Aepa Gemae 7
7
Alopa aniʼmo heʼniya gemae
1 #
Mai 11:8; Aiy 26:20; 1 Pi 3:20 Inagi Ala kava neʼmoʼa Noafeʼmo ina ge huno ha paiʼniye. Nagaemo kageʼnovana muki ma mopafi vayapatiʼmo naulagale fatago vekamo maiʼnane. Maiʼnanaʼmofeʼmo kagaeʼe muki afamo anagakaʼeʼmo sipifiʼmo utapa haiyo. 2#Mon 11:2-47; Iyi 44:23Kagaemo nagae naulagaleʼmo ofalinimo namisayafeʼmo muki alu afu alu afu anagaʼafatiʼmo seveniʼa kanale ve afugi seveniʼa a afugi huka apavaleteka hosu afufatiʼeʼmo ve afuʼe a afuʼeʼmo apavalo. 3Ani kava huka muki alu nama alu namafatiʼeʼmo seveniʼa ve namagi seveniʼa a namagi huka apavalo. Olagaiʼa alu nama alu namamo halate ma mopafiʼmo aiʼa atagu faeʼa maisayafeʼmae. 4Hemeni afinatetiʼmo seveniʼa afinaʼmo utesigeʼna koʼmo aliʼna atesugeno fotiʼa felugaʼe haniʼilagaʼeʼmo ko aige aige huno maigiye. Ma mopafatiʼmo muki afaʼa neʼmaiya yaʼmo alo huʼna apateʼnova yaʼmo aliʼna hano huʼna apatalegauve, huno ha paiʼnigeno 5Noaʼmo Ala kava neʼmoʼa muki ha paiʼniya agufa kavaʼamo huʼniye. 6#Aep 5:32; 8:13Noaʼa sigisi hataletiʼa kafugamo maiʼniya afinaʼmo ani alopa aniʼmo heʼniye.
7Noaʼagi aʼagi ve mafaʼne anagaʼagi aʼne anagaʼapigi huʼa aniʼmo heʼniya kavapatiʼmo ofalisayafeʼmo sipifiʼmo uʼa haiʼnae. 8Gotiʼa Noaʼmo ha paiʼniya gemo akame huʼa alagepa afugi hosu afugi namagi yagagafagi huʼa sipifiʼmo uʼa haiʼnae. 9Lole lole huʼa veʼe aʼeʼmo aliʼa lokaete lokaete huʼa uʼa haite haite huʼnae. 10Seveniʼa afinaʼmo ago utegenoʼaeʼmo mopafiʼmo alopa aniʼmo aepa faino heʼniye. 11Noaʼa sigisi hataletiʼa kafugamo maiʼnigenoʼaeʼmo tu kaimo sevetini afinaʼmo mopamo aino akaka vaeʼnigeno alopa aniʼmo mopamo afeʼalumelagamo haneʼniya aniʼmo eno haineʼniye. Kokuʼnapatiʼmo alopa koʼmo aige aige huno maiʼniye. 12Alopa koʼmo fotiʼa felugaʼe fotiʼa haniʼilagaʼeʼmo aige aige huno maiʼniye.
13Ani afinakeʼmo koʼmo aepa faino aiʼnigeʼa Noaʼagi aʼagi loleʼe magoʼe ve mafaʼne anagaʼamo Semiʼagi Hamuʼagi Yafetiʼagi aʼne anagaʼapigi huʼa sipifiʼmo uʼa haiʼnae. 14Muki agufa afela afugi yuna afugi yagagafagi namagi huʼa Noa afamo anagaʼaʼeʼmo sipifiʼmo uʼa haiʼnae. 15-16Apakaemo Gotiʼa Noafeʼmo ha paiʼniya kavaʼmo huʼa Noategamo muki afaʼa neʼmaiya yaʼafatiʼmo lolelaʼmo veʼe aʼeʼmo apavaleli ete ete huʼa sipifiʼmo uʼa haiʼnageno Ala kava neʼmoʼa kitamo ki maleʼnigeʼa sipifiʼmo afaʼa maiʼnae.
17Fotiʼa afinaʼmo aniʼmo hege hege huno maiʼniyaʼmofeʼmo ani aniʼmoʼa maleme maleme uno haiteno sipimo avalelino avalelino uno haiʼnigeno sipimoʼmo mopamo ataleno magoʼe huno muga anagamo uno haiʼniye. 18Aniʼmoʼa magoʼe huno malelino uno haiʼnigenoʼaeʼmo sipimo ani aniʼmo agotofuleʼmo haneʼneno uneno huno maiʼniye. 19#Sam 46:2-3; 2 Pi 3:6Aniʼmoʼa magoʼe magoʼe huno malelino uno haiʼniyaʼmofeʼmo muki haopalega alopa avemo ago aeno ati kaeʼniye. 20Henagaʼamo ani aniʼmoʼa muki avemo ago alino haletenoʼaeʼmo magoʼe huno alino aga seno seveni mita agufa yaʼmo uno haiʼniye. 21Muki afaʼa neʼmaiya yaʼamo ago alagi faliʼnae. Namagi afela afugi yuna afugi yagagafagi muki aise aise kafagi vayanagi huʼa muki mopafi neʼmaiya yaʼamo ago faliʼnae. 22Mopafiʼmo maiʼneʼapaeʼmo muki apavamusaʼmo aige apavamusaʼmo alige nehaya yaʼamo ago faliʼa hano huʼnae. 23#1 Pi 3:20; 2 Pi 2:5Gotiʼa afaʼa neʼmaiya yaʼamo muki vayanagi yuna afugi yagagafagi namagi huno alino hano huno apataleʼniye. Magoke vekamo Noaʼe afamo anagaʼaʼenagi sipifiʼmo maiʼnaya afugi yagagafagi huʼa afaʼa maiʼnae. 24Vani hataleti fifitiʼa afinaʼmo aniʼmo heteno muki mopamo ago aeno ati kaeʼniye.
Zvasarudzwa nguva ino
Aepa Gemae 7: kyg2013
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2013, Wycliffe Bible Translators, Inc. All rights reserved.