Godié: Godie Nouveau Testament (New Testament)

Godie Nouveau Testament

Zozii ni bhɛ lä ‑jlü 'kädaa 'yi nä, kɔ gblää‑ 'sää 'kükë 'wlu, 'nɩ ɔ yi sä kʋ. 'Nɩ ɔɔ' 'kʋgënyʋa yio yëku 'jloo 'nɩ ɔ yiwa cɩalɩ 'kʋ cie, ɔ lä
‑Wa plöö‑ lä 'wugɔɔ 'mnö ŋäzönyʋä nä, wa yä 'pʋ!
Laagɔɔ' 'Leyiduu ‑glö yɩ waa' lʋʋ.
‑Wa tu lä nä, wa yä 'pʋ!
Laagɔ yiwa 'yii sɩɔ.
‑Wa nää‑ lä plɛkʋ nä, wa yä 'pʋ!
Laagɔɔ' ‑dʋdʋʋ ‑ʋ yi lä nä,
Wamää‑ 'gʋʋ lä jaa 'kʋ lä lüü!
‑Lʋa 'yigëgbɩɩ' nʋtʋ bhlä lä nynä ‑gbugbe ‑yä 'mnätʋ 'sɔ nä, wa yä 'pʋ!
Sä wa ylä lä nä, Laagɔ yiwa sɔɔ 'nyɛ.
‑Wa ‑kä lä ŋäzöplɛ nä, wa yä 'pʋ!
Laagɔ yiwa ŋäzö yibhë.
‑Wanö pleyii‑ ‑kplɔ lä wɩa nä, wa yä 'pʋ!
Wa yi Laagɔ 'yi 'ni.
‑Wa gbä lä 'nɩ 'kʋ wɔtɔlɩ kʋ lä nyɩkpa pää' nä, wa yä 'pʋ!
Laagɔ yiwa ʋʋ' 'yuë laa.
‑Lʋa wa klä lä nyenyisä 'yigëgbɩɩ' ‑za nä, wa yä 'pʋ!
Laagɔɔ' 'Leyiduu plöö‑ yɩ waa' lʋʋ.
Anyɩ nä, nyɩkpa ka'anyɩ 'bhɩsɛ, 'nɩ wa ka'anyɩ 'sɩɩ nyenyisä klä, 'nɩ wa ka'anyɩ ‑kpläkplösä yëku 'mʋ sää 'naa 'ŋnöö ‑za nä, a yä 'pʋ!
Nä, a nʋ ‑pʋpɛ ‑yä a kään ‑jäkä pleyii ‑mä, anyɩa' bɔɔpälɩ 'kädɩ ‑kʋ ‑mɔɔ Laagɔ yëku. 'Plɔfɛtɩnyʋa 'fɩɩn ‑wa ‑kʋ bhlä tɛɛ nä, sɔɔ ‑säkä ‑säkä wa ‑klʋwa lä nyenyisä.

Anyɩ nä, anyɩ‑ plöö‑ lä ‑mää 'ylʋzɔɔ' glü. Glü kä nyɔnyɔɔ' ‑bhɩä nä, säsä wa yii bhä nʋ 'nɩ wa yii bhä bʋkʋ mɛnɔɔ' 'ŋʋʋ? Ɩɩ' yɩɔ lʋʋ 'kʋ ‑ŋwa nä, kwa jɛnɩ jlukʋ 'nɩ 'plöplönyʋä nämnönɩ 'kʋ. Anyɩ‑ plöö‑ lä 'ylʋzɔɔ' zëlü. 'Duu lʋʋ wa 'slää‑ lä 'kükë 'wlu nä, ʋʋ' ‑lä 'kɔɔn 'kʋ zizio. 'Nɩ 'näpɛ wa kɛ 'yi döö‑ nä, waa' 'gbie ‑wʋ ‑takwë 'wlu, ‑mä zëkpë 'kʋ wa ŋʋɛ 'nɩ ɛ ŋänɩä gbëë' nyɩkpaa' 'fɩɩn 'kʋ. Nä, anyɩa' zëlüü, ɩ ŋänɩä 'sɔɔ nyɩkpa 'kʋ! Ɩmɩ 'mnö wa 'kä lä anyɩa' 'nägägbɩɩ 'yi 'nii ‑yä wa 'kä lä a 'Bä Laagɔ 'ŋnu fään.

A 'nä bhobho ‑lä nynä ‑mä Moyizöö' ‑Jlämaa ‑yä 'Plɔfɛtɩnyʋa' ciciwälɩɩ, kä n ‑yi ‑yä n 'kɩ ‑lɔɔ ‑sä. Nn' ‑wʋ cii‑ nynä n 'kɩ ‑lɔɔ ‑sä ‑mä, ɩ 'kä glää nä, 'ɩzä n ‑yi lä. ‑Nʋawlɛɛ 'mnö, n sonö'anyɩ nynä ‑mä, 'tänyɩɩ 'fɩɩn 'mnö ‑laagɔ ‑yä ‑dʋdʋ 'sɔ yi lä kʋ nä, Laagɔɔ' ‑Jlämaa' ‑lä 'kɔɔn 'pɛ 'kʋ ‑bha. Aa' ‑lä 'sää 'näböyilɛɛ 'kʋ ‑bha. Sɔɔ ɩ 'kä lä kʋ ‑aaa, ‑yä wälɩɩ 'fɩɩn‑ ‑jɩjlɔɔ lä nä, ɩ 'kä glää. Nyɩkpɔɔ' lɔɔ ‑ɔ gä ‑Jlämaa nëëdëë' ‑jlämö 'tɩkɩɩlɛɛ 'titi 'klʋkpä ‑sä nä, 'nɩ ‑ɔ gä ɔ ‑liesɩ ‑soo nynä ‑mä wa nʋ ɔmɔ 'bhisäkʋ nä, ‑mɔɔ Laagɔɔ' 'Leyiduu 'mnö nä, ‑lɔɔ' nyɩkpɔɔ nyɩkpa 'tɩkɩɩlɛɛ wa 'kɔ laa. 'Ɩzä ‑ɔ yi lä ‑Jlämaa 'fɩɩn 'klʋkpää' 'ŋʋ, 'nɩ ‑ɔ yia lä 'sɩɩ cɩa nä, ‑mɔɔ Laagɔɔ' 'Leyiduu 'mnö nä, ɔmɔ wa 'kä lä nyɩkpa 'kädɔ laa. Kä n mʋ'anyɩ yɩ soo ‑kää nynä ‑mä, ‑Jlämöcɩanyʋa ‑yä Falizɩɛnyʋaa' 'yigëgbɩɩ, anyɩa' 'yigëgbɩɩ 'nɩɩ 'kʋ ‑zi nä, aa' ‑lä 'kɔɔn Laagɔɔ' 'Leyiduu 'mnö plä.

A nuu‑ nynä ‑mä, wlä kä Moyizöö' ‑Jlämaa soo bhä ‑a 'bäsɩ nynä ‑naa 'bhlä ‑lä ‑n ‑lie. Nyɩkpɔ kä ɔ ‑lie bhlää‑ nä, ɩ ‑ŋwa 'kʋ nynä ‑mä wa kunöɔ tʋ 'zuzu dëlü. ‑Mä ‑amʋ kä n mʋ'anyɩ yɩ soo ‑kää nynä nyɩkpɔ ‑kä ɔ ‑liee' ‑za gbʋgblɛ pleyii ‑kä nä, ‑lɔɔ' nyɩkpɔɔ wa kunöɔ 'zuzu dëlü tʋ. 'Nɩ nyɩkpɔ kä 'sɩɩ ɔ bheli 'bhɩsɛ‑ nynä ‑naa 'fiee nä, ‑lɔɔ' nyɩkpɔɔ, ɩ ‑ŋwa 'kʋ nynä wa kunöɔ 'Zufʋnyʋaa' 'Tütüplä‑jɛnyɩɛ yëku tʋ ‑yä wa 'kɔ gbäylö ‑sä. 'Nɩ nyɩkpɔ kä 'sɩɩ ɔ bheli ‑soo nynä ‑mä, dëbënyɔ‑ nä, ‑lɔɔ' nyɩkpɔɔ, ɩ ‑ŋwa bhä 'kʋ nynä wa 'pɔɔ 'Dëvloo' ‑Kosu ‑düdëa 'mnö. 'Nɩ Zozii yiwa bʋkʋ soo, ɔ lä ‑n gä cii‑ nynä ‑mä ‑n 'gä Laagɔɔ' bʋbɔda mʋ ‑yä, ‑n 'gä bʋbɔ bʋbɔlʋʋ Laagɔ 'nyɛ nä, ‑n gä ‑lʋʋ fädä ‑kʋ 'nɩ ‑n gä ‑luë nynä ‑mä ‑n bheli ‑kä ‑naa wälɩ 'mnö nä, ‑lʋʋ ‑n fä bhlä nä, ‑n tu ‑lɔɔ bʋbɔda, ɩyä ‑n 'ylɩbhɔ ‑n bheli yëku ‑yä ‑n ‑yɔsɔ 'nunu 'fɩa. ‑N ‑yɔsɔ kä yɩ 'nunu‑ nä, ‑naa ‑lʋʋ ‑n fä bhlä bʋbɔlɩɩ' ‑za nä, ‑lɔɔ ‑tɛɛ ‑n nä ‑n fʋʋ. Nyɩkpɔ kä‑ä 'zuzu dëlü tʋ ‑kuu nä, 'tänyɩɩ ɔ ‑yä ‑mɔɔ 'sɔ ‑kʋ lä ‑mɔɔ mʋdä nä, ‑n nʋ saa 'fɩɩn ‑yä ‑n ‑yɔsɔ 'kä 'mʋ 'nunu ‑yä ɔɔ' kä‑ä ‑kä 'zuzu dëlü fä, ɩyä 'zuzuo ‑mä 'sɩɩ, ɔɔ' kä‑ä ‑kä ‑jɩɩ gbëë' 'sʋjaa kuu nynä wa 'ŋʋ‑ʋ ‑jɩɩ'. ‑Nʋawlɛɛ 'mnö, n sonö‑ö nynä ‑mä, ‑n 'nö sɔɔ ‑nʋ 'nɩ kwa kä‑ä ‑jɩɩ' paa‑ nä, ‑n yi ‑mɔɔ ‑jɩɩ kʋ 'nɩ ‑n yi ‑lɔɔ' dluu plʋʋdä kʋ ‑aaa, 'nɩ ‑pikinii' ‑lä ‑mɔɔ too.

A nuu‑ 'sɩɩ nynä ‑mä kä Moyizöö' ‑Jlämaa cii‑ nynä ‑Naa 'ylä ‑lä ‑n ‑liee' 'ŋnɔ, ɩyä ‑naa 'ylä ‑lä ‑n ‑liee' 'wli. ‑Mä ‑amʋ nä, kä n mʋ'anyɩ soo ‑kää nynä ‑mä, nyɩkpɔɔ' lɔɔ‑ wloo lä 'ŋnɔ, 'nɩ ‑ɔ ci lä ɔɔ' pleyii nynä ‑mä, 'ŋnɔnɔ n yio 'ylä nä, ‑lɔɔ nyɩkpɔɔ, ɔ ‑yä wɛzä 'ŋnɔɔ 'ylä ‑mɔɔ ɔɔ' pleyii. ‑Naa lüüklä‑yie kä gbä 'nɩ ‑n gä nyenyii' bhlüü nä, ‑n ‑sɛɛ ‑mɔɔ! ‑N ‑sɛɛ ‑mɔɔ ‑yä ‑n 'pɛɛ 'klä fɛɛn! Sä ‑n 'gä 'bhë 'kʋ kʋ ‑yä ‑n 'gä ŋnäŋä ‑kosu ‑düdëa' ‑zëbhuu 'mnö bhlüü nä, ɩ ‑ŋwa 'kʋ nynä ‑mä ‑naa 'yɛkɛɛ, ɛmɛɛ‑ ‑lä ‑bha 'pɛlʋ 'kʋ ‑yä ʋ too, ɩyä ‑n 'gä ‑lɔɔ nëë' ‑bha. ‑Naa lüüklä ‑klɔgba kä gbä 'nɩ ‑n gä nyenyii' bhlüü nä, ‑n ‑döa 'kʋ ‑yä 'paa 'klä fɛɛn! Sä ‑n gä 'bhë 'kʋ kʋ ‑yä ‑n 'gä ŋnäŋä ‑kosuu' ‑düdëa' ‑zëbhuu 'mnö bhlüü nä, ɩ ‑ŋwa 'kʋ nynä ‑mä ‑naa 'yɛkɛɛ, ɛmɛɛ‑ ‑lä ‑bha 'pɛlʋ 'kʋ ‑yä ʋ too, ɩyä ‑n 'gä ‑lɔɔ nëë' ‑bha.


A nuu‑ 'sɩɩ nynä ‑mä, Moyizöö' ‑Jlämaa lä Nyɩkpɔ kä cii‑ nynä ɔ 'kä ɔ 'ŋnɔ cɛɛ nä, ɔ gbɩɔ 'bɔɔgʋ 'kʋ nynä ɔɔ' 'ylɔɔ yɩɔ. ‑Mä ‑amʋ nä, kä n mʋ'anyɩ yɩ soo ‑kää nynä ‑mä nyɩkpɔ, ɔ 'ŋnɔ 'nö 'wlie 'ylää 'nɩ ɔ kɔ cɛɛ‑ nä, ‑lɔɔ' nyɩkpɔɔ kɔ 'kä lä gbä ‑yä ɔ 'ŋnɔ 'kä wluyläŋnɔ 'plö. 'Nɩ nyɩkpɔ kä 'sɩɩ 'ŋnɔ lɔɔ ɔ ‑nyoto tlüü‑ lä nä nöö‑ nä, ‑lɔɔ' nyɩkpɔɔ yä 'sɩɩ 'ŋnɔ 'ylä.

A nuu‑ 'sɩɩ nynä kä ‑Jlämaa ‑soo ‑a tɩtɩä nynä ‑mä, nyɩkpɔɔ' ci ‑lä nynä ‑mä n 'sɔlɩ ‑mä n yi ‑nʋnʋ nʋ! 'Nɩ ‑lɔɔ' nyɩkpɔɔ 'kä bʋkʋ ci nynä ‑mä, ‑ɔ! n cii‑ bhä ‑mä nn' nʋʋ yɩɔ! Nyɩkpɔ kä Laagɔ dëlü cii‑ nynä ‑mä, n yi ‑nʋnʋ nʋ nä, ‑lɔɔ' ‑lʋʋ ɔ nʋʋ!
‑Mä ‑amʋ n mʋ'anyɩ yɩ soo ‑kää nynä aa' zlügo ‑lä 'kwläkwlä! Aa' zlügo ‑lä 'nyukpɔ‑laagɔnʋ 'mʋ! ‑Ɔnöza bhää? 'Nyukpɔ‑laagɔɔ 'mʋʋ‑ plöö‑ lä ‑a 'Bä Laagɔɔ' 'Leyi‑këkpëa. Aa' zlügo ‑lä 'sɩɩ gbämnä‑dʋdʋʋ'! ‑Ɔnöza bhää? ‑Dʋdʋnʋ nä, ʋmʋ ‑a 'Bä Laagɔ gbɛɛ lä ʋʋ' ‑kokokpüü 'kʋ. Aa' zlügo ‑lä 'sɩɩ Zolizalɛmʋ‑duu' 'ŋnöö 'mnö. ‑Ɔnöza bhää? Zolizalɛmʋ‑duu 'mʋʋ‑ plöö‑ lä 'Loyo 'kädɔɔ' 'duu. 'Nɩ ‑naa zlügo ‑lä 'sɩɩ ‑naa 'wluu 'mö! ‑Ɔnöza bhää? ‑Naa 'wluu nyɩɩye ‑bhlo 'coo, ‑nn ‑lä mii 'nɩ ‑n 'gɛ pɔɔmä, 'nɩ ‑nn ‑lä 'sɩɩ mii 'nɩ ‑n 'gɛ kpëmä. A kä wälɩ nëë' ‑sä, 'nɩ a kä cii‑ nynä ‑ɛɛɛ! nä, anyɩa' ‑ɛɛɛ 'plö ‑ɛɛɛ. 'Ɩzä ka kä cii‑ nynä yio! nä, anyɩa' yio 'plö yio. A kɩ yɩ 'klë 'kʋ pään nä, ‑lɔɔ' 'klëa 'Dëvlo nëë' a bha ylä.


A nuu‑ 'sɩɩ nynä kɩ cio‑ nynä ‑mä, ‑n ‑lie kä‑ä 'yii ‑wlä nä, ‑n wlä 'sɩɩ ɔɔ' ‑lɛɛ! Ɔ kä‑ä gleeye nëë' ‑sä nä, ‑n ‑sɔɔ 'sɩɩ gleeye nëë'!
‑Mä ‑amʋ nä, kä mʋ'anyɩ yɩ soo ‑kää nynä nyɩkpɔ 'kanyɩ nyenyi ‑nʋ nä, a 'nä ‑sä ‑lä kpä. Nyɩkpɔ kä‑ä lüüklä‑nyukluu' 'kpeye paa‑ nä, ‑n tlɔɔ 'sɩɩ ‑mɔɔ' 'nyukluu ‑yä ɔ 'pʋʋ 'kpeye!
Nyɩkpɔ kä cii‑ nynä ‑mä ɔ 'kä‑ä tʋ kuu ‑yä, ɔ 'kä‑ä ‑naa 'kotu ‑sä nä, ‑n ‑tanöɔ 'yi ‑yä ɔ 'bhlü 'sɩɩ ‑naa gbëbie‑lokwie 'kʋ! Nyɩkpɔ kä‑ä 'fɩɩ ‑klää nynä ‑mä ‑n ‑yɔsɔ bhlü ‑blɔɔ' kilooyee' ‑blɔklë nä, ‑n ‑yɔsɔ bhlü kilooyuë 'sɔɔ ‑blɔ! ‑Ɔ zlää‑ä lä nä, ‑n 'nyɩɔ! Nyɩkpɔ kä‑ä ‑soo nynä ‑mä ‑n gblɔɔ nä, ‑n gblɔɔ ‑mä ‑naa sɩɔ ‑lä!


A nuu‑ nynä ‑mä, kɩ cio‑ nynä ‑n wamä ‑n ‑lie ‑mä ‑naa ‑zɔbhlɛgbänyɔ nä, ‑n zɔbhlɛmänöɔ. ‑Mä ‑amʋ kä n sonö'anyɩ lä nynä ‑mä, a wamä anyɩa' ‑zɔbhlɛgbänyʋä! ‑Wa ŋʋ'anyɩ lä 'kwlɩkabhɩää' nä, a 'pʋwa 'nyu ‑mä a kä 'sɔɔ nʋ nä, 'Bäɔ ‑ɔ ‑kʋ lä ‑mɔɔ Laagɔɔ' nä, ‑lɔɔ a 'kä lä ɔɔ' 'yuë 'plö. ‑Ɔnöza bhää? 'Bäɔ nä, gbenyenyinyʋa ‑yä 'nää nʋnyʋa 'sɔ nä, kɔ gbä 'nɩ 'ylʋʋ pʋ waa' ‑lefɩɩn ‑za. 'Nɩ 'yigëënyʋa ‑yä nyɩkpaa' ‑lʋa ‑wʋ lä 'yi gëë‑ nä, ɔ gbä 'nɩ 'nyu bhlä waa' ‑lefɩɩn ‑za. ‑Wa ‑wa'anyɩ lä nä, wamä ‑bhlo a kä ‑waa nä, Laagɔɔ' bɔɔpälɩɩ' 'cësä a tään bhää? Lapoo‑ylänyʋa 'titii‑ plöö‑ lä gbenyenyinyʋa nä, wa nʋmʋ 'sɩɩ sɔɔ. 'Nɩ a bhelie ‑bhlo a kä bhään nä, wälɩklë ‑sä a ‑nʋ bhä 'nɩ ‑a 'ninie bhä nyɩkpa plɛkʋ? Nyɩkpaa 'titi ‑waa 'mänyɩ ‑wʋ lä Laagɔ nä, wamä ‑mä 'sɩɩ, wa nʋmʋ sɔɔ. Nä, 'Bäɔ ‑ɔ ‑kʋ lä ‑mɔɔ ‑laagɔɔ' nä, sɔ ‑kplɔɔ lä nä, anyɩ ‑mä 'sɩɩ a kplɔɔ 'sɔɔ!

Terera ku Matie 5