 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

حَا ڢُطَّمْ، وٛودِ بِعٜتٜىٰطٛ وٛلْدٜ؞ وٛلْدٜ مَنْ طٛنّٛ حَا کٛمْبِ اَللَّه، کَيْرٜ وٛنِ اَللَّه؞ ندٜ طٛنّٛ حَا کٛمْبِ اَللَّه دِغَ ڢُطَّمْ؞ اَللَّه تَغْرِ کٛو طُمٜ ڢُو بٜى مَارٜ، وَلَا کٛ تَغَ بِلَا مَارٜ؞ نغٜىٰندَمْ عِوِ حَا مَارٜ، نغٜىٰندَمْ مَنْ وٛنِ أَلنّٛورَ يِمْࢡٜ؞ أَلنّٛورَ طٛنْ يَيْنَ ندٜرْ ࢩِࢡْرٜ، عَمَّا ࢩِࢡْرٜ وَاوَايْ حَطُغٛ کَ؞
اَللَّه نٜلِ غٛطّٛ مٛ عِنْدٜ مُوطُمْ يُحَنَّ؞ عٛوَرِ نغَمْ سٜىٰدَنَاغٛ أَلنّٛورَ غٛ، نغَمْ حَا يِمْࢡٜ ڢُو نُطِّنَ کَ؞ عٛلَاتَاکِ أَلنّٛورَ کَنغْکٛ بٜى حٛورٜ مَاکٛ، عَمَّا عٛوَرِ سٜىٰدَنَاغٛ أَلنّٛورَ؞ وٛلْدٜ غٛ وٛنِ أَلنّٛورَ نغٛونغْطُکَ، کَ وَرِ ندٜرْ دُنِيَارُ، کَ طٛنْ يَيْنَنَ يِمْࢡٜ ڢُو؞
وٛلْدٜ مَنْ طٛنّٛ ندٜرْ دُنِيَارُ، اَللَّه تَغْرِ دُنِيَارُ بٜى مَارٜ، عَمَّا دُنِيَارُ عَنْدِتَايْ ندٜ؞ ندٜ وَرِ حَا يِمْࢡٜ مَارٜ، عَمَّا يِمْࢡٜ مَارٜ نجَࢡَايْ ندٜ؞ عَمَّا حَا جَࢡّٜ ندٜ، نُطِّنْࢡٜ ندٜ ڢُو، ندٜ حٛکِّ ࢡٜ بَاوْطٜ لَاتَاغٛ ࢡِࢡّٜ اَللَّه؞ ࢡٜندَࢩَاکَ ڢٛدّٜ طَبِيَ يِمْࢡٜ مَلَّ مُويٛ يِمْࢡٜ، عَمَّا طُمْ اَللَّه لَاتِنِ ࢡٜ ࢡِࢡّٜ مُوطُمْ؞
وٛلْدٜ غٛ لَاتِ نٜطّٛ مَرْطٛ ࢡَنْدُ، عٛجٛوطِ شَکَ مٜىٰطٜنْ؞ عٛ کٜىٰوْطٛ مٛعّٜرٜ عٜ غٛونغَ؞ مِنْ نغِعِ تٜدُّنغَلْ مَاکٛ، طُمْ تٜدُّنغَلْ ࢡِطّٛ بَجّٛ مٛ بَابِرَاوٛ؞ يُحَنَّ سٜىٰدَنِمٛ، وٛلْوِ بٜى سَوْتُ، وِعِ‏: «کَنغْکٛ وٛنِ مٛ مِوٛلْوِ دٛوْ مُوطُمْ، مِوِعِ‏: عٛوَرَنْ ࢡَاوٛ عَمْ، عَمَّا عٛࢡُرِ يَمْ، نغَمْ عٛطٛنْ دِغَ مِسِوَا دَࢩٜىٰغٛ؞»
عٜنْ ڢُو عٜنْ کٜࢡِ غٜطَلْ مٜىٰطٜنْ حَا جٜيْنِتَاجٜ مَاکٛ، عٜنْ کٜࢡِ مٛعّٜرٜ دٛوْ مٛعّٜرٜ؞ تَوْرٜىٰتَ حٛکَّامَ بٜى جُنغٛ مُوسَى، عَمَّا مٛعّٜرٜ عٜ غٛونغَ مبَنغِ بٜى عِيسَى اَلْمَسِيحُ؞ وَلَا مٛ مٜىٰطِ يِعُغٛ اَللَّه؞ عَمَّا ࢡِطّٛ بَجّٛ، طَکّٛتِرْطٛ بٜى بَابِرَاوٛ، کَنغْکٛ عَنْدِنِ عٜنْ مٛ؞


ندَا سٜىٰدَمْکُ يُحَنَّ ندٜ يَحُودُعٜنْ عُرُسَلِيمَ نٜلِ لِمَنْعٜنْ عٜ لٜوِعٜنْ حَا مَاکٛ نغَمْ ࢨَمُغٛ مٛ‏: «عَنْ عَ مٛيٜ؟» عٛسَلَاکِ جَابَاغٛ، عٛوَنغِنِ طُمْ لَاࢡْطُمْ، عٛوِعِ‏: «نَا مِنْ وٛنِ اَلْمَسِيحُ؞» ࢡٜࢨَمِمٛ‏: «عَ مٛيْ کَدِ؟ عَ إِلْيَاسُ نَ؟» عٛجَابِ‏: «عَاعَ، نَا مِعٜلِيَ؞» ࢡٜمبِعِ‏: «عَ اَلنَّبِيجٛ مٛ مِنْ ندٜىٰنَتَ نَ؟» عٛجَابِ‏: «عَاعَ؞» ࢡٜمبِعِمٛ‏: «عٜ عَ مٛيْ کَدِ؟ حَا مِنْ کٜࢡَ لٛرْنَنْغٛ نٜلْࢡٜ مِنْ جَاوَابُ؞ طُمٜ عَوِعَنْتَ حٛورٜ مَ، عَنْ؟» عٛجَابِ‏:
«مِنْ وٛنِ مٛ اَلنَّبِي عٜسَايَ وٛلْوِ دٛوْ مُوطُمْ، وِعِ‏:
غٛطّٛ طٛنْ حٛولَ ندٜرْ لَدّٜ، طٛنْ وِعَ‏:
مبَطَنٜ جَوْمِرَاوٛ لَاوٛلْ دَرْنُنغٛلْ؞»
نٜلَاࢡٜ وَرْࢡٜ حَا يُحَنَّ غٛ، طُمْ ڢَرِسَعٜنْ؞ ࢡٜࢨَمِمٛ‏: «تٛ عَلَاتَاکِ اَلْمَسِيحُ مَلَّ إِلْيَاسُ مَلَّ بٛو اَلنَّبِيجٛ غٛ، نغَمْ طُمٜ عَطٛنْ وَطَ بَݠْتِسْمَ؟» يُحَنَّ جَابِ ࢡٜ‏: «مِنْ مِطٛنْ وَطَ بَݠْتِسْمَ ندٜرْ ندِيَمْ، عَمَّا وٛودِ غٛطّٛ شَکَ مٛوطٛنْ، عٛنْ عَنْدَا مٛ؞ عٛوَرَنْ ࢡَاوٛ عَمْ، عَمَّا مِ حٜعَايْ کٛو ڢِيسْتُغٛ ࢡٛغِّ ݠَطٜ مَاکٛ؞»
ڢُو طُمْ وَطِ حَا وُرٛ بَيْتَنِيَ، غَطَ مَايٛ عُرْدُنْ، حَا يُحَنَّ وَطَنْتَ يِمْࢡٜ بَݠْتِسْمَ؞

جَنغٛ مَنْ يُحَنَّ يِعِ عِيسَى طٛنْ وَرَ حَا مَاکٛ، عٛوِعِ‏: «ندَا جَوْغٜلْ اَللَّه عِتَّنْنغٜلْ حَکّٜىٰجِ دُنِيَارُ؞ کَنغْکٛ وٛنِ مٛ مِوٛلْوَنِ عٛنْ حَالَ مُمْ، مِوِعِ‏: غٛطّٛ وَرَنْ ࢡَاوٛ عَمْ، عَمَّا عٛࢡُرِ يَمْ، نغَمْ عٛطٛنْ دِغَ مِسِوَا دَࢩٜىٰغٛ؞ مِعَنْدَانٛ مٛ، عَمَّا مِوَرِ وَطُغٛ بَݠْتِسْمَ بٜى ندِيَمْ نغَمْ حَا عٛوَنغَنَ إِسْرَاءِيلَعٜنْ؞»
يُحَنَّ وَطِ سٜىٰدَمْکُ، وِعِ ڢَحِنْ‏: «مِيِعِ رُوحُ اَللَّه جِݠِّ دِغَ عَسَمَ بَنَ ݠٛولَ، وَرِ جٛوطِ دٛوْ مَاکٛ؞ مِنْ مِعَنْدَانٛ مٛ، عَمَّا اَللَّه مٛ نٜلِ يَمْ وَطُغٛ بَݠْتِسْمَ بٜى ندِيَمْ، وِعِ يَمْ‏: عَيِعَنْ رُوحُ جِݠّٛتٛ، جٛوطٛ دٛوْ غٛطّٛ، کَنغْکٛ عٛوَطَنْ بَݠْتِسْمَ بٜى رُوحُ شٜنِيطٛ؞» مِنْ مِيِعِ طُمْ، مِسٜىٰدَکٜ کَنغْکٛ وٛنِ ࢡِطّٛ اَللَّه ؞

جَنغٛ مَنْ يُحَنَّ طٛنّٛ دَرِ ڢَحِنْ حَا نٛکُّورٜ غٛ تَوٛنْ بٜى ݠُکَرَعٜنْ مُوطُمْ طِطٛ؞ ندٜ عٛيِعِ عِيسَى طٛنْ سَالٛ، عٛوِعِ‏: «ندَا جَوْغٜلْ اَللَّه؞» ݠُکَرَعٜنْ طِطٛ غٛ نَنِ کٛ عٛوِعِ، ࢡٜتٛکِّ عِيسَى؞ عِيسَى يٜىٰسِتِ، يِعِ ࢡٜطٛنْ تٛکِّمٛ، عٛࢨَمِ ࢡٜ‏: «کٛ طَࢡِّتِتّٛنْ؟» ࢡٜمبِعِمٛ‏: «رَبِّ، تٛيْ نجٛوطِيطَا؟» رَبِّ يِطِ وِعْغٛ مٛودِبّٛ؞ عٛوِعِ ࢡٜ‏: «نغَرٜ، عٛنْ نغِعَنْ؞» ندٜنْ ࢡٜنجٜحِ، ࢡٜنغِعِ حَا عٛجٛوطِ؞ ࢩَنْدٜ مَنْ ࢡٜکِيرْتِدِ، طُمْ طٛنّٛ بَاکِنْ سَاعَ نَيِ؞
عَندِرٜ دٜىٰرْطِرَاوٛ سِمٛنْ ݠِيٜرْ، عٛ غٛوتٛ ندٜرْ نَنْࢡٜ سٜىٰدَمْکُ يُحَنَّ، کَنغْکٛ عٛتٛکِّ عِيسَى؞ عَندِرٜ تَوِ دٜىٰرْطُمْ سِمٛنْ عَرَنْ، وِعِمٛ‏: «مِنْ تَوِ اَلْمَسِيحُ؞» اَلْمَسِيحُ يِطِ وِعْغٛ مٛيْتَاطٛ؞ عٛيَحْرِمٛ حَا عِيسَى؞ عِيسَى لَارِمٛ، وِعِ‏: «عَنْ وٛنِ سِمٛنْ ࢡِي يُحَنَّ، يٜىٰسٛ طٛ عِنْدٜ مَ لَاتٛتٛ کٜڢَسْ؞ کٜڢَسْ يِطِ وِعْغٛ تَݠَارٜ؞»

جَنغٛ مَنْ، عِيسَى يِطِ يَحُغٛ لٜسْدِ غَلِيلِ؞ عٛتَوِ ڢِلِݠْ، عٛوِعِمٛ‏: «تٛکَّمْ‏!» ڢِلِݠْ عِوِ وُرٛ بَيْتِسَيْدَ، وُرٛ مَاکٛ وٛوتٛ بٜى عَندِرٜ عٜ ݠِيٜرْ؞ ڢِلِݠْ بٛو تَوِ نَتَنَيٜلْ، وِعِمٛ‏: «مِنْ تَوِمٛ مُوسَى وٛلْوِ دٛوْ مُوطُمْ ندٜرْ تَوْرٜىٰتَ عٜ اَلنَّبِعٜنْ بٛو مبٛلْوِ حَالَ مَاکٛ، کَنغْکٛ وٛنِ عِيسَى مٛ نَسَرَتُ، ࢡِي يُوسُڢُ؞» نَتَنَيٜلْ وِعِمٛ‏: «حُوندٜ وٛوندٜ عِوَنْ دِغَ نَسَرَتُ نَ؟» ڢِلِݠْ وِعِ‏: «وَرْ، لَارْ‏!»
ندٜ عِيسَى يِعِ نَتَنَيٜلْ طٛنْ وَرَ حَا مَاکٛ، عٛوٛلْوِ دٛوْ مَاکٛ، عٛوِعِ‏: «ندَا غٛطّٛ لَاتِيطٛ عِسْرَعِيلَاجٛ بٜى غٛونغَ، مٛ وَلَا نَاڢِکَارٜ سَمْ؞» نَتَنَيٜلْ ࢨَمِمٛ‏: «نٛيْ عَنْدِرْطَ مِ؟» عِيسَى جَابِمٛ‏: «مِيِعِ مَ ندٜ عَطٛنّٛ لٜسْ عِبِّ، دِغَ ڢِلِݠْ عٜوْنَاکِ مَ تَوٛنْ؞» ندٜنْ نَتَنَيٜلْ وِعِمٛ‏: «مٛودِبّٛ، عَنْ وٛنِ ࢡِطّٛ اَللَّه ، عَنْ وٛنِ لَامِيطٛ إِسْرَاءِيلَ‏!» عِيسَى جَابِمٛ‏: «عَنُطِّنِ نغَمْ مِوِعِ مِيِعِ مَ لٜسْ عِبِّ نَ؟ عَيِعَنْ کُوجٜ ࢡُرَنْطٜ کُوجٜ طٜعٜ مَوْنُغٛ؞» عٛوِعِمٛ ڢَحِنْ‏: «غٛونغَ مِوِعٜتٜ، عٛنْ نغِعَنْ عَسَمَ مَࢡِّتَکٜ، مَلَاعِکَعٜنْ اَللَّه طٛنْ عٜىٰنغَ، طٛنْ نجِݠّٛ دٛوْ ࢡِي-نٜطّٛ ؞»

Terera ku يُحَنَّ 1