San Lucas 2
2
Jesús thaabatarr
(Mt. 1:18-25)
1Mag Juan thaaba nʉm jaar ya ĩchab Mariajã pomcha waaurba sĩejim aajem, Jesús gaai. Mag nʉm ee chi rey César Augustoou ich thethem khʉʉnag jaaujim aajem, jũrr makhʉʉnau ichdeu durr jʉ̃a sim ee õor nʉnʉidʉmpierr jaaubaa amach thʉ̃r phãkhapi mamkhĩir. 2Mag õor thʉ̃r phãkhatarr warrpem ajim aajem, Cirenio anʉm Siria durr gobernadorkha sim jaar. 3Mag iek aaidʉ nʉm jaar jaautarrjo, thumaam khʉʉn amach jooin phoborpierr wetjierram anaabá, amach thʉ̃r phãkhamkhĩir. 4Magua Josejã ĩchab ich jooin phobor ee majim aajem, ich thʉ̃r phãmkhĩir. Ich José Galilea durr joobaajeejim anʉm, phobor Nazaret anʉm ee. Mamʉ jooingarm rey David khakhitarr ag chaain ewagam khʉʉn den arr aawai chi David thaabatarr phobor Belén anʉmʉgta majim anaabá, Judea durr. 5Mag ich mam dʉi María arrjim aajem, ag nawe iek deewia jua pʉrju anarr aawai. Maagwai María ya auwimʉʉ sĩejim aajem.
6Mag wetwia, Belén bardʉtkhaimawia, khãai khapan khaba nʉm ee María chaai aujim aajem, warrpemdam. 7Mamʉ amach jẽraag di ajaphamjã baauba sĩi phak khãaijem degta narr aawai putdam ee pʉreunaa phak thakhaar sẽejemdam uthur kherʉm eeta werba kherjim aajem.
8Mag chaai thaababarm dakha phʉʉrsã sim ee õor naajim aajem, edaar amach oveja thʉa nʉm khʉʉn. 9Mag amach nemchaain thʉa nʉmta, degolp phʉr jẽer atham dʉi arar joi sim ee, Ẽwandam chog ich Jooirau pʉitarrta am khĩirphee barjopbaichejim anaabá. Mag oobaawai jãphierr phobaadejim aajem. 10Magbaa chi Ẽwandam chogau amag, —Oob jãphierrmiet. Mʉʉn sĩi pãrag iek ajapham jawaanta beejimgui ajim anʉm. Mʉg murua pãrag iek jaaubarmua pãar israelnaan thum onee ajurau, pãachdeu ũrmampierr. Murua pãrag iek jawaan beetarran mʉgaugui ajim anʉm: 11Ĩsta Belén phobor ee chaai thaababarm, warrgarwe õor thumaam khʉʉnau nʉajerr Chaai. Mʉg chaairauta mʉg atag õor peerdʉ aujugui ajim anʉm. Ichta Cristoou maach Por. 12Mʉch seukha chirʉm am ugua, nauwe ereubaadet ajim anʉm, Belén phoborog. Mam barbaimaawai chi chaaidam putdam ee pʉreunaa phak thakhaar sẽejem uthur khitʉm ee aukherʉm pãrau ooimaju a jaaujim anʉm.
13Chi Ẽwandam chogau mag jaaubarm ee, i khapeen ijom khʉʉn khapan edjã ee pʉʉrthʉbaichejim anaabá, seukhabarmjo abarm ee. Magbaawai makhʉʉnau Ẽwandamag jeeu nʉmua,
14“Ẽwandam, ʉu abarm ʉ̃gtharm magwe.
Ʉu pua pʉch Iewaa pʉibarmgui” anaajim anʉm.
“Mʉg pʉchdeu i pʉibarm gaaimua mʉg durr jooi gaaijã pʉchdeu jʉr aumam khʉʉnan pʉ dʉi khõinaa wenʉrraju” anaajim anaabá, Ẽwandamag jeeumamua.
15Mag thʉnʉʉ awia chi Ẽwandam chognaan deeu ʉ̃gthar ereubaadeewai chi nemchaain thʉa narr khʉʉnau jũrr wir aigpai amach khapeenag, —Keena, magan Belenag wettarrau ajim anʉm, Ẽwandam chogau jaauwai mag chaaidam eeu au khitʉm anʉm oon.
16Mag wettarrau awia, chadcha eerpamjo ereuwia ooimaawai, chadcha chi chaaidam ewaa au khitʉm phak thakhaar sẽejem ee aukherʉm ooimajierram anaabá. Maig i bigaau chi ãd José dʉi naajim aajem. 17Mag amach daúa oobaimaawai chi Ẽwandam chogau amachig jaautarr thum jũrr amag ĩgkhaimajierram anʉm. Mag jaauwia, oberwia, deeu amach nemchaain aar wetumuajã amachdeu õor oomampierr ich mag jajawag wetjim aajem. 18Mag chi oveja thʉamienau nem ĩgkhakhag wetum ũrwia thum chi ũrmarr khʉʉn jʉ̃gderraa nʉisijim anʉm. 19Mamʉ mag amau jaau nʉm ũrtarr thum Mariaau khaphʉ sĩerrjã bʉ̃ʉrjã bĩi aba, ich thãar eepai ich mag khaphʉ wai sĩsijim anaabá. 20Mag chi nemchaain thʉamienau amach daúacha oonaa amach jʉ̃gʉucha ũrtarrpa ig wetumua, onee Ẽwandam tho iekhakhag wetumua, “Ẽwandam, ĩsin chadau purua ʉu abarm. Pʉjo wajaugkham chan õor chukhum” a serereug wetwia deeu amach nemchaain aar phʉʉrsã ee naaimajim aajem.
Jesudam Aai i jeeujem deg arrtarr
21Chi chaai autarr ocho días aadem ee, jooingarwe amach i arr aawai nacha i meheudam phʉʉrbichpʉiwia warre i thʉ̃rdam Jesús a thʉ̃rjierram aajem, chi Ẽwandam chogau warrcha Mariaag jaaucheewai thʉ̃rju a jaautarrjo. 22Maimua ĩchab magtarr khur ed ãbjo aadem ee, Jerusalén phobor ee Aai i jeeujem deg chi Jesudam aibeejierram aajem phadeg oopien, Moiseeu Ẽwandam iek phãtarr gaai jaau simjo ag ipierr. Mag aibeewia Ẽwandamag i kõit ʉu ajim anaa warag irig jeeumamua, “Ẽwandam, cha kherʉm maar chaaidam; puata i khap chirʉm mʉg atagjã. I dʉi pʉchdeu ampierr abá” ajierram anʉm, “pʉchigpai khĩirju bãaumkhĩir.”
Mag amau jeeutarran amach chaai Ẽwandamag deeg ajim, warrgar Moiseeu jaautarrjo. 23Mag Moisés iek gaai Ẽwandamau mag sim: “Thum emkhoi chaai chi nacha oomamdam pãrau mʉrʉg deemaju.” 24Maimua ĩchab, “Jãbaukhitʉm wa dubur chaaindam khãijã dau numí deebat” a sim “ag chaai paar.” Maagjerr aawai chadcha duburdam khechwia chi chaai Ẽwandamag dee nʉm anʉmua i kõit jeeujierram aajem.
25Maagwai Jerusalén phobor ee woun ãb Simeón a thʉ̃r sim sĩejim aajem, Ẽwandam dau na ajapha khitanaa i ipierraa khitaajerr. Ich mag jooirau ĩchab nʉajeejim aajem, warrgarwe Ẽwandamau jooinag jaauwai irua ich Chaai pʉibarmuata israelnaan peerdʉ auju a jaaujerr Chaai. Mag jooi gaai Ẽwandamau ich Akhaar phẽs wai sĩejim anaabá. 26Magua ich mag Ẽwandam Akharau ichig jaautarr aawai jooi Simeonau khaphʉ sĩejim aajem, ich daúacha ooju maach Por Ẽwandamau mʉg jẽb gaai Cristota Reikhamkhĩir pʉiju a jaaujerr.
27Magtarr aawai mag chi Jesudam Aai i jeeujem deg wai nʉm edcha ich mag jooi Simeón anʉmjã ĩchab ich Ẽwandam Akharau agʉg i arrjim aajem. Mag José María dʉimua jooingarwe Moiseeu iek phã pʉatarr gaai jaaujemjo chaai dʉi aag Aai i jeeujem deg bardʉtkhabaimaawai, 28ich mag jooi Simeonau chi chaaidam jiir auwia Ẽwandam tho iekhamamua,
29“Ẽwandam, mʉʉn pʉ chogau” ajim anʉm, “maagwai pʉ mʉ Porou;
30ĩsin chad ya pʉch aar mʉ auju aai chirʉmgui” ajim anʉm, “pʉ aar khõinaa chiraimaag.
Pʉchdeu nawe mʉrʉg oopiju a jaaujerr ya chadcha mʉch daúacha oobarmgui” ajim anʉm.
“Mʉg chaairauta jooipaawai õor peerdʉ auju.
31Chadcha mʉg chaai õor thumaam khʉʉn atheeta pua pʉibarm.
32Mag, i gaaimuata durr chaauram khʉʉnaujã Israelpien tho iyʉʉ ajurau.
Maimua i jooipa sĩsiewai ĩchab Israelpien khabam khʉʉn atheejã õtdaujo sĩsiju, amachdeu jãga amjã peerdʉju aai nʉ a khap amkhĩir” a iekhamajim anʉm jooyau.
33Mag chaaidam bʉ̃rʉʉ khitʉmta jooipa khersiewai, jãgata õor eejã sĩerraju khai a thumaa jaaubarm ũrbaawai, amach appai, “Maach chaai ¿jãgata khitajuuta, bʉ̃rʉʉ khitwe mag jaau nʉma?” ajierram anʉm chi dennaanau.
34-35Maimua Simeonau chi dennaanagta jũrr, —Pãach numwe Ẽwandamau pãar mʉg atagjã ʉu wai nʉisijugui ajim anʉm. Magnaa chi ãdagcha, María, Ẽwandamau mʉg ich Iewaa pʉibarm gaaimua, chadcha mʉg Israel durram khʉʉn pom ʉ̃gthar oberjugui ajim anʉm. Mamʉ ĩchab Israel durram khʉʉnaupai i oomapham iekhau amach jãrr i phʉʉr thuur auju. Pʉch chaai mag dau aphʉʉ wai nʉm oobaawai pʉchta thuthuíu thoopbapʉimjo aphʉʉ i athee pʉ bĩe ʉrrajugui ajim anʉm, gaai machgau. Mag i aphʉʉ wai nʉm aigta merag chukhu ajugui ajim anʉm, chijã khʉʉnauta i khõsi aju maimua chijã khʉʉnauta i oomapha khãijã aju a jaaumajim aajem ich chi ãdagcha.
36Maig ĩchab ũan Ana anʉmjã sĩejim aajem, agjo Ẽwandam i jaaumie. Mag Ana apkhʉʉ jooi Fanuel khararr ag kha ajim aajem. Maagwai ich jooi Fanuel anʉm warr jooingar Asernaan a thʉ̃ʉrjerr khʉʉn eem ajim aajem. Mag ũan Ana warrpem ich jaai autarr dʉi siete añospai nʉm ee khoopawia ich mag tag jaaijã auba khitʉmua ya ũanaa khitajim anaabá. 37Mag ũanaa ochenta y cuatro años khitʉmjã chawag maba, edaram magwe Aai i jeeujem degpaita sĩejeejim aajem, sʉrkha simua Ẽwandamag jewaag.
38Mag agtha María ich chaai dʉi Aai i jeeujem deg nʉm ee, mag ũan Ana anʉmjã beewi Ẽwandamau ich Chaai pʉitarr khaug athaawai irig, “Ʉu ajim Ẽwandam; purua maar peerdʉ awaag pʉiju aajerr chaai barbaicheewai mʉ onee ʉmgui” ajim anʉm.
Magnaa mag ich Ẽwandamaucha pʉiju a jaautarr ĩchab nʉajerr khʉʉnag chi chaaidam igwia, “Ich Ẽwandamau jaautarrjo chamʉguata mʉg atag maach peerdʉ auju ag Chaaidamauwai” aajeejim anaabá.
Deeu Nazareeg wettarr
39Maimua Ẽwandamau ich iek Moiseeg phãpitarr gaai jaau sim ipierraa thum wau dichdimaawai deeu amach Nazaret phoborog beejierram aajem, Galilea durr. 40Mag chaai ich dʉrrpapagmampierr warag khĩirjug khaphʉ pamajim anaabá. Mag nʉm dʉi ich Ẽwandamau ich khõchagpierrta bãaupijim aajem.
Jesús Aai i jeeujem deg chi machnaan dʉi iyʉʉ atarr
41Jesús dennaan añopierr Jerusalenag weetjeejim aajem, nemkhoo pomaam jaar paawai. 42Mag añopierr weetjerr aawai, Jesús doce años aadeewai, ĩchab Jerusalenag majim aajem, ich dennaan dʉi. 43Maimua chi nemkhoo dichdimaawai õor pom amach durrag erereukham ee, ĩchab José María dʉi amach phoborog wetjim aajem. Mamʉ Jesús am dʉi maba, thʉba sĩsijim anaabá. Mamʉ i thʉbabarmjã chi jooinau khaugbajierram aajem, deeum khʉʉn dʉi urumpii awia. 44-45Mag deeum khʉʉn dʉi õor khapanag ee urumpii awiata ich mag khãaim ãb wenʉrra kheumamua i jʉʉrjeejim anʉm. Mamʉ amach khodnaanag jeeuwia amach khap khʉʉnagjã jeeukha ohookham ooba abaawai ag noram deeu ewag beejierram anaabá, i jʉr wedurumua. 46Ich ag ed kheeuraa Jerusalén barchejierram aajem. Maimua ag noram ãspaau jʉrphobaadeeuta Aai i jeeujem deg Ẽwandam iek jawaag chi machnaan dʉita Ẽwandam iek iigwai iyʉʉ oo sim ooimajierram aajem. 47Maagwai aig thum chi ũr narr khʉʉn jʉ̃gderraa thʉnaajim aajem, chi machnaanau jeeumam chaairauta am denjo nem khaug am iek ʉkhapʉpʉigmam ũrwia. 48Mag chi machnaan jãrr sim oobaicheewai, chi jooinau amach wir aigpai, —¡Mʉgah! Pʉde oobá, mʉigta sĩebma ajierram anʉm.
Magbaawai chi ãdau magjim anʉm ich chaairag:
—¿Khantheeta mʉgcha maar phithurg waupibarma? Pʉ jʉr wenʉrrʉmua marau pʉ khĩirju nʉʉ ajimwai ajim anʉm, ich chaairag.
49Magbaawai chi chaairau amag magjim anʉm:
—¿Pãrau khaugbata nʉ, mʉ mʉig mʉch Aai iek õor dʉi ig iyʉʉ chiraju aai chirʉm?
50Mamʉ chi chaairau amachig mag iekhabarm chi jooinau pod khaugba, parhoobata ũrpʉijierram anʉm. 51Maimua ich dennaan dʉi oberwia ãba amach phobor Nazareeg wetjim aajem. Maimua ewag pawiajã ich dennaan ipierraa ich mag khitajim anaabá. Mamʉ ich chaairau mamagkhamjã Mariaau ich thãar eepain thum khapphʉ aajeejim anʉm. 52Mag nʉm ee warag Jesús dʉrrpamampierr ĩchab khĩirjug khaug pamajim anaabá. Maagwaita Ẽwandam dau na agchanaa ĩchab õor eejã khajappha nʉrraajeejim anʉm.
Zvasarudzwa nguva ino
San Lucas 2: noaA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2011, Wycliffe Bible Translators, Inc. All rights reserved.