If you have would like a copy of this version please contact info@davarpartners.org

Kulvi New Testament, CC-BY-SA-4.0, The Love Fellowship (Text) Kulvi New Testament Audio Bible, CC-BY-SA-4.0, Davar Partners International, 2022 (Audio)

Kulvi New Testament

This work is licensed under Creative Commons Attribution-ShareAlike 4.0 License.

तेही ध्याड़ै न यीशु तेई घौर छ़ौड़िआ उपदेश देणै री तैंईंयैं समुन्द्रा रै बौढ़ा ज़ाइआ बेठा। ज़ैबै तेइरै च़ोहू पासै सारै लोकै री बोहू भीड़ कठा हुई ता सौ एकी किश्ती पैंधै च़ढ़िया तिन्हां बै सिखाणै री तैंईंयैं बेठा होर लोकै री भीड़ कनारै पैंधै खड़ी रौही। तेइयै तिन्हां बै उदाहरण देइया बोहू सारी गैला दैसी: “एक बेज़ै बाँहणु आल़ा बेज़ै बाँहदा निकता। ज़ैबै सौ बेज़ै बाँहदा लागा ती ता किछ़ बेज़ा बौतै रै कनारै न पौड़ू होर सौ च़िड़ूऐ च़ुगू। किछ़ बेज़ा रड़खड़ी ज़मीना न पौड़ू माटा नी मिलणै री बजहा सौ बेज़ा छ़ेकै निकता। पर ज़ैबै धुपा आऊ ता ते झ़ोट शुकै किबैकि तिन्हरै ज़लाड़ै पैक्कै नी ती ऑथि। किछ़ बेज़ा कौन्डै रै झ़ौकड़ा ज़ोंदरै पौड़ू, झ़ौकड़ बढ़दा रौहू होर ते दबाऐ। पर किछ़ बेज़ा शोभली ज़मीना न पौड़ू होर शोभली फ़सल त्यार हुई। ज़ेतरा बाहू ती तेथा न तीह गुणा, शौठ गुणा होर शौऊ गुणा। अगर तुसै समझ़णा चाहा सी ता, ज़ो मैं बोलू सा, तेथा बै ध्याना सैंघै शुणित्।”

तैबै च़ेले यीशु हागै एज़िया पुछ़ू, “तू लोका सैंघै उदाहरणा न किबै गैला केरा सा?”
यीशुऐ तिन्हां बै बोलू, “स्वर्ग राज्य रै भेद ज़ाणनै रा समझ सिर्फ़ तुसाबै धिनी सा तिन्हां बै नी।” किबैकि ज़ुणी हागै थोड़ा सा तिन्हां बै होर देणा होर तिन्हां हागै बोहू होंणा। पर ज़ुणी हागै किछ़ बी नी ऑथि तिन्हां हागै न सौ बी वापस मुँगिणा ज़ो तिन्हां हागै सा। एसा बजहा न हांऊँ तिन्हां सैंघै उदाहरणा न गैला केरा सा,
“किबैकि ते हेरिया भी नी हेरदै;
होर शुणिया भी नी शुणदै; होर न समझ़दै।
ऐण्ढै तैरहै तिन्हां पैंधै यशायाह भविष्यवक्तै री भविष्यवाणी पूरी होआ सा,
“ ‘तुसा कोनै लाइया ता शुणना, पर तुसरी समझ़ा न किछ़ नी ऐणा;
होर तुसा औछियै ता हेरना, पर तुसाबै किछ़ पता नी च़लणा।
किबैकि इन्हां लोका रा मन मोटा हुआ सा,
ते कोनै लाइया उथड़ा शुणा सी,
होर तिन्हैं आपणी औछ़ी बन्द केरी सा,
कोइँछ़ै ऐण्ढा नी लोड़ी हुआ कि ते औछियै लाइया हेरलै,
कोनै लाइया शुणलै होर मनै लाइया समझ़लै,
होर पाप केरना छ़ौड़िआ मूँ धिराबै फिरलै,
होर हांऊँ तिन्हरा उद्धार केरनु।’
“पर धन्य सी तुसरी औछ़ी, कि ते हेरा सी, होर कोन ते शुणा सी। हांऊँ तुसाबै सच़ बोला सा, बोहू सारै भविष्यवक्तै होर धर्मी लोकै ऐ गैला हेरनी चाही, पर नी हेरी सकै होर शुणनी चाही, पर नी शुणी सकै।

“ऐबै तुसै बेज़ै बाहणु आल़ै उदाहरणा रा मतलब शुणा; ज़ो परमेश्वरा रा वचन शुणा ता सा पर समझ़दा नी, ज़ो तेइरै मना न सा तेथा बै शैतान एज़िया नेआ सा। ऐ सौ बेज़ा सा ज़ो बौतै रै बौढ़ा पौड़ू ती। रड़खड़ी ज़मीना न पौड़ूदा बेज़ा सौ सा ज़ो वचन शुणिया खुशी सैंघै मना सा। पर आपणै मना न वचनै री जड़ पक्की नी होंणै देंदा होर सौ थोड़ै रोज़ा तक रौहा सा। ज़ैबै वचना री बजहा न दु:ख क्लेश एज़ा सा ता सौ फट पिछ़ै हटा सा। होर झ़ौकड़ा न औल़ूदा बेज़ा सौ सा, ज़ुणियै वचन शुणू, होर दुनिया री चिंता, ढैबुऐ रा धोखा होर हर किस्मै री चीज़ा रा लालच तिन्हरै मना न भौरूइया वचना बै दबा सा होर ते फलदै नी। शोभली ज़मीना रा बेज़ा सौ सा, ज़ुणा वचना बै शुणिया ग्रहण केरा सी होर फ़ौल़ा सी, कोई तीह गुणा, कोई शौठ गुणा, कोई शौऊ गुणा।”

यीशुऐ तिन्हां बै एक होर उदाहरण दसु, “स्वर्ग रा राज्य तेई किसाना सांही सा ज़ुणियै आपणै छेता न शोभला बेज़ा बाहू। पर ज़ैबै लोका सोंदै लागै ती ता तेइरै बैरियै एज़िया गेहूँ रै बीच़ा न जंगली बेज़ा बाहू होर नौठा। ज़ैबै गेहूँ रा बेज़ा लगा होर तेथा न सिला लागै ता गेहूँ रै बिच़ा न जंगली बेज़ै रै झ़ोटड़ू बी हेरिदै लागै।
“तैबै छेतै रै मालकै रै नोकरै एज़िया तेइबै बोलू, हे मालिक, तुसै ता छेता न शोभला बै ज़ा बाहू ती? तैबै ऐ जंगली बेज़ै रै झ़ोटड़ू कौखै न लागै? तेइयै तेइबै बोलू, ‘ऐ कौसी बैरी रा कोम सा।’ तेइरै नोकरै पुछ़ू, ‘तू कि चाहा सा, कि आसै ज़ाइआ जंगली बेज़ै रै झ़ोटड़ू बै पेच़ाऊँ?’ छेतै रै मालकै बोलू, ‘नैंई ऐण्ढा मता केरा, किबैकि ज़ैबै तुसै झ़ौकड़ पेचलै तैबै तेथा सैंघै गेहूँ भी पेचणै। फसला पौकणै ढौई दुही बै सैंघै-सैंघै बढ़नै दैआ, होर ज़ैबै फसल काटणै रा बौगत एला ता मूँ काटणू आल़ै बै बोलणा; कि तुसै पैहलै जंगली बेज़ै रै झ़ोटै रै पूल़ै बणाईया तिन्हां बै फूका, होर गेहूँ बै कठा केरिया मेरै नाज़ गौदामा न रखा।’”

यीशुऐ तिन्हां बै एक होर उदाहरण दसु, “स्वर्ग राज्य राई रै दाणै सांही सा; ज़ैबै तेइबै ज़मीना न बाहा सी। ऐ ज़मीना रै सैभी बेज़ै मौंझ़ै न होछ़ा होआ सा। पर ज़ैबै बेज़ा बाहिया, उगा सा ता सैभी सागपाता न बड़ा होआ सा; ऐ ऐतरा बड़ा बैणा सा कि सर्गा न उड़नू आल़ै च़ीड़ू एथै री शांणी पैंधै रौहा सी।”

यीशुऐ तिन्हां बै एक होर उदाहरण दसु, “स्वर्ग रा राज्य तेई मलेड़े सांही सा ज़ो कौसी बेटड़ियै लेईया बीह किलो न ज़ादा पिठै न मलाऊ होर होंदै-होंदै सौ सारा पिठा मलेड़ुआ, ऐण्ढी तैरहा किछ़ लोकै रै ज़रियै परमेश्वरा रा राज पूरी दुनिया न फैला सा।”

ऐ सैभ गैला यीशुऐ लोका बै उदाहरणा न दसी, होर बिना उदाहरण सौ तिन्हां बै किछ़ नैंई बोल्दा ती। ऐ एथै री तैंईंयैं हुआ कि परमेश्वरै भविष्यवक्तै रै द्वारा ज़ो बोलू ती, सौ पूरा होला,
“मूँ उदाहरण बोलणै री तैंईंयैं आपणा मुँह खोलणा,
दुनिया बैणनै न लेइया औज़ा तैंईंयैं ज़ो गैला गुप्त रौही तै मूँ प्रकट केरनी।”

तैबै यीशु भीड़ा बै विदा केरिया घौरा बै आऊ। तैबै तेइरै च़ेले एज़िया तेइबै बोलू, “आसाबै जंगली बेज़ै रै उदाहरणा रा मतलब समझ़ा।”
यीशुऐ बोलू, “शोभलै बेज़ै बाहणु आल़ा मांहणु रा बेटा मतलब हांऊँ सा। ऐ छेत दुनिया रै लोका सी, शोभला बेज़ा तै लोका सी ज़ुणी पैंधै परमेश्वर राज्य केरनै न खुश सा होर जंगली बेज़ा सौ सा ज़ो शैताना रा हुक्म मनिया कोम केरा सी। ज़ुणी बैरियै सौ बेज़ा बाहू सौ शैतान सा, फसल काटणा दुनिया रा आखरी सा होर काटणू आल़ै स्वर्गदूत सी।
“ज़ैण्ढै जंगली बेज़ा झ़ोट कठा केरिया फूकै दुनिया रै आखरी न बी ऐण्ढा होंणा। हांऊँ मांहणु रै बेटै आपणै स्वर्गदूत भेज़णै होर तै तिन्हां रै राज्य मौंझ़ै न सारै ठोकर देणु आल़ै होर पाप केरनु आल़ै कठा केरनै। होर तै औगी रै कुण्डा न पाणै ज़ौखै कि तिन्हां बै बोहू दु:ख होर कष्ट होंणा। तेई बौगतै धर्मी परमेश्वरै रै राज्य न सूरज़ा सांही च़मकणा। अगर तुसै समझ़णा चाहा सी ता, ज़ो मैं बोलू सा तेथा बै ध्याना सैंघै शुणित्।

“स्वर्ग राज्य छेता न गज़िहाउदै धना सांही सा ज़ो कौसी मांहणु बै मिलू होर तेइयै सौ तौखै पौथू होर सौ ऐतरा खुश हुआ कि तेइयै ज़ाइआ आपणा सैभ किछ़ बैच़ू होर सौ छेत कीमतियै लेऊ।

“स्वर्ग रा राज्य समान लेणू आल़ै व्यापारी सांही सा ज़ो शोभलै मोती तोपदा लागा ती। ज़ैबै तेइबै कीमती मोती मिलै ता तेइयै आपणा सैभ किछ़ बैच़ू होर ते मोती लेऐ।”

“फिरी स्वर्गा रा राज्य तेई बड़ै ज़ाला सांही सा ज़ो समुन्द्रा न पाऊ, होर हर किस्मै री मैच्छ़ी कठा केरी। ज़ैबै पाणी भौरूआ ता मैच्छ़ी ढौकणु आल़ै ज़ाल खींच़ू होर बैशिया शोभली-शोभली मैच्छ़ी आपणै भाण्डै न कठा केरी होर माड़ी-माड़ी मैच्छ़ी फ़ेटै शेटी। दुनिया रै आखरी न ऐण्ढा होंणा। स्वर्गदूता एज़िया दुष्ट धर्मी न अलग केरनै, होर स्वर्गदूतै दुष्ट लोका औगी रै कुण्डा न पाणै ज़ौखै कि तिन्हां बै बोहू दु:ख होर कष्ट होंणा।”

यीशुऐ बोलू, “तुसै ऐ सारी गैला समझ़ी?” तिन्हैं बोलू, “हाँ।”
यीशुऐ तिन्हां बै बोलू, “हर एक शास्त्री ज़ो स्वर्ग राज्य रा च़ेला बैणू सा सौ तेई गृहस्ती मांहणु सांही सा ज़ो आपणै भण्डारा न नोऊँई होर पराणी चीज़ा खोला सा।”

ज़ैबै यीशुऐ सैभ किछ़ उदाहरणा न बोलू ती, सौ तौखै न च़लू, होर आपणै नासरत नगरा बै वापस आऊ। तैबै तेइयै यहूदी री आराधनालय न उपदेश देणा शुरू केरू। तैबै हर कोई हैरान होईया बोलदा लागा, “ऐईबै ऐण्ढी बुद्धि री गैला कौखै न मिली होर ऐण्ढी चमत्कारी शक्ति कौखै न मिली? कि ऐ सौहै लकड़ी रै कोमा केरनु आल़ा (मिस्त्री) नी ऑथि? कि ऐईरी आमा रा नाँ मरियम नी ऑथि? याकूब, यूसुफ, शमौन होर यहूदा ऐईरी भाई ता सी। कि ऐईरी सारी बैहणी आसा बिच़ै नी ऑथि? ता ऐईबै ऐ सैभ किछ़ कौखै न मिलू?”
तिन्हैं यीशु स्वीकार नी केरू। तैबै यीशुऐ तिन्हां बै बोलू, “एक भविष्यवाणी केरनु आल़ै रा आपणै देश, आपणै परिवार होर आपणै घौरा छ़ौड़िआ हर ज़ैगा आदर होआ सा।”
तिन्हरै कम बशाह होंणै री बजहा न यीशुऐ तौखै बोहू च़मत्कार नी केरै।

Terera ku मत्ती 13