Mavhesi emuBhaibheri Ane Mukurumbira kubva kuna Romans 6

Pakurirana nevamwe

Ti ha byayed chi byasuɏ ked otoy. Ngim ha biyeg un mallalayun idchon Apudyus un sagutla gapu si litimpuyugen taku kan Apu takuʼn Jesu Kristu.

Achi taku ipalubus un ha byasuɏ mangituray kan chitaku, ti ha kachegun Apudyus chi mangituray kan chitaku si sala, chakampun un lintog chi manturay.

Ked ha lampabunyagen taku, lipati taku kan Jesu Kristu si latoyala ya lilobolala, taplu maatod kan chitaku baruʼn biyeg un isun chi ummuliyan Jesu Kristu lataguwan gapu si pallakabyelin Ama takuʼn Apudyus.

Ya achi taku ipalubus chi ulay siluʼn petin chi long-eg taku un mauseɏ un mangwa si lawwing. Ngim ipuɏang taku long-eg taku kan Apudyus un isun chi latagu si baruʼn biyeg. Ked useɏon taku petin chi long-eg taku un mangwa kan cha lalintog un panggop.

Ked ammu taku un ha chachaan un kilatatagu taku, siya lipati un lailansa si krus ta siya manyam-an si kilabyelin chi byasuɏ si long-eg taku ya achipun chitaku mammusassu si byasuɏ.

Ked chitaku bo, masapuɏʼn ibilang taku long-eg taku lalattoy si kilabyelin chi byasuɏ. Ngim matatagu taku kan Apudyus gapu si litimpuyugen taku kan Jesu Kristu.

Tuttuwaʼn amod chi kachegun Apudyus kan chitaku. Ked himma mibyega taku? Ha ituɏutuɏuy taku un mangwa si byasuɏ ta machogchog-an chi kachegun Apudyus kan chitaku? Achipun makwa! Ti lagamput taku lalattoy lu mipanggop si byasuɏ, ked achipun makwaʼn ituɏutuɏuy taku pin-a mangmangwa si byasuɏ.

Ha achipunyu ammu un musassu chikayu si mangidchenyu si long-egyu? Ked lu byasuɏ mangidchen taku, ha mambyalagela matoy taku. Ngim lu si Apudyus chi mangidchen taku si long-eg taku, siya simmusassu kan chitaku, ked ibilangla chitaku lalintog.

Ked manyaman taku kan Apudyus! Ti si chamu, isun chi musassu chitaku si byasuɏ. Ngim si sala, tuttuwaʼn ipapati taku un mamotog si katuttuwaan un litudtuchu kan chitaku. Ked si sala, lawayawayaan kayu si byasuɏ ya lambyalilon Apudyus chikayu musassun chi kilalintog.