Yala - 1979 BSNIG (NT) Non Drama

La okwi̍ihi yī ɔla̍ā, ɔwɔ̄wīyā ɔha̍ nīi Iju̍u wa̍a̍ ē ya̍ ma̍ wā ge̍ kū. Iji̍sɔ̄ɔsi wā ge̍ pīya ga Ijɛru̍sālɛm. Abɔ̍ɔ la Ijɛru̍sālɛm, la wāā yī ɛbɛ nīi re̍ka O̍grīgba yī Anyīyɛrɔ̄ ma̍, u̍nu̍ ɔha̍ kū abɔ̍ɔ bla̍a u̍bu̍yēenyi ɔha̍. U̍nu̍ ɔla̍ā lɛ u̍twɔ̄ɔda ɛrwɔ̄. E̍ hī ɔ̄ ka Ibɛsa̍yi̍da la oko̍o yī Ihi̍bru. Āchɛ okwi̍īyē lyɛ̄mɛ̄ kpɛ̍ɛ nīi gblāa abɔ̍ɔ la u̍twɔ̄ɔda ɛla̍ā ma̍: āchɛ epriyī, āchɛ okwi̍kpo̍ oko̍ōku̍ ba̍la āchɛ ɔgbā ngunungunu wa̍a̍ pa abɔ̍ɔ. [Aa̍ wa̍a̍ gblāa yɛ ē gbēyī yī yɛ̄grāa nīi yenyi yī u̍bu̍yēenyi ɔla̍ā ge̍ē ha̍kpa̍ ma̍. Wu̍chē oji̍ nɛ, yɛ̄grāa ɔha̍, ɔyɛ̍ɛ̄chɛ̄rɔ̄ yī Ādā Nīi - Ɔwɔ Ma̍ ē wā la u̍bu̍yēenyi ɔla̍ā ge̍ē ti̍ya yenyi ē tū. Ɔ̄chɛ okwi̍īyē nīi ge̍ yɔbɔ̄ɔbū gatū ga yenyi ɔla̍ā nīi ti̍yatū ma̍, iyē ɔha̍lɔha̍ nīi ge̍ ku̍ ɔlɔjā ma̍ ē de ē hīya anu̍.] Ɔngrɔ̄ɔ ɔha̍ kwi̍īyē lɛ̍yi̍ ohu che igwa̍arāata̍ gbo abɔ̍ɔ. Iji̍sɔ̄ɔsi ma̍ ɔngrɔ̄ɔ ɔla̍ā nīi o̍ gbo abɔ̍ɔ ma̍, o̍ jo̍ōkū hīka ɔ̍lɔ kwi̍īyē ligbi̍gbo̍ gba̍a̍ mɛ̍. O̍ che ɔngrɔ̄ɔ ɔla̍ā ikpo̍ hīka ɔ̍lɔ chikpo̍ ge̍ē de ē lɛ cha̍cha̍?
Ɔngrɔ̄ɔ ɔla̍ā ka de ɔ̍ hīka, “Ādā, n i̍ lɛ ɔ̄chɔ̄chɛ hɔ̄ amu nīi ge̍ē nāa ami ē tū gāa yenyi yɛ̄grāa nīi yenyi ē ti̍ya ē tū ma̍ ni̍. N ge̍ chɛ̄rī yɛ ma̍ yɛ gāa ɔpɔ̄ɔpɛ̄, ɔ̄chɛ ɔha̍ ē de ē yɔbū de u.”
Iji̍sɔ̄ɔsi ka de oku̍ku ɔla̍ā hīka, “Nīichō, nāa ɔjā ɔgbwɔlā yī wɔ nīi a ā de yɛɛ gɛ!” Ɔpɔ̄ɔpɛ̄, ɔngrɔ̄ɔ ɔla̍ā de lɛ cha̍cha̍ i̍ngɔ̍ɔ ke̍e̍. O̍ nāa ɔjā ɔgbwɔlā yī nū, wu̍ ɛyɛ ta̍ ɔpɔ̄ɔpɛ̄.
Lɛlā nūma̍ ya̍ la Ɔ̄chī Ɔmyɛ̍nyɛ̍. Wu̍chē yī ɔla̍ā, alɛhu̍ yī Iju̍u da ɔngrɔ̄ɔ ɔla̍ā hīka, “Je̍ka i̍chɛ - ɔ̄chī Ɔmyɛ̍nyɛ̍ nɛ! Lihɔ yī alɔ ka ɔ̄chɛ ɔ̍lɔ ge̍ e̍e bī ɔjā ɔgbwɔlā la Ɔ̄chī Ɔmyɛ̍nyɛ̍ ni̍.”
Ɔngrɔ̄ɔ ɔla̍ā ka de wa̍ hīka, “Ala̍ ma̍ ko̍ō! Ɔ̄chɛ nīi ya̍ u nīi n de lɛ cha̍cha̍ ma̍, anu̍ ka de u hīka amɔ̍lɔ ge̍ nāa ɔjā ɔgbwɔlā yī amɔ̍lɔ nīi amɔ̍lɔ ge̍ yɛɛ a̍nɛ.”
E̍ gba̍a che ɔ̍ ikpo̍ hīka, “Ɔ̄nyɛ u̍tu hɔ̄ aa̍ nīi ka de wɔ i̍ngɔ̍ɔ ka aɔ̍lɔ ge̍ nāa ɔjā ɔgbwɔlā yī aɔ̍lɔ nīi aɔ̍lɔ ge̍ yɛɛ ma̍?”
Ɔngrɔ̄ɔ ɔla̍ā i̍ je̍ ɔ̄chɛ nīi nyiya anu̍ ma̍ ni̍. Wu̍chē oji̍ nɛ, āchɛ lyɛ̄mɛ̄ kpɛ̍ɛ nīi grēeyī ma̍. Iji̍sɔ̄ɔsi chī gba fi̍yɛ̍ pīya hī ɛbɛ ɔla̍ā mɛ̍.
Bɛ̍ɛ̄nɛ̄, Iji̍sɔ̄ɔsi wā ge̍ ma̍ ɔ̄ abɔ̍ɔ la u̍nu̍ yī Ɔwɔ. Iji̍sɔ̄ɔsi da ɔ̍ bɛ̍ɛ̄nɛ̄ hīka, “Ma̍ u ma̍! A de lɛ cha̍cha̍ mɛ̍, pi̍ye̍mā lɛlā ɔdwɔ̄bi̍ ɔyɔ̍ɔ̄ya̍ bɛ̍ɛ̄nɛ̄. Nɛ̄ni̍, lɛlā ɔha̍ nīi - ɔdwɔ̄bi̍ ɔdwɔnyɛ ma̍ ge̍ē ya̍ wɔ bɛ̍ɛ̄nɛ̄ a̍nɛ.”
Ɔngrɔ̄ɔ ɔla̍ā pīya ɔpɔ̄ɔpɛ̄ ge̍ de koko̍o de alɛhu̍ yī Iju̍u hīka Iji̍sɔ̄ɔsi ɔ̍lɔ nyiya anu̍ a̍nɛ. Bū la ɛbɛ ɔla̍ā, e̍ wā la lɛlā la Iji̍sɔ̄ɔsi bɛ̍ɛ̄nɛ̄. Wu̍chē oji̍ nɛ, Iji̍sɔ̄ɔsi nyiya ɔ̄chɛ oli̍ngɛ̍ɛ̄nɛ̄ la Ɔ̄chī Ɔmyɛ̍nyɛ̍. Iji̍sɔ̄ɔsi hīya aa̍ ɔkɔ hīka, “Ala̍ ma̍ ko̍ō! Lɔkɔ nīi A̍dā yī u ē ya̍ u̍ku̍rɔ̍ myɛ̄grāa-myɛ̄grāa ma̍ nīi ami titi ē ya̍ u̍ku̍rɔ̍ myɛ̄grāa-myɛ̄grāa a̍nɛ.”
Lɛlā nūma̍ nīi o̍ ka ma̍ ya̍ nīi alɛhu̍ yī Iju̍u wa̍a̍ hwa ɔ̍ ɔhwɔ̄hwa ga iyɔ̄bū iyɔ̄bū ka aɛ̍lɛ ge̍ē de ɔ̍lɔ ē ngmo̍. I̍ lihɔ yī Ɔ̄chī Ɔmyɛ̍nyɛ̍ ke̍e̍ nīi o̍ bīya ma̍ gɛ ni̍; o̍ gba̍a ka hīka Ɔwɔ ɔ̍lɔ - A̍dā yī anu̍ nɛ. Bū la ɛbɛ ɔla̍ā, o̍ re̍ka o̍ nāa iyī nū jɔ̄ɔ̄jɛ̄ tāa Ɔwɔ.

Wu̍chē yī ɔla̍ā, Iji̍sɔ̄ɔsi hīya aa̍ ɔkɔ hīka, “Lēchi̍-lēchi̍, n ā koko̍o de ala̍! Ɔyi̍ yī Ɔwɔ i̍ ē ya̍ ɔjɔ̄jā wɔ̄bɔ̄bɔ̄ yī nū ni̍. Ɔjā nīi o̍ ma̍ nīi A̍dā yī nū yɛ ē ya̍ ma̍ nīi o̍ ē ya̍ a̍nɛ. Ɔjā nīi A̍dā ge̍ yɛ ē ya̍ mɛ̍, Ɔyi̍ yī Ɔwɔ ē ya̍ titi. Wu̍chē oji̍ nɛ, Ɔwɔ A̍dā yɔ̍ɔhɔtū yī Ɔyi̍ yī nū kpɛ̍ɛji; o̍ ē de ɔjā nīi anu̍ ɔlɔjā yɛ ē ya̍ ma̍ ē chabɔ̄ hu̍ ɔ̄. O̍ ge̍ē de ɔjā ɔnɔ̄kɔ̄kū ɛha̍ nīi gla onūma̍ ta̍ ma̍ ē de ɔ̍ we̍. Lēchi̍, o̍ ge̍ē de ē ya̍ ala̍ lɛbɛ̍bi̍. Lɔkɔ nīi Ɔwɔ A̍dā ɔlɔjā ē de okū hye̍ēyī mɛ, chī de ɔhɔ̄leyī de okū mɛ ma̍, i̍ngi̍ngɔ̍ɔ nīi Ɔyi̍ yī Ɔwɔ titi ē de ɔhɔ̄leyī de āchɛ nīi o̍ chikpo̍ ge̍ē de ē de wa̍ ma̍ a̍nɛ. Ɔwɔ A̍dā yī u ɔlɔjā i̍ ē hɛ̍ ɔ̄chɔ̄chɛ lɛpɔ̄ ni̍. O̍ de wɔhu̍ yī lɛpɔ̄ ɔhɔ̍ɔ̄hɛ̍ de Ɔyi̍ yī nū la ɔgɔ̄grāa. O̍ ya̍ i̍ngɔ̍ɔ hɛ̄ɛbɛ nīi ɔ̄chɛmɔ̄chɛ ge̍ē de otūlichō de Ɔyi̍ yī Ɔwɔ lɔkɔ nīi e̍ ē de ē de Ɔwɔ A̍dā ɔlɔjā ma̍. Ɔ̄chɛ nīi i̍ ge̍ de otūlichō de Ɔyi̍ yī Ɔwɔ ni̍, o̍ re̍ka ɔlɔjā i̍ de otūlichō de Ɔwɔ A̍dā nīi de ɔ̍ tɛ̄rɔ̄ ma̍ ni̍.
“Lēchi̍-lēchi̍, n ā koko̍o de ala̍! Ɔ̄chɛ nīi ge̍ yɛ ē plɛ̍ɛ̄lā yī u, nīi o̍ ge̍ de ɔtū che ɔ̄chɛ nīi de u tɛ̄rɔ̄ ma̍, ɔlɔjā lɛ ɔhɔ̄leyī i̍mɔ̄mɛni̍ mɛ̍. Ɔwɔ i̍ ge̍ē hɛ̍ ɔlɔjā lɛpɔ̄ ni̍. O̍ re̍ka ɔlɔjā ga hī ɔpīyaku̍ ga ɔhɔ̄leyī mɛ̍. Lēchi̍-lēchi̍, n ā koko̍o de ala̍! Yɛ̄grāa ɔ̍lɔma̍ yɛ amu yewā, o̍ u̍tu de gbajɛ mɛ̍. Okū ge̍ē po̍ ɔkɔlɛ̄lā yī Ɔyi̍ yī Ɔwɔ. Bū la ɛbɛ ɔla̍ā, enīi po̍ wa̍a̍ ma̍ ge̍ē de wōwi. Lɔkɔ nīi ɔhɔ̄leyī ē bū la abɔ̄ yī Ɔwɔ A̍dā ɔlɔjā ma̍, i̍ngi̍ngɔ̍ɔ nīi o̍ ya̍ nīi ɔhɔ̄leyī ē bū la abɔ̄ yī Ɔyi̍ yī nū a̍nɛ. O̍ de wɔhu̍ de Ɔyi̍ yī nū nīi o̍ ge̍ē hlɛ̍ɛ̄pɔ̄; wu̍chē oji̍ nɛ, anu̍ re̍ka Ɔyi̍ yī Ɔngrɔ̄ɔ a̍nɛ. Lɛlā nūma̍ ge̍ e̍e lɛ ala̍ lɛbɛ̍bi̍ ni̍. Yɛ̄grāa ɔha̍ yɛ amu yewā nīi okū nīi tū la u̍nwɔ̍wu̍ ma̍ ge̍ē po̍ ɔkɔlɛ̄lā yī nū. E̍ ge̍ē bīyɛchɛ ē hī u̍nwɔ̍wu̍ yī wā cha̍cha̍. Āchɛ nīi ya̍ hwɔhi hwɔhi ma̍ ge̍ē hye̍ēyī de ē wōwi. Āchɛ nīi ya̍ dwɔ̄bi̍ ma̍ ge̍ē hye̍ēyī wā nīi e̍ hɛ̍ wā lɛpɔ̄ ɔdwɔ̄bi̍.

“Ami i̍ ē ya̍ ɔjɔ̄jā wɔ̄bɔ̄bɔ̄ yī u ē mɛ̍ ni̍. N ē hlɛ̍ɛ̄pɔ̄ lɔkɔ nīi Ɔwɔ ka de u ma̍. Bū la ɛbɛ ɔla̍ā, lɛpɔ̄ ɔhɔ̍ɔ̄hɛ̍ yī u nīi ē hɛ̍ ma̍ lɛ bāa ɔkpakpa ma̍. Wu̍chē oji̍ nɛ, i̍ lɛlā nīi hi ami ɔlɔjā ɔtū ma̍ nīi n chikpo̍ ge̍ē ya̍ a̍ni̍. Lɛlā nīi ɔ̄chɛ nīi de u tɛ̄rɔ̄ ma̍ chikpo̍ ma̍, anu̍ nīi n ge̍ē ya̍ a̍nɛ.
“O̍ ge̍ re̍ka n koko̍o yī lɛlā yī ami ɔlɔjā nɛ, āchɛ i̍ ge̍ē nāa anu̍ bāa oko̍o yī lɛlā olēchi̍ lēchi̍ ma̍ ni̍. Ɔ̄chɛ ɔha̍ hɔ̄ abɔ̍ɔ nīi ē koko̍o yī lɛlā yī u ma̍. N jo̍ōkū hīka lɛlā nīi o̍ ē ka ē ku̍ u ma̍ - lɛlā lēchi̍ nɛ. Ala̍ de āchɛ yī ala̍ tɛ̄rɔ̄ ga ɛbɛ yī Ijɔ̍ɔn ma̍, o̍ koko̍o yī lɛlā olēchi̍ lēchi̍ ke̍e̍. I̍ tɛ̍ɛhi̍yɛ̍ yī ɔ̄chɛ̄ɛchɛ ku̍ um ɔkɔ i̍ngɔ̍ɔ a̍ni̍. Wu̍chē yī ɔhɛ̍ta̍ yī ala̍ nīi n yɛ ē kɛlā nūma̍ a̍nɛ. Ijɔ̍ɔn lɛ bāa otīnīkā nīi yɛ ē chɔ̄chɛ̄, ya̍ nīi ɛbɛ ē lɛ gēdēgēdē ma̍. Yɛ̄grāa ɔha̍ pi̍nyɛ̍ nīi o̍ rīya ala̍ ma̍, ala̍ nāa ɛbɛ ɔlɛgēdēgēdē yī nū ɔla̍ā. N lɛ itɛ̍ɛhi̍yɛ̍ yī lɛlā yī u nīi gla itɛ̍ɛhi̍yɛ̍ yī Ijɔ̍ɔn ta̍ pɛtɛpɛtɛ ma̍; U̍ku̍rɔ̍ nīi n ē ya̍ ma̍, u̍ku̍rɔ̍ nīi A̍dā yī u de u tɛ̄rɔ̄ ka amɔ̍lɔ ge̍ ya̍ ma̍, aa̍ re̍ka itɛ̍ɛhi̍yɛ̍ yī u a̍nɛ. U̍ku̍rɔ̍ ɛla̍ā ē ya̍ ochi̍chi̍ hīka Ɔwɔ A̍dā ɔ̍lɔ de amɔ̍lɔ tɛ̄rɔ̄ a̍nɛ. Ɔwɔ A̍dā nīi de u tɛ̄rɔ̄ ma̍ titi tū itɛ̍ɛhi̍yɛ̍ yī u i̍ngi̍ngɔ̍ɔ. N jo̍ōkū hīka ala̍ i̍ po̍ ɔkɔlɛ̄lā yī nū kɛ̄ɛ ma̍ ɔ̄ la eyī je̍ ni̍. Ala̍ i̍ ē de ɛrɔ̄ yī Ɔwɔ ē gbōgbō la ūkpɔ̄tū yī ala̍ ni̍. Wu̍chē oji̍ nɛ, ala̍ i̍ chɛ̄ku ɔ̄chɛ nīi o̍ de tɛ̄rɔ̄ ma̍ ni̍. Ala̍ yɛ ē ngū lɛlā yī Īpū yī Ɔwɔ; wu̍chē oji̍ nɛ, ala̍ gbɛri̍ya̍ ka abɔ̍ɔ nīi ala̍ ɔ̍lɔ ge̍ē pīyɛ̄ ɔhɔ̄leyī i̍mɔ̄mɛni̍ a̍nɛ. Ami nīi īpū ɛla̍ā chī kɛlā yī u a̍nɛ. O̍ i̍ chī rīya ala̍ la ɔwā dikpo̍ba̍ u ge̍ lɛ ɔhɔ̄leyī ni̍.
“N i̍ yɛ ē gāla̍ ɔkɔ̄kā bū la abɔ̄ yī āchɛ̄ɛchɛ ni̍. N je̍ ala̍. N jo̍ōkū hīka ala̍ i̍ lɛ ɔhɔtū yī Ɔwɔ abɔ̍ɔ la ūkpɔ̄tū yī ala̍ ni̍. N wā la wɔhu̍ yī A̍dā yī u; ala̍ i̍ chī chɛ̄ nāa lɛlā yī u ni̍. Ɔ̄chɛ ɔha̍ ge̍ wā la wɔhu̍ yī anu̍ ɔlɔjā u̍uma, ala̍ chī ge̍ē nāa lɛlā yī nū. Ɔjā nīi ala̍ ē chikpo̍ ma̍ re̍ka ɔkā ɔ̍nyīnū ɔkɔ̄kā. Ala̍ i̍ ē chɛ̄rī gāla̍ ɔkɔ̄kā nīi bū la abɔ̄ yī Ɔwɔ lōri̍īnū ma̍ ni̍. Kana̍ nīi ala̍ ge̍ē chɛ̄ku Ɔwɔ ē mɛ ma̍? Ala̍ e̍e gbɛri̍ya̍ ka amɔ̍lɔ ge̍ē kɛlā abi̍ yī ala̍ de A̍dā yī u ni̍. Imo̍sīisi nīi ala̍ de ɔtū che ɔ̍ ma̍, anu̍ ge̍ē koko̍o yī lɛlā abi̍ yī ala̍ a̍nɛ. Ala̍ ge̍ u̍tu chɛ̄ku Imo̍sīisi lēchi̍ lēchi̍ nɛ, ala̍ ge̍ē chɛ̄ku ami i̍ngi̍ngɔ̍ɔ. Wu̍chē oji̍ nɛ, o̍ ta̍ īpū kɛlā ku̍ u. Ala̍ i̍ chɛ̄ lɛlā nīi o̍ ta̍ tū la īpū ɛla̍ā ni̍ ma̍, kana̍ nīi ala̍ ge̍ē chɛ̄ lɛlā nīi ami ē ka ma̍ mɛ ma̍?”

Terera ku Ijɔ̍ɔn 5