mihahu hangu niḍabve kudzalacha matunda ya mutini, na sidzaona hat̯a modza. Ukente! Koro wakuinangani hi nkonde ḅure.’ 8Ela huyu muima nkonde kamwambukuya kamwamba, ‘Ḅwana nahuuyatse nangaa hu huu mwaka t̯u. Naut̯ukuria simo hapfa sinani makisa naungiza mbolea. 9D̯ubva ukidza ukivyaa matunda ni urembo, ela ukitsavyaa ukente.’ ”
Yesu kapfonya muke nsiku ya Sabato
10Nsiku modza ya *Sabato, Yesu ewa kuyongweezani *sunagogini. 11Humo sunagogini kwiwa muke eyekuwa na mpepfo nzuka imumpiyeo nd̯wari ya myaka kumi na minane. Ewa kakutsika kumu na nkakuweza kudzigonzowa. 12Yesu epfomuona kamuhana kamwamba, “Ee muke, kwa huru na nd̯wariyo!” 13Kamuwekea mikono, na pfapfo huyuḍe muke kagonzoka ḍii na kaḍabva kumushad̯a Muungu. 14Ela huyu mukuu jwa sunagogi kareja kwa kwamba Yesu kapfonya muntu na nsiku ya Sabato. Ndookomu kanena na hawa wantu kawamba, “Kuna nsiku ntandahu za kwamba munaweza kuhenda kazi. D̯ubva nzoni kuzimuni ya hizo hizo nsiku muriit̯we, ela namutsekudza na nsiku ya Sabato!” 15Ndipfo Ḅwana akimwambukuya akimwamba, “Ee nywinywi wambiimbii! Ni ga kahi yenu asifunguya sangaye ya ngombe ambu hareḍye akaḍipfiika kunwani madzi na nsiku ya Sabato? 16Ehe ayu muke ayu, eye yuvyee jwa Iburahimu ahendezejwe muhumwa jwa Shaat̯ani kwa myaka kumi na minane, atsewekwa huru kwa dzambo ḍya kwamba ni nsiku ya Sabato?” 17Hiviḍe vya Yesu ambukwiiyevyo kuwagiza yutswa nyabvawe wonse na wantu wangine watsekezwa ni haya mambo makuu ahendeyeyo.
Namuna ya Uhaju wa Muungu wivyonakuya
Matayo 13:31-33; Marko 4:30-32
18Yesu kawauza wantu kawamba, “Uhaju wa Muungu waa dza kintu ga? Ambu niuinganye na kintu ga? 19Waa dza mbeju ya tsare#13:19 Haya matsoro ya Kiyunani yahadza mbeju ya harid̯ale. Hii iwa ni mbeju ndoḍo sawa sawa na mbeju ya tsare. imeeyeyo nkondeni. Ikuya hat̯a ihenda muhi mukuu na mukuu, hat̯a nyuni nao wenda wadzielekanyia vitsanza humu mahambini.”
20Makisa Yesu kanena kawii kamba, “Uhaju wa Muungu niwiinganye na kintu ga? 21Waa dza hamira ya muke ahwaiyeyo akiikandia mukahe. Ingawa hu unga wiwa ni mwinji na mwinji,#13:21 Haya matsoro ya Kiyunani yanakwamba: ni chima cha pishi nsano na nusu. hi hamira injia-njia, na hu unga wonse ufura hat̯a uhenda mukahe mukuu na mukuu.”
Inganyo ḍya muḍyango mutseke
Matayo 7:13-14, 21-23
22Epfokuwa charoni kwenda Yerusalemi, Yesu kachia na midzini na vidzidzini, akiyongweeza wantu. 23Muntu mumodza kamuuza kamwamba, “Ḅwana, yani awa wadzeopfona ni wachuchu ḅasi?” Yesu kambukuya kamba, 24“Jwaniani kunjia na hu muḍyango mutseke, koro hachi nyakumwambiani, ni wenji wadzeotsaka kuunjia, ela ntawakudzaweza. 25Mwenye nyumba kadzanuka na kuufunga hu muḍyango. Ndookomu mukisumama nze na kuhana na hapfa muḍyangoni mukimurai amufungwiiye, jeje kadzamwamba, ‘Hat̯a simudzi muyawiyeko!’ 26Nanywi mudzamwamba, ‘Wewe wikiyongweeza midzini mwehu, na hat̯a hwiikiḍya na kunwa pfamodza nawe.’ 27Ela jeje kadzamwamba, ‘Kare simudzi muyawiyeko t̯i! Ninukiani hapfa nywinywi wantu wazuka nywi!’ 28Mudzaiya na kurhigha magego mudzepfomuona Iburahimu, Isaka na Yakobo, na manabii wonse Uhajuni mwa Muungu, huku anywi mukifat̯ulwa nze. 29Wantu wadzakudza kuyawa muyao dzuwa na mutso dzuwa, hangu dzuu hat̯a nsini, na wadzakaa vihako jilani mwa Uhaju wa Muungu. 30D̯ubva wa mwiso wadzawa wa d̯ura, na hawaḍe weo wa d̯ura hi hii saasambi wadzawa wa mwiso.”
Yesu kawiiya mudzi wa Yerusalemi
Matayo 23:37-39
31Iiḍe saa *Mafarisayo wangine wamuḍaabvata Yesu wamwamba, “Nuka hapfa wende kuntu kungine, koro haju *Herod̯e anatsaka kukuyaga.” 32Ela Yesu kawambukuya kawamba, “Endani mukamwambie huyuḍe hamabworama kwamba, nyakuyavyani mpepfo nzuka na kupfonya wantu yeo na keso na nsiku ya hahu#13:32 Huu wiwa ni muḍa mufufi usiomanyikana uyeyawe. nakwisa. 33Hat̯a vivyo ni had̯i ninjie charoni yeo, keso na muhondo. Koro si hachi kwamba *nabii afwe kungine kuḍekwonse lamud̯a Yerusalemi. 34Yerusalemi, e Yerusalemi! Mudzi wiwonayaga manabii na kuwabiga na mawe *ntumi wa Muungu! Ni myeedha myengaa nitsakiyeyo kuwatsanganya wantuwo pfamodza, dza hiviḍe vya nkuku evyonawafunamia wanawe nsii ya maḅawaye? Ela wewe kudziza! 35D̯ubva mudzi wenu mudzausindikijwa. Hachi nyakumwambiani, ntamukudzaniona kawii mumpaka ngera idzepfofika ya kwamba mudzanena mwambe, ‘Kavodhyegwa jeje eyekudzani kwa sari ḍya Ḅwana!’ ”
Zvasarudzwa nguva ino
Luka 13: pkb
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2004, Bible Translation and Literacy