San Lucas 11
11
Jesuu jãgata maadeu Ẽwandamag jeeuju aai nʉ a jaautarr
(Mt. 6:9-15; 7:7-11)
1Biek ãb Jesús ich Ayag jeeu sĩejim aajem. Mag jeeu aaipabaadeewai ich khapeen eem ãbmua irig, —Señor, jãg Juanau ich dʉi wenʉrrʉm khʉʉnag Ẽwandamag jeeu nʉm jaautarrjo, magan maragjã agjo jaaubá ajim anʉm, maraujã ĩchab irig jeeu khaphʉ aag.
2Magbaawai ichdeu amag magjim aajem:
—Pãach Ẽwandamag jeeuwai magbat:
“Ẽwandam, pʉʉta maar Aai ʉ̃gthar chiraajemʉu.
Pʉch appaita chadcha pekau chukhu chitʉm.
Pʉrʉgta marau maach dʉi pʉchdeu ampierr apinaa pʉchta thumaam khʉʉn Porkhapim khõsi nʉm.
[Ʉ̃gtharjã jãg pʉchdeu nem waupi jaau nʉm appai waaujemjo, mʉg jẽb gaaijã thum pʉchdeu jaau simjota apim khõsi nʉm.]
3Ed eepierr pua marag khojudam deebarju.
Ẽwandam, maar pekau thum chugpaabapʉi,
4maimua ar marau maach dʉi khaigba abarm khʉʉn dʉi tag magʉm iek igba ich mag khĩir okhoopäaijemjo maar denjã khĩir okhoobapʉi.
Oob pua ʉdʉraa chan maar pekau ee burrpi chiram.
[Mag khãyau warag maar thʉa wai chirsí, phithurg chukhu dosãtau maar ichig paa aum ugua]” a jeeubat a jaaujim anʉm amag.
5Mag jaau dichwia jãga Ẽwandamag jeeuju aai nʉm a khap amkhĩir ĩchab amag magjim anʉm: —Khanim nemjo pʉ pʉch khapkhʉʉn ajapham wai chirʉm. Maimua ya edacha pam ee i aar mawia pua irig, 6“Kake, mʉ aig mʉ khapkhʉʉndam barbaichemʉg nemdam deejujã chukhu chiraawai pʉ aig thachdam jeeu awaan beejim” aimaawai, 7irua ierrmua jũrr pʉrʉg, “Ideu mʉ khajapha khãaipibá. Ya mʉ put ee chirʉm; mʉ chaainjã ya khãidʉtkha thʉnaawai pod mʉ pʉ aar puertdi wewaanjã mabam; pʉ nem ig sim pod mua deepʉibam” akhiin, ¿jãgaju khai? 8Mua oowai chan warmua mag iekhawiajã chadcha irua ichdeu nem jeeu sim ig sim khai, ichiita irua warag pʉaba jejeeu aju. Mag jejeeukham, ¿jãga mag phiidʉwia irua au deeba abarju? Ichiita i phiidʉjugui ajim anʉm. Mamʉ mag ich khapkhʉʉnau nem ig sim awia khabam. I phiidʉjuun, sĩi ideu ich khãaipiba aawaita irua nem ig sim au deen phiidʉju. 9Ich jãgta aajemgui ajim anʉm agjo Ẽwandamag jeeuwaijã. Magua mua pãragjã pʉaba jeeubat a chirʉm. Magta pʉaba jeeu nʉmʉn, pãachdeu nem igbarm irua deeju. Pãrau i jʉrmʉn, i baauju. I sim aar dubaag pãach weeu aupi jeeumʉn, irua pãar weeu auju. 10Pãrau khaphʉ nʉmgui ajim anʉm, ar õor nem jeeu paraam khʉʉnagan nem deeb khaba deejem. Ar amachdeu nem inag ig nʉm pʉaba jʉr nʉm khʉʉnau baaujem. Maagwai ĩchab chi puertdi sirbaichem khʉjã weeu auwia dubpiejem.
11’¿Khaíuta mʉg sim aig ich chaairau thach jeeubaa mokdauta phedeeju khai? ¿Wa ãwarr khãijã chaairau jeeubaawai ãwarr deeju khãyau nemkhõrta thõo deeju khai? 12Wa magba, ¿nemhãudam khãijã jeeubaawai nemhãu awia dojũrta au deeju khai? Ni ãbmuajã magbamgui ajim anʉm. 13Pãar o ãkhãraa khitheem khʉʉnaujã pãach chaainau nem jeeuwai ¿nem ajaphamjã ĩgkhaba deeba aajẽ? Ich jãgta aajemgui ajim anʉm maach Aai ʉ̃gthar chiraajemuajã agjo. Chadcha thãrau ichig jeeu simʉgan irua ich Akhaarjã deeb khaba deejugui ajim anʉm.
Õor iek meperauta Jesuug juapá dee sĩejim aajem
(Mt. 12:22-30; Mr. 3:20-27)
14Biek ãb Jesuu woun mor ee ben khaigbam wai sim monaau sĩejim aajem. Mag beneu chi woun podjã iekhapiba sĩi ichʉp wai sĩejeejim anaabá. Mamʉ Jesuu chi ben obeerbapʉim bʉrre chi woun deeu iek eerdʉ sĩsiewai iyʉʉ aadejim anʉm. Mag oowi thumaam khʉʉn dauderraa naajim aajem. 15Mamʉ ãaur khʉʉn dʉi aig oo narr khʉʉnau, —Jãg Jesuun dosãtnaan por Beelzebú dʉi ben dotarr aawai ag juapaauta jãg õor mor eem mepeenjã dau daau jʉrkhʉʉi nʉrraajemgui anaajim aajem.
16Magbaa jũrr ãaur khʉʉnau amach odegpai, “Daau chadcha irua Ẽwandam juapá wai chirʉm khai, deeum nemjã ompaa athaju” awia irig, —Magan chadcha pʉchta Ẽwandamau pʉiju aajerr chaar khai, edjã ee maadeu nem ooba aajem ompaa athá pʉch iekhau ajierram anʉm irig.
17Mamʉ magbaa ichdeu amau khĩirju nʉm ajapha khaphʉ sĩerr aawai amag magjim anʉm:
—Pãrau oowai, gobiernoou ich igar nʉm khʉʉn jãrrcha thoonaa amach wir aigpai werbʉpikhiin, ¿mag gobierno warre khʉt mabaju khai? ajim anʉm. Jooi ãb simua khãijã ich chaain dʉipai meeukhawia amach wir aigpai werbʉkhiin, warag aaidʉjugui ajim anʉm. 18Ich magta aju agjo dosãtjã. Ich khapeen dʉipai wir aig werbʉ nʉmua amach opʉpʉi amʉn, pod ich mag jua theeg khaba sĩerraju, amachdeupai amach khechmaawai. Pãar iek mag mua dosãtnaan por Beelzebú juapaauta mepeenjã õor mor eem jʉrkhʉʉi chirʉm anʉm, 19chadcha Beelzebú ag juapaauta mua ben khaigbamjã jʉrkhʉʉi chitʉm khai, magan ar pãach eepaim khʉʉnaujã agjo i juapaauta mepeen jʉr werp nʉm. Mag nʉmta ¿jãgwia pãrau makhʉʉnag chan bʉ̃ʉrjã magʉm aba nʉ? ajim anʉm. ¿Chadcha ich Ẽwandamauta amag magamkhĩir ich juapá dee sim pãachdeu khaphʉ naawai khabá? Pãar iek mag chi dosãtaupaita wir aig ich khaibag waaujem anʉpí, magan jãg chi mʉ denjo dau daau mepeen jʉr werp nʉm khʉʉnagchata jeeu oobat daau amau chadcha dosãt juapaauta jãg jʉr werp nʉm abarju pãrag. Pãach chi mʉrʉg mag iekha nʉm khʉʉnta ag eyaajã khaba iekha naabahab. 20Muan chadcha Ẽwandam jua theegauta mepeenjã jãg jʉr werp chitʉm. Mag mepeenjã mua jʉr werp chirʉm gaaimua pãrau khaphʉ aju aai nʉm, ya ich Ẽwandam chi jua thierrta pãar ee sĩeichem. Mamʉ magʉmjã pãrau khaugba nʉmgui ajim anaabá.
21’Dosãtan woun ãb chi jua thierrta jierrnem dʉi ajap khĩir khaugwia ich di thʉa simjota sĩerrʉmgui ajim anʉm, nem jua theeg. Mag sĩewaita, i khãyau jua eegpaimua chan i sim aig i nem bʉ̃ʉrjã chig abam, ich jua ee thʉnaawai. 22Mamʉ ãb i khãyau thethecharamua beewi, i dʉi werbʉwia i podbapäaiwain chadau, irua ich jierrnem tho chirarr thum khechthʉg auwia i juagam nemjã jũrr ich denkha auju, ag dʉi ichdeu ampierr aag. Magua mʉʉta dosãt khãai jua theeg chiraawai muata õor eem mepeenjã jʉr werpju aai chirʉm. 23Magua mua mag chirʉmgui ajim anʉm: Ar chi mʉ igar khaba sim woun ichta dosãt igar sim; maimua Ẽwandam iek ʉkhapi awaag mʉ ipierr õor ãbamʉg jʉr pheba simuan waragta jʉr werp simjo simgui ajim anʉm.
Ben ãkhãar deeu õor mor ee sĩeicheewai jãga aajẽ
(Mt. 12:43-45)
24’Ben khaigbam õor mor eemua jʉrpäaiwain warp õor chukag ee phʉreu nʉrraajem. Mamʉ pod ich sĩeimaju baauba abaawai khĩirju sĩi awia, “Deeu mʉch chiraajerr deg chiraimaag majugui” awia, deeu ich ag woun jʉrmaajem. 25Mag mawia ooimaawai, chadcha di chaarta ajap thũapwia ãbamʉg nem phewia ãkha thʉnʉmjo, dijã parii ooimaajem. 26Mag dijã parii oobaimaawai, deeu mawia, ich daumaai ich khapeen ich khãyau khaigbacharam khʉʉn siete jʉr auwia, deeu mag woun mor ee naaicheejem. Magbarm aigmua chi wounjã warr ich sĩerr khãyau warag athuucha khaigba sĩsiejem.
Ʉ̃rʉʉcha onee nʉm khʉʉn
27Jesús mag iekha sim ee, ʉʉi ãbmua khapanag eemua irig, —Pʉ thaabawia ich jũd gaai pʉ dopi bãautarr ʉʉita Ẽwandamau ʉucha ajim chadcha. Dich chaaita jãg khitakhiin maach onee khitajugui ajim anʉm irig.
28Magbaawai jũrr ichdeu, —Jãan chadaugui ajim anʉm, mamʉ mag khãyau ar Ẽwandam iek jaau nʉm ũrwia i ipierraa nʉm khʉʉnta ʉ̃rʉʉcha onee aju aai nʉmgui ajim anʉm.
Nem ooba aajem waupi narr gaaimua Jesuu õor khĩir iekhatarr
(Mt. 12:38-42; Mr. 8:12)
29Warag õor pom ich aig phẽeudʉdʉkham ee, Jesuu amag iekhamamua magjim aajem:
—Ĩsim khʉʉn chan warag chi ajaugjã chukhuta thʉnʉm. Oo nʉmjomta warágata amachdeu nem ooba aajempata khĩirpierr ompaa aupi jaau nʉm. Mamʉ mua pãar ipierraa nem waubamgui ajim anʉm. Mag khãyau Ẽwandamau Jonás dʉi arrjo abarm gaaimuata mʉch jua theeg oopiju. 30Warrgar jooi Jonás aajerr nemmeeurrkhan buch ee khãai thãrjup sĩethurtarr gaaimua Nínivepienau Ẽwandamau i pʉitarr khaug autarrjo ĩchab, mʉch chi Emkhooi Iewaaujã agjo mʉch iiu phiidʉbarm gaaimuata pãrag khap apiju, chadcha ich Ẽwandamauta mʉ pʉibarm. Mamʉ magʉmjã pãrau ʉkhabajugui ajim anʉm ichdeupai. 31Magua, ar ĩs mʉg jaar õor mee nʉm khʉʉn Ẽwandamau mʉg atag am phiriutkha auwia chachbarm jaar, Sabá anʉm durrmua rey Salomón oon beetarr ʉʉiraujã ich ipaarmua ĩchab pãar khaibagta Ẽwandamag ĩgkha thʉnʉʉuju. ¿Jãgwi? Í pãar khãaijã warpmuata Ẽwandamau rey Salomonag khĩirjug deetarr iekha sim ũraan beetarr aawaima. Mag khãai pãar wir aig nʉm khʉʉnau mʉ Salomón khãaijã ʉ̃rʉʉcha chirʉm iekta ũrmapha nʉm. 32Mag Ẽwandamau õor i agkhabarm ed Nínivepienaujã ĩchab amach ipaarmua pãar khaibagta warag Ẽwandamag ĩgkha thʉnʉʉuju. ¿Jãgwi? Jonaau Ẽwandam iek amach aar jaaubaimaawai amau magʉmjã aba ʉkhatarr aawaima. Mamʉ ĩs mʉ Jonás khãyaujã ʉ̃rʉʉcha chirʉmuata Ẽwandam iek jaau chitʉmjã pãrau ʉkhamapha nʉmgui ajim anʉm, amach khĩircha.
Maach mor gayam õtdau
(Mt. 5:15; 6:22-23)
33Maimua mag jajawagmamua ich Jesuupai, —Mua mag õtdau paanaa sĩi ag ʉ̃r bathẽeu khoo sĩu nʉm ooba chitʉmgui ajim anʉm. Õtdaun paanaa õor dau garta ausĩiujem, thumaam khʉʉn dau araraa amkhĩir. 34Maach daun õtdaujota simgui ajim anʉm, maach mor gaai. Maach daujãata ajapha sim aiguin nem thum dawaata oojem. Ich agjota simgui ajim anʉm maach thãarjã. Ẽwandam iek ʉkhanaa maach thãarta ajapha sim aiguin nem thum Ẽwandamau khõsimjota waaujem. Mag nʉm aiguin ararag ee nʉmjota nʉm. Mamʉ magba agtha pãach pekau eeta nʉmʉn magan pãran sĩi khĩchag ee jʉrkha jʉrkha nʉmjota nʉmgui ajim anʉm. 35Magua khĩirjug paraa aajeet. Khĩchag ee nʉmjo nʉmta pãach thãar ajapha nʉm awi oob Ẽwandamag pãach isegpimiet ajim anʉm. 36Mamʉ pekau gaaimua khĩchag ee khaba nʉmjo nʉm khai, magan chadcha pãar ararag chaar eeta nʉm, Ẽwandam dʉi. Mag amʉn magan õtdaúa pãar khĩirphee wʉʉ wai nʉm bʉʉg nʉmjota nʉmgui ajim anʉm, i dʉi.
Jesuu fariseonaanag iekhanaa chi machnaanagjã iekhatarr
(Mt. 23:1-36; Mr. 12:38-40; Lc. 20:45-47)
37Mag ich Jesús iekha obaadem ee, ãb Moiseeg Ẽwandamau ich iek phãpitarr ajapcha ʉʉrkhaajem khʉʉn eemua i thach khoon eeurrjim aajem, ich di aar. Magbaawai Jesuu i dʉi mawia, barwia, ãba phʉʉr khophobaadejim aajem. 38Mamʉ mag chi Jesús eeurrtarr wounau oowai Jesús jua ʉbata thach khobaadejim anaabá. Magbaa ich odegpai, “Waa, ideu maach jooinau jaaujem khaugbamjo jua sũgbata thach kho chitabaa” ajim anʉm.
39Mamʉ maach Por Jesuu mag wounau ich odeg mag simjã khaphʉ sĩerr aawai irig, —Mʉ iek ũrbá ajim anʉm irig. Pãar fariseonaanan pãach pem aawai sĩi juagam nem chi ʉ̃rʉm memerkhogpaita ajapha ʉkhakha aju khĩirju sĩerrjeemgui ajim anʉm, mag memerkhom ee khãijã dobaawai Ẽwandam dau na pekau waumaaugau awi. Mamʉ pãachdeu chikham nemdamjã jĩgkha pãach denkha aunaa chikham khaibag wau nʉm gaaimua pekau pom nʉm chan isegba ni Ẽwandamag chugpaapi jeeujujã khĩirjuba sĩerrjeemgui ajim anʉm. 40Pãar chi khaphʉm khaphʉm aajem khʉʉnta, ¿jãga jãg khĩirjug chukhumjota nʉma? ajim anʉm. ¿Pãrau khĩirjuawai Ẽwandamau ʉ̃rʉm nempai oonaa pod pãar thãar ooba aajẽ, mor ee ierr sĩewai? ¿Nem thum ichdeupai wautarr khabá? 41Nem ajapha jã ʉkhakha aju khãyau, pãach khaibagta Ẽwandamag chugpaapi jeeubat ajim anʉm. Mag pãar morjã thum ajapha nem jã ʉkha thʉnʉisimjo sĩsiewain chadau aphʉʉm khʉʉnagjã nem deem khõsi deeju. 42Mamʉ ¡eh, apdurr ajim anʉm pãar, fariseonaan, Ẽwandamau Moiseeg ich iek phãpitarr iek ajapcha ʉʉrkhaajem aajem khʉʉn! Pãrau chadcha Moiseeu deepi jaautarrjo thum pãach di ũjãrram nemjĩirdam bʉ daiicharam gayampa Ẽwandamag ofrendakha deejem. Mag naab mamʉ, jũrr wir aig pãach khapeen dʉi agpierraanaa Ẽwandamjã khõsi aju chan bʉ̃ʉrjã khĩirjuba sĩerrjeemgui ajim anʉm. Pãrau ʉ̃rcha Ẽwandamta khõsi aju aai nʉmgui ajim anaabá. Magnaan chadau pãachdeu nem dee nʉmjã ich jãg dee wenʉrraju aai nʉmgui ajim anʉm ĩchab. 43Magnaa amag, Pãran pãach Ẽwandam iek jaaujem deg weetwaijã pãachta porgarcha thumaam khʉʉnag khĩir jʉrkha juupjerram, pãachta ajapcha nʉm awia. Maimua kaaijã ee weetwaijã thumaam khʉʉnau pãachig saludaa nʉmua pãach tho iekhapim khõsi sĩerrjeemgui ajim anʉm, õor dakhĩir.
44’¡Eh! Pãarjã agjo chi machnaan dʉi Moiseeu phãtarr iek ajapcha ʉʉrkhaajem aajem khʉʉn. Pãrau khaphʉ nʉm, maach meeun ee nawe õor aukhertarr jẽbdi ʉ̃r dichpiba aajem. Khaugba dichwiajã ichiita maach ãarjem aajem. Ich jãg jẽbdi õor ãrpiejemjota naabahab ajim anʉm, pãarjã. Pãachdeu nem jaau nʉm gaaimuata agjo õor Ẽwandam dau na ãrpi naabahab, mamʉ magʉmta amau khaugba durrumgui ajim anʉm.
45Magbaa chi machnaanpa aig narr aawai ãbmua ũr oo sĩi awia Jesuug magjim anʉm:
—Maestro, pua warm khʉʉnag mag iekhabapʉim aig, ĩchab maar khĩirpata iekhabapʉibahab ajim anʉm.
46Magbaa Jesuu irig, —Chadma ajim anʉm. Mamʉ ¡eh, apdurr, pãar chi machnaan ãba! Pãrau chará pãachta chi khaphʉm awia pãachdeu nem jaaum aig jaaujem. Jãg nʉm aig pãrau õor ʉ̃r nem chʉkhʉm jiirpʉpʉikhamjota naabahab ajim anʉm. Pãach garmuan pãrau õrag nem jaauwai pãach ipierraata api nʉm. Mamʉ mag nʉm pãachdeu chan waujojoopaijã khaba aajemgui ajim anaabá. 47¡Eh, magʉm pãar chará! Pãar jooinauta warrgarwe Ẽwandam i jaaujerr khʉʉnjã khechbajieb ajim anʉm. Pãachdeucha khabajim, mamʉ pãar ya ĩs ewagam khʉʉn awia bʉ̃ʉrjã khĩethuupaijã khaba nʉmgui ajim anʉm. Amau beptarr jã ʉ̃rjã pãar den ajapha phʉnaa ooimʉ wau kher nʉmua pãach iiupain pãrau, “Mʉkhʉʉn joointa chadcha Ẽwandam i jaaujerr khʉʉnau” aajem. 48Mamʉ mua pãrag jaaukhimgui ajim anʉm: Jãg nʉm aig pãrau, “Oobat Ẽwandam i jaaumien maar jooinau khechtarr. Mʉʉgwaijã agtha ich jãg wenʉrrʉm akhiin, maraujã agjo khechju nʉm” a jaau nʉm khabahab ajim anʉm. Magaagta pãar den warag am jã ʉ̃rjã nem ooimʉ waunaa sirppapiba aba aajeeb ajim anʉm, pãachdeu khechbajim awia. 49Jãgju khaphʉta Ẽwandamau ich khĩirjug ee ĩchab magjim: “Mua pãar athee õor pʉiju, mʉch i jaau wenʉrramkhĩir. Mag mua jʉr auwia pʉibarm khʉʉn ãaur khʉʉn khechpʉiwia ãaur khʉʉn ẽudee sĩi khoojem nem ẽudeemjo ẽkhaju” a jaaujim warrgarwe. Magtarr aawai ĩs ewag pawiajã chadcha pãar ich magta thʉnaabahab. Magua pãade mʉ iek ũrbat ajim anʉm: 50Ar warrcha mʉg jẽb ich Ẽwandamau ompaatarr aigmua ewag i iek jaau durraajerr khʉʉn khech nʉm aig bag ãrtarr thum, jũrr ich Ẽwandamau pãar ĩs ewagam khʉʉn gaaita thʉpʉijugui ajim anʉm. 51Warrcha Abel thõotarr ed bag ãrtarr aigmua ewagjã khĩeb jooi Zacarías khararr Aai i jeeujem deg thõo naawai ãrtarr bagpa thum pãach gaaita pajugui ajim anaabá. Jã chan par okhoobam, ichiita Ẽwandamau pãrag jeeub khaba jeeujugui ajim anʉm. 52Mag iekhakhagmamua, ¡Eh, apdurr ajim anʉm pãar, Ẽwandam iek jawaag chi machnaan aajem khʉʉnta! Pãrau khaphʉ nʉmgui ajim anʉm, Ẽwandam iekta ʉ̃gthar dubaag athee yabmejo sim. Mag yabmejo simta pãachdeuta nacha garpawia bʉ̃ʉrjã õrag jaauba nʉmgui ajim anaabá. Pãachjã dubba nʉmta, chi dubam khõsi nʉm khʉʉnagjã pãrau ʉdʉʉr dubpiba nʉmgui ajim anʉm, amach khĩircha.
53Jesuu amachig magbaawai, amach chi machnaan fariseonaanpa i dʉi meeukha phobaadejim aajem. Maimua warag i dʉi wetumua i thʉ awaag a i aig phẽeudʉ beenaa, jũrram khʉʉnau amachdeu khaphʉm irig jeeuphobaadejim anaabá, 54mag amachdeu jeeu nʉm jũrr ich Jesuu ipeerdʉ khãijã jaaubapäaiwai magʉm gaaimua chi thethem khʉʉnag i pʉr deeg.
Zvasarudzwa nguva ino
San Lucas 11: noaA
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2011, Wycliffe Bible Translators, Inc. All rights reserved.