Mavhesi emuBhaibheri Ane Mukurumbira kubva kuna Isaya 60

Pakurirana nevamwe

Chisimuka uti ngwe-e kuvheneka nokuti chiedza chako chasvika uye mbiri yaTenzi yapenya pamusoro pako

Vechirudzi vachauya kuchiedza chako, madzimambo achauya kuchiedza chako chinenge chasimuka.

nokuti tarisa uone nyika ichanzi kwidiba nerima, vanhu vachanzi nezarima gude gude. Asi pauri Tenzi achanyatsoti ngwe-e, mbiri yake ichaonekwa pauri.

Mudikidiki pavari ndichaita kuti ave dzinza chairo, mudukuduku pavari achiva rudzi rwavanhu rukuru. Ndini Tenzi, panguva yayo ndichakurumidza kuzviita.

Chichakuvhenekera masikati harisi zuva nechichakuvhenekera usiku unenge usisiri mwedzi, asi kuti ini Tenzi ndini ndichava chiedza chako narini wose. Ini Mwari wako ndini ndichava mbiri yako.

Kwauri iwe zuva harizombodoka kana iwo mwedzi kwauri iwe hauchazombonyura nokuti ini Tenzi ndini ndichakuvhenekera narini wose. Mazuva ako okuchema achabva apera.

Ipapo uchazviona ugomwekuma kufara, mwoyo usingagoni nokufara nokuti upfumi hwose hwegungwa hunenge hwonanga kwauri upfumi hwevechirudzi huchauya kwamuri.

Simudzai musoro mutarise uku nokuku muone, vose vari kuunganidzana vari kuuya kwauri, vanakomana vako vari kuuya vachibva kure, vanasikana vako vakaita zvokutakurwa mumaoko.

Vanhu vako vose zvavo vachave vakarurama, nyika ichava yavo nokusingaperi, ivo bukira rangu randakasima namaoko angu kuti ndigorumbidzwa.

Manyongori haachazombonzwikizve munyika mako. Umharadzi nokuparadza kwose hazvichazombonzwikizve munyika yakatenderedzwa nemiganhu yako. Tsvingo dzako uchadzitumidza zita rokuti Ruponeso, misuo mikuru yako zita rokuti Kurumbidza.

Misuo mikuru yako ichangogara yakazaruka siku nesikati, kuzarirwa isingazarirwi kuitira kuuya kunenge kuchiita vanhu kwauri noupfumi hwevechirudzi, vachitungamirirwa namadzimambo avo.

Mauri muchava nebvakapfaka renghamera, nghamera dzichine simba dzokuMidhiani nokuEfa nedzose dzinobva kuShebha dzichakotonoka. Dzichauya nendarama norusenzi, dzichadhumisa mbiri yaTenzi.

Vatorwa zvavo ndovachakuvakira tsvingo dzako, madzimambo avo ivo ndoanenge otokushandira iwe. Ndakakuranga pamusana pokushatirwa kwandakanga ndaita, asi zvino pamusana pemwoyochena wangu ndava kukuitira tsiye nyoro.

Wakanga wafuratirwa uchivengwa pasisina kana neachadimura namauri, zvino ndichakuita guta rino mukurumbira narini narini richange riri rinofadza pachizvarwa nechizvarwa.

Uchayamwa mukaka wevechirudzi uchayamwa mazamu amadzimambo ndopauchaziva kuti ini Tenzi, ndini Muponesi wako, iye Mununuri wako iye Samasimbaose waJakobho.