Meta - 2013 CABTAL (NT) Non Drama

Meta - 2013 CABTAL (NT) Drama

À nyaʼa ənɨ ə nyùmə̀ we, ɨnɔ̂n bə̂d chuʼ mbɨ ə chuʼ nyaʼa wò fetɨ. Mbɨ nyaʼa fetɨ əne, mbɨ mɔʼɔ sɨə tə̀ʼrɨ̀ə̀ mbɨ cherə. Yeso nyaʼa bè kɔ ghǎ əmbɨ mbi mə̀mə̀ə̀nɨ̀-ɨnû ni, “Mbə̀ we əwən ɨmbə̀ʼ ɨfuʼ mɨ̀Farisiî we nɨə ghɨ̀ ni ŋgə̀ŋ kɔʼ. Əne yɨ mə̀ gha ni mbə̀ we ɨmbə̀ʼ ɨbekɨ ɨnû mɨ̀mə̌d. Chəi əghɨ ə mɔʼɔ nɨ mbɨ kubrɨ nɨ chəi mbɨ bɨrɨ fiʼ, kɨ̀ ənɨ mbɨ nəmɨ nɨ chəi bə̂d bɨrɨ kyerɨ. Əne ɨnû mɔʼɔ mbe nɨ mbə̀ nyaʼa gha ənɨ ɨsɨ ə finə, bə̂d bɨrɨ zu ənɨ ɨsɨ ə zeŋə. Mbe nɨ mbə̀ nyaʼa chùmbɨ̀ ɨŋga ɨtu nəb əfənə, bə̂d bɨrɨ təm saʼ tɨ ɨdom rɨ nəb.”


“Mə wɨə ghà ɨ nən, mbən mbɨ mɨ̀sə̀ʼ ni, tɨ mbə̀ bɔ ə bə̂d mbe nɨə zwiirɨə nyamnyod, àyɨə chəi ənû ə cherə nɨ tɨ̀ mbɨ wɨrɨ ghɨ̀. Àyɨə mə bɨrɨ patɨ əwən ɨmbə̀ʼ wə̀d we nɨ tɨ̀ mbə bɔ. Mbə̀ bɔ yeʼ Ŋwiə̀, ɨmbə̀ʼ ɨghəm nɨ ənɨ wɨ̀ zwiirɨ bə̂d, wɨ̀ kɨrɨ berɨ ɨka nɨ maʼ mɨ̀mə̌d ɨŋga əsɨ ɨchə. Ee, mə ghà ɨ nən ni mbə̀ bɔ əməd!
“Ɨmbə̀ʼ ɨ mbɨə fènə̀ tɨcherɨ rɨtân ənɨ akə ɨkab ə? Àyɨə chəi Ŋwìə̀ neb fɨ mɔʼ. Ka àbei nyôŋ te nɨ yeʼ ɨgun mbə ɨtu, Ŋwìə̀ fə taŋgɨ rɨjìm. Tɨ mbə̀ bɔ ə. Mbə yɨ ɨghɨ əka ɨnùn chè tɨcherɨ nɔnɔʼ.”


“Mə ghà ɨ nən ni, wə̀d jìm we nɨ ben ɨfě bə̂d ni tə kyerɨ əmɨ, Wan Wə̀d bɨrɨ bɨ ben ɨfě mbɨ̀aŋgɨrə̀ Ŋwiə̀ ni tə kyerɨ əməd. Àyɨə wə̀d mɔʼɔ we nɨ ton ɨfě bə̂d ni chəi tə kyerɨ əmɨ, Wan Wə̀d bɨrɨ bɨ ton ɨfě mbɨ̀aŋgɨrə̀ Ŋwiə̀ ni chəi tə kyerɨ əməd. Ŋwìə̀ bɨrɨ waʼ ɨnû rɨbɔ̀ŋ wə̀d jìm we nɨ gha ɨŋgam rɨbɔ̀ŋ ɨmbə̀ʼ Wan Wə̀d, àyɨə ka wɨ̀ bɨrɨ waʼ i mbɨ wə̀d we nɨ zɔm Əzwî ə Zeŋɨ.
“Ənɨ mbɨ nɨŋ əwən wò ɨŋga nəb tɨ ə̀kàtɨ̀, kɨ̀ ɨfě mə̀tùmbɨ̀ əbeŋ kɨ̀ ɨfě mɨ̀mbǎʼ əbeŋ, tɨ mbə̀ nwìʼ ə ɨnyod ɨmbə̀ʼ ɨchî nɨ tɨ̀ mbə bɨrɨ chɨ ɨnû rɨ ɨgwɨ nən, kɨ̀ ɨmbə̀ʼ ənû ze nɨ mbə̀ bɨrɨ ghà, ɨmbə̀ʼ ɨghəm nɨ Əzwî ə Zeŋɨ ə bɨrɨ ghɨ mbə̀ kyerɨ ənû ze nɨ mbə berɨ ghà ənɨ ə nyùmə̀ we.”

Mbaŋə̀ mɔʼɔ rɨŋga ɨnɔ̂n bə̂d we nyaʼa ghà əmbɨ Yeso ni, “Əchwiə̀-ɨnû, gha əmbɨ wum aŋgɔb ni wɨ̀ ghapɨ ɨghɨ mbe nɨ a mbǎʼ nyaʼa kwɨ nùŋ ɨ na.”
Yeso nyaʼa wììrɨ̀ ɨ bɔ ni, “Mɨ sə̀ʼ, a kɨə we nuŋ əmɨ ənɨ əsaʼ bə̂d, kɨ̀ ənɨ wə̀d nɨə ghàpɨ̀ ɨghɨ ɨ nən ə?” Ənɨ wɨ̀ nyaʼa ghà əne, wɨ̀ nyaʼa ghà əmbɨ ə bə̂d mbe ni, “Mbə̀ chub ɨkyèʼe, we əwən ɨmbə̀ʼ ənû nɨ feenɨ ɨghɨ, ɨmbə̀ʼ ɨghəm nɨ ka ɨ̀tènɨ̀ wə̀d yɨ i ɨmbə̀ʼ ɨchî nɨ wɨ̀ berɨ ɨghɨ nɔnɔʼ.”
Wɨ̀ nyaʼa sɨ ghà ənû ə mɨgɨ əmbɨ mɨ̀mə̌d ni, “Wə̀d mbɔ̂n mɔʼɔ nyaʼa berɨ si nɨ nyaʼə nàʼə̀ rɨjɨg nɨ kaŋ nɔʼ. Əne wɨ̀ nyaʼa kɔndɨ ɨŋga i fîŋ ni, 'Mə kɨə wo ghɨ ye ə? Chəi mə berɨ əsɨ nɨ nuŋ tɨjɨg tɔ̂ əŋgu!' Wɨ̀ nyaʼa ghà ɨŋga i fîŋ ni, 'Mə kyerɨ ənû ze nɨ mə̀ bɨrɨ ghɨ̀. Mə bɨrɨ saʼ tɨ ŋgə̌n, bɔm te nɨ faŋgɨ, əne nùŋ tum rɨjɨg mbɨ mbɨ ɨghɨjìm ɨŋga. Mə mɨ ghɨ̀ əne, mə bɨrɨ ghà əmbɨ mɨ nyamnyod ni, nyamnyod, à berɨ ɨghɨ nɨ nɔʼɔ, nɨ bɨrɨ nɨŋ əwe ɨghəm ɨwu nɔnɔʼ. Bɔtɨ e, jɨg e, nɔ e bə̀ ghaʼ e.' Àyɨə Ŋwiə̀ nyaʼa ghà ɨ bɔ ni, 'Àwɔ̀ yɨ əneŋ! Mə bɨrɨ nɨŋ e ɨ̀tènɨ̀ ɨzimɨ wɔ̂. Əne à kɨə we bɨrɨ berɨ ɨghɨjìm mbe nɨ à tekɨ nùŋ ə?'
“À yɨ ɨchî nɨ zɨə bɨrɨ yeʼ we mbɨ wə̀d we nɨə fetɨ ɨghɨ nùŋ əmbɨ i nyamnyod, nɨ ka məd yɨ i wə̀d mbɔ̂n ɨfě Ŋwiə̀.”


Yeso nyaʼa ghà əmbɨ mbi mə̀mə̀ə̀nɨ̀-ɨnû ni, “Mə ghà ɨ nən ni tɨ mbə̀ nwìʼ ə ɨnyod ɨmbə̀ʼ ə ɨ̀tènɨ̀, ni mbə̀ kɨə wo jɨg ye, kɨ̀ ɨmbə̀ʼ ə nyamnyod, ni mbə̀ kɨə wo zɨ ye, ɨmbə̀ʼ ɨghəm nɨ ɨ̀tènɨ̀ ə chè ɨghɨjɨg, nyamnyod ə bə̀ chè ngywɨ̌. Mbə̀ neŋ mbɨ̀məsaŋə, chəi tɨə kon ɨghɨ, chəi tɨə kwə̀ŋ ɨghɨ, chəi tɨ berɨ neb nɨ nuŋ ɨghɨ ɨŋga, chəi tɨ berɨ ŋgə̌n, àyɨə Ŋwìə̀ wɨə jəə mɨ̀mə̌d. Mbə̀ yɨ ɨghɨ əka ɨnùn chè rɨnən! À kɨə we rəbɔʼ nən nɨə nwìʼ ɨnyod nɨ tɨ̀ wɨ̀ yì ə awà fibɨ̀ ɨgun ɨni mbe nɨ wɨ̀ bɨrɨ chub ɨŋga ɨsɨg ə? À mɨ yeʼ nɨ chəi ənɨ tɨ̀ mbə ghɨ̀ ənû ə kwa ɨghabɨ əze, njɨ əton nɨ mbə̀ə nwìʼ ə ɨnyod ɨmbə̀ʼ ɨnû cherə kɨ ni yè ə? Mbə̀ neŋ ɨchî nɨ tɨ̀kwě ə kwiə. Chəi tɨə fàʼə̀, chəi tɨə bə̀ baʼə tə ngywɨ̌. Àyɨə mə ghà ɨ nən ni, ka àbei ɨfɔ̂n Solomòn nɨ nyaʼə fɔ̀ɔ̀nɨ̀ ɨŋga mbɔ̂n, chəi wɨ̀ nyaʼa berɨ ngywɨ̌ nɨ bɔŋ ɨghabɨ ɨ̀kwě mɔʼ rəbɔʼ rɨ̀kwě tɔ̂. Àyɨə Ŋwìə̀ mɨ yeʼə zɨ̀ə̀ ngywɨ̌ ənɨ ɨfu nɨ yeʼ ɨkǎ rə̀chɔ̀ŋ, ɨsɔ mbɨ màʼ ɨŋga ɨwid, njɨ ka məd wa bɨrɨ zɨ i ngywɨ̌ ɨgwɨ nən chè ɨchî nɨ wɨ̀ zɨ ənɨ ɨfu ə? Ə ɨbenɨ ə kàŋ kə! Tɨ mbə̀ kə̀b ə ɨghɨ mbe nɨ mbə̀ bɨrɨ jɨg mbɨ mbe nɨ mbə̀ bɨrɨ nɔ. Tɨ mbə̀ bɨ nwìʼ ə ɨnyod. À yɨ ɨbeŋ mbe rɨŋga ɨsɨg nɨ chəi mbɨ kyerɨ ə Ŋwiə̀ mbe ə kə̀b ɨghɨ mbɔ̂. Ə Mbǎʼ ə kyerɨ ni mbə kə̀b ɨghɨ mbɔ̂. Àyɨə mbə kəb yeʼ ənû ɨfɔ̀n əməd, əne wɨ̀ bɨrɨ bɨ naʼ ɨghɨ mbɔ̂ jìm ɨ nən.”


“Tɨ mbə̀ bɔ ə, kyɨə bɔn njɨ̀g, ɨmbə̀ʼ ɨghəm nɨ ə Mbǎʼ ə ghaʼ nɨ naʼ ənû ɨfɔ̀n ɨ nən. Mbə̀ fendɨ mbə ɨghɨ, nàʼ ɨkab we əmbɨ ə bə̂d ɨkwaŋ. Mbə berɨ tɨtagɨ nɨ ka tɨ bɨrɨ nun i. Mbə̀ bə̀ nùŋ ə mbɔ̂n ɨkaŋ əsɨ ze nɨ chəi zɨ̀ bɨrɨ mì, nɨ chəi ənɨ tɨ̀ ɨjɨ tindɨ ɨban bə̀ fɔrɨ ənɨ chəi ənɨ tɨ̀ ɨsəʼɨ chə̀kɨ̀. Əne yɨ ɨmbə̀ʼ ɨghəm nɨ, əsɨ nɨ e mbɔ̂n yeʼ əŋgu, e fîŋ bɨrɨ bɨ yeʼ əŋgu.”

“Mbə̀ kod ə ɨ̀kɔ̀bɨ̀ bə̀ che mbə ɨnam, əne chub ɨghabɨ ə bə̂d nɨə wòmə̀ ni ə mbǎʼ ə̀fàʼì yeʼe tɨ ənɨ əchwɨ̂ ɨnamɨ, ɨmbə̀ʼ wɨ̀ mɨ pè goŋgɨ ɨchû nəb, mbə fiʼ ɨ bɔ əwu əwən. Ŋwìə̀ zɨ əbɔrəbɔd ɨgun ə bə̂d ə̀fàʼì mbe nɨ ənɨ mbǎʼ ə̀fàʼì mɨ̀mə̌d yeʼe, wɨ̀ pè zə mɨ̀mə̌d ɨkyèʼe. Mə ghà rəsìʼ ɨ nən ni wɨ̀ bɨrɨ zɨ i ngywɨ̌ ə̀fàʼì, ghà ni mbɨ chub ə si, əne nàʼ ɨghɨjɨg əmbɨ mɨ̀mə̌d. Ŋwìə̀ zɨ əbɔrəbɔd ɨgun ə bə̂d ə̀fàʼì mbe nɨ chub ɨkyèʼe ənɨ ə nyùmə̀ we nɨ mbǎʼ ə̀fàʼì mɨ̀mə̌d yeʼe. Kɨ̀ wɨ̀ yeʼe ɨzimɨ ka kɨ ənɨ ɨzimɨ fə ka chè. Àyɨə mbə̀ kyerɨ ni, à kɨ nɨ wə̀d nəb kəʼ kyerɨ ə nyùmə̀ we nɨ ɨjɨ ə wo yeʼe, njɨ chəi wɨ̀ saŋ i nəb ni ɨjɨ we toʼə nyɨ ɨŋga. Əne mbən bə̂, mbə̀ tekɨ ɨnyod ɨmbə̀ʼ ɨghəm nɨ Wan Wə̀d wɨə yeʼe ənɨ ə nyùmə̀ we nɨ chəi mbə̀ə wòm əməd.”


Pità nyaʼa biirɨ əmbɨ Yeso ni, “Ə̀nùŋɨ̀sɨg, à wa kɨə ghà ənû ə mɨgɨ zɔ̂ ɨ na, kɨ̀ à kɨə ghà əmbɨ wə̀d jìm ə?”
Ə̀nùŋɨ̀sɨg nyaʼa wììrɨ̀ ni, “Wə̀d ə̀fàʼì we nɨə fàʼ ənɨ i fîŋ jìm bə̀ berɨ ɨwe, nɨ mbǎʼ ə̀fàʼì məd nuŋ ni wɨ̀ nəŋgɨ mbi bə̂d ə̀fàʼì, bə̀ nàʼ ɨghɨjɨg əmbɨ mɨ̀mə̌d ənɨ ə nyùmə̀ kuʼu kɨ wi ə? Ŋwìə̀ zɨ əbɔrəbɔd ɨgun ə wə̀d ə̀fàʼì we nɨ ənɨ mbǎʼ ə̀fàʼì məd bəndɨ, wɨ̀ pè zə əməd ənɨ wɨə fàʼə̀. Mə ghà rəsìʼ ɨ nən ni mbǎʼ ə̀fàʼì we bɨrɨ nuŋ əməd ni wɨ̀ sɨə nəŋgɨ mbi ɨghɨjìm. Àyɨə wə̀d ə̀fàʼì we mɨ ghà ɨŋga i fîŋ ni, 'Mɨ mbǎʼ ə̀fàʼì fə tan nɨ yeʼe.' Wɨ̀ nɨə ghà əne, wɨ̀ kɔ som bə̂d ə̀fàʼì mbaŋə̀ mbɨ mbɨ məyi, bə̀ kɔ ghanə jɨgə, bə̀ nɔə be i. Mbǎʼ ə̀fàʼì məd bɨrɨ yeʼe ɨgwɨ əni nɨ chəi wɨə wòm əməd bə̀ fɔrɨ ənɨ ə nyùmə̀ nɨ chəi wɨ̀ kyerɨ. Wɨ̀ bɨrɨ pe zɨ ɨchə ɨgwɨ məd, bə̀ nùŋ əməd əbɔʼ bə̂d ə̀fàʼì mbe nɨ chəi mbɨə fàʼ ənɨ tə fîŋ rɨjìm.
“Mbɨ bɨrɨ som wə̀d ə̀fàʼì we ɨchî rɨbɔ̀ŋ, ɨmbə̀ʼ ɨghəm nɨ wɨ̀ nyaʼa kyerɨ ənû ze nɨ mbǎʼ ə̀fàʼì məd nyaʼa kəbɨ, àyɨə chəi wɨ̀ nyaʼa tekɨ i ɨnyod ɨ ghɨ ənû rəŋgu. Àyɨə mbɨ bɨrɨ som wə̀d ə̀fàʼì we nɨ chəi wɨ̀ kyerɨ ənû ze nɨ mbǎʼ ə̀fàʼì məd kə̀bə̀ àmei ɨkə rɨpiî, ɨmbə̀ʼ ɨghəm nɨ wɨ̀ ghɨ̌ ənû ze nɨ njɨ mbɨ kəʼ som əməd. Wə̀d jìm we nɨ mbɨ naʼ ɨghɨ nɔnɔʼ ɨ bɔ, mbɨ bɨrɨ bɨ kəb ɨghɨ nɔnɔʼ rɨ bɔ. Mbɨ bɨrɨ bɨ kəb ɨghɨ nɨ nɔʼ chè rɨ əmbɨ wə̀d we nɨ mbɨ bə̀ naʼ ɨghɨ nɨ nɔʼ chè ɨ bɔ.


“Mə nyaʼa yeʼe ɨ chuʼ ɨwid ɨgwɨ ə si, əne mə kàŋ kəʼ kə̀b ni njɨ ɨ wɨə sɨə berɨə! Mə bɨrɨ nɨŋ mɨnib mɔʼɔ, əne chəi mɨ fîŋ bɨrɨ chub ənɨ əbɔrəbɔd pè ənɨ mə fə maanɨ! Mbə wa kɔndɨ ni mə fə yeʼe ɨmbə̀ʼ naʼ əbɔrəbɔd ɨgwɨ ə si ə? Mə gha ɨ nən ni chə̂. Mə fə yeʼe yeʼ mbɨ ə̀ghàbrɨ̀. Ɨ kɔ rɨ̀nîn, ə̀ghàbrɨ̀ ə berɨ jwɨ ɨŋga nəb ze nɨ bə̂d mɨ̀tân yeʼ ɨŋga. Mbɨ mɨtad bɨrɨ goŋ ətu mbɨ mbɨ mɨbe, mbɨ mɨbe bə̀ goŋ ətu mbɨ mbɨ mɨtad. Mbɨ bɨrɨ ghàbrɨ̀. Əne mbǎʼ bɨrɨ goŋ ətu mbɨ i wan mbaŋə̀, wan mbaŋə̀ bə̀ goŋ ətu mbɨ i mbǎʼ; ɨŋgɔb bɨrɨ goŋ ətu mbɨ i wan əyi, wan əyi bə̀ goŋ ətu mbɨ i nɨŋ, ɨŋgɔb ɨnom bɨrɨ goŋ ətu mbɨ i ɨwi wan, ɨwi wan bə̀ goŋ ətu mbɨ wi ɨŋgɔb ɨnom.”


Yeso nyaʼa bə̀ yì ghà əmbɨ mɨnɔ̂n bə̂d mbe ni, “Ənɨ mbə̀ zə ənɨ pàʼ ə nɔ̀ʼ rɨ əba ze nɨ nyùmə̀ ə nyɨ ɨkòb, mbə mbɨə ghà əwu əwən ni, 'Mbə̀ŋ zɨə wo nɔ.' Zɨ̀ bə̀ nɔ. Ənɨ mbə zə nɨ əfim ə chè rɨ əba ze rɨ əton, mbə ghà ni, 'Ɨsɨ bɨrɨ nòm əndan.' Ɨsɨ bə̀ nòm. Mbə yɨ ɨbekɨ bə̂d! Mbə kyerɨ ɨchî nɨ toʼrɨ ɨnû ɨmbə̀ʼ si fɔrɨ əton ɨkaŋ, àyɨə chəi mbə̀ kyerɨ ɨchî nɨ toʼrɨ ɨnû ɨmbə̀ʼ nyùmə̀ wɔ̂ rɨ̀nîn ɨmbə̀ʼ ə ye ə?”


“Əton nɨ mbə kyerɨ ənû nɨ kuʼnɨ, àyɨə chəi mbə̀ə ghɨ̀ə̀ kɨ ɨmbə̀ʼ ə ye? Ənɨ àwɔ̀ ə wò ə nəb ɨsaʼi mbɨ wə̀d we nɨ zɨ ɨsaʼi ɨgwɨ ne, kywɨ ənywɨ nɨ maanɨ ɨsaʼi we mbɨ məd ɨnə̂njɨ̀, njɨ wɨ̀ bɨrɨ suŋ əwe wò nàʼ əmbɨ əsaʼ mɨ̀sàʼi, əsaʼ mɨ̀sàʼi we nàʼ əwe əmbɨ mɨ̀pùrɨsɨ̀, mɨ̀pùrɨsɨ̀ sɨ nɨŋ əwe wò zɨ̀ ə ndəŋ. Mə ghà ɨ ne ni, kaʼ à bɨrɨ jwɨ̀ e pè əni ze nɨ à fə chwɨ ɨkab məd jìm.”

Terera ku Lk 12