Lûk 1

1Wòt èkɔŋ am Tìofilɔ̀s, bòt nyaŋ e nyɔꞋtè shɨ ànəa èghɨ bu bɔ ko nê e ghɨ̌ a kètsìà wa la. 2Bɔ shɨ ènəê bu ba zə a ètsəê bòt bu bɔ li ndzè èghɨ mbɔŋ a mèmbuꞋu ndɔ̀Ꞌ ntsɔ̀tè la. 3Mbɨ̀Ꞌɨ̀ mâ kùŋe mènəè maa ègème a mèmbùꞋu la, mâ kwaꞋtè nê è shɨ mènəè mbɔŋ a si mɨ̧̂ abua yê, àwɔ̀ Tìofilɔ̀, wuê mbɨ̀Ꞌɨ̀ è li ntsè la. 4E ngɨ̀à anè mbɨ̀Ꞌɨ̀ aa ko nkûŋ anè ànəa èghɨ bu bɔ li nyɨ̀Ꞌte awê la.

Ntu̧ Ngableyà abua Zàkàleyà

5È li ngu àfɨꞋa Elɔ̀d li ngu fɔ̧̀ àlaꞋ a Jùdià la, ntsìà mèpɨ̧̀ Mbɔ̧ɔ̧mà kǒ wuê, èlen tò wu Zàkàleyà la. Tà li ndzəa ènɔ̧̂ bèntsìà mèpɨ̧̀ Mbɔ̧ɔ̧mà bu àndǎ̧ Àbijà la. Èlen vi tò li ngû Èlisabèt, tà li dzəèà àndǎ̧ Alɔ̀n è wu àndǎ̧ bèntsìà mèpɨ̧̀ Mbɔ̧ɔ̧mà la. 6Bòt baa babe la bɔ li ntɨ̧̀ɨ̧ ndɨŋndɨ̀ŋ a mbì Mbɔ̧ɔ̧mà mè me paŋe mbɨ̧te tò nè nkɨ̀atsə tò tègème. 7Bɔ li bɔ̀ ka bɔ bɔ̧ nkàà nê Èlisabèt li ngu yen, bɔ mè ntsìꞋi ndente bòt.

8È lè wu ane àli ako Zàkàleyà me ghɨ̌ àfàꞋ àzi mbɨ̀Ꞌɨ̀ ntsìà mèpɨ̧̀ a èbem lob nɨ̧ Mbɔ̧ɔ̧mà, àfɨꞋa a è we tò nè ènɔ̧̂ àa fàꞋa ane àlia ngaa la. 9Bèntsìà mèpɨ̧̀ bu bɔ li mbɔ̌ ndɨ bɔ̀ɔ màꞋa èbìt àa nyɨꞋte wòt tàa nyi a èbem lob nɨ̧ Mbɔ̧ɔ̧mà etɔ̧̀ mèwet àghaa ntsɔ̧̀ eŋa abua Mbɔ̧ɔ̧mà la. Bɔ maꞋa èbìt bu ale, e baãaã a Zàkàleyà. 10Àfɨ̀Ꞌ a tseke tê nkùꞋ bòt e bu̧u̧te a ètsəê lob nɨ̧ Mbɔ̧ɔ̧mà e me tsàꞋte atò, Zàkàleyà nyi nga etɔ̧̀ mèwet mu.

11Wantu̧ Mbɔ̧ɔ̧mà è bê sàꞋa a mbì tò, ntɨ̧ɨ̧ àbâ àbualu̧ èjɨwèt mèwet àghaa ntsɔ̧̀ mu. 12Zàkàleyà ye atò, sàꞋà mè mbɔ̀ɔ̂. 13Ka wantu̧ wu shu abua tò nê, “Zàkàleyà, à ka mbɔ̀ɔ̂, Mbɔ̧ɔ̧mà zə àtsàꞋtè àyê. Vi wè Èlisabèt bèle bi wambâ̧ abua yê, aa tsì èlen tò ane Jɔ̌n.” 14Bɔɔ bi atò ale, aa me bɔ̌ àwê tè aa taꞋa wùꞋte àwê, bòt nyaŋ aa mèe taꞋa wùꞋtè àwɔb mɨ̧̂. 15Taa li wu wòt nɨ̧ a mbì Mbɔ̧ɔ̧mà. Tà ka li nu mèlùꞋ kèkweelè à, Mbɔ̧ɔ̧mà mè ngu elu̧u̧ne èntɨ̧ɨ̧ tò nè Fo Kèfə ka bɔɔ bi atò. 16Taa li ghɨ̌ bòt èpfəè àlaꞋ Izəèlȩê nyaŋ aa kua akwèn ekɨꞋɨ abua tǎt wɔb Mbɔ̧ɔ̧mà. 17Mbɔ̧ɔ̧mà naa li zǐ Fo yu tà li ndzi ane Èlȩjà la ane tò, taa bɔ mètàŋ eghǎ a mbì Mbɔ̧ɔ̧mà. Taa ghɨ̌ ale mbɨ̀Ꞌɨ̀ gheble mèntɨ̧ɨ̧ bètǎt ètsəꞋne awɔb bɔ̂ bɔ̧ bɔb. Taa li gheble bòt àtsəa kekweelè, mbɨ̀Ꞌɨ̀ bɔɔ bɔ èyì elɔ̀Ꞌɔ kua akwèn e me kwàꞋtè mènəè mbɨ̀Ꞌɨ̀ bòt bɔ ntɨ̧ɨ̧ ndɨŋndɨ̀ŋ la, e mě taŋke bòt Mbɔ̧ɔ̧mà bɔɔ me chɨ̀Ꞌɨ àfɨ̀Ꞌ yu tàa li kɨꞋɨ la.”

18Zàkàleyà bììte atò nê, “Màa ko na laꞋ nê ànəê yaa wu nkûŋ à? E ngu ndèn wòt, vi am mè ntsìꞋi ndèn àvi mɨ̧̂.”

19Wantu̧ Mbɔ̧ɔ̧mà wu nê, “E ngu Ngableyà wu tàa ntɨ̧̀ɨ̧̀ a mbì Mbɔ̧ɔ̧mà la. Wu tòà zìambɔŋ ka tà tu̧u̧ am nê è nkɨꞋɨ ndàꞋà abua yê mè shù awê Ntu̧ Ntsɔ̧̀ yaa la. 20Ndɨ̀ wu à bakà bɨ̧̀ɨ̧̀nê ntu̧ yaã yu nàa li ete wu àfɨ̀Ꞌ àzi la, àa kwen mbûꞋ, à kà tsi ngua ndàꞋà te ghǎ dzəâ ane àli yu ànəa mâ shu la àa te la.”

21Bɔɔ̀ ndàꞋà ale, bòt bu àbȩ la bɔ chɨ̀Ꞌɨ̂ tè ntsìꞋa mbììta a kètsìà wɔb nê, èghǎ ghɨ̂ ka tà tsèkê taꞋà àfɨꞋa seè yaa a èbem lob nɨ̧ Mbɔ̧ɔ̧mà à? 22Mbɨ̀Ꞌɨ̀ tà dzəè àbȩ la, tà kà tsi nko ndàꞋ abua yɔb, ale bɔ ko nê tà ye àtsə a èbem lob nɨ̧ Mbɔ̧ɔ̧mà. Ètsəê tò e leme ale, tà tsiꞋi me fɨ̀Ꞌtè mènəè ane èbu bi.

23Tà tseke tê mpàâ àfàꞋ àzi a èbem lob nɨ̧ Mbɔ̧ɔ̧mà ane àfɨ̀Ꞌ yu bɔ loo la, nkua akwèn ngà àpfəè azi. 24Àfɨ̀Ꞌ a tseke te me wu, vi tò, Èlisabèt kɔt ntsèke a lob ane èŋu yetà̧â̧, kà gha àbȩ. 25Èlisabèt nê, “Àfɨ̀Ꞌ yaa, a me ghǎ te me lìa, Mbɔ̧ɔ̧mà tɨŋe am, ntsì ntsoꞋ yu banɔ̧̀ è le zi àtsə am la.”

Ntu̧ Ngableyà abua Màlià

26AfɨꞋa Èlisabèt kɔɔle tê ngu ane èŋu yentùa la, Mbɔ̧ɔ̧mà tu̧u̧ a Ngableyà wantu̧ vi àpfəè ako bɔ̀ɔ ntɔ nê Nazàlet a èbem àlaꞋ a Galìlî la. 27Tà li mbɔ̌ ntu̧ abua angɔ̧̀ kǒ èlen tò wu Màlià la. Tà li ngu èleè Jòsêb kǒ tà dzəè a àndǎ̧ Fɔ̧̀ Dàbid la. 28Wantu̧ Mbɔ̧ɔ̧mà wu kɨꞋɨ̀ shu abua tò nê, “Maà ntsàꞋtà awê. Tǎt wa Mbɔ̧ɔ̧mà wu nè nè, tà taꞋa lɔ̀ɔ̀lè àwê.”

29Wantu̧ wu làꞋ ale, a taꞋa tsè a Màlià. Lə mèngǎ̧ tò mu taꞋa kɨ̀Ꞌnè atò. 30Wantu̧ wu shu abua tò nê, “Màlià, à ka mbɔ̀ɔ̂, à wu àvi èsi ntsɔ̧̀ e mbì Mbɔ̧ɔ̧mà. 31Aa kɔɔle lɔ̀Ꞌɔ bi wambâ̧ e tsì èlen tò ane Yesò. 32Taa li wu wòt nɨ̧, bɔɔ me tɔ atò nê Waã Mbɔ̧ɔ̧mà Àtsèàngɔ̀ŋ. Mbɔ̧ɔ̧mà Lefɨ̀Ꞌ naa li ŋa atɨ̧ kèfɔ̧̀ tǎt nyaꞋ tò Dàbid abua tò. 33Taa li wu fɔ̧̀ àtsəa àndǎ̧ Jàkɔ̂b kà ye ndìa, kèfɔ̧̀ tò kà mee ngu li elìa.”

34Màlià shu abua wantu̧ Mbɔ̧ɔ̧mà wu nê, “E ngu angɔ̧̀ kà ko mbâ̧, èwuu ànəê yaa aa li wu naà?”

35Wantu̧ wu bɨ̀ɨ̀lè nê, “Fo Kèfə naa wu ne nè, aa kɔɔle waã ane mètàŋ Mbɔ̧ɔ̧mà, ebi. Bɔɔ li tɔ waã wu ane waã tà dzəè abua Mbɔ̧ɔ̧mà la, e mě tɔ atò ane Waã Mbɔ̧ɔ̧mà. 36Ye wòt ləlob yê Èlisabèt, bɔ laꞋnê tà wu yen la, ka àfɨ̀Ꞌ yaa tà tsiꞋi ndène àvi la, tà wu nè èbêm ane èŋu yentùa. 37Ale, àghɨa ko a ntsě betsiꞋa Mbɔ̧ɔ̧mà kà ko ngɨ̀ la.”

38Tà làꞋ ale Màlià bɨ̀ɨ̀lè nê, “E ngu waã a èten Tǎt wa Mbɔ̧ɔ̧mà, tsiꞋ tà ghɨ ane yaã mbɨ̀Ꞌɨ̀ à shu la.” Tà paa èngǎ̧ vi tè tà lɔꞋɔ, wantu̧ Mbɔ̧ɔ̧mà wu sà atò ngà.

Màlià ghà emû a Èlisabèt

39AfɨꞋa mbɔŋ Màlià tàŋke ntèmnê nkɔꞋ ngà àpfəè àko àlaꞋ a Jùdià. 40Tà ghà ale nyi a lob Zàkàleyà ntsàꞋtè a Èlisabèt. 41Èlisabèt zə ndɨ Màlià tsàꞋte àvi la ale, waã wu a èbem tò la ghȩ̀ȩ̀nè. Fo Kèfə kɨꞋɨ adù̧ tò. 42Ale, tà ŋȩ shu abua Màlià nê, “Mbɔ̧ɔ̧mà lɔ̀ɔ̀lè àwê tè ntsè bèzi ko, èlɔɔle tò e mè ngu ane waã wu àa li bi la. 43Ghǎ ghɨ̂ ka èwuu ànəê yaa a te ane yaã, te nyɨ̌ Lefɨ̀Ꞌ am kɨꞋɨ̀ mù am à? 44À bê ntsàꞋtè am ale waã wu a èbem èlaã la ŋùꞋ ane mèngùꞋte. 45Ntsɔ̧̀ wu àwɔ̀ ndɨ̀ wu à bɨ̧ɨ̧nè nê ntu̧ Tǎt wa Mbɔ̧ɔ̧mà abua yê naa li wu nkûŋ la.”

Màlià wùꞋtè a Mbɔ̧ɔ̧mà

46Màlià li nê:

“Maà nkɔ̧̀ɔ̧ ngùꞋtà Tǎt wa Mbɔ̧ɔ̧mà,

47MèngùꞋte è lu̧u̧ a èbem èntɨ̧ɨ̧ am

ane Mbɔ̧ɔ̧mà wu tà wu Mpemnà am la.

48Tà ŋa kènuke abua am, mmɔ̌ wɔ̀fàꞋ tò wu

màa ka ŋèꞋe tèkwȩ taã la.

E bùꞋu àfɨ̀Ꞌ yaa me ghà ne mbì,

wòt ègème naa me tɔ am ane àvi èsi ntsɔ̧̀,

49nkàà èghɨ nɨ̧ bu Mbɔ̧ɔ̧mà mètàŋ

è ghɨ abua am la.

Maà nkùkta èlen tò.

50Tà nyɨꞋtè tèsȩ ti

abua bòt bu bɔ̀ɔ nkùkta atò la,

e bùꞋu ane bɔ̧ e ghǎ wu ane bɔ̧ bɔb.

51Tà nyààbe àbu mètàŋ àzi

èsàŋè bòt bu bɔ̀ɔ ŋèꞋa tèkwȩ tɔb la,

nè mènəè bɔ taŋke a mèntɨ̧ɨ̧ mɔb la.

52Tà shuktè bèfɔ̧̀ kekweelè

a ègwet ètɨ̧ kèfɔ̧̀ bɔb

ndɔ̀ktè bòt kà wua ŋèꞋa

tèkwȩ tɔb ntsà a ègwet.

53Tà jɨɨ bòt ndzìtsə tèa nkua wɔb la

ane èghɨ ntsɔ̧̀,

èfèle bòt èkab bɔ ghà èbu fə.

54Tà ghɨ̀ àghɨa tà lè kaꞋa abua bètǎt nyaꞋ ba la,

nkɨ̀Ꞌɨ̂ etɨŋe bòt Izəèlȩê bu bɔ̀ wu bɔfàꞋ tò la.

55Tà ku̧u̧tè enyɨꞋte tèsȩ ti ane Abàlàghâm

e ghǎ dzəâ ane àndǎ̧ tò àgème kà ye ndìa.”

56Mbɨ̀Ꞌɨ̀ Màlià è kɔ̧ɔ̧ mèkù̧ maa la, tà tsèkê bɔ̂ Èlisabèt mbɔ̀ŋè èŋu yetat ndɔ̀Ꞌ nkua akwèn ngà àpfəè azi.

Bɔ bi a Jɔ̌n ndzìà èdzî

57AfɨꞋa Èlisabèt lè wu bi la a le kuêꞋ, tà bi wambâ̧. 58Bòt àpfəè ayɔb nè bɔnyɨ tò bɔ zə ndɨ tǎt wɔb Mbɔ̧ɔ̧mà è ku tèsȩte tò la, ntàꞋa wùꞋte àwɔb nè tò.

59Èli befà̧aã e li ntsè bɔ kɨꞋɨ naŋe waã wu, mbɔ̂ me kɨꞋɨ ale ngua nga etsì èlen tò ane Zàkàleyà, nko laꞋ nê bɔ tsì èlen tǎt tò. 60Ka nyɨ̌ tò nê, “ÀwɔꞋ, èlen tò naa wu Jɔ̌n.”

61Tà làꞋ ale, bɔ shu abua tò nê, “Bɔnyɨ bê ko e bakà bɔ èlen mbɔŋ.”

62Bɔ ghɨ̀ ale, fɨ̀Ꞌtè ane èbu bɔb mbììte a tǎt tò nê tàa nkɔ̀ŋkà nê èlen waã wu wu wàà leꞋ? 63AfɨꞋa mbɔŋ Zàkàleyà lo̧o̧ a tafèn shɨŋ adù̧ nê, “Èlen tò wu Jɔ̌n.” Ànəa mbɔŋ a taꞋa kɨ̀Ꞌnè àwɔb. 64AfɨꞋa ngaa ètsəê tò e ghaꞋà, èlɨ̧ tò e yàà, ta bùꞋ mbê me kɔ̧ɔ̧ ngùꞋtà Mbɔ̧ɔ̧mà. 65Ale, bòt àpfəè ayɔb e bɔɔ̀, àndǎ ànəê yaa a ghɨ̀ la, a ghà èdziꞋ ègème àlaꞋ a tèbȩ ko bɔ̀ɔ ntɔ̀ nê wu Jùdià la. 66Bòt bàgème bɔ zə mènəè maa la, bɔ nɔ̀ŋè a mèntɨ̧ɨ̧ mɔb, ndɔ̀Ꞌ mbììte nê “Waã waa naa li wu wà à?” È li ngu nkûŋ nê mètàŋ Mbɔ̧ɔ̧mà li ngu ane tò.

Zàkàleyà làꞋ àtɔŋ Mbɔ̧ɔ̧mà

67AfɨꞋa bɔ̀ le wua ntsìà èlen Jɔ̌n la, Fo Kèfə è kɨ̀Ꞌɨ̂ adù̧ Zàkàleyà, tǎt tò tà bùꞋ me làꞋa àtɔŋ Mbɔ̧ɔ̧mà nê:

68“Bà wùꞋte èlen Lefɨ̀Ꞌ wu,

tà wu Mbɔ̧ɔ̧mà bòt Izəèlȩê la.

Tà kɨꞋɨ̀ ntɨ̀ŋe bòt bi ndɔ̀Ꞌ nchùꞋu ètsə bɔb,

ntsì àwɔb a èbem ngoꞋ.

69Tà tsàà àwa wòt nɨ̧

tàa ŋa awa ngule mèmpème la.

Ŋut dzəè a àndǎ̧ wɔ̀fàꞋ tò Fɔ̧̀ Dàbid,

70mbɨ̀Ꞌɨ̀ tà li ngɨ̀ bèndàꞋàtɔŋ tò

e làꞋ ane mèngùꞋ nyaŋ è tsè la.

71Nê, yea li tsì àwa a tèkitebu bòt bu

bɔ̀ɔ nkɨà àtsəa ya enɨ la;

e mee li tsì àwa abua bòt bu

bɔ̀ɔ mpààbà àwa la.

72Tà lè laꞋnê, yea li ku tèsȩte bètǎt nyaꞋ ba

elɔ̀Ꞌɔ ku̧u̧te mènkàꞋa kèkweelè mu

zìambɔŋ ye kàꞋà la.

73Tà lè zì nkà̧ a mbì tǎt nyaꞋ wa Abàlàghâm nê,

74mbɨ̀Ꞌɨ̀ ye tsì àwa a tèkitebu bɔmbù̧ ba la,

baa me fàꞋa abua zi kà bɔ̀a,

75mbɨ̀Ꞌɨ̀ bòt bɔ li tɨ̧ɨ̧ ndɨŋndɨ̀ŋ

a mbì li mè mbɔ̀ mèntɨ̧ɨ̧ kèfə

ane èli ba a sitsǎꞋ ègème la.

76È wu awê waã wàa,

bɔɔ li tɔ awê nê

ndàꞋàtɔŋ Mbɔ̧ɔ̧mà Àtsèàngɔ̀ŋ.

Nkàà nê aa tsě a mbì Tǎt wa Mbɔ̧ɔ̧mà

etaŋke alu̧ tò.

77Aa gha shu abua bòt to nê,

Mbɔ̧ɔ̧mà naa waꞋa a kàbɔ̀ŋ wɔb èghɨ bɔɔ peme,

78ndɨ̀ wu tà wu mbɔɔlà wòt,

mè ngu mànkua tèsȩ la.

Taa li ghɨ̌ mèmpème mi naa saꞋa ane ya mbɨ̀Ꞌɨ̀

nyèm ntɔtetsɔ̌Ꞌ è saꞋa a ègwet la,

79eŋa èkaꞋà ane bòt bu a èbem

ndzěm yu è wuê mbɨ̀Ꞌɨ̀ mbàꞋ èvə la,

e ghɨ̌ bàa ghȩ̀ȩ̀ne ane alu̧ àlàŋkà èntɨ̧ɨ̧.”

80Waã wu li ntsə, èyì tò e mè me kwèꞋne. Tà lɔ̀Ꞌ ngà ntsèke àbâ àlaꞋ àyuube tè ngà ndzə àfɨꞋa Mbɔ̧ɔ̧mà nàa ghɨ̌ bòt Izəèlȩê aa ko atò la.

Zvasarudzwa nguva ino

Lûk 1: mnf

Sarudza vhesi

Pakurirana nevamwe

Sarudza zvinyorwa izvi

Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda

Dzidza Zvakawanda Pamusoro Pe Mundani

Lûk 1

Mavhesi emuBhaibheri Ane Mukurumbira kubva kuna
Lûk 1

Bhaibheri:

Mundani

Vhezheni: Mundani - mnf

Lûk 1

Lûk 1

Mavhesi emuBhaibheri Ane Mukurumbira kubva kuna Lûk 1

Bhaibheri:

Mundani

Vhezheni: Mundani - mnf

Lûk 1

Mavhesi emuBhaibheri Ane Mukurumbira kubva kuna
Lûk 1