Mien Bible (Thai Script) © Thailand Bible Society, 2007

อา​ดัม เหธา นิ่น เญย เอ๊า, ฮา​วา, นิด ลิ์ว ต่อย, นิ่น เญย เอ๊า ฯฒฯ ม่าย เจี๊ยน ซิน อ๊ะ. ยู์ง ตุ๊ เต้า ตอน ต้าย. นิ่น ฯฒฯ ก๊อง, “เฒี้ยว เถง เยีย ตุ๊ เต้า ตอน ต้าย อ๊ะ.” นิ่น ฯฒฯ ธ้วด บั๋ว เห่ว คา​อิน. ฆะฮ้า นิ่น แอ๋ง ยู์ง คา​อิน เญย โย์ว, อา​แบน.
อา​แบน โฮล ต้าย นิ่น ยู์ง ปะกี ยู่ง. คา​อิน แอ๊ะ, โหฒว เหลียง-เด่ย. เจี๋ย ต้าย, ม่าย ฮนอย คา​อิน ต้อ เต๋ย นิ่น เญย เด่ย หฒั่ง ธ้วด เญย กะน้าย-หฒวัง ต้าย ฝ่ง ห่อ ปุน เฒี้ยว. อา​แบน ต้อ เต๋ย เยียม นิ่น เญย ปะกี ยู่ง กวั้น กะญั์ว เญย ต้าว ทอย ตอน เหธา ปะกี ยู่ง เญย เฮมย ต้าย ฝ่ง ห่อ. เฒี้ยว ปวั๊ง เฮญี้ยว อา​แบน เหธา นิ่น ฝ่ง ห่อ เญย กะน้าย. มป่า คา​อิน เหธา นิ่น ฝ่ง ห่อ เญย กะน้าย ทิน-ฮู่ง ไม้ ปวั๊ง เฮญี้ยว อ๊ะ. คา​อิน ฯฒฯ เฉีย เจี์ย ไห่. เฮมียน มับ แม่ง มับ หฮมวัง เญย.
เฒี้ยว ฯฒฯ ก๊อง บั๋ว คา​อิน, “เม่ย โหฒว หาย หญู่ง เฉีย เจี์ย, เฮมียน ด่ง หน่าย หฮมวัง? เม่ย โหฒว ตุ๊ หอบ นอ, เยีย ปวั๊ง เฮญี้ยว เม่ย. หลาย เม่ย โหฒว ไม้ หอบ, ฒุ์ย บ๊าบ เจี๊ยน วั้ว แก้ง ด่าง อ๋อย กุ๊น เจี๊ยน เม่ย, มป่า เม่ย อ๋อย หฒุ ป์อง เถา ฮี่ง.”
คา​อิน ก๊อง บั๋ว นิ่น เญย โย์ว, อา​แบน, “บัว มี่ง วั้ว เจี๋ย เด่ย เอาะ?” มี่ง เถา เด่ย, คา​อิน ฯฒฯ ธา เจี๊ยน นิ่น เญย โย์ว ไต๋ กวั่ง หมี่ อ๊ะ.
เฒี้ยว หน่าย ก๋า คา​อิน, “เม่ย เญย โย์ว, อา​แบน, เจี๋ย หาย หมี่ อ๊ะ?”
คา​อิน เตา, “เยีย ไม้ ฮิ้ว นีอา. เยีย หธ่อ อ๋อย หฒุ โก๋ว เยีย เญย โย์ว ไฟ?”
เฒี้ยว แอ๋ง ก๊อง, “เม่ย โหฒว ธ้วด หาย หญู่ง สี่? เม่ย เญย โย์ว เญย ฑย้าม เยียม เดา-เดี๊ย เห่ว เจี๊ยน ธ้วด ต้าย โก๋ เยีย. อี้ หฒั่น เยีย โฮ้ว เจี๊ยน เม่ย. ยั่ง น้าย เจี๋ย เม่ย ไม้ ตุ๊ โหฒว เด่ย, เหว่ย หฒุ เม่ย หล่ง เม่ย เญย ปั์ว ปุน เม่ย เญย โย์ว เญย ฑย้าม เหลี่ยว เหฌี่ย สาม เปียะ เดา, ฮนั้ง เดา หมอง ฑุ่ย นะ ฑย้าม นอ. เยียม น้าย มี่ง, เม่ย โหฒว เด่ย, เญย เฒี่ยง โห่, เดา ไม้ ธ้วด แกง-หฒวัง. เม่ย อ๋อย หฒุ โหฒว โฌ่ว หฮวา เมี่ยน โย่ว ลู่ง เดี๊ย.”
คา​อิน แอ๋ง ก๊อง บั๋ว เฒี้ยว, “เม่ย ฮนั้ง น้าย นอ ตี่ง เยีย เญย ฒุ์ย เซ ปะหละ เฮนี้ย ไห่, เยีย เตี๊ย ไม้ ตุ๊. หมั่ง ก๋า! อี้ ฮนอย เม่ย หฒุ่น เยีย เปย๋า, กวั่ง เจี๊ยน น้าย เต๋ย เดา มี่ง, หย่า ไม้ ปุน เยีย เยียม เม่ย เญย หฑะเฮมียน. เยีย อ๋อย หฒุ โหฒว โฌ่ว หฮวา เมี่ยน เจี๋ย น้าย เจี๋ย วั้ว โย่ว ลู่ง เดี๊ย. เถา หาย เมี่ยน ปวัด เยีย, นิ่น บัว อ๋อย ไต๋ เยีย.”
มป่า เฒี้ยว เตา, “ไม้ ตุ๊ เหลาะ. หาย เต้า ไต๋ เม่ย อ๋อย หฒุ เฒาะ เสี่ย เต้า ไต๋ ตี๊ เม่ย เหยียด เต้า.” เฒี้ยว ฯฒฯ โหฒว นอม จั๋ง-โห่ เยียม คา​อิน เญย ซิน. หาย เต้า ปวัด นิ่น ฯฒฯ ฮิ้ว ตุ๊ ไต๋ ไม้ ตุ๊ นิ่น อ๊ะ. คา​อิน ฯฒฯ เล่ย ฆอย เฒี้ยว หมี่ อ๊ะ, มี่ง เอ​เดน ตง ปูง แหมง, เยียม นอม เต่ย-ปูง เห่ว โน้ด.

คา​อิน เหธา นิ่น เญย เอ๊า นิด ลิ์ว ต่อย, นิ่น เญย เอ๊า ฯฒฯ ม่าย ซิน อ๊ะ, ยู์ง ตุ๊ เต้า ตอน หย่า ธ้วด บั๋ว เห่ว เอ​โน้ก. คา​อิน เหธย นอม ฒี่ง ต้าย ธ้วด บั๋ว กัน นิ่น เญย ตอน เญย บั๋ว เห่ว เอ​โน้ก. เอ​โน้ก ตุ๊ เต้า ตอน เห่ว อิ​ล้าด. อิ​ล้าด โหฒว เม​หู​ยา​เอน เญย เตีย. เม​หู​ยา​เอน โหฒว เม​ทู​ซา​เอน เญย เตีย. เม​ทู​ซา​เอน โหฒว ลา​เม้ก เญย เตีย.
ลา​เม้ก หล่ง อี เต้า เอ๊า. ม่าย เต้า เห่ว อา​ดา, ม่าย เต้า เห่ว สิน​ลา. อา​ดา ยู์ง ตุ๊ ยา​บาน. ยา​บาน โหฒว เยียม ด๊บ-ลิ่ว ยู์ง แซง-คู้ วั้ว เต๋ย เมี่ยน เญย อง-ถาย-แงะ. นิ่น เญย โย์ว เห่ว ยู​บาน. ยู​บาน โหฒว พัด ต้าน ป้า, ปย๊ม เฮล้า-ด้ง หนู วั้ว เต๋ย เมี่ยน เญย อง-ถาย-แงะ. สิน​ลา ยู์ง ตุ๊ ทู​บัน​คา​อิน. ทู​บัน​คา​อิน โหฒว หฒั่ง เมี่ยน, หล่ง ต้ง ซิ เหธา เฮลียะ โหฒว หญู่งๆ จา-สี่. นิ่น เญย หมั่ว เห่ว นา​อา​มา.
ลา​เม้ก บั๋ว นิ่น เญย เอ๊า,
“อา​ดา เหธา สิน​ลา หมวัง เยีย ก๊อง ม่าะ!
ลา​เม้ก เญย มเซียะ ตอน อ้า! หมวัง หลง เยีย เญย หว่า.
เยีย ไต๋ เต้า เมี่ยน เหว่ย หฒุ นิ่น ห่อย เยีย เซียง ไห่.
ไต๋ เต้า เมี่ยน หลุน เมี่ยน เหว่ย นิ่น เบ๊าะ เยีย มุน.
สี ก๊อง หาย เต้า ไต๋ คา​อิน, อ๋อย หฒุ ไต๋ เสี่ย เต้า ตี๊ นอ.
หาย เต้า ไต๋ เยีย, อ๋อย หฒุ ม่าย เธี้ยด เหฒียบ เธี้ยด เต้า ตี๊.”

อา​ดัม เหธา นิ่น เญย เอ๊า นิด ลิ์ว ต่อย, นิ่น เญย เอ๊า แอ๋ง ยู์ง ตุ๊ เต้า ตอน ต้าย. นิ่น เญย เอ๊า ก๊อง, “ทิน-ฮู่ง แอ๋ง ปุน เต้า ตอน เยีย ตี๊ อา​แบน, ต้ง คา​อิน ไต๋ วั้ว เต้า.” นิ่น ฯฒฯ ธ้วด บั๋ว เห่ว เสด. เสด หย่า ตุ๊ เต้า ตอน, ธ้วด บั๋ว เห่ว เอ​โน้ด. วั้ว หฒั่น เมี่ยน เจี์ย กอน ก๊อง ธ้วด เฒี้ยว เญย บั๋ว หฒั่ง นิ่น.

Listen to ทิน เต่ย โต้ว 4