Hawaii Pidgin Bible

©2020 Hawaii Pidgin Bible Ministries 
hawaiipidginbible.org

One time was da Jew Res Day. Jesus an his guys wen walk thru da fields wea dey grow da wheat. His guys pick litto bit wheat, rub um wit dea hands fo get rid a da junks, an eat um. But had some Pharisee guys tell, “Hala! How come you guys stay do da kine work dass kapu fo do on da Res Day?!”
Jesus tell um, “Wot! You guys neva read inside da Bible wat King David wen do, dat time him an his guys was hungry? He wen go inside God house. He take da bread dass spesho fo God dat stay ova dea an eat um. He give um to his guys too. An nobody neva say notting to David, no matta da Rules From God tell dat ony da pries guys can eat dat bread.
“Eh! I da Fo Real Kine Guy. Dass why I da One get da right fo tell wat can do da Res Day.”


Anodda Res Day Jesus go inside one Jew church an teach. One guy stay dea an his right hand no work no moa. Some teachas dat teach da Rules From God an some Pharisee guys like bus Jesus, so dey watch um real good, if he goin make somebody come good on da Res Day. But Jesus know wat dey stay tink, an he tell da guy wit da hand dat no work no moa, “Stan up ova hea in front erybody.” An da guy come. Den Jesus tell dem, “I like aks you guys one question. Dass right in da Rules From God fo do da good kine stuff on da Res Day, o do da bad kine stuff? Fo help peopo fo stay alive, o fo wipe um out?” He look aroun at dem, an den he tell da guy, “Stick out yoa hand.” An da guy stick um out, an his hand come good one mo time.
But da Pharisee guys come real huhu, an start fo make one plan togedda wat dey like do to Jesus.


Dat time Jesus go up one hill fo pray. He stay dea an pray all nite. Wen day time come he call all da guys dat go wit him fo come. An he pick twelve guys, an tell dey da guys he goin sen all ova. He pick
Simon (da guy Jesus name Peter),
Andrew his braddah,
James an John,
Philip an Bartolomew,
Matthew an Thomas,
Alfeus boy James,
Simon da guy dey call da Jew sovereignty guy,
James boy Judas,
Judas Iscariot, da guy dat bumbye goin set Jesus up fo mahke.


Jesus come down da hill wit his guys, an he stan on top one flat place. Had plenny guys dea dat go wit him an plenny odda peopo from Jerusalem an all ova Judea, an from da coast nea Tyre an Sidon. Dey come ova dea fo lissen him, an fo him make um come good from all kine sick. Da kine wit da bad kine spirits dat bodda dem, Jesus make um all come good. Erybody try fo touch him, cuz da powa stay come outa him an make um all come good.


Jesus look da guys he stay teach an tell,
“You guys dat stay pooa now,
You can stay good inside
Cuz God, he yoa King!
You guys dat stay hungry now,
You can stay good inside
Cuz you goin come full!
You guys dat cry now,
You can stay good inside
Cuz you goin laugh!
“You guys can stay good inside wen da peopo hate you, an throw you out, an talk harsh kine to you, an tell you no good cuz a me, da Fo Real Kine Guy! Da peopo dat hate you guys now, long time befo time God wen sen da guys dat talk fo him fo teach dea ancesta guys. An dose peopo dat time make da guys dat talk fo God suffa plenny too, jalike nowdays dea kids stay make you guys suffa. But eh! Dance an sing wen dey make any kine to you guys! Stay plenny good inside! Cuz bumbye God goin give you guys plenny good kine stuff in da sky.
“Bummahs you guys dat stay rich now!
You get da easy time awready.
Bummahs you guys dat stay full now!
You goin come hungry!
Bummahs you guys dat laugh now!
You goin come real sad an cry!
Bummahs wen erybody talk good bout you guys!
Cuz you know, long time befo time dea ancesta guys wen talk good bout da fake guys dat tell dey talk fo God but dey neva.”


“I stay tell you guys dat lissen me: Get love an aloha fo da peopo dat stay agains you. Do good stuff fo dem. Tell God fo do good tings to da peopo dat put kahuna on top you, an pray fo da peopo dat make you guys suffa. If somebody wack yoa right cheek, let him wack yoa lef cheek too. If one guy steal yoa coat, give him yoa shirt too. Give to erybody dat aks you fo someting, an if somebody rip off yoa stuffs, no tell him fo give um back. Do to da odda guy jalike you like him do to you.
“If you guys get love an aloha ony fo da peopo dat get love an aloha fo you, you figga God owe you money fo dat? No way! Even da bad kine guys get love an aloha fo da guys dat get love an aloha fo dem! An if you guys do good ony to da peopo dat do good to you, you figga God owe you money fo dat? No way! Even da peopo dat do bad kine stuff do dat. If you guys ony lend someting to da peopo you figga goin give um back, you figga God owe you money fo dat? Even da bad kine peopo lend stuff to odda bad kine peopo, if dey figga dey goin get um all back. No way! Get love an aloha fo da peopo dat stay agains you, an do good tings fo dem, an lend um stuff, an no figga you goin get um back! Cuz da God Dass Mo Importan Den All Da Odda Gods, he erytime do good tings fo da peopo dat no tell him ‘Mahalo plenny!’ an da peopo dat do real bad kine stuff. If you make jalike God, dat show he you guys Faddah, an you his kids. An bumbye, God goin give you guys plenny good kine stuff bumbye in da sky cuz a dat. Give chance jalike yoa Faddah give chance.


“No make jalike one judge to nobody. Den God no goin be yoa judge. No tell da odda guy gotta get punish. Den God no goin punish you. Let da odda guy go, an no stay huhu wit him. Den God goin let you go an hemo yoa shame fo all da bad kine stuff you wen do. Give stuff to da odda guy. Den God goin give stuff to you. He goin fill um up, shake um, fill um up some moa, plenny goin even run ova, an he goin pour um all inside yoa bag. Cuz da way you give to peopo, same way he goin give to you.”
Jesus talk some moa. He tell, “You tink one blind guy can lead anodda blind guy? He do dat, an da two guys goin fall down inside one puka. One guy not mo importan den his teacha, but erybody dat learn all da stuffs from dea teacha, dey goin come jalike dea teacha.
“How come you guys spock da small piece junk inside yoa braddah eye, an no tink bout da big two by four inside yoa eye? How you goin tell yoa braddah, ‘Eh, try let me pull da small piece junk outa yoa eye,’ wen you no see da big two by four inside yoa eye? You tell one ting an do anodda! Firs take da big two by four outa yoa own eye, den you can see good fo take da small piece junk outa yoa braddah eye.


“Da good kine tree no can give bad fruits, an da bad kine tree no can give good fruits. You know da kine tree from da kine fruits dey give. No can pick da fig o da grape from da kine tree wit thorns. Da good guy do good kine stuff cuz get good stuff inside him, an da bad guy do bad kine stuff cuz get bad stuff inside him. Da kine stuff somebody get inside goin come out thru da mout by wat da guy tell.


“How come you guys call me ‘Boss, Boss,’ but you no do wat I tell you fo do? I goin show you guys how da guy stay dat come by me, an lissen wat I tell um fo do, an he do um. He jalike da guy dat stay build his house, an dig deep an put da foundation on top da rock. Den da big watta come, an poun da house, but no can shake um, cuz he make um good. But da guy dat hear wat I tell an no do um, he jalike da guy dat build his house on top da groun, but no mo foundation. Da big watta poun um, an dat house fall down an bus up.”

Terera ku Luke 6