Text: © The Bible Society in Liberia, 1999 Audio: ℗ 2010 Hosanna

Krahn, Western - 1998 Edition (NT)

The New Testament in Western Krahn published as KU̍O̍ DELEE © The Bible Society in Liberia, 1999.

Dǒ weɛ̍ due di̍i̍ Jusu wɔ̀-a ba̍le-ɛ, iě ɔ̍ kòà-a due la̍a̍ dě ɔ̍ we̍, “Joi, toe àɔ̀ ba̍le-ɛ, ka Chɔɔn nu̍-a ɔ̍ kòà ba̍le-ɛ toe-ɛ.”
Wɛ̀ Jusu la̍a̍ dě u̍h we̍, “Pò mɔ̀ ja ba̍le-ɛ, nɛ̀ mɔ̀ la̍a̍,
‘Baa,
àn nynɛ̌ bo nyɔ̍ iě ja̍ tè.
Àn kmɔ̌ wlu̍ i̍ kɔn-ɛ iě ji̍.
Weɛ̍ jɛ-ɛ, nɛ̀ ìn nyǐ ɛ̍ di̍-dɛ̍ àɔ̀.
Tǎli à gblɛ̍n sɔ̀ɛ̀n-a tìh i̍, ka à nu̍-a gblɛ̍n sɔ̀ɛ̀n nyɔ̍ kli̍hgbɛ̍ nu̍-a à pùn-ɛ i̍ tǎli-ɛ.
Bɔ̌ à blu̍ja̍a̍ gbǎ tìh i̍ wɔ̌ɛn.’ ”
Wɛ̀ Jusu la̍a̍ dě u̍h we̍, “Pò mɔ̀-a nyɔ̍ blě ba̍ wɛ̀ ɔ̍ iě dě ɔ̍ we̍ mu̍ tòloo, ɔ̍ iě ka nu̍, ‘Ǐn ba̍, po̍ ǐn blèe̍ gba̍nᵻ ta̍a̍n-a gba̍-a lě. Dɛ̍nu̍ɛ, ǐn ba̍-a mu̍ wìèlè, wɛ̀ ɔ̍ paɛ dě ǐn we̍ gbò. Jɛ ǐn se̍ di̍-dɛ̍ blě iě ɔ̍ nyǐ.’ Nɛ̀ pò ìn ba̍ nɛ dě gbò wɛ̀ ɔ̍ iě ka dǎ, ‘Bɔ̌ ǐn wɔ̍ɔ̍n i̍ bɛ̌ɛ, dǒ gbò wɔ̍i̍n ka̍n-ɛ wɛ̀. Ǐn ke ǎn nynuu̍ ke à mɔ̌ la̍-ɛ, ǐn se̍ bloɔ̍ sɔ mu̍ dɛ iě ìn dɛ̍-o-dɛ̍ nyǐ.’ Ǎn sèàɛ̍ mɔ̀ wlùh, ɔ̍ se̍ bloɔ̍ sɔ mu̍-a chɛ̀ gbɛɛ ɔ̍ àn ba̍ nu̍ tìh ɔ̍ iě ìn dɛ̍-o-dɛ̍ nyǐ. Jɛ ka ìn se̍-a ɔ̍ ja̍i̍ ple̍-e dǒ ɔ̍ kɛ̍ɛ̍n nɛ̌-ɛ we̍-ɛ, nɛ̀ ɔ̍ mu̍ bloɔ̍ sɔ ɔ̍ iě ìn dɛ̍ àn pɔ̀n-aɛ nyǐ. Ǎn sèàɛ̍ mɔ̀ wlùh, mɔ̀ jbǎ dɛ̍, nɛ̀ ɛ̍ mu̍ mɔ̀ kwa̍a̍ gbǎ. Mɔ̀ pɔ̀n dɛ̍ i̍, nɛ̀ mɔ̀-a mu̍ ɛ̍ jě. Mɔ̀ bla̍ gbaba, nɛ̀ ɛ̍ mu̍ pɔ̀ni dǒ mɔ̀ we̍. Dɛ̍nu̍ɛ, nyɔ̍ jɔ jbǎ-a dɛ̍-ɛ, nɛ̀ ɛ̍ gbǎ ɔ̍ kwa̍a̍. Nɛ̀ nyɔ̍ ɔ̀ pɔ̀n-a dɛ̍ i̍-ɛ, nɛ̀ ɔ̍ jě ɛ̍. Nɛ̀ nyɔ̍ ɔ̀ bla̍-a gbaba-ɛ, nɛ̀ ɛ̍ mu̍ pɔ̀ni dǒ ɔ̍ we̍. Baa jɔwe̍ bo ɔ̀ nɛ dě mɔ̀ nynɛ̌ ɔ̀ kɔn jǔ jɔ̍gbau jbǎ-ɛ ɔ̍ smìɛ̍-ɛ, wɛ̀ ɔ̍ se̍ ɔ̍ smìɛ̍ nyǐ iě ɔ̍ nyǐ ɔ̍ sɛ̌ ɛ? Àe̍e̍, pò ɔ̍ jbǎ-ɛ ɔ̍ dɛ̍ kèɛ̍n-ɛ, nɛ̀ ɔ̍ mu̍ ɔ̍ kèǎnkèàn nyǐ ae? Mɔ̀ɔ̍ juh kɔn gblɛ̍n nyni-a jii̍-ɛ, pò mɔ̀ juo mɔ̀-a nynuu̍ dɛ̍ᵻ chɛ̀ nyǐ-ɛɛ, jɛ nɛ̀ mɔ̀ Baa Nyɔsoa nɛ-a dě ja̍i̍wlɔ̀-ɛ, ɔ̍ bo ɔ̀ se̍ nyɔ̍ jbǎ-ɛa ɔ̍ Sùù-ɛ nyǐ mu̍ ae?”


Jeědih ɛ̀ nɛ dǒ nyɔ̍ de̍e̍-ɛ wɛ̀ ɔ̍-ɔ wlu-aɛ, nɛ̀ ɛ̍-ɛ bo Jusu-a sà dǒ jɔ̍gbau due de̍e̍. Ɛ̍ sɔ-a dǒ ɔ̍ de̍e̍-ɛ, sɔ ɔ̍ wlu la̍-ɛ sǔh. Sɔ ɛ̍ flɔn-ɛ nyɔ̍ tlùgbei̍ laa̍ wɔ̍n. Jɛ nyɔ̍ duuh la̍a̍, “Biɛsibo ɛ̀ nu̍-a jeědih-a dlǔtu-ɛ, ɛ̍ bo ɛ̀ nyǐ ɔ̍ gbǐh wɛ̀ ɔ̍ sà nyɔ̍ jeědih de̍e̍ i̍.”
Wɛ̀ nyɔ̍ duuh-a pɔ̀n Jusu i̍ tɛ̀n-ɛ i̍. Iě u̍h tèle ɔ̍ i̍ ɔ̍ iě jbaɛdih sɔ-a dě Nyɔsoa we̍-ɛ po̍. Jɛ ɔ̍ juo dɛ̍ nɛ-a dě u̍h wlùh di̍i̍-ɛ. Iě ɔ̍ la̍a̍ dě u̍h we̍, “Pò blǔh nyɔ̍-a sǔh ja fɔ̀n-ɛ, nɛ̀ blǔh laa̍ ɛ̍ mu̍ wa̍. Nɛ̀ pò gbò nyɔ̍-a sǔh ja fɔ̀n-ɛ, nɛ̀ gbò laa̍ ɛ̍ mu̍ wa̍. Ɛ̍ tìh-ɛ, pò Setɔn ja ɛ̍ chɛ̀ we̍ fɔ̀n-ɛ, nɛ̀ ɛ̍ gblè-e ɛ̍ chɛ̀ i̍ wɛ̀ bo. Nɛ̀ ɛ̍ bloa̍ se̍ i̍ tè mu̍. Dɛ̍nu̍ɛ, mɔ̀ la̍ Biɛsibo ɛ̀ nu̍-a jeědih-a dlǔtu-ɛ, ɛ̍ bo ɛ̀ nyǐ ǐn gbǐh wɛ̀ ǎn sà nyɔ̍ jeědih de̍e̍ i̍. Nɛ̀ pò ɛ̍ tù Biɛsibo iě jeědih i̍ nu̍-iɛ, nɛ̀ nyɔ̍we̍ bo ɔ̀ nyǐ mɔ̀ naɛ nyɔ̍ gbǐh ke wɛ̀ u̍h-a nu̍ jeědih i̍ ɛ? Ka ɛ̍ nɛ-a ka-ɛ, mɔ̀-a chɛ̀-a nyɔ̍ bo ùh-a mu̍ tìh-a chɛ̀ i̍ chɛ̍n. Jɛ pò ɛ̍ tù Nyɔsoa-a gbǐh iě jeědih i̍ nu̍-iɛ, nɛ̀ mɔ̀ juo ɛ̍ ka Nyɔsoa-a kmɔ̌ wlu̍ i̍ kɔn-ɛ nɛ-a da̍a mɔ̀ we̍ wɛ̀-ɛ.
“Kmu-nyɔ̍ ɔ̀ blě-a ɔ̍ fɔ̀n-dɛ̍ᵻ kli̍hgbɛ̍-ɛ, pò ɔ̍ gbɛ̀n dǒ ɔ̍ chɛ̀-a gbò we̍ i̍-ɛ, nɛ̀ ɔ̍ kɔn-dɛ̍ᵻ kli̍hgbɛ̍-a gbɛ̍n gba̍n. Jɛ pò nyɔ̍ ɔ̀ kmu-a ɔ̀ sìì-a ɔ̍-ɛ pa̍ ɔ̍ we̍, wɛ̀ ɔ̍ iě ɔ̍ klà sà-ɛ, nɛ̀ ɔ̍ sà ɔ̍ fɔ̀n-dɛ̍ᵻ ɔ̍ tè-a wlì-ɛ kwa̍a̍, wɛ̀ ɔ̍ iě ɔ̍ gbɛ̍n-dɛ̍ᵻ laa̍ gblè.
“Nyɔ̍ jɔ se̍-a ǎn dɛ kɛ̍n nɛ-ɛ, nɛ̀ ɔ̍ tbaɛ ǐn bu̍hᵻ i̍. Nɛ̀ nyɔ̍ ɔ̀ se̍-a ǐn we̍ gbǎ à iě-a dɛ̍ tàdùè po̍-ɛ, nɛ̀ ɔ̍ gbà dɛ̍ ja̍i̍.”


Jusu la̍a̍, “Pò jeědih sɔ dǒ nyɔ̍ de̍e̍ wɛ̀ ɛ̍ iě tǐn la̍ i̍ pɔ̀n la̍ mu̍ dě pòɛ̍ɛ̍ kɛ̍n wɛ̀ ɛ̍ se̍-e tǐn la̍ jě-eɛ, nɛ̀ ɛ̍ mu̍ ka dǎ, ‘Gbò kɔn di̍i̍ ǐn sɔ-aɛ, ǎn mu̍-e de̍ mu̍.’ Ɛ̍ iě-a de̍ mu̍-ɛ, nɛ̀ dě gbò-a chɛ̀ wo̍lo-ɛ i̍, dɛ̍ᵻ kli̍hgbɛ̍ po̍-eɛ gba̍a̍. Wɛ̀ ɛ̍ mu̍ iě ɛ̍ ja jeědih mɛ̀sɔɔ̌n diih ìh kɔn gblɛ̍n nyni-a jii̍ ìh sìì-a ɛ̍ chɛ̀-ɛ. Wɛ̀ i̍h mu̍ iě i̍h tǐn deě. Sɔ tu̍ jɔ̍gbau laa̍ ɔ̍ bɔ̌ɛ-a dě di̍i̍ nɛ-ɛɛ, ɛ̍ nyni jii̍ ɛ̍ sìì sàì naɛ.”

Jusu wlu-a dɛ̍ la-ɛ, iě nynɔ̌ due wǐ dě nyɔ̍ tlùgbei̍ laa̍ nynɛ̌. Ɔ̍ la̍a̍ dě Jusu we̍, “Nynɔ̌ ɔ̀ wlǔh-ia m̀ wɛ̀ ɔ̀ nyǎ-ɛa m̀-ɛ, ɔ̍ nmɔ i̍.”
Jɛ Jusu la̍a̍, “I̍i̍n, jɛ nyɔ̍ ùh wɔ̌n-a Nyɔsoa-a wlu̍ iě ùh nu̍-a ɛ̍-ɛ, u̍h bo ùh nmɔ i̍ kaa̍.”


Nyɔ̍gbei-a tìè-a la̍ i̍-ɛ, iě Jusu la̍a̍, “Ti̍laa nyɔ̍ la u̍h nyni gblɛ̍n-ɛ. U̍h-a pɔ̀n jbaɛdih i̍, jɛ i̍h se̍ poe-ɛ mu̍. Jbaɛdih u̍h-a mu̍-a jě sǔh-ɛ, i̍h bo ìh nɛ-a Jona pùn. Ka Jona bo ɔ̀ nu̍-a juola dǒ Ninifa nyɔ̍ we̍-ɛ, kǎ Nyi̍ɔ̍-a Jǔ-a mu̍ juola nu̍-ɛ nu̍ ke dǒ ti̍laa nyɔ̍ we̍. Ti̍ ɛ̍ mu̍-a sàwi̍h sì ti̍ nu̍-ɛ, nynɔ̌ ɔ̀ kɔn-a Siba bloa̍ wlu̍ i̍-ɛ, nɛ̀ ɔ̍ mu̍ i̍ nyna ɔ̍ iě ti̍laa nyɔ̍ la tìh dlǔ po̍. Dɛ̍nu̍ɛ, ɔ̍ sɔ dě bloa̍-a kɔ̍ la̍-a, wɛ̀ ɔ̍ ji̍ blǔh baa Sɔlɔma-a flɔ̍nwlùh dounᵻ we̍ po̍ la̍. Jɛ kaka la̍, dɛ̍ ɛ̀ ku̍-a wɔ̍n ɛ̀ sìì-a Sɔlɔma-a, ɛ̍ nɛ da̍a wɛ̀. Ti̍ ɛ̍ mu̍-a sàwi̍h sì ti̍ nu̍-ɛ, nɛ̀ Ninifa nyɔ̍-a mu̍ i̍ nyna u̍h iě ti̍laa nyɔ̍ la tìh dlǔ po̍. Dɛ̍nu̍ɛ, u̍h nɔ̀ɔ̍, ti̍ Jona bla̍-a tìh dě u̍h we̍-ɛ, wɛ̀ u̍h bǐi i̍. Jɛ kaka la̍, dɛ̍ ɛ̀ ku̍-a wɔ̍n ɛ̀ sìì-a Jona-a, ɛ̍ nɛ da̍a wɛ̀.


“Nyɔ̍-ɔ tba̍ nape̍ wɛ̀ nɛ̀ sìle ɛ̍, àe̍e̍ wɛ̀ nɛ̀ bǎɛ ɛ̍ jawih kɛ̍n. Jɛ nyɔ̍-a pèle ɛ̍ ja̍i̍, wɛ̀ nyɔ̍ ùh-a pa̍-a dě gbò-ɛ, iě u̍h-a jě i̍. Àn jlǐh bo ìh nu̍ nape̍ dǒ àn ku̍ pùn. Ɛ̍ tìh pò àn jlǐh nɛ blee-ɛ, nɛ̀ àn ku̍ kli̍hgbɛ̍-a mu̍ sɔ̀npli nu̍. Jɛ pò àn jlǐh se̍ blee nɛ-ɛ, nɛ̀ àn ku̍ kli̍hgbɛ̍-a mu̍ dě kwile-e nɛ. Ɛ̍ tìh-ɛ, chlɛ̌ àn chɛ̀ i̍ pò sɔ̀npli nɛ-a dě ìn ja̍a̍-ɛ, ɛ̍ se̍ kwile-ɛ. Pò àn ku̍ kli̍hgbɛ̍ nu̍ sɔ̀npli ɛ̍ dɛ̍ se̍ dě kwile-e nɛ-ɛ, nɛ̀ àn ku̍ kli̍hgbɛ̍-a mu̍ fa̍n ka nape̍-a wa̍n-ɛ.”


Jusu wɔ̀-a wlu-ɛ, iě Fɛlesii jǔ due dǎ ɔ̍, ɔ̍ ke ɔ̍ iě dɛ̍ tàdùè di̍ i̍. Wɛ̀ Jusu mu̍ dě ɔ̍ blǐ gbò, iě ɔ̍ tè i̍ ɔ̍ iě dɛ̍ di̍. Fɛlesii jǔ jě-a Jusu-ɛ, sɔ ɛ̍ kèle ɔ̍ i̍. Dɛ̍nu̍ɛ, ɔ̍ se̍ i̍ dle wɛ̀ ɔ̍ di̍ dɛ̍. Wɛ̀ Joi la̍a̍ dě ɔ̍ we̍, “Mɔ̀ɔ̍ Fɛlesii nyɔ̍, mɔ̀-a wɔ̍lɔ dǒ mɔ̀-a kàu̍n ke plɛ̌ɛ kɛ̍n i̍, jɛ nɛ̀ dě i̍h di̍i̍ jǐ-i dǒ flɛ̀n we̍. Kǎ dɛ̍ᵻá kloǒ nu̍-ɛ ke kà kɔn-ɛ nu̍ dě mɔ̀ di̍i̍ jǐ-ɛ. Mɔ̀ɔ̍ bo-nyɔ̍ la, ɛ̍ se̍ nyɔ̍ ɔ̀ nu̍-a dě di̍i̍ ka-ɛ ɔ̀ se̍ nɔ̌ kɛ̍n ka nu̍ ke ae? Jɛ dɛ̍ᵻ ìh nɛ-a dě mɔ̀-a kàu̍nᵻ ke plɛ̌ɛᵻ di̍i̍-ɛ, mɔ̀ nmɔ-ɛ i̍h wlùh dě nyɔ̍gbà nyɔ̍ we̍, nɛ̀ dɛ̍ᵻ kli̍hgbɛ̍-a mu̍ wlihwlǐh nɛ dǒ mɔ̀ we̍.
“Jɛ Fɛlesii nyɔ̍, chlě dǒ mɔ̀ we̍. Dɛ̍nu̍ɛ, dɛ̍ᵻ pùè mɔ̀-a jě-aɛ, mɔ̀-a sà-o due dǒ Nyɔsoa we̍, ìh nu̍-a dɛ̍ᵻ plìh plìh ìh-a chɛn-a smǎ-ɛ, iě mɔ̀-a tǎli i̍ slɛ̌-ɛ ke Nyɔsoa-a jbɛɛ i̍. Mɔ̀ kɔn mɔ̀ iě i̍h nu̍ gbɛɛ, jɛ nɛ̀ mɔ̀ bɔ̌ jih sie-a dǒ de̍-ɛ i̍ tǎli-ɛ.
“Chlě dǒ mɔ̀ we̍ Fɛlesii nyɔ̍. Dɛ̍nu̍ɛ, mɔ̀ jbɛɛ tà chɛ̀ i̍ tè-ɛ dě Juu nyɔ̍-a wɛɛ sà gbòᵻ sɔ̀n i̍, ɛ̍ ke mɔ̀-a ja̍ tè-ɛ dǒ mɔ̀ nyinɔ̍ i̍ sà la̍ dě dɔɔ̌ gbale̍e̍ ke. Chlě dǒ mɔ̀ we̍, dɛ̍nu̍ɛ, mɔ̀ wɔ̀ gbàlɔ̍ biěᵻ ìh se̍-a juola tù-iɛ iě nyɔ̍ se̍-a juo u̍h-a na-a kɛ̍n i̍-ɛ.”
Wɛ̀ telě nǎ poe nyɔ̍ due sà ɔ̍ wlu̍ pɔ̀n we̍, ɔ̍ la̍a̍, “Dlǔtu, ɛ̀ àn bla̍-aɛ, nɛ̀ àn po̍ àɔ̀ wlu̍ pùn i̍ bo ke wa.”
Jusu la̍a̍, “Chlě dǒ mɔ̀ we̍ ke, telě nǎ poe nyɔ̍. Dɛ̍nu̍ɛ, gbɛ̀ᵻ ìh ku-a kwa̍-aɛ bo mɔ̀-a po̍ dǒ nyɔ̍ duuh kleǐ. Jɛ nɛ̀ mɔ̀-a chɛ̀-ɛ wɔ̌ɛn u̍h sɔ̍n we̍ po̍ tìh i̍. Chlě dǒ mɔ̀ we̍, dɛ̍nu̍ɛ, Nyɔsoa-a tu̍owli po̍ nyɔ̍ mɔ̀ baaᵻ dbǎ-aɛ, mɔ̀ɔ̍ bo ùh pɛ̀ɛ̀ u̍h-a gbàlɔ̍ biěᵻ. Ɛ̍ tìh-ɛ, mɔ̀ɔ̍ bo ùh nu̍ sàànsi̍i̍h, iě mɔ̀ wɔ̌ɛn mɔ̀ baaᵻá nu̍-dɛ̍ᵻá tìh i̍. U̍h dbǎ Nyɔsoa-a tu̍owli po̍ nyɔ̍ iě mɔ̀ pɛ̀ɛ̀ u̍h-a gbàlɔ̍ biěᵻ. Ɛ̍ tìh-ɛ, Nyɔsoa-a flɔ̍nwlùh la̍a̍ ke-ɛ, ‘Ǎn mu̍ ǎn tu̍owli po̍ nyɔ̍ ke gba̍tòà dě u̍h we̍ dbo̍, nɛ̀ u̍h-a mu̍ u̍h-a duuh dbǎ, wɛ̀ u̍h iě duuh klě jě-e.’ Wɛ̀ Nyɔsoa-a tu̍owli po̍ nyɔ̍ kli̍hgbɛ̍ ùh dǔ-aa dbǎ-ɛ sɔ dě kmɔ̌-a gbɔ̀ tè la̍-ɛ, u̍h-a nymɔ̍ wlǎ-a i̍-ɛ, ɛ̍ tìh iě dǒ ti̍laa nyɔ̍ dlǔ i̍ tè, sɔ dě Ebɛ-a nymɔ̍ we̍ wɛ̀ ìè Sɛɛkewlaɛɔ jɔ u̍h dbǎ-ɛa dǒ gblǒ ke Nyɔsoa-a slaǎ sà gbò nynɛ̌-ɛ, ìè ɔ̍ naɛ jɛɛ-ɛ. I̍i̍n, ǎn sèàɛ̍ mɔ̀ wlùh, u̍h-a tìh-a mu̍ dǒ ti̍laa nyɔ̍ dlǔ i̍ tè.
“Chlě dǒ mɔ̀ we̍ telě nǎ poe nyɔ̍. Dɛ̍nu̍ɛ, mɔ̀ sà tɔɔ-a gbò kɔɛ̍n wɔ̍n. Mɔ̀-a chɛ̀-ɛ pa̍-e, iě ùh-a pɔ̀n-a deě pa̍-a i̍-ɛ, mɔ̀ ka̍n u̍h-a wìè.”
Jusu sɔ-a doǒ-ɛ, wɛ̀ telě nǎ poe nyɔ̍ ke Fɛlesii nyɔ̍-a po̍ ɔ̍ pàwe̍i̍ dɛ̍blɔ dɛ, iě u̍h-a tèle ɔ̍ dɛ̍ᵻ dɔu dɔu i̍. U̍h-a nu̍ ɛ̍-ɛ dǒ gbɛ̀ɛ̀ tè-ɛ we̍, wɛ̀ pò ɔ̍ po̍ wlu̍ sɔ̀n-ɛ, u̍h iě ɔ̍ gbɛ̍n.

Terera ku Luu 11