Matta 6
6
Miyaku a da wuyile
1“Ti̱ma daan ki̱ni nangi̱n ti̱yili chi̱ntu, di̱ne a ne kuki̱ku durang we nangang ki̱yilangu. Ka a kabi yiko, a ne ta ya ki̱ti̱me we Te chi̱n wu a diye.
2“Di̱ne yiko, ka mun ma nike, ri̱kadu yimwiyu we chi mwang maatu, tiyangu ni̱bu di̱bebelin a kambi muraku ni̱bu Yafudamitu n ti neti̱ loyu ko ke ni̱bu a wer chiyangu. Bi̱yili̱mu nang bi̱bu, n chi a tu a yiu sure chi kwang. 3Aya ka mwang maka wuka niye, kedu wuka nii a yindu chi mun maditu we. 4Chi ti̱yilitu mun maditu, ma n lailaye. Te wu a diye wu ki̱ku ka ti̱ti̱le chi mun madite, ka ni̱n ki̱ti̱me mo.
Miyaku a twa̱ba̱ku
(Luk 11:2-4)
5“We ya̱m twa̱ba̱ku buniyangi̱mu, ti̱kaduwe tiyang ni̱bu di̱bebelin bi̱bu ki̱twa̱ba bunitu a fi tiye we kambi muraku ni̱bu Yafudamitu n ti neti̱ loyu ko ke ni̱bu a ku chi. Bi̱yili̱m mi̱n fwa chimi̱nu, a tu a yiu ki̱ti̱me chi. 6Ka ya mun twa̱ba̱ bunite, yinge dur munu a kan, twa̱ba̱ bunitu we di̱Tewuduwe, n ki̱n wu niyang kube, wu ki̱ku ti̱lairite, ka ni̱n ki̱ti̱me mo. 7Ka yati̱ twa̱ba̱ bunite, ti̱bwidu ya̱muwe tiyangu bi̱bu a yimbu Kwamamu ki̱madangu, n chi ko kate ka nwe chidu di̱ne nabwe ya̱me. 8Ti̱maduwe nang chi, di̱ne Te chi̱n a yim chi ti̱baditu kasi no nang ki̱dangu ta tibu fwa ya̱ma̱ngu.
9“Ti̱twa̱ba̱ buniti ying,
Te ni̱n wu a diye,
di̱n muni wauwadu.
10Yaa mo a be,
yo ni̱n ma we ti̱ti̱nitu, tiyangu wenga bwadiyangu.
11Ni ni̱n chabtu ti̱ditu.
12Du ni̱mi̱n ki̱leti niyu,
tiyangu ni̱n du bi̱bu
ki̱ma ni̱mi̱n ki̱letimu.
13Yo ni̱n ledu sweki̱ku we,
aya yu ni̱n we bwila.
14“Ka ti̱du bi̱bu a ma chimi̱n ki̱letimu mi̱n ki̱leti chiye, n Te chi̱n wu a diye ka du chimi̱n ti̱nu. 15Ka ta du ni̱bu mi̱nbu ki̱leti chiye. N Te chi̱n wu a diye a ne du chimi̱n ti̱nu.”
Miyaku a dimwen
16“Ka yati̱ da̱u dimwene, ti̱kaiyu kabi̱ni we tiyangu ni̱bu di̱bebelinu ki̱madangu yo ki̱ da̱u dimwene. N chi ki̱kai kabi̱ni chiyu di̱ne ke chi yung ni̱bu ko chi ma dimwen. Bi̱yili̱m mi̱n fwa chimi̱nu, n chi a yiu sure chi di̱mbi̱ri̱m. 17Aya ka mun ma dimwen, fu kabumo, wa ti̱ki̱nung we dur munu Yinangu mun madi kwadangu. 18Di̱ne ke ni̱bu a yinduwe ko mun ma dimwen. Te wu mwang kube, wu a yim chiti kwange ka ni̱n ki̱ti̱me mo.”
Ti̱yo ni̱ru a lo wu a bwadiye
(Luk 12:33-34)
19Ti̱mur yichiyu mi̱nu kuliti we ti̱ti̱nitu, fi ki̱bwa̱ta n ti fi sa̱ngre a ne ka kaiye n ti fi dabi̱kum a ne ka wure. 20Aya ti̱mur yichiyu mi̱n kulitu a bwadi, fi ki̱bwa̱ta n ti sa̱ngre a ne ka kaiyinde n ti fi dabi̱kum a ne ka wure. 21Di̱ne fi kuli mwitu we mi̱ne, nang fi ni̱r munu wetuwe.
Yiiku bwiyang
(Luk 11:34-36)
22“Nu nang yiiku bwiyangu, ka nu mo ki̱ni li̱mange, bwiyi kwang ka ya yiiku. 23Aya ka numo a ne li̱mang wenge, bwiyi kwang ka kwala yiiki̱ku. Ka yiiku bwiyangi ki̱liye, ki̱liye ka su ki̱nati̱ng.”
Mwang bunti̱ Kwama ka kuliya
(Luk 16:13; 12:22-31)
24A ne nii ka sii ni̱bu lomi burabe we. A mwintuwe n ki̱n ka ko wuka, ka ke wuka, ka ka nii dukan ki̱nu a wu wiine, ka du wuka. A ne da we mwang bunti̱ Kwama n ti ka̱mbi̱r ki̱da kiin.
Ti̱yo ni̱ru a di̱Kwama
(Luk 16:13; 12:22-31)
25Di̱ne yiko mi̱n fwa chimi̱nu, ti̱kuradu chiwe chabti̱tu ta chaditu n ti chi ta node, ka kuli̱n di̱du ta dodu a bwiyine. Ti̱kuritu a labu chabti̱ta? Yinu bwiyu a labu kuli̱n di̱dori̱na? 26Ti̱da̱ng ki̱ni̱biyu, n chi a fibu chi, a kabbu chi, a murbi̱ chi we bi̱ni chiyu. N Te chi̱n wu a diye ki̱chadu ki̱ni chi. N ti̱n ta labu ki̱ni̱biya? 27N wure we tibe chi̱n di̱ne ti̱kuran kitu ka suddu ka awa wiine?
28Yinu a mayire ta kai ni̱ru we chi ta dodite? Ti̱da̱ng fili̱ntu we di̱kiru tiyangu ki̱dwiyedu, n chi a mabu nangang ka̱mbi̱rang a kubuti̱bu kuli̱n. 29Aya mi̱n fwa chimi̱nu, kasi no m Mai Solomon n ti dwiyen kitu, a doonbu kuli̱n leran di̱du we tiyang fili̱ntu. 30Ka n Kwama ka ywa̱ta swa̱ki̱ku a di̱kirinu mi̱ndiye, ti̱tu diwu ki̱ni ti̱kuri fi̱nenang ki̱le ki̱rangite, a ne ma chimi̱n ti̱tu a la Yeta, n ti̱n bi̱bu keku bi̱yili̱mang changu a ki̱tani̱mu.
31Di̱ne yiko, ti̱kuradu chiwe tiko, “Nang chau wureni, ka nang no wureniye, ka niing do wureniye?” 32We kuu ni̱bu bi̱bu a yimbu Kwamamu, ti̱tu nang chi a mabu ti̱kali ki̱ne. Aya Te chi̱n wu a diye a yim ti̱badu. 33Aya a la chi ti̱bau Yaa Kwama n ti yile ko, ti̱tu chi kwang ka nii chi̱nu. 34Di̱ne yiko, ti̱kuradu chiwe ya̱m fi̱nenangi̱mu, di̱ne fi̱nenangu n wu Kwama. Kanang wuwule diye ki̱ni wuko riye.
Zvasarudzwa nguva ino
Matta 6: Tula
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2015, The Nigeria Bible Translation Trust and Wycliffe Bible Translators, Inc. All rights reserved.