Kodaku

ईसु भीड़िय ञेंलकेते बुरू रेय रकब यनु, अवुर हें-डेय दुड़ूब यनु, तहाँ चेला कुतय हेंय थरे कू मेजेना। अवुर हेंय हेंकू नआँ घयते कहनी केतेय चेडकू दोहो एनु।


“मन रे दीन इदान कुआ, हेंकू आसीस कू ञाँमा, कहेकि सरग राज हेन कुराः हवे। अब दुख राः इस्तिथि रे इदान कुआ, हेंकू आसीस कू ञाँमा, कहेकि हेंकू सान्ति कू ञाँमा। नम्र गिआकू, हेंकू आसीस कू ञाँमा, कहेकि हेंकू धरती राः हँकदारी कू होयाआ। भगवान राः नँजेर रे धरमिः लगड रँगेज ततँग केन हेंकू, आसीस कू ञाँमा, कहेकि भगवान हेंकुय पुरो कुआ। दयाः हेंकू, आसीस कू ञाँमा, कहेकि हेंकू थरे होय दयाआ। जे जे राः मन सुद्ध गिआ, हेंकू आसीस कू ञाँमा, कहेकि हेंकू भगवान कू ञेंलेया। मिमीलोः हेंकू, आसीस कू ञाँमा, कहेकि हेंकू भगवान रेनकू चोंडिजकू कहोआ। धरमिः राः चलते तेकू सतो कुआ, हेंकू आसीस कू ञाँमा, कहेकि सरग राज हेन कुराः हवे। अपे, होड़कू ईञाः चलते तेकू निंदा पेरे, अवुर कू सतो पे, अवुर झूठ मुठ ते टेबोः केते, अपे केय गोटंग अनाप सनाप तेकू टेबोः नसो पेरे, अपे आसीस पे ञाँमा। हेना तोलोग अपे खुसी अवुर बहाली पे मनो, कहेकि अपे लगड सरग रे बडेआ ईनाम इदाना। नेन घयते अपे वरी पहीलाःकू भविस्यवक्‍ताकू होकू सतो तेडकुआ।”


“अपे ओतेत रेनकू बूलुंग कू हवे, लेकिन बुलुंग राः चहट उजड़ जोम रेदो, हेना ची ते चहाटेआ? फेर हेना दो कनर काम रे एरो मेजेना। नआँ बहेर हनतेकू घी रेआ अवुर होड़कू हेना कू तिका बयो वेआ। अपे धरती रेनकू इंजोतकू हवे। बुरू अगस रे दोहोना सहर मेने उकुआ। अवुर दीया जबके ते होड़कू टुकवाः ते मेने कू हरूबेआ, लेकिन हेना अगस रेकू टेंगवा तआ, हेंडे हेना ओड़ाः रेनकू सींड़कू मरसल वकुआ। नेन घयते अपे राः जीवन हो मरसल घयते होड़कू मड़ंग रे चमकोऊ, हेंडे हेंकू अपे राः बढ़ियाँ काम कू ञें-ला, अवुर सरग रे इदानिया अपे रेनिय भगवान अपापेकू बडेय वया।”

“इंञ धरम नियम चहे भविस्यवक्‍ताकू लिखो केडा कागद रादे लगाडिंञ मेजकेना मेनते अलोपे अड़िंगू। इंञ हेना रादे लगड मेने, बल्कि हेना पूराय लगाडिंञ मेजकेना। इंञ अपे थरे सही मेतेंञ कहनी यडा, अगस अवुर ओतेत भले मिटियोऊ, लेकिन मूसा राः नियम वरी मियाँटंग अक्छर अवुर बिंदू घली बेगर पूरा ते एरो मिटियो एना। हेनाते कनय नआँ हुकूम मेंडे कनर मियाँटंग दमभरा अहोय टोवीजे, अवुर होड़कू हेनेन घयतेय चेडकू रेदो, हेंय सरग राज रे सींड़कू वरी होडिंञय कहोआ। लेकिन जे नआँ हुकूमिय मनोआँ, अवुर नअय चेडकुआ, हें-नी सरग राज रे बडेअय कहोआ। इंञ अपे थरे सही मेतेंञ कहनी यडा, अपे राः धरमी जीवन एहूदी नियम चेचेडकू अवुर फरीसिकू राः धरमी जीवन वरी बढ़ ते मेने दोहोन रेदो, अपे सरग राज रे एनेरो पे सेन सको एना।”

“अपे मरिताःकू थरे न याःते कहनी केड हेना पे अँजोम केडा, ‘अलोपे ञेंड गोजकू’, अवुर ‘कनायिय ञेंड गोज हेंय, कोट कछेरी रे सजा ञँम लायिक गिआयू।’ लेकिन इंञ अपे थरे नआँ घयतेंञ कहनी यडा, कनय अपन भाई धकोवाः हेंय, कोट कछेरी रे सजा ञँम लायिक इदानिया, अवुर कनय अपन भाई बे-कमाअय मेनतेय कहनी वयू, हेंय दरबार रे सजा ञँम लायिक इदानिया, अवुर कनय, ‘ए, बोया’ मेनतेय कहनियू, हेंय नरक राः सेंगेल रे सजा ञँम लायिक इदानिया। अगर अम धाम रे भेंट मी रकब तोलोग, अवुर हेना रे अमाअय भाई राः मन रे अमाः बिरोध रे कनारा इदाना, हेनाम उहयर ञँम रेदो, धाम मड़ंग रे अमाः भेंट मी बगीवा, पहले अम अपन भाई सुदाम मेल परेम कोऊ, हेना वरी मेजकोःते अमाः भेंट मी रकाबू। अम अमाअय मुदेय कोट कछेरी हनतेय गोःमी तोलोग होनोर भर्रे हेंय सुदा बरोबर कोःमी, नहीं तदो हेंय न्यायी थरेय इदी मिआँ, अवुर हेंय पुलूस कुय जिमा वआँ, अवुर हेंकू जेहेल रेकू डलो मिआँ। इंञ अपे थरे सही मेतेंञ कहनी यडा, एगो एगो अनायिन पे भरोवे मेन दिन हेना वरी एरो पे उडूंग एना।”

अपे, “अलोपे लंद फँदुऊ” मेनते कहनी केड हेना पे अँजोम केडा। इंञ अपे थरेंञ कहनी यडा, जे होड़ कनय कोड़ीहोन गलत नँजेर तेय ञेंलेयू, हेंय अनेज राः मन रे हेंय सुदा लंद फँद कामिय करो केडा। अगर अम जोम हन मेड मी एर पाप मी रेदो, हेना उडूंग केतेम घिर गोत्ते; कहेकि सींड़ होड़ोम नरक रेम एर डलोः सेथा दो, मियाँ अंग नासुःऊ हेना बढ़ियाँ गिआ। अगर जोम हन तीम एर पाप मी रेदो, हेना बोंगेर केतेम घिर गोत्ते; कहेकि सींड़ होड़ोम नरक रेम एर डलोः सेथा दो, मियाँ अंग नासुःऊ हेना बढ़ियाँ गिआ।


“नआँ घयते कहनी केड हेना हो इदाना, ‘कनय अनेज कन्याँय बगिवय रेदो, हेंय पंचनमा कागद बनो केतेय ओवायू।’” लेकिन इंञ अपे थरेंञ कहनी यडा, कनय हो अपन कोड़ीहोन लंद फँदुः वरी कनर एटाः घियाः चलते तेय बगिवय रेदो, हेंय लँद फंदु अयिय बनो यडिया; अवुर कनय हेंय बगी वडिया कोड़ीहोनिय असुलू, हेंय लंद फाँदुः तनायू।

“अपे मरिताःकू थरे न याःतेय कहनी केड हेना पे अँजोम केडा, ‘जलिया ते अलोपे कीरियाऊ, अपे परभु लगड कीरिया केन हेना पे पूरोवे।’ लेकिन इंञ कहनी वपे तना, कबोह अलोपे कीरियाऊ; न दो सरग सुदा, कहेकि हेना भगवान राः सिहासन हवे; न दो धरती सुदा, कहेकि हेना हेंय कटा राः चवकी हवे; न दो एरुसलेम सुदा, कहेकि हेना बनाडेअय राजा राः सहर हवे। अपन भोः सुदा हो अलोपे कीरियाऊ, कहेकि अपे मियाँटंग ऊब हो एरो पे पुंडी तेडा, न पे हेंदे सकोआ। लेकिन अपे ‘हे’ मेंडे दो ‘हे’ ‘एरोः’ मेंडे दो ‘एरोः’ मेनते पे कहनियू; कहेकि जो कुछ न वरी बगरा होयाआ, हेना सयतान हनवरी होयाआ।”


“अपे नआँ घयते कहनी केडा हेना होपे अँजोम केडा, ‘मेड बदला मेड, अवुर तिरींग बदला तिरींग।’ लेकिन इंञ अपे थरेंञ कहनी यडा, अपे सुदा खराब कामिय कामा, हेंय सुदा बदला अलोपे मिड़ागे, अगर कनय हो मियाँ गतर जोहापे रेय चाड़ोवे रेदो, एटाः गतर होपे ओयठा वयू। अगर कनय दरबार रे बदी केपे ते अपे वरी अँगाय असी रेदो, हेंय कोट होपे ओवायू। कनय अपे कोस भरिय गोःपे लगाडिय जिदहाय पे रेदो, हेंय सुदा दूय कोस पे सेनुऊ। जरूरत रे कनय असी पेरे रेदो, हेंय ओवाय पे, कनय उधारिय असी पे रेदो, हेंय ओवाय पे।”


“अपे, ‘अपन परोसी सुदा परेम तेपे दोहोनू, अवुर अपन मुदेयकू थरे खुरेस सबता’ मेनाआँ टेबोःपे अँजोम केडा।” लेकिन इंञ कहनी वपे तना, अपे रेनकू मुदेयकू सुदा मया मिलन तेपे दोहोनू, अवुर अपेकू सतो पेआ, हेंकू लगड पे बिनतिऊ। ताकि अपे, सरग रेनिय अपा रेनकू चोंडिज कुपे बनोऊ। कहेकि हेंय बढ़ियाँ होड़कू अवुर खराब होड़कू लगड हो बे-रिय उगोआ, अवुर धरमी होड़कू लगड अवुर अधरमी होड़कू लगड हो दाईय एर उयुआ। कहेकि अपे सुदा मया मिलन तेकू दोहोना, हेंकू सुदा मया मिलन तेपे दोहोन रेदो, अपे ची फल पे ञाँमा? न घयते दो, अपे पापी होड़कू मेनते पे कहनी वकुआ, हेंकू मलगुजारी तिला कुहो कू करो वेआ। “अगर अपे अपन भाईकू पे जोहारवा रेदो, बड़ा भारी काम पे काम यडा किदो? न घयते भगवान मेने पपाड़िकू हो मेने कू करो वेआ किदो? हेनाते, जे घयते अपे रेनिय अपा पक्‍का गिआ, हेन घयते अपे हो पक्‍का पे बनोऊ।”

Terera ku मत्ती 5