If you would like a copy of this version please contact info@davaraudiobibles.org

Bodo Parja New Testament, CC-BY-SA-4.0, The Love Fellowship. Bodo Parja New Testament Audio Bible, CC-BY-SA-4.0, Davar Partners International, The Love Fellowship, 2023.

Bodo Parja New Testament

Bodo Parja Bible (ବ୍‌ଡ଼୍ ହ୍‌ର୍‌ଜା) by The Love Fellowship is licensed under Creative Commons Attribution-ShareAlike 4.0 License.

ଇରି ଯୀଶୁ ଖ୍ରୀଷ୍ଟର୍ ଦାଦି ଆନି ମନାର୍ ବ୍ଉଁଶାର୍ ଲେକା। ଯୀଶୁ ଦାଉଦ୍ ର୍‍ଜାର୍ ବ୍ଉଁଶାର୍ ଆର୍ ଦାଉଦ୍ ର୍‍ଜା ଅବ୍ରାହାମାର୍ ବ୍ଉଁଶାର୍। ଅବ୍ରାହାମାର୍ ହିଲା ଇସ୍‍ହାକ୍‍, ଇସ୍‍ହାକାର୍ ହିଲା ଯାକୁବ, ଯାକୁବାର୍ ହିଲାମ୍‍ନ୍ ଯିହୁଦା ଆର୍ ତାର୍ ବାଇମ୍‌ନ୍‌ ରିଲାଇ, ଯିହୁଦାର୍ ହିଲାମ୍‍ନ୍ ପେରସ୍ ଆର୍ ସେରହ ରିଲାଇ, ତାମର ସେମ୍‍ନାର୍ ଆଇସି ରିଲି, ଆର୍ ପେରସାର୍ ହିଲା ହିଷ୍ରୋଣ,
ହିଷ୍ରୋଣାର୍ ହିଲା ଅରାମ୍, ଅରାମାର୍ ହିଲା ଅମ୍ମୀନାଦବ୍, ଅମ୍ମୀନାଦବାର୍ ହିଲା ନହଶୋନ୍, ନହଶୋନାର୍ ହିଲା ସଲୋମନ୍‌, ସଲୋମନାର୍ ହିଲା ବୋୟାଜ୍ ଆର୍ ବୋୟାଜାର୍ ଆଇସି ରାହାବ୍ ରିଲି। ବୋୟାଜାର୍ ହିଲା ଓବେଦ ଆର୍ ଓବେଦର୍ ଆଇସି ରୂତ୍ ରିଲି, ଓବେଦର୍ ହିଲା ଯିଶୀ, ଯିଶୀର୍ ହିଲା ଦାଉଦ୍ ର୍‍ଜା ରିଲା। ଦାଉଦ୍ ର୍‍ଜାର୍ ହିଲା ଶଲୋମନ୍ ଆର୍ ତାର୍ ଆଇସି ଉରୀୟର୍ ମାଇଜି ବେଥ୍‌ସେବା ରିଲି,
ଶଲୋମନାର୍ ହିଲା ରିହବୀୟାମ୍‌, ରିହବୀୟାମାର୍ ହିଲା ଅବୀୟ, ଅବୀୟାର୍ ହିଲା ଆଶା, ଆଶାର୍ ହିଲା ଯିହୋଶାଫଟ୍, ଯିହୋଶାଫଟାର୍ ହିଲା, ଯୋରାମାର୍ ହିଲା ଉଜିୟ।
ଉଜିୟାର୍ ହିଲା ଯୋଥମ, ଯୋଥାମାର୍ ହିଲା ଆହସ୍‌, ଆହସାର୍ ହିଲା ହିଜକିୟ, ହିଜକିୟାର୍ ହିଲା ମନଃଶି, ମନଃଶିର୍ ହିଲା ଆମନ୍, ଆମନାର୍ ହିଲା ଯୋଷୀୟ ରିଲା। ବାବିଲୋନ୍ ଦେଶ୍‌କେ ଗତି କ୍‍ଟୁକେ ଜାତା ଆଗେ। ଯୋଷୀୟ ଯୀକନୀୟ ଆର୍ ତାର୍ ବାଇମ୍‍ନ୍‍କାର୍ ଦାଦା ରିଲା।
ବାବିଲୋନ୍‌କେ ଗତି କ୍‍ଟୁକେ ଗ୍‍ଲାହ୍‌ଚେ ଯୀକନୀୟ ଶଲ୍‌ଟୀୟେଲ୍‌କେ ଜ୍‍ର୍‍ନ୍‌ ଦିଲା, ଶଲ୍‌ଟୀୟେଲ୍‌ର୍ ହିଲା ଜିରୁବାବିଲ, ଜିରୁବାବିଲାର୍ ହିଲା ଅବୀହୁଦ, ଅବୀହୁଦାର୍ ହିଲା ଏଲିୟାକୀମ୍‌ନ୍‌, ଏଲୟାକୀମାର୍ ହିଲା ଆସୋର, ଆସୋରାର୍ ହିଲା ସାଦୋକ, ସାଦୋକାର୍ ହିଲା ଆଖିମ୍‌, ଆଖିମମାର୍ ହିଲା ଏଲିହୁଦ୍,
ଏଲିହୁଦାର୍ ହିଲା ଏଲୀୟାଜର୍, ଏଲିୟାଜରାର୍ ହିଲା ମତ୍ତାନ, ମତ୍ତାନାର୍ ହିଲା ଯାକୁବ, ଯାକୁବ ମରୀୟମାର୍ ଅଣ୍ଡ୍‌ରା ଯୋଷେପ୍‍କେ ଜ୍‍ର୍‍ନ୍‌ ଦିଲା, ଇରି ମରୀୟମାର୍ ହେଟେ ହ୍‍ଣି ଯୀଶୁ ଜ୍‍ର୍‍ନ୍‌ ଅଇଲା, ତାକେ ଖ୍ରୀଷ୍ଟ ବ୍‍ଲି କ୍ଉତି। ଅନ୍‌କାର୍ ସବୁଲକ୍ ଅବ୍ରାହାମାର୍ ତେଇ ହ୍‍ଣି ଦାଉଦ୍ ର୍‍ଜା ହତେକ୍ ଚ୍ଉଦ ଜ୍‍ର୍‍ନ୍‌, ଆରେକ୍‌ ଦାଉଦ୍ ର୍‍ଜାର୍ ତେଇ ହ୍‍ଣି ବାବିଲୋନ୍‌କେ ଗତି କ୍‍ଟୁକେ ନେତା ହତେକ୍ ଚ୍ଉଦ ଜ୍‍ର୍‍ନ୍‌, ଆରେକ୍‌ ବାବିଲୋନ୍ ତେଇ ଗତି କ୍‍ଟ୍‍ତା ବ୍‍ଳ୍‍ହ୍‍ଣି ଯୀଶୁ ଖ୍ରୀଷ୍ଟର୍ ହତେକ୍ ଆର୍ ଚ୍ଉଦ ଜ୍‍ର୍‍ନ୍‌।


ଯୀଶୁ ଖ୍ରୀଷ୍ଟ ଜ୍‍ର୍‍ନ୍‌ ଅଉତା ଆଗେ ଇ ସ୍‌ବୁ ଗଟ୍‍ଣା ଗଟ୍‍ଲି। ତାର୍ ଆଇସି ମରୀୟମାର୍ ସ୍‍ଙ୍ଗ୍‍ ଯୋଷେପାର୍ ମାଗ୍‌ଣି ଅଇରିଲି, ସେମ୍‍ନ୍ ବିବା ଅଉତା ଆଗେ ସେ ପବିତର୍ ଆତ୍ମାର୍ ଶ୍‌କ୍‌ତି ସ୍‍ଙ୍ଗ୍‍ ହେଟେ ଅଇଲି। ଜ୍‌ଡେବ୍‌ଳ୍ କି ସେ ଗଟେକ୍ କୁଆରି ଦ୍‌ଙ୍ଗ୍‌ଳି ରିଲି। ଯୋଷେପ୍, ତାର୍ ମାଗ୍‌ଲା ଅଣ୍ଡ୍‍ରା ଗଟେକ୍ ଦ୍‌ର୍‌ମ୍ ଲକ୍‌ରିଲା ଆର୍ ମରୀୟମ୍‌କେ ଲକ୍ ମନାର୍ ଲ୍‌ଗେ ଲିନ୍ଦା ନ୍‍କେରୁକେ ଇଚାକ୍‌ରି, ସେ ମନ୍ ବିତ୍‌ରେ ତାର୍ ମାଗ୍‌ଣି ବାଙ୍ଗୁକେ ବାବ୍‍ଲା।
ମ୍‍ତର୍ ସେ ଇରି ମ୍‌ନେ ବାବ୍‍ଲା ହ୍‌ଚେ, ଦ୍‌କା, ମାପ୍‌ରୁର୍ ଗଟେକ୍ ଦୂତ୍ ଚ୍‍ହ୍‍ନେ ତାକେ ଦ୍‍କାଇଅଇ କଇଲା, “ଏ ଦାଉଦ୍ ର୍‍ଜାର୍ ବ୍ଉଶାର୍ ଯୋଷେପ୍, ମରୀୟମ୍‌କେ ତର୍ ମାଇଜି କ୍‌ରୁକେ ଡିର୍‍ନାଇ, କାଇତାକ୍ ସେ ପବିତର୍ ଆତ୍ମାର୍ ଶ୍‌କ୍‌ତି ଲ୍‌ଗେ ହେଟେ ଅଇଆଚେ। ସେ ହିଲା ଜ୍‍ର୍‍ନ୍‌ କ୍‍ରେଦ୍, ଆରେକ୍‌ ତୁମି ତାର୍ ନାଉଁ ଯୀଶୁ ଦିଆସ୍, କାଇତାକ୍ ସେ ନିଜାର୍ ଲକ୍‌ମ୍‍ନ୍‌କେ ସେମ୍‍ନ୍‍କାର୍ ସ୍‍ବୁ ପାପେହ୍‌ଣି ଉଦାର୍‌ କ୍‍ରେଦ୍।”
ଯିଶାଇୟ ବବିଶତ୍ କ୍‌ତା କ୍‌ଉତା ଲକାର୍ ସାଇଜେ ଇଶ୍ୱର୍‌ କଇରିଲା ଯୀଶୁର୍ ଜ୍‍ର୍‍ନ୍‌ ଅଉତା କ୍‌ତା ଜ୍‌ନ୍‌କ୍‌ରି ସ୍‌ତ୍ ଅଇଦ୍, ଇତାର୍‍ଗିନେ ଇ ସ୍‌ବୁ ଗଟ୍‍ଲି, ଯିଶାଇୟ ଅନ୍‌କାର୍ ଲେକ୍‍ଲା, “ଦ୍‌କା, ଗଟେକ୍ ଟକି ହେଟେ ଅଇ ହିଲା ଜ୍‍ର୍‍ନ୍‌ କ୍‍ରେଦ୍, ଆରେକ୍‌ ଲକ୍‍ମନ୍ ତାର୍ ନାଉଁ ଇମ୍ମାନୁୟେଲ ଦେତି”, ଇ ନାଉଆର୍ ଅର୍‍ତ “ଅମାର୍ ମ୍‌ନ୍‌କାର୍‌ ସ୍‍ଙ୍ଗ୍‍ ଇଶ୍ୱର୍‌।”
ସେଡେବ୍‍ଳ୍ ଯୋଷେପ୍ ନିଦେ ହ୍‍ଣି ଉଟିକ୍‍ରି ଇଶ୍ଵରାର୍ ଦୂତ୍ ତାକେ ଜ୍‌ନ୍‌କ୍‌ରି ଆଦେଶ୍ ଦେଇରିଲା, ତାର୍ ହର୍ କ୍‍ଲା ଆର୍ ମରୀୟମ୍‌କେ ବିବା ଅଇ ତାର୍ ଗ୍‍ରେ ଆନ୍‍ଲା। ମ୍‍ତର୍ ସେ ହଇସି ଜ୍‍ର୍‍ନ୍‌ ଅଉତା ହ୍‍ତେକ୍ ସେମ୍‍ନ୍ ଗଟେତ୍ଇ ସଇ ନ୍‌କେର୍‌ତି, ଆରେକ୍‌ ଯୋଷେପ୍ ସେ ହଇସିର୍ ନାଉଁ ଯୀଶୁ ଦିଲା।

Terera ku ମାଥିଉ 1