Thai, Northern - 2017 Lanna Bible (Non-Drama NT)

“หละวัง​หื้อ​ดี​เน่อ ห้าม​แต่ง​เยียะ​ความ​ดี​ตัง​ศาสนา เปื้อ​อวด​คน​อื่น​เต้าอั้น ย้อน​ว่า​ถ้า​เยียะ​จาอั้น ต้าน​จะ​บ่﻿ได้​ฮับ​รางวัล​สัก​อย่าง​จาก​พระบิดา​ของ​ต้าน​ตี้​อยู่​ใน​สวรรค์
“ย้อน​จาอั้น เมื่อ​ใด​ก็​ต๋าม​ตี้​ต้าน​จ้วย​เหลือ​คน​ตุ๊ก​คน​จ๋น ก็​ห้าม​เยียะ​เหมือน​กับ​หมู่​คน​หน้า​ซื่อ​ใจ๋​ก๊ด ตี้​หูม​เป่า​แก​ใน​ธรรมศาลา กาว่า​ต๋าม​หน​ตาง เปื้อ​จะ​หื้อ​คน​ยกยอ​ปอปั้น​เขา เฮา​บอก​ความ​จริง​แก่​ต้าน​ตังหลาย​ว่า หมู่​เขา​ก็​ได้​ฮับ​รางวัล​เรียบร้อย​แล้ว จะ​บ่﻿มี​รางวัล​จาก​พระเจ้า​เลย ต๋อน​ตี้​หื้อ​ตาน​นั้น ห้าม​หื้อ​ใผ​ฮู้ เหมือน​กับ​มือ​ซ้าย​หื้อ​ตาน​แต่​บ่﻿หื้อ​มือ​ขวา​ฮู้ เปื้อ​ว่า​ก๋าน​หื้อ​ตาน​ของ​ต้าน​นั้น จะ​เป๋น​ความ​ลับ แล้ว​พระบิดา​ของ​หมู่​ต้าน ผู้​ตี้​หัน​สิ่ง​ตี้​หมู่​ต้าน​ลัก​เยียะ ก็​จะ​โผด​หื้อ​รางวัล​แก่​ต้าน

“เมื่อ​ต้าน​อธิษฐาน ก็​ห้าม​เยียะ​เหมือน​หมู่​คน​หน้า​ซื่อ​ใจ๋​ก๊ด ตี้​ซอบ​ยืน​อธิษฐาน​ใน​ธรรมศาลา กับ​ต๋าม​หนตาง เปื้อ​อวด​หื้อ​คน​อื่น﻿ๆ หัน เฮา​บอก​ความ​จริง​แก่​ต้าน​ตังหลาย​ว่า หมู่​เขา​ได้​ฮับ​รางวัล​ของ​เขา​ไป​แล้ว ส่วน​ต้าน​ต๋อน​ตี้​จะ​อธิษฐาน ก็​หื้อ​เข้า​ไป​ใน​ห้อง หับ​ปะตู๋ แล้ว​อธิษฐาน​ต่อ​พระบิดา​ของ​ต้าน​ตี้​ผ่อ​บ่﻿หัน แล้ว​พระองค์​ผู้​ตี้​หัน​สิ่ง​ตี้​ต้าน​ลัก​เยียะ ก็​จะ​โผด​หื้อ​รางวัล​แก่​ต้าน
“แล้ว​ต๋อน​ตี้​ต้าน​อธิษฐาน​อยู่​นั้น ก็​ห้าม​อู้​หลื้ม​เก่า​หลื้ม​ใหม่ เหมือน​คน​ตี้​บ่﻿ฮู้จัก​พระเจ้า​เยียะ​กั๋น ย้อน​ว่า​หมู่​เขา​กึ๊ด​ว่า​ถ้า​เยียะ​จาอั้น​แล้ว หมู่​เขา​ก็​จะ​ได้​ฮับ​กำตอบ​จาก​ก๋าน​อธิษฐาน​นั้น ห้าม​เยียะ​เหมือน​กับ​คน​หมู่​นั้น​เน่อ ย้อน​ว่า​พระบิดา​ฮู้​แล้ว​ว่า​ต้าน​ต้องก๋าน​อะหยัง​พ่อง ก่อน​ตี้​ต้าน​จะ​อ้า​ปาก​ขอ
“​ตั้งแต่​นี้​ต่อ​ไป​หื้อ​ต้าน​ตังหลาย​อธิษฐาน​จาอี้​ว่า
‘​ข้า​แต่​พระบิดา​ของ​ข้า​พระองค์​ตังหลาย​ผู้​ตี้​อยู่​ใน​สวรรค์
ขอ​หื้อ​นาม​ของ​พระองค์​เป๋น​ตี้​นับถือ
ขอ​หื้อ​แผ่นดิน​ของ​พระองค์​มา​ตั้ง​อยู่
ขอ​หื้อ​คน​ตังหลาย​เยียะ​ตวย​ต๋าม​ความ​ต้องก๋าน​ของ​พระองค์​ใน​โลก​นี้​เหมือน​อย่าง​เดียว​กั๋น​ตี้​เยียะ​ใน​สวรรค์
ขอ​โผด​หื้อ​ข้า​พระองค์​ตังหลาย​มี​อาหาร​กิ๋น​ใน​วัน​นี้
ขอ​โผด​ยก​โต้ษ​บาป​ของ​ข้า​พระองค์​ตังหลาย
เหมือน​กับ​ตี้​ข้า​พระองค์​ตังหลาย​ยกโต้ษ​หื้อ​คน​อื่น​ตี้​เยียะ​บ่﻿ดี​ต่อ​ข้า​พระองค์​ตังหลาย
แล้ว​ขอ​บ่﻿หื้อ​ปา​ข้า​พระองค์​ตังหลาย​เข้า​ไป​หา​ก๋าน​ลองใจ๋
แต่​ขอ​จ้วย​หื้อ​ป๊น​จาก​สิ่ง​บ่﻿ดี​’
ย้อน​ว่า​ถ้า​หมู่​ต้าน​จะ​ยกโต้ษ​หื้อ​คน​ตี้​เยียะ​บ่﻿ดี​แก่​ต้าน พระบิดา​ของ​ต้าน​ตี้​อยู่​ใน​สวรรค์​ก็​จะ​โผด​ยกโต้ษ​หื้อ​ต้าน​เหมือน​กั๋น แต่​ถ้า​ต้าน​บ่﻿ยอม​ยกโต้ษ​บาป​หื้อ​คน​อื่น พระบิดา​ของ​ต้าน​ก็​จะ​บ่﻿ยอม​โผด​ยกโต้ษ​บาป​ของ​ต้าน​เหมือน​กั๋น

“เมื่อ​ต้าน​ถือ​อด​อาหาร​เตื้อ​ใด​ก็​ต๋าม ห้าม​แป๋ง​หน้าหมอง​ต๋องเศร้า เหมือน​หมู่​คน​หน้า​ซื่อ​ใจ๋​ก๊ด​เยียะ​กั๋น หมู่​เขา​บ่﻿ซ่วย​หน้า​ล้าง​ต๋า บ่﻿หวี​ผม​หื้อ​ผ่อ​เหมือน​บ่﻿สบาย เปื้อ​ใค่​หื้อ​คน​ตังหลาย​หัน​ว่า​เขา​ก่ำลัง​ถือ​ศีล​อด​อาหาร​อยู่ แล้ว​ยกยอ​ปอปั้น​เขา แต่​เฮา​บอก​ความ​จริง​แก่​ต้าน​ตังหลาย​ว่า หมู่​เขา​ได้​ฮับ​รางวัล​เรียบร้อย​แล้ว จะ​บ่﻿มี​รางวัล​จาก​พระเจ้า​เลย แต่​เมื่อ​ใด​ตี้​ต้าน​ตังหลาย​ถือ​ศีล​อด​อาหาร​อยู่ ขอ​หื้อ​ซ่วย​หน้า​ล้าง​ต๋า กับ​หวี​ผม​เหมือน​ตี้​เกย​เยียะ​ตึง​วัน เปื้อ​จะ​บ่﻿หื้อ​ใผ​ฮู้​เลย​ว่า​ต้าน​ก่ำลัง​ถือ​ศีล​อด​อาหาร​อยู่ แต่​พระบิดา​ผู้​ตี้​ผ่อ​บ่﻿หัน จะ​หัน​สิ่ง​ตี้​ต้าน​ลัก​เยียะ ก็​จะ​หื้อ​รางวัล​แก่​ต้าน

“ห้าม​เอา​ก้า​เก็บ​ฮอม​ทรัพย์​สมบัติ​ไว้​หื้อ​ตั๋ว​ใน​โลก​นี้ เซิ่ง​ขี้​เมี่ยง​กาว่า​แมง​จะ​มา​ขบ​กิ๋น​เยียะ​หื้อ​ทรัพย์​สมบัติ​เสีย​หาย​ได้ กาว่า​ตี้​ขโมย​จะ​มา​ลัก​เอา​ไป​ได้ แต่​หื้อ​เก็บ​ฮอม​ทรัพย์​สมบัติ​ไว้​ใน​สวรรค์ ตี้​ขี้เหมี้ยง​กับ​แมง​จะ​มา​ขบ​กิ๋น​เยียะ​หื้อ​ทรัพย์​สมบัติ​เสียหาย กาว่า​ขโมย​เข้า​บ้าน​ลัก​เอา​ไป​ตึง​บ่﻿ได้ ย้อน​ว่า​ทรัพย์​สมบัติ​ของ​ต้าน​อยู่​ตี้​ไหน จิตใจ๋​ของ​ต้าน​ก็​อยู่​ตี้​หั้น
“แก่นต๋า​เผียบ​เหมือน​โกม​ไฟ​ส่อง​แจ้ง​ใน​ตั๋ว​ของ​คน​เฮา ถ้า​แก่นต๋า​ของ​ต้าน​ดี​ตึง​เนื้อ​ตึง​ตั๋ว​ก็​เป่งแจ้ง​ไป​หมด แต่​ถ้า​แก่นต๋า​ของ​ต้าน​บ่﻿ดี​ตึง​เนื้อ​ตึง​ตั๋ว​ก็​มืด​ไป​หมด แล้ว​ถ้า​กึ๊ด​ว่า​ตั๋ว​ต้าน​เป่งแจ้ง​แต่​แต๊﻿ๆ เป๋น​ความ​มืด ความ​มืด​นั้น​จะ​มืด​นัก​เหลือ​นั้น​ขนาด​ไหน
“บ่﻿มี​ใผ​จะ​ฮับ​ใจ๊​เจ้านาย​สอง​คน​พร้อม​กั๋น​ได้ ย้อน​ว่า​เขา​จะ​จัง​นาย​คน​นึ่ง แล้ว​ก็​ฮัก​นาย​แหม​คน​นึ่ง กาว่า​เขา​ก็​จะ​ซื่อสัตย์​กับ​นาย​คน​นึ่ง​แต่​จะ​ดู​ถูก​ดู​แควน​นาย​แหม​คน​นึ่ง เจ้น​เดียว​กั๋น​ต้าน​จะ​ฮับใจ๊​พระเจ้า​แล้ว​จะ​ฮับใจ๊​เงินคำ​พร้อม​กั๋น​บ่﻿ได้

“ย้อน​จาอั้น​เฮา​ขอ​บอก​ต้าน​ตังหลาย​ว่า บ่﻿ถ้า​ฮ้อนใจ๋​จี้​วี้​จ้อ​หว้อ​เกี่ยวกับ​จีวิต​ว่า จะ​เอา​อะหยัง​มา​กิ๋น เอา​อะหยัง​มา​ดื่ม กาว่า​เป๋น​ห่วง​เรื่อง​ของ​ตั๋ว​ว่า​จะ​เซาะ​หา​เสื้อผ้า​ตี้​ไหน​มา​นุ่ง ย้อน​ว่า​จีวิต​สำคัญ​นัก​เหลือ​ของ​กิ๋น กับ​ตั๋ว​ของ​คน​เฮา​ก็​สำคัญ​นัก​เหลือ​ผ้า​นุ่ง​บ่﻿ใจ้​กา แหงน​ผ่อ​นก​ตี้​บิน​อยู่​บน​ฟ้า​ลอ มัน​บ่﻿ได้​หว่าน​บ่﻿ได้​เก็บ​เกี่ยว แล้ว​ก็​บ่﻿ได้​เอา​ข้าว​สะสม​ไว้​ใน​หลองข้าว แต่​พระบิดา​ของ​ต้าน​ตี้​อยู่​ใน​สวรรค์ เลี้ยง​นก​หมู่​นั้น​ไว้ แล้ว​หมู่​ต้าน​ลอ มี​ก้า​นัก​เหลือ​นก​หมู่​นั้น​บ่﻿ใจ้​กา ใน​หมู่​ต้าน มี​ใผ​พ่อง​ตี้​ฮ้อนใจ๋ แล้ว​ต่อ​จีวิต​ตั๋ว​เก่า​หื้อ​ยาว​ออก​ไป​แหม​สัก​หน้อย​นึ่ง​ได้
“แล้ว​เป๋น​อะหยัง​เถิง​เป๋น​ห่วง​เรื่อง​ผ้า​นุ่ง แยง​ผ่อ​ดอกไม้​ต๋ำ​โต้ง​ต๋ำ​นา​ลอ​ว่า งอก​งาม​ขึ้น​มา​ได้​จาใด มัน​บ่﻿ได้​เยียะ​ก๋าน บ่﻿ได้​ปั่น​ฝ้าย แต่​เฮา​จะ​บอก​หื้อ​ต้าน​ตังหลาย​ฮู้​ว่า ขนาด​กษัตริย์​ซาโลมอน​ตี้​นับ​ว่า ร่ำรวย​นัก​ขนาด ก็​ยัง​ใส่​เสื้อผ้า​บ่﻿งาม​เต้า​ดอกไม้​หมู่​นี้​สัก​ดอก​เดียว ถ้า​พระเจ้า​แต่งหย้อง​ดอก​หญ้า​ต๋ำ​โต้ง​ต๋ำ​นา เซิ่ง​อยู่​ได้​วัน​นี้​วัน​เดียว ตก​แหม​วัน​ก็​จะ​ถูก​ก๋ำปือ​เข้า​ก๋องไฟ จาอั้น​แล้ว​พระองค์​ก็​จะ​แต่งหย้อง​หมู่​ต้าน​นัก​เหลือ​นั้น​แหม โอ หมู่​ต้าน​มี​ความ​เจื้อ​หน้อย​แต๊﻿ๆ ย้อน​จาอั้น​บ่﻿ถ้า​ฮ้อนใจ๋​ว่า ‘จะ​มี​อะหยัง​กิ๋น​พ่อง​ก่อ’ ‘จะ​มี​อะหยัง​ดื่ม​พ่อง​ก่อ’ กาว่า ‘จะ​มี​อะหยัง​มา​นุ่ง​พ่อง​ก่อ’ ย้อน​ว่า​คน​ตี้​บ่﻿ฮู้จัก​พระเจ้า​ก็​ปา​กั๋น​เซาะ​หา​สิ่ง​หมู่​นี้ แต่​พระบิดา​ของ​ต้าน​ตังหลาย​ตี้​อยู่​ใน​สวรรค์ ฮู้​ดี​อยู่​แล้ว​ว่า​สิ่ง​หมู่​นี้​จ๋ำเป๋น​สำหรับ​ต้าน แต่​สิ่ง​ตี้​สำคัญ​ตี้​สุด​สำหรับ​หมู่​ต้าน ก็​คือ​หื้อ​เซาะ​หา​แผ่นดิน​ของ​พระเจ้า​ก่อน กับ​เยียะ​ตวย​ต๋าม​ความ​ต้องก๋าน​ของ​พระเจ้า แล้ว​พระองค์​จะ​เตื่อม​แถ้ง​สิ่ง​ตี้​จ๋ำเป๋น​ตึง​หมด​นี้​กับ​หมู่​ต้าน ย้อน​จาอั้น​ก็​บ่﻿ต้อง​ฮ้อน​ใจ๋​เรื่อง​วัน​พูก วัน​พูก​ก็​มี​เรื่อง​ฮ้อน​ใจ๋​สำหรับ​วัน​พูก​อยู่​แล้ว วัน​ใด﻿ๆ ก็​มี​ปั๋ญหา​ปอ​สำหรับ​วัน​นั้น​อยู่​แล้ว

Terera ku มัทธิว 6