If you have would like a copy of this version please contact info@davarpartners.org

Kulvi New Testament, CC-BY-SA-4.0, The Love Fellowship (Text) Kulvi New Testament Audio Bible, CC-BY-SA-4.0, Davar Partners International, 2022 (Audio)

Kulvi New Testament

This work is licensed under Creative Commons Attribution-ShareAlike 4.0 License.

तैबै फरीसी होर सदूकी लोका यीशु हागै आऐ। तिन्हैं यीशु बै परखणै री तैंईंयैं तेइबै बोलू, “आसाबै स्वर्गा रा कोई नशाणी रिहा” ताकि ऐ पता लागला कि तेइबै परमेश्वरा न हुक्म मिलु सा।
यीशुऐ ज़वाब धिना, “सौंझ़की घेरै तुसै बोला सी कि मौसम ठीक रौहणा किबैकि सर्गा लाल सा।” होर दोथी बोला सी कि “औज़ मौसम धुँधला रौहणा,” किबैकि सर्ग धुँधला होर लाल सा। तुसै सर्गा रै लछणा बै ज़ाणा सी पर बौगता री नशाणी होर लछणा बै किबै नी ज़ाणी सकदै? “ऐई ज़ुगै रै बूरे होर विश्वासघाती लोका नशाणी च़मत्कार तोपा सी पर तिन्हां बै योनै रै नशाणी छ़ौड़िआ होर कोई नशाणी नी मिलणा।” तैबै यीशुऐ ते छ़ौड़ै होर आपणै च़ेले सैंघै नौठा।

होर यीशु रै च़ेले झ़ीला पारा बै आऐ, पर तिन्हैं रोटी आंणनी बिसरी। यीशुऐ तिन्हां बै बोलू, “फरीसी होर सदूकी लोकै रै मलेड़े न साबधान रौहा।”
तिन्हैं आपु न विचार केरिया बोलू, “होई सका सा आसै रोटी नी आंणी तैबै ऐईयै ऐण्ढा बोलू।”
ते कि लागै सी बोलदै, ऐ ज़ाणिया यीशुऐ तिन्हां बै बोलू, “तुसै रोटी नी आंणी ऐण्ढै सोच़िया तुसै आपणा बशाह किबै कम लाऊ केरना? कि तुसै हाज़ी भी नी समझ़दै। याद केरा कि ज़ैबै पौंज़ हज़ार लोकै रोटी खाई ता तुसै पौंज़ रोटी री केतरी टोकरी भौरिया च़की? कि तुसाबै याद नी ज़ैबै च़ार हज़ार लोकै रोटी खाई ता तुसै सौत रोटी री केतरी टोकरी भौरी? तुसै किबै नी समझ़दै कि मैं तुसाबै रोटी रै बारै न नी बोलू? मैं ता तुसाबै फरीसी होर सदूकी लोकै रै खमीरा न बच़णै बै बोलू।” तैबै ते च़ेले समझ़ै कि रोटी रै मलेड़े न नी बल्कि एथा रा ऐ मतलब सा कि आसा फरीसी होर सदूकी लोकै री बहकाणू आई शिक्षा न बच़िया रौहणा।

यीशु कैसरिया फिलिप्पी नगरा बै आऊ होर आपणै च़ेले न पुछ़दा लागा, “लोका मांहणु रै बेटै रै बारै न कि बोला सी कि हांऊँ कुण सा?” च़ेले बोलू, “किछ़ यूहन्ना बपतिस्मा देणु आल़ा बोला सी, किछ़ बोला सी कि तू एलिय्याह सा होर किछ़ बोला सी कि तू यिर्मयाह या भविष्यवाणी केरनु आल़ै मौंझ़ै न कोई एक सा।”
यीशुऐ तिन्हां बै बोलू, “होर तुसै कि बोला सी कि हांऊँ कुण सा?” शमौन पतरसै बोलू, “तू ज़िन्दै परमेश्वरा रा बेटा मसीह सा।”
यीशुऐ तेइबै बोलू, “योनै रै बेटै शमौन! तू धन्य सा; किबैकि कोई भी मांहणुऐ तुसाबै ऐ नी दसु एथा रै बजाय, कि ऐ मेरा बापू ती ज़ो स्वर्गा न रौहा सा ज़ो तुसाबै ऐ दसा सा। हांऊँ बोला सा कि तू पतरस सा, ज़ुणी रा मतलब सा ‘पाथर’ तुसा तेसा मण्डली री मनियाद होंणा, ज़ुण मूँ बनाणी। नरका न रौहणु आल़ी आत्मा री शक्ति बी मुँभै तेइबै बनाणै न नैंई रोकी सकदी। मूँ तौभै स्वर्ग राज्य री कुँज़ी देणी: ज़ो किछ़ तू एसा धौरती पैंधै बोनला तेई स्वर्गा न बोनिणा होर ज़ो तू एसा धौरती पैंधै खोलला तेई स्वर्गा न खोलिणा।” तैबै यीशुऐ आपणै च़ेले बै बोलू कि तुसै एसा गैल, “कौसी बै हेरेइत दसदै कि हांऊँ मसीह सा।”

तेई बौगत यीशुऐ आपणै च़ेले बै बोलू, “मेरा यरूश्लेम शैहरा बै ज़ाणा ज़रूरी सा, कि तौखै हांऊँ मांहणु रै बेटै यीशु बै बोहू दु:ख सौहणा पौड़ना होर स्याणै मुख्यपुरोहित होर शास्त्रियै सौ नकारना होर तेइरी बेइज़ती केरनी होर सौ पक्का मारिना होर तेई त्रीज़ै ध्याड़ी मूँऐंदै न ज़िन्दै होंणा।”
एथा बजहा न पतरसै यीशु एकी धिरै नेऊ होर तेइबै झ़िड़कदा लागा, “ओ प्रभु! परमेश्वर तौ पैंधै दया केरला होर तौ सैंघै ऐण्ढा नी लोड़ी हुआ।”
तैबै यीशुऐ पतरसा धिराबै मुड़िया बोलू, “हे शैतान मूँ सामनै न दूर हो। तू मेरी तैंईंयैं ठोकरा री बजहा सा। तू परमेश्वरै री गैला न मन नी लाँदा पर मांहणु री गैला न मन ला सा।”

तैबै यीशुऐ आपणै च़ेले बै बोलू, “अगर कोई मूँ पिछ़ै ऐणा चाहा सा ता सौ आपणा सैभ किछ़ छ़ौड़ला होर आपणै दु:ख सौहणै री तैंईंयैं त्यार रौहला। ज़ुण आपणै प्राण बच़ाणा च़ाहला, तेई ते नाश केरनै पर ज़ुण मेरी तैंईंयैं आपणै प्राण देला तेई ते बच़ाणै। अगर कोई मांहणु दुनिया न सैभ किछ़ हासिल केरा सा, ज़ो सौ चाहा ती होर फिरी आपणै प्राणा बै नाश केरा सा ता तेथा रा कि फायदा? किबैकि कोई भी मांहणु आपणै प्राणा रै बदलै हमेशा री ज़िन्दगी नी पाई सकदा। मांहणु रा बेटा स्वर्गदूता सैंघै परमेश्वरै री महिमा न ऐणा होर तेई बौगत तेई हर एक मांहणु रा तिन्हरै कर्मा रै मुताबक फैसला केरना कि कुणी बै कि ईनाम देणा।
“हांऊँ तुसाबै सच़ बोला सा, औखै ज़ो खड़ै सी, तिन्हां न किछ़ ऐण्ढै सी तिन्हां मांहणु रै बेटै बै परमेश्वरै रै राज्य न ऐन्दा नी हेरलै तैबै तक तिन्हां नी मौरना।”

Terera ku मत्ती 16