Sawmus 9
9
Kibeyne, Uhokri pareke abet nuhawkan
1Kiyavwiye Uhokri, nah kabayhap akak madikte nubetki. Nah kinetihwanek amin madikte pikehni kabayka.
2Ku aysaw nah kiyepi nuyakni bateke. Nah avanenekwa batek pikak. Nah paknek adahan kabeyhene piw avanenekwa. Pisnewa nuwohkiga. Pis avitminte madikte nudahan.
3Ku aysaw pis parak abet nuhawkan, nuvetunyavu bisik, igkis tuguh, igkis miyarap.
4Pisnewa ivegbeta hiyeg gihiyekemnikis. Pis waditye. Pis ka taraksati. Pis kumaduka hiyeg akak madikte waditka. Kibeyne ku samah pis pareke abet nuhawkan.
5Pis himehe hiyegviyenevwi ku pariye kane ihpa piwn. Pis pisenwe akak hiyeg mbayavye gihawkankis; pis miyehkise giwkis gitkis hiyeg.
6Pis keh uvetunyavu yuma giwskekikis akiw; pis pisenwe gikakkis adahan avanenekwa, hawata igkis ka kiyekan akiw.
7Heneme pis, Kiyavwiye, pis kumadukene adahan avanenekwa. Pis bat amadga pevwi kiyatyo adahan hiyekne gikakkis madikte hiyeg.
8Pis kumaduka hiyeg akak waditka. Pis hiyapkis gitkis pakeku akak ku samah gikehnikis.
9Kiyavwiye, pis hawata humaw ayemweket gidahankis hiyeg ku pariye haraksakavu. Pis mpithigkis avim ini ku aysaw igkis abet mbeyne.
10Ku pariye hiyeg pihiyekten ignes kamaxwa pivitit. Mmanawa pis ka miniwnema giwkis hiyeg ku pariye amnihswenevwi pit.
11 Nukebyuvwi, paknay avat adahan kabeyhene Kiyavwiye Uhokri Dehetniye ku pariye kumadukene aynte Jerusalém! Akkanay gannu gitkis hiyegviyenevwi muwapuw amadga hawkri!
12Mmanawa ig Kiyavwiye Uhokri avuriw ku pariye hiyepnevwi mbeyne. Ig ka miyeh gamnihswankis. Ig hiyapkis mbeyne gitkis neras ku pariye giharakseptenkis.
13Kiyavwiye, amnihnanuba! Iveg ku samah igkis namiyhetnivwi hiyapkis mbeyne nutuh! Nah abet miyaka, Kiyavwiye. Uya wiwhun ayteke
14kahadbe nah ik adahan tabira givetunkis jerusalémyenevwi adahan nah ekkene gitkis mmahki nah kabayhap hawata adahan nah awna gitkis ku nah bateke numinuh awaku ku samah pis wiwhpen ariw miyaka.
15Hiyeg ku pariye kane wewkere akak Kiyavwiye Uhokri gihiyekemni, igkis pisenwepkanek gikakkis. In ke wotbe igkis tuguhbetwikisbenek arikut inwata miyokwiye ku pariye gitiknikis. Igkis ahegbete pahat tey, heneme igkisnewa tuguhbetwikis arikut.
16Avim ini ig Kiyavwiye Uhokri Dehetniye metakwa ig hiyakan ku ig waditye. Igkisme mbayavye igkis tuguhbetwikisnek arikut gidahankiswa giteynikis.
17Hiyeg mbayavye payak gikakkis madikte hiyeg ku pariye kane aminema giw Kiyavwiye Uhokri, aysawnemenek igkis madikte tiviknek arimkat miyaka.
18Ignesme hiyeg madiptavye avim ini igkis avuriwkanek kabayntiwa. Yuma pahavwinema gaytakkis miyehka akiw. Neras ku pariye hiyepnevwi mbeyne kuri avim inin, aysawnemenek madikte ku pariye igkis aharitne in ka mpithakanek giwkis akiw.
19Kiyavwiye, kannikawnaba. Ka ba isaksa hiyeg amadgaya inin ikaw awaygtema mpiyap. Iwapnigkis pivetunat adahan pis hiyak gikakkis.
20Kiyavwiye, keh igkis avis pibohri kahadbe igkis hiyak ku igkis he hiyeginenwa ka dep miya, igkis ka ariknawnama.
Zvasarudzwa nguva ino
Sawmus 9: pluPB
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.