येशु ॱसोम्‍बुल लोङे तम् १-१२

1हुनी ङीत्‍तुवे नेम्‍बेत् स ङीमे ॱङेट्‌टो दी थोर्च्‍याल भुमु घयेत् दीबे ढीम स्‍यीम्‍बो़त्‍म ॱहीक्‍केङ्‌गी ॱनुम् ॱनम्‍ब गज्‍येन् दी़ब दी खुर्न रो बेक्‍स दील युङ बेत्। 2ॱनी रो बेक्‍सल च्‍योरे दो दी सुर्ल टी स्‍यक्‍प थोङ्‌नी, 3हुब नङ्‌ल स्‍युन फीन्‍नी चोव ज्‍यीन्‍दक् येशुगी कुबुर् दी उन मीप्‍प थोङ बेत्। 4हुनी हुबे घन्‍ड झ्‍युङ ब अक् ॱनो़न हुब गो थोम्‍न दो़प्‍पे यङ्‌ल घो़ टक्‍सी घो़म्‍ब मीरङ् ॱङी ॱरीप् घङ्‌ल हुदु थो़न्‍न युङ बेत्। 5हुनी भुमु दीब हुल टक्‍प सेत्‍न छ्‌यक् छेब बेत्। मीरङ् ॱङीबु दीगी भुमु दीबल ॱस्‍यीनर घयेक्‍की छीक्‍ल खीत् घन्‍डल ॱसोम्‍बु ॱयेङ्‌गो़प्‍प? 6खोङ् ॱसोम्‍बुल लोङ् छर बेत्। हीन मीप्‍प बेत्। खोङ् खीत्‍रङ्‌दङ् गालीलादु दो़प्‍पे यङ्‌ल खोङ्‌गी खीत्‍रङ्‌ल ॱस्‍येप्‍पे केच्‍च्‍य हीगो ढेन्‍सो़ झ्‍यी। 7कोलीमीगी ॱरेबु दीक्‍च्‍येन् घयेक्‍की लक्‍ल टेत्‍न कुरुस्‍ल तान ॱसो़क्‍केन् बेत्। हुनी स्‍यक्‍पु ॱसुम् ॱसोङे ङीन् दी यङ् ॱसोम्‍बुल लोङ्‌गेन् बेत् सीन्‍न ॱसुङ्‌न स्‍यक्‍न यो़क्‍केन् बेत्। 8हीनी क भुमु दीबल येशुगी ॱसुङे केच्‍च्‍य हुगो ढेन्‍सो़ झ्‍युङ बेत्।

9हुनी भुमु दीब रो बेक्‍स दीनी लोक्‍न युङ्‌नी ॱलोप्‍टुक् च्‍युज्‍यीक्‍पु दीब धङ् ॱयोङ्‌म घयेत् दीबल हुदु झ्‍युङे केच्‍च्‍य घयेत् दी ॱस्‍येत्‍न टेप्‍प बेत्। 10ॱनी हीगो ॱस्‍यो़क्‍केन् भुमु घयेत् दीब मरीयम् मग्‍दलीनी, योअन्‍न, याकुब्‍गी आम मरीयम् धङ् भुमु ॱयोङ्‌म आक् यो़प्‍प बेत्। 11ॱनी हील ठीक्‍नल घयेत् दीबे धो़म्‍मीक्‍की केच्‍च्‍य ॱस्‍यो़क्‍कुक् ॱनो़ब छ्‌यर्न हुबे ॱस्‍युली छ्‌य मत् स्‍यक्‍प बेत्। 12ॱनी हीन्‍न अक्, पत्रुस् ॱहोक् लोङ्‌न रो बेक्‍स दील तदु ज्‍युन फीम्‍ब बेत्। ॱनी रो बेक्‍स दील ॱलीत्‍नी हुदु नङ् दील गुक् झ्‍यीन तेनी उन एल्‍ला खोङ्‌गी कुबुर् तुम्‍बे रे दीरङ् क धबील यो़प्‍प थोङ बेत्। हुनी घन्‍ड झ्‍युङ ब अक्? ॱनो़न लोक्‍न युङ बेत्।

इम्‍मौस्‍की लम्‍दु येशु थो़म्‍ब १३-३५

13ॱनी हुगी ङीन् दी हुबे छीक्‍नी मीरङ् ॱङी इम्‍मौस् युगङ्‌ल फीम्‍ब बेत्। हुदु यरुशलेम्‍नी छ्‌युजो़त् ॱङीजो़त् च्‍यीक्‍की ची थोगेन् बेत्। 14ॱनी हुगी कप्‍ल हुदु झ्‍युङे केच्‍च्‍य घयेत् दीगी ढीक्‍ल हुब ॱङीबु तम्‍स्‍यु लप्‍कील्‍ल लम्‍ल डोये यङ्‌ल 15येशु थो़न्‍न हुबदङ् जोम्‍न मुल फीम्‍ब बेत्। 16ॱनी हीन्‍न अक्, हुबे येशु हीन्‍डो ॱनो़ब ॱमत् छ्‌यर बेत्। 17ॱनी खोङ्‌गी हुब ॱङीबुल खीत् घन्‍डे तम्‍स्‍यु लप्‍को़प्‍प? सीन्‍न ढीब बेत्। हुनी हुब ॱङीबु ठेल्‍ल देत्‍न ॱसीम्‍ब दुक्‍तोक्‍प डस्‍सी झ्‍यीन 18हुब च्‍यीक् केलोपास् सीक्‍केन् दीगी खोङ्‌ल हीगी दी़न्‍डक् हीगी नङ्‌ल हीदु झ्‍युङे केच्‍च्‍य घयेत् ॱस्‍यो़च्‍च्‍ये मीप्‍पे मी यरुशलेम्‍न खो़त् च्‍यीक्‍पुरङ् हीम्‍ब? सीन्‍न ढीब बेत्। 19ॱनी हील खोङ्‌गी घन्‍ड झ्‍युङ बेक्‍क? सीन्‍न ढीनी, हील हुब ॱङीबी़ नासरत्‍की येशुगी ढीक्‍की केच्‍च्‍य ॱनी। को़न्‍ज्‍योक् धङ् मी घयेक्‍की खोङ् ॱङो़न्‍ने कलुङ् ॱस्‍यो़क्‍केन् हीम्‍ब ॱसम्‍न युङ बेत्। खोङ् यम् छेम्‍मे ले जेक्‍केन् धङ् ॱस्‍युक् छ्‌यीम्‍मी़ केच्‍च्‍य ॱस्‍यो़क्‍केन् झ्‍युङ बेत्। 20हज्‍यरङ्‌गी हीगी छ्‌यो़प्‍पो़न् चो छ्‌यीया घयेत् धङ् लुङ्‌बे चो छ्‌यीया घयेक्‍की खोङ् ठीम्‍सल च्‍येन ॱसो़त् गोगेङ्‌गी छ्‌येप्‍प केन कुरुस्‍ल तान ॱसो़त्‍तु ची़प्‍प बेत्। 21ङीक्‍की स्‍येन् खोङ् इस्राएली घयेत् छ्‌यीन ॱलुदु युङ्‌गेन् दी हीम्‍ब ब अक् ॱनो़न रीगो झ्‍यीबेन्। उजो़त् च्‍यीक्‍की ॱमीत् छेप्‍प, हीगो झ्‍युङ्‌नी हरीङ्‌दङ् स्‍यक्‍पु ॱसुम् ॱसोङ बेत्। 22ॱनी हरुङ्‌द ङीक्‍की छीक्‍नी भुमु यरीगी ॱह लेसीगी केच्‍च्‍य च्‍यीक् ॱस्‍येच्‍च्‍युङ्। हुब हरीङ् ॱङेट्‌टो थोर्च्‍याल खोङ्‌गी कुबुर् झ्‍यीस्‍से रो बेक्‍स दील फीन्‍नी 23उन खोङ्‌गी कुबुर् दी हुबे मीन्‍दुक् सीगुक्। हुनी हुब लोक्‍न युङ्‌नी, रोरङ्‌सोल तेङ् यी़गी भङ्‌ज्‍येम्‍ब थो़न्‍न खोङ् ॱसोम्‍बु यो़क्‍केन् बेत् सीन्‍न ॱस्‍येच्‍च्‍युङ् सीगुक्। 24हीनी ङीक्‍की दगु छ्‌यीट्‌टो यरी रो बेक्‍स दील तदु फीन्‍नी भुमु दीबे एल्‍ला ॱस्‍येप्‍प दी डस्‍सीरङ् यो़प्‍प थोङ्‌ज्‍युङ् सीगुक्। ॱनी खोङ्‌दङ् ॱमत् ठेप्‍पेत् सीन्‍न झ्‍यीब बेत्।

25हीनी खोङ्‌गी हुब ॱङीबुल हीन्‍दुक् ॱसुङ बेत्। खीत्‍रङ् म दीरङ् घुस्‍सी दुक्। कलुङ् ॱस्‍यो़क्‍केन् घयेक्‍की ॱस्‍येप्‍पे केच्‍च्‍य घयेत्‍ल छ्‌य स्‍योक् ॱमीत् छुगेन् घन्‍डे दुक्‍प। 26को़न्‍ज्‍योक्‍की को़बे च्‍यप्‍को़न् ख्रीष्‍ट्‌ल हुगो डस्‍सीगी दुक्‍स्‍यी छ्‌यीम्‍मु नोङ्‌नी हुनी खोङ्, खोङ् रोरङ्‌गी तो़त्‍वङ्‌गी ओ़च्‍च्‍य झ्‍यीस्‍सल डो गोगेन् मेम्‍बेक्‍क ॱनी? सीन्‍न ॱसुङ बेत्। 27हुनी खोङ्‌गी मोशा धङ् कलुङ् ॱस्‍यो़क्‍केन् घयेक्‍की ढीबे ॱसुङ्‌रप्‍नी झ्‍यीनी, ॱसुङ्‌रप् जेङ्‌ल खोङ् रोरङ्‌गी ढीक्‍ल घङ् ढीन यो़प्‍पे धो़न् घयेत् दी हुब ॱङीबुल ॱस्‍येत्‍न टेप्‍प बेत्।

28हुनी हुब ॱङीबु रोरङ्‌सो डोस्‍से युगङ् दील ॱलीच्‍च्‍येम ॱयेङ्‌नी, हुनी खोङ् हुबदङ् घीन ॱयोङ्‌ल डोज्‍येम झ्‍यीब बेत्। 29ॱनी हुब ॱङीबी़ खोङ्‌ल ह गोङ्‌ज्‍यो नम् ॱरो़ज्‍येम झ्‍यीसोङ्। ङीत्‍तङ् दल स्‍युरो झ्‍यी सीन्‍न गन्‍दीक्‍म स्‍युदेन् ज्‍यब बेत्। हुनी खोङ् हुबदङ् दल फीम्‍ब बेत्।

30ॱनी गोङ्‌मु दी हुब ॱङीबुदङ् दल सम सये यङ्‌ल खोङ्‌गी छ्‌यक्‍ल ढोप्‍ची दी ॱनम्‍न को़न्‍ज्‍योक्‍ल थु छ्‌यी पुन हुनी च्‍यक्‍न हुबल टेप्‍प बेत्। 31हुनी क हुब ॱङीबी़ ॱसीम्‍बे ॱमीक् दी भीन खोङ् ङु ॱस्‍यीब बेत्। हुनी ॱस्‍यर्च्‍यक् खोङ् ॱमीत् थोङ्‌गेल्‍ल टप्‍नर बेत्।

32हुनी रोरङ्‌सो ॱङीबु हज्‍यरङ् लम्‍ल डोये यङ्‌ल ॱसुङ्‌रप्‍की धो़न् घयेत् खोङ्‌गी हज्‍यरङ्‌ल ॱस्‍येत्‍न टो़प्‍पे यङ्‌ल हज्‍यरङ्‌ल गेसक्‍की स्‍यीदङ् च्‍यीक्‍रङ् लङ्‌ज्‍युङङ् ॱनी? सीन्‍न लप्‍री चीय बेत्।

33हुनी ॱस्‍यर्च्‍यक् ॱहोक् लोङ्‌न हुब ॱङीबु यरुशलेम्‍ल युङ बेत्। युङ्‌नी उन ॱलोप्‍टुक् च्‍युज्‍यीक्‍पु दीब अक् झ्‍ये, हुनी दगु ॱयोङ्‌म आक् जोम्‍न यो़प्‍प ठेप्‍प बेत्। 34ॱनी उन जोम्‍न यो़प्‍प घयेत् दीबे हुगी मीरङ् ॱङीबु दील चोव ज्‍यीन्‍दक् गन्‍दीयरङ् ॱसोम्‍बुल लोङ्‌दुक्। शीमोन्‍दङ् ठेत्‍तुक् सीन्‍न ॱस्‍येप्‍प बेत्। 35ॱनी हुगी ॱङीबु दीगी इक् रोरङ्‌सो लम्‍ल डोये यङ्‌ल घङ् झ्‍युङे केच्‍च्‍य दी धङ् ढोप्‍ची च्‍यक्‍न तीरे यङ्‌ल येशु ङु ॱस्‍यीबे केच्‍च्‍य दी कुरीक् हुब घयेत्‍ल ॱस्‍येत्‍न टेप्‍प बेत्।

येशु ॱलोप्‍टुक् दीबे घुङ्‌दु थो़म्‍ब ३६-४९

36हुबे हुन्‍दुक् झ्‍यीन ॱस्‍यो़प्‍पे यङ्‌ल हुब घयेक्‍की घुङ्‌दु येशु डङी थो़न्‍न युङ बेत्। ॱनी खोङ्‌गी हुब घयेत्‍ल खीत्‍रङ्‌ल स्‍यीव दीव युङ स्‍योक्‍च्‍यीत् सीन्‍न ॱसुङ बेत्। 37हील हुब घयेत् गन्‍दीक्‍म टक्‍प सेत्‍न ज्‍यीबे, म दीरङ् ॱस्‍यीम्‍बु हीम्‍ब न घन्‍ड ब अक्? ॱनो़ब छ्‌यर बेत्। 38हीगोल खोङ्‌गी खीत् घन्‍डल ज्‍यीक्‍टक् लङ्‌गुक्‍क। घन्‍डल मेन्‍डो ॱनो़ब खुर्केन्। 39ङे लक्‍प धङ् कङ्‌बल तो़। ॱङो़न्‍ने ङ हीन्। ङल सीन्‍न तो़। ङल खीत्‍रङ्‌गी थोङे ॱस्‍य धङ् री़त्‍तोक् यो़प्‍प डस्‍सी ॱस्‍यीम्‍बुल हीन्‍दुक् झ्‍यीब मीत् युङ्‌गेन् बेत् सीन्‍न ॱसुङ बेत्। 40हीगो ॱसुङ्‌नी खोङ्‌गी लक्‍प धङ् कङ्‌ब दी हुबल तो़म्‍ब बेत्। 41हुनी हुबल गेस धङ् ॱह लेब झ्‍युङ्‌नी, हुबे छ्‌य दीरङ् स्‍योक् ॱमत् छुब बेत्। ॱनी खोङ्‌गी हुबल सम यो़प्‍पक्? सीन्‍न ढीब बेत्। 42ॱनी हुबे ने ॱस्‍य ॱहेब च्‍यीक् खोङ्‌ल टेप्‍प बेत्। 43ॱनी हुगो खोङ्‌गी लीन्‍न हुबे दोङ्‌दु सेब बेत्।

44खोङ्‌गी हुबल ङ खीत्‍रङ्‌दङ् दल दो़प्‍पे यङ्‌ल ङे खीत्‍रङ्‌ल हीन्‍दुक् सीन्‍न मोशागी छ्‌यो़डीम्‍ल, कलुङ् ॱस्‍यो़क्‍केन् घयेक्‍की ॱसुङ्‌रप्‍ल धङ् ॱसुङ्‌रप्‍की गुल्‍लुल ङे ढीक्‍ल ढीन यो़प्‍पे केच्‍च्‍य घयेत् कुरीक् डुप् गोगेन् बेत् सीन्‍न ॱस्‍येप्‍पेन् न ॱनी झ्‍यीब बेत्। 45हीनी क ॱसुङ्‌रप्‍की धो़न् घयेत् दी ॱह घो छुगेल्‍ल खोङ्‌गी हुबे ॱसीम्‍बे ॱमीक् दी भीदु ची़प्‍प बेत्। 46खोङ्‌गी हुबल ॱसुङ्‌रप्‍ल हीन्‍दुक् सीर थो़ङ्‌गेन् बेत्। को़न्‍ज्‍योक्‍की को़बे च्‍यप्‍को़न् ख्रीष्‍ट्‌ल दुक्‍स्‍यी छ्‌यीम्‍मु नोङ्‌न, ढोङ् गो़ ॱस्‍यर्केन् बेत्। हुनी स्‍यक्‍पु ॱसुम् ॱसोङे ङीन् दी यङ् ढोङ्‌नरे ॱसनेनी ॱसोम्‍बुल लोङ्‌गेन् बेत्। 47हीनी ॱसीम् ज्‍युर् गोगेङ्‌गी केच्‍च्‍य धङ् दीक्‍प धक्‍केङ्‌गी केच्‍च्‍य घयेत् यरुशलेम्‍नी झ्‍यीनी ज्‍यी़त् ज्‍यी़त् घयेत्‍ल खोङ्‌गी छेन्‍नी ॱस्‍यो़त् गोगेन् बेत्। 48खीत्‍रङ् ङे हीगी केच्‍च्‍य घयेत् हीगो पङ्‌बु झ्‍यीन ॱस्‍यो़क्‍केल्‍ल युङ्‌गेन् बेगो। 49तेदे ङे यप्‍की ॱनङे छ्‌यो़त्‍तुम् जेप्‍प दी ङे इगीनी मल्‍ल तङ् योङ्। हुनी खीत्‍रङ्‌ल ॱस्‍यीक् ॱङीक्‍केन् बेत्। ॱनी नम् ॱस्‍यीक् ॱङीत् ॱङीत् थुक्‍ल खीत्‍रङ् हीगी सार् हीदुरङ् दो़च्‍च्‍यीत् सीन्‍न ॱसुङ बेत्।

येशु तेङ् यी़ल झ्‍यो़न्‍नर ५०-५३

50हुनी हुब घयेत् बेथानी युगङ्‌ल ते ठीक्‍न हुदु खोङ्‌गी छ्‌यक् ॱङीबु दी ॱनम्‍ल छ्‌यर्न हुबल ॱमेल्‍लम् ज्‍यप्‍न टेप्‍प बेत्। 51ॱनी हीगी ॱमेल्‍लम् हीगो ज्‍यक्‍पे यङ्‌ल खोङ् हुबदङ् भीन, इगी तेङ् यी़ल डुनर बेत्। 52हुनी हुब घयेक्‍की खोङ्‌ल छ्‌यक् छेब बेत्। ॱनी गेस छ्‌यीम्‍मु झ्‍युङ्‌न, यरुशलेम्‍ल लोक्‍प बेत्। 53हुनी हुब छीगङ् ज्‍यी़न्‍दु छ्‌यो़गङ्‌ल फीन्‍न को़न्‍ज्‍योक्‍ल यस्‍सो पु पुब झ्‍यीब बेत्।

Terera ku लुका 24