ማዢንቲ ማፃኣፔ 9
9
ፆኦሲ ኖሄና ዎላ ጫኣቄ ጫኣቁሞ
1ፆኦሲ ኖሄና ናኣቶና ዓንጃዖ፦ «ሚርጉዋቴ፤ ዳልጉዋቴ፤ ሳዖዋ ኩሙዋቴ፤ #ማዢ. ማፃ 1፡28። 2ቆልሞንታ ካፖንታ ካዮ ቦዖ ዻኮንታ ዼኤፖንታ፤ ሃሣ ዋኣፃ ናንጋ ሞላሢ ቢያ ዒንሢ ዒጊጪሢና ናንጎንጎ፤ ቢያሢያ ዒንሢ ቢታንቶ ዴማ ዎርቆንጎ። 3ሃያኮ ቤርታ ዱማ ዱማ ቱኮ ሚፆ ሙኡዚ ማሂ ታ ዒንሢም ዒንጌሢጉዲ ሃሣ ሃያ ሼምፓ ዓኣ ማዢንቶ ቢያ ሙኡዚ ዒንሢም ማዓንዳጉዲ ታ ዒንጌኔ። 4ጋዓንቴ ሱጉፆ ላኣሉዋዖ ዓሽኮ ሙዒፖቴ፤ ዓይጎሮ ጌዔቶ ሼምፓሢ ሱጉፆይዳ ዓኣያ ማዔሢሮኬ#9፡4 ሼምፓሢ ሱጉፆይዳ ዓኣሢሮኬ ጌይንቴሢ፦ ዔብሬ ዓሳ ሼምፔ ሱጉሢዳ ዓኣኔ ጌዒ ጉሙርቃሢሮኬ። ጌዔኔ። #ሌዊ. ዓኬ 7፡26-27፤ 17፡1-16፤ 19፡26፤ ላሚ. ዎማ 12፡16፤ 23፤ 15፡23። 5ዓሲ ዎዻሢ ሃይቃንዳጉዲ ዎጊንታንዳኔ፤ ካይዚ ቦዖ ማዔቴያ ቆልሞታዖ ዓሲ ዎዼቶ ዬያኣ ታ ሃይቃንዳጉዲ ማሃንዳኔ።
6«ዓሲ ማዢንቴሢ ፆኦሲ ማሎናታሢሮ ዓሲ ዎዻ ዓሲ ቢያ ዓሲ ኩሽካ ሃይቃንዳኔ። #ማዢ. ማፃ 1፡26፤ ኬሲ. ማፃ 20፡13። 7ዒንሢ ሚርጉዋቴ፤ ዳልጉዋቴ፤ ዒንሢኮ ዜርፃ ሳዖ ኩሞንጎ» ጌዔኔ። #ማዢ. ማፃ 1፡28።
8ዬካፓ ፆኦሲ ኖሄና ዒዛኮ ናኣቶናም ሂዚ ጌዔኔ፦ 9-10«ዓካሪ ዒንሢና ዒንሢኮ ዜርፆና ሼምፓ ዓኣ ማዢንታ ቢያ ጌይፃ ካፓ፥ ቆልማ፥ ካዮ ቦዓ፤ ዬያጉዲ ኔኤና ዎላ ዋኣፆ ካኣሚላፓ ኬስኬ ማዢንቶንታ ሃሣ ሳዖይዳ ሃጊ ሾይንታንዳ ዜርፆማኣ ቢያም ታ ጫኣቃንዳኔ፤ 11ዬያ ታ ጫኣቄ ጫኣቁሞ ዛሎና ሃካፓ ሴካ ሼምፓ ዓኣ ማዢንታ ቢያ ባይሲንታ ዋኣሢና ፔቴታዖ ኩዳዓኬ፤ ሳዓ ሃሣ ላሚሣ ባይሲንታ ዋኣሢና ባይቃዓኬ። 12ዒንሢንታ ሼምፓ ዓኣ ማዢንቶ ቢያሢንታ ዎላ ታኣኒ ጫኣቃ፥ ሃያ ናንጊና ናንጋ ጫኣቁሞኮ ማላታ ማዓንዳጉዲ፥ 13ታኣኮ ዡኡላሢ ጫሪንጮ ሻኣሮይዳ ታኣኒ ዔቂሳንዳኔ፤ ዬይ ዡኡላሢ ታኣኒ ‹ሳዖ ባይዛዓ› ጌዒ ጫኣቄ ጫኣቁሞኮ ማላታ ማዒ ናንጋንዳኔ። 14ሻኣሮና ጫሪንጮ ታ ካንቃኣና፥ ሃሣ ዡኡላሢ ሻኣሮይዳ ዔቂ ጴዻ ዎዶና ቢያ፥ 15ዓካሪ ሃይካፓ ሴካ ‹ባይሲንታ ዋኣሢ፥ ሼምፓ ዓኣ ማዢንቶ ቢያ ባይዛዓኬ› ታኣኒ ጌዒ ዒንሢና ሜሌ ሼምፓ ዓኣ ማዢንቶና ዎላ ጌሌ ጫኣቁሞ ታ ጶቂሣንዳኔ። 16ዡኡላሢ ሻኣሮይዳ ዔቂ ጴዻ ዎዶና ቢያ ታኣና ሳዖይዳ ሼምፓ ዓኣ ማዢንቶና ባኣካ ዓኣ ናንጊና ናንጋ ጫኣቁሞ ታ ጶቂሣንዳኔ። 17ዬይ ዡኡላሢ ሼምፓ ዓኣ ማዢንቶና ዎላ ታኣኒ ጫኣቄ ጫኣቁሞ ዔርዛ ማላታኬ።»
ኖሄና ዒዛኮ ናኣቶና
18ዋኣፆ ካኣሚሎይዳፓ ኬስኬ ኖሄኮ ናኣታ ሴኤሜ፥ ካኣሜ፥ ያኣፔቴ ጎዖዞንሢ ማዓዛ፥ ካኣሜ ጊንፃፓ ካኣናኔ ጎዖ ናይ ሾዔኔ፤ 19ሃኖ ሄላንዳኣና ሳዖ ቢያይዳ ዓኣ ዓሳ ቢያ ሾይንቴሢ ዬንሢ ሃይሦ ኖሄኮ ናኣቶንሢዳፓኬ። 20ኖሄ ጎሺ ጎሽካያ ማዓዖ ዎይኔ ጌይንታ ባልጊ ካፃ ሚሢ ቤርታዺ ቱኪሢ ዓርቄኔ፤
21ኖሄ ፔቴ ኬሊ ዒ ቱኬ ዎይኖ ዓኣፖ ጩኡጲ ኮሾና ዑሺ ዑሽኪ ማሢንታዖ ዓፒላ ዑፃ ባኣያ፥ ካሎ ፔ ማኣሮይዳ ላሄኔ። 22ካኣናኔኮ ዓዴ፥ ካኣሜ ዒዛኮ ዓዴ ያኣዼ ካሎ ላሄሢ ዛጌ ዎዶና ካሮ ኬስካዖ ላምዖ ፔኤኮ ጌርሲንሢም ኬኤዜኔ። 23ዬካፓ ጌርሲንሢ ሴኤሜንታ ያኣፔቴንታ ጋኣቤ ዓፒላ ፔኤኮ ጌኤታ ዓርቂ ዓዶኮ ካሉሞ ዛጋዓ ጌዒ ዓዴ ላሂ ዓኣ ኬኤፆ፥ ጊንሢና ሃንቲ ጌሊ ዓዶኮ ካሉሞ ዓኣቼኔ፤ 24ኖሄኮ ማሢፃ ዓኣዻዛ ዒዚ ዔቃዖ ናኣቶይዳፓ ዻኮ ጌኤዛሢ ማዼ ባኮ ዔሪጋፓ፥ 25ሂዚ ጌዔኔ፦
«ካኣናኔ ጋዳንቂንቴያ ማዖንጎ!
ጌርሲንሢም ዓይሌ ማዒ ማዻያ ማዖንጎ፤
26ሴኤሜኮ ናንጊና ናንጋ ጎዳ ማዔ ፆኦዛሢ ጋላቲንቴያ ማዖም፥
ካኣናኔያ ሴኤሜም ዓይሌ ማዒ ማዻያ ማዖንጎ፤
27ፆኦሲ ያኣፔቴኮ ዓጮ ዳልጊሾንጎ፥
ያኣፔቴ ዜርፃ ሴኤሜ ዜርፆና ዎላ ናንጎንጎ፤
ካኣናኔ ያኣፔቴኮ ዓይሌ ማዒ ማዻያ ማዖንጎ።»
28ባይሲንቶ ዋኣፆኮ ጊንፃፓ ኖሄ ሃይሦ ፄኤታና ዶንጊታሚ ሌዔና ናንጋዖ፥ 29ዒዛኮ ሌዓ ዎሊ ዑፆይዳ ታዞጳ ፄኤታና ዶንጊታሚ ማዓዛ ሃይቄኔ።
Zvasarudzwa nguva ino
ማዢንቲ ማፃኣፔ 9: ጌኤ.ማፃ
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Maale Full Bible © 2008 by The Word for the World International and The Bible Society of Ethiopia, 2008.