Urarina - 2006 Edition (NT)

Inae jorerera colane faan quihuruhane jaa cojoanonaa Fasocoa beseta catainaane jana jetaote, Jesoso sohin joaerateeuruhane coina jetao, “Chatohaneein ichanaareta”, naain coaaucure saseredotecuru curuaanaacuru aina Cana Coaunera aitoonjoa que cacha relaaureraauru. Nabana raajenihane mucuhin sohin jaooruhane, chatohaneein acaauru teeuruha cachaaurune que necasacuruhane jaun.
Nitohaneein inaen sohin jaooruhane coina que necousuujuaaruhane jana jetaote, nii aina nerelanacauru lechoonca coroataja Jodasi Isacariote neein niicha curuaateeuri suujua saruha Moconajaerane jaun jetao, batirichuru curuaanaacuru, Teenforo curuaanaacuru, naaonjoainuri coaraa cue: “Canune naaonjoaain inara rai naineeun, nii Jesoso mucuhichene coina ecu inara turuaanunera”, naa acaauru raine coina.
Inae niritoha acaauru raine jaun jetaote, jataain coroajeein coretena jerecure. Nii jaun jetaote, acaauru suujua rijitojoeein cachaauru colane niha Jesosone cojoae, ecu Jorioocuru bijihu Jesoso tihane coina Jodasi.


Nii jana inae jorerera colane ichanohin faan quiin carenero narejeen sooruhane jaan beseta cojoanonaa Fasocoa que turuhane jaun jetaote, Fedoro aina Joaan rai jetao:
“Chajaain Fasocoa beseta cosonaina que canaacha quiine ichanihuchete que lenonichaachera”, naain jetao acaauru letoae Jesoso.
Nii jaun jetaote:
“Chujian ichacaaunne jereeita”, naain jetao caje bajaaure.
Nii jaun jetaote:
“Inaen cuhin nii neseu turuhichene janate, baichaje cuhane acau baaibaaichaain cuujiha leinjiin cachane jana eruriquicheein. Chaaen loreri asae enohane reentiaain sacuuchera. Chaaen inae nii loreri asaae turuhichene, nii loreri erora rai: ‘Taa cana relaerate, Chariji loreri asae nenaa ecuha cuhane, Fasocoa beseta cosonaina que lenonereeunni canu aina nerelanacauru ainata, naain ii caje bajaeratera’, naauche. Niritocoichene janate, nii loreri coroata coarana ecuha seeonjoa siricha coaaratereein inara que. Chaaen inae nitohaneein inara que coaaratihane baiha, ecu sonaina lenonichaachene jaanu jelai rucuhecuchera”, naain jetao letoanajae Jesoso.
Nii jaun jetaote cuhin, nii acaauru rai aitoha Jesosone rijijieein eruuruhane jaun jetao, ecu teein Fasocoa beseta bitoaain, cosonaina que lenonecuruhane jaanu jelai rucuhecure.
Inae nitohaneein enoalaauruhane jana jetaote turuhin, inae que lenonecuruhane jaan rijiu tihane jana, rai afosotooru aina rori ichoae nelauriae lenonecuruhane coina Jesoso.
Nitohaneein rori ichoae nelauriaain jetaote: “Jataaine inara aina carijieein caa Fasocoa beseta bitoaain, cosonaina que lenonena jerenajacoon osichaaunne ajiniha. Coatiha laen caa baiha, inaen caa Fasocoa beseta bitoaain inara aina lenonerihaaunni Cana Coaunera Cojoanonaa que turuhanune reentiaain”, naain jetao, curu cuhane, oba caje ichanohin bino teberiaain Cana Coaunera bajaane baiha jetao, acaauru rai teein:
“Nocoa, inara nejesinajeein caa leruune leruuneein cooche. Inae caa baiha nacoaauneein caa oba caje ichanohin bino corihaaunni Cana Coaunera Cojoanonaa que turuhanunereen tiaain”, naane baiha jetaote, faan mucuhin Cana Coaunera bajaain, cataaun nii faan tatuhin beeune beeuneein acaauru rai teein jetao:
“Caa inara rai canuhacha teite cajabereeoneeite ne. Acate jianacoon neeichene coina, inara coreniha cairichanojoineein atinanohinereein. Aihane jaun, itolere bana canuneein nihanune coacuhin que lenonecuche”, nae jetao acaauru rai faan teruhin teein Jesoso.
Niritoha acaauru rai Jesosone jana lenonecuruhane baiha jetaote, nii faan que aitohane rijitojoeein, acaauruacha coheni teein jetao:
“Caa oba caje ichanohin binote, inara caohachanu que cacoichana jaohin canuhacha ichaneni icharihanuhinne coujunaca nera. Nitohaneein caque nejeratenacaauru rai caeteraanute ena cau cana aina lenoniha ne. Nitohaneein acaihaniji Cachaneein nejanoanaa nichaaunne cairichaeriin neeuruhane coina, aitiin neeuruhane rijijieein aihanete ne. Nete jataain cairichaaojoaa cureein, nii caque nerotohin cacairichaerateranu”, naain jetao bino teberiaain Cana Coaunera bajaane baiha afosotooru rai te Jesoso.
Nii jaun jetaote, “Charijinachara toon totohaneein que nerotohin aina nejeratenacaauru rai colurujueein cairichaeratiha cureein”, naain jetao ita caje bajaacoaaure aina nerelanacauru.

Niritiin jetaote nejesinajeein: “Charijina caa cana caje jataain nelateineein coaanojoineein ne”, naain jetao ita caje bajaacoaaure aina nerelanacauru. Nii jaun jetaote acaauru rai: “Cana Coaunera coitucuelanaala nenacaauru curuaanaacurute, itolere amurijiriin nenaa jereein cachaauru cairichaeriin neeure. Niite acaauru cairichaauruhane coitucuuruhane nihanatiin coroaecure caohacha ichaa benajaain. Nete laen inara naineneeiche nitohaneein neeichene. Nitohaneein nenaa coacuelanaala, leeochaauru amurijiriin nelateein nenaa jeriha chuni inara cajene, leeochaauru ere tonoraain, letoaauruhane jaan ichaain neeine. Jana chunocoha leeochaauru letoaeraneein nenaa jerihane satiin rai, chachaeraneein neeine.
Nitohanihane jaun chariji jataain nelateineein nere, nii lenonihane coina rori ichoae nelaurianaana. Ainihane nii lenone chaluherana nelateein neriha. Aihei jerihane. Nii rori ichoae lenonihane coina nelaurianaate nii lenone chaluera amurijiriin nelateein niha nocoete.
Nena laen canu nitohanelanaala, inara letono rijijieein ena cau inara aina inaraacha latei icharaneein neeun.
Inarate cajiniichaain necairichanaa coaraain nenajaaonquiche. Nii jaunne itolere Curuaanaa neein nelateein nihanune coina canu cocoainaain caeteein niha Ofane rijijieein, inara netonai cocoainaain nereeunni. Nii banate inae nii cojoanonaa que turuhane bana, cajiniichaain rorihuru ichoae nelauriaain acau cohin, lenoneein, naaonjoanriquicheein. Chaaen techu baaso ichacurenihane, caohacha ichacuruha lechoonca coroata laurii Isaraele cocoaichacurune coaraain coitucuhichene coina cajiniichaain nii coina banijiaain nenaa rori ichoae nelauriariquicheein, inae nii cojoanonaa que tihane bana”, nae jetao aina nerelanacauru rai Jesoso.


Niritiin jetaote: “Simoon, inae Canu sacueraneein neeichene bajaa moconajaaera inara raane coina. Nena ii coreniha Cana Coaunera bajaaun, canu esenetaaine jianeeine nihanatiin nacoauneein nelararajiaain Canu esenetaain neeine coina. Aihana jaun, inae nacoaauneein canu esenetaaine bana, inejeraauru coroatajanecuhin caohachaain laraajiin, canu esenetaauruhane jianelanaala raotojoeein rachoojoeein neeuruhane coina”, nae jetao Simoon rai Jesoso.
Niritoha raine jaun jetaote:
“Curuaanaa, canune ijiniichaain caresero cuhane enohin nihanatiin ii coreniha onaa naineeun”, nae jetao rai Simoon.
Nii jaun jetaote:
“Fedoro, enene janotiin cuhanete, iriha janonaa rai ataohari curuaanaane ajiniha, nichata saain canu coitucuha nocoetoeneriquiin”, nae jetao Fedoro rai Jesoso.

Niritiin jetaote:
“Inara letoaain nihanulu coriqui curu, inara safato, inara atora, naaonjoain colane janana lanaain nihalu inara rai cha”, naain acaauru caje bajaa Jesosone jaun jetaote:
“Aihei. Coatiha nii lanaailu canacaanu rai chata”, naain jetao tonoraaure.
Niritocuruhane jaun jetaote:
“Nete laen ena chateeinti coriqui curu siriin, natora siri, nii amaain cuhane caohachae. Chateeinti sabere siriine nii jelaronaa bana niicha jiai cajione burique necoreteein leinjiin sabere coretemiin.
Inara raine aitoon, inae caque aitiin Quiricha inoaesi cuhane: ‘Naaonjoaain cairichaaeriin necha aansai caseteco coaraane rai nenaa ichara rijijieeinte teeurureeincha’, naain itolereneein niritiin caque aitiin laenacuruhalune rijijieein situhane rai te ne”, naa acaauru raine jaun jetaote:
“Curuaanaa, caute ne coroatajaain sabere”, naauruhane jaun jetaote:
“Inae nainejerichaain niriimiin”, nae jetao acaauru rai Jesoso.


Niritoha acaauru raine baiha jetaote, ecu nesurunajaaoncane jaun, Oliboneein niicha curuaateeuri ichatane ucuuno cuha Jesosone jana jetao, caaijie cuure aina nerelanacauru. Nitohaneein cuhin, inae nii Olibo neeojoaaihu turuhin jetaote:
“Cana Coaunera bajaauche nabana osa que nesaruquichene coataara”, nae jetao acaauru rai.
Acaauru rai niritiin jetaote, nita acaauru aonajeein cuhin neseeonrariin jetao; “Ofa, ii jereeine caa jataain necairichanaa tabai caje canu mitaaura. Nena canu jerichaaunne rijijieein ichaaine jereneeunra. Ii jereeine rijijieein ichaaura”, naain jetao Cana Coaunera bajae Jesoso.
Niritohane jana jetaote, dede caje ecocohin lararajiaa leinjiin anjerane jaun jetaote, aina suujua nunaaojoae. Nii aina jataain nesoonenaa cataaun neein jelai rutaain, Cana Coaunera bajaaebajaaeca Jesosone jana jetaote, atanichoaae tabaanain nalue rai doroana ichananeein.
Nitohaneein inae Cana Coaunera bajaane nainaain, aina nerelanacauru coaraa cuhane jana jetaote, jataain cotaaena aina inaderanaa caaun sinihure. Nii jaun jetaote acaauru rai:
“Chanuna siniiche. Chajaain nimichuhin Cana Coaunera bajaauche nabana osa que nesaruquichene coataara”, nae jetao acaauru rai Jesoso.


Niritiin jaiti acaauru rai ereerejiha Jesosone jana jetaote, turuha cuure arajiin cachaauru. Nii aina nerelanacauru lechoonca coroataja neein nenaa Jodasi jetaote, acaauru ichoaichaniha acaauru amaeraneein cue. Aca jetaote, Jesoso rohan nichuuntaain nechu jataain belaicha rijijieein jetao rai nomeri lioracae. Nii jaun jetaote:
“Jodasi, belaicha rijijieeina nomeri lioracaain nii acaihaniji cacha Calaohineein nenaa teei aina nejerateeriin nenacaauru bijiute”, nae jetao Jesoso.
Inae inooneeuruhane coaraain jetaote:
“Curuaanaa, coanene ii cocoaeratihacaanu sabere quera”, naaure jetao nii Jesoso aina nerelanacauru.
Niritiin jetaote, leinjiin saseredotecuru curuaanaa letono uricho beuhite, rai raotono nichajai que tacaain sabere que, leinjiin nii Jesoso aina nerelanaa. Nii jaun jetaote:
“Inae niriimiin, coa cunaitaa”, naain jetao jelaiha nii saseredotecuru curuaanaa letono uricho tirichaain jetao rautae Jesoso. Nitohaneein rautaane baiha jetaote, saseredotecuru curuaanaacuru, Teenforo beraihurera, chaaen Jorioocuru bichauhenaauru, Jorioocuru rai nelateein nenacaauru, naaonjoainuri rai jetao:
“Chanuna leinjiin necha aansai asijiatoneein sonajaain joaeraneein nihanune que airijiin sabereeuru aina enuhacuru uhaain canu mucuha uhiche. Itolere cojoanonaa banara, inara aina Teenforo asae nenajacoonna. Nii jana nii chatohaneein coatiha canu dadanajaaoheeiche. Nete inae nitohaneein nocohena tabai osa que nesaruhin namuritocohichene cojoanonaa que tihane jaun aiiche inarara”, nae jetao acaauru rai Jesoso.


Nitohaneein jetaote, Jesoso mucuhin saseredotecuru curuaanaa loreri asae amaauruhane jana jetao, nita caaijie coarajeein jetao cuujue Fedoro. Cuu turuhin jetaote, jelarotohane jaun, nenaanaja cataaun teein usi mocohin, curuhacaain nichaatiha neeuruhane jana jetao, Fedoro netonai cuu turuhin acaauru aina nichaatiha usi rohan lauheque. Nii jana saseredotecuru curuaanaa coseenraneein nenaa leinjiin ene jetaote, cuu usi rohan lauhequiin nichaatiha Fedorone jana, cuu coarajihane baiha jetao cojoeluhin:
“Caa netonaite aina nenaane”, naane jaun jetao:
“Ainaaunchenaate. Coatiana Jesoso coitucuhaaunche canute”, naain jetao suujue Fedoro.
Nii baiha neeoriin jetaote, leeocha netonai:
“Caa netonaite acaauru aina nenaanera”, naane jaun jetaote:
“Ainaaunnaate, Coatiana aca ninaaunte”, naain jetao nii cacha tonorae Fedoro.
Nii baiha carajaaojoaain jetaote, coaiteen leeocha netonai:
“Esinae rauhijiriin caa cacha netonaite, aina nenaane. Nii choae tacaain techu Calileea cocoaichanera”, naane jana jetao:
“Coatiana nii carai chaitoonjoan cacha coitucuhaaunte”, nae jetao nii cacha rai Fedoro. Niritiin jaiti ereerejiha Fedorone jana, nii rijieeoritiin iriha ataohari curuaanaane jana, jaotoroaain Fedoro coaraa Jesosone aina jetaote: “Enene cojoanotiin cuhanete, nichata saain cacoitucuha nocoetelanaala nesuujueeine jana erereein ataoharicha”, naa Jesoso raine coacuhin nainaain jetao, nii neeurunaja loreri caje mituhin jetao jataain obajeein chanae Fedoro.


Nitohaneein nii Jesoso mucuuruhane jana beraiha nenacaauru cachaauru jetaote, que ninichaajeein faohacure. Nitohaneein faojoaain jetaote, nota conajaain:
“Aihane esinae rauhijiriin profeta neeine caa ii soera coitucuura”, naainchuru jetao sohin, jataain que ereeinchuru nocoeje chanuure.


Nitohaneein teein jetaote, inae janohane jana, ita taojiaaure Jorioocuru coaaraneein nenacaauru bichauhenaauru, chaaen saseredotecuru curuaanaacuru, Cana Coaunera aitoonjoa que cacha relaaureraauru, naaonjoainuri, jataain Jorioocuru rai nelateein nenacaauru Junta Suprema acatiha amaauruhane coina. Nitohaneein amaain inae cuu turuaain jetaote:
“Esinae rauhijiriin Mesihasi neeine canacaanu rai beeune coitucuhacaanura”, naaunruhane jaun jetaote:
“ ‘Aca nichaaunchujian’, naanune nihanatiin, nii quesenetareeichene coaalanaalata. Nii inara caje erenaa bajaanune nihanatiinchu catoonrariquichene coaalanaalata. Nena laen inae, enene caje coaauneein, itolere Coauneraneein nelateein nenaa Cana Coaunera raotono nichajai que nelauriaa cureeunni, canu acaihaniji cachaneein nejanoanaa nichaaunne”, nae jetao acaauru rai Jesoso.
Niritoha acaauru raine jaun jetaote, satiin:
“Aihane jaunna, ii Cana Coaunera Calaohineein”, naauruhane jaun jetao:
“Esinae rauhijiriinte acanichaaunne que aitocoichera”, nae jetao acaauru rai Jesoso.
Niritoha acaauru raine jaun jetaote:
“Cha nenacaeneein cana rai berana laterihacache, inae raajenihane nujuae caje acanihane que aitohane aonacaache natiin”, naaure jetao.

Terera ku Locasiicha Laenai 22