Mixtec, Northern Tlaxiaco: Tutu ii - Kaꞌan ia Dios nuu ndiꞌi ñayiu New Testament+

Tutu ii - Kaꞌan ia Dios nuu ndiꞌi ñayiu

Nuu ni kuyatni viko pascua ñayiu judio, kiuu ka jai xtaa vixin ja tu na levadura yiꞌi, te sutu ka kuu nijaꞌnu vi tee ka kaxtnoꞌo Ley Moisés ni ka nduku de naxa vi kaꞌni de Jesús, chi ka yuꞌu de ja vi kiti ini ñayiu ñuu siki maa de. Yun te ni kee Tachi anu Judas, tee suni nani Iscariote, ja ni okuu in tee neꞌu ndi uxi uu tee ni ka oskuaꞌa jin Jesús. Te ni jaꞌan de ni kaꞌan de jin sutu ka kuu nijaꞌnu vi tee ka kuu nijaꞌnu ka jito veñuꞌu ja ni ka ndatnoꞌo tnaꞌa de naxa xtuu de Jesús. Te ni ka kusii ini tee yun, guaa ni ka kaꞌan de ja vi tniuyaꞌu de Judas. Te ni jantaꞌu de. Yun te ni jinkondee de nduku de naxa saꞌa de ja xtuu de Jesús nuu tu na ñayiu ka oo.

Te nuu ni kintnaꞌa maa kiuu viko ja ka jaa ñayiu judio xtaa vixin ja tu na levadura yiꞌi, kiuu ka jaꞌni lelu ja ka jai viko pascua yun, te ni tetniuu Jesús Pedro vi Juan, te jiñaꞌa ya:
―Kuaꞌankuei ni te vi saꞌa tuaꞌa ni ja vi kaxinio viko pascua yaꞌa ―jiñaꞌa ya.
Te ni ka jikan tnoꞌo ña de:
―¿Ndenu kuini ni ja vi saꞌa tuaꞌa san? ―ka jiñaꞌa de.
Te jiñaꞌa ya:
―Kuaꞌankuei ni te nuu kiukuei ni maa ñuu kaꞌnu yun, te vi jinkuntnaꞌa ni jin in tee ndiso in kiyi ndute. Te vi kondikin ni de kiꞌinkuei ni ndee na ndiuu de veꞌe nuu oo de yun. Te vi kaꞌan ni jin maa tee xiin veꞌe yun: “Kachi Mastru ja ¿ndenu oo veꞌe ja tanuu ni vi kaxini de jin tee ka skuaꞌa jin de viko pascua yaꞌa?”, vi kuñaꞌa ni. Te xneꞌe maa de in veꞌe kaꞌnu oo ndee sukun nuu ja oo tuaꞌa. Te yun vi saꞌa vaꞌa ni ja vi kaxinio ―jiñaꞌa ya.
Yun te ni jaꞌankuei de, te ni ka jinkuꞌun de vi nagua ni kaꞌan maa Jesús. Te yun ni ka saꞌa vaꞌa de ja vi kaxini de jin ya viko pascua yun.
Te nuu ni jino ore ja vi kaxini ya, te ni ka jinkoo ya jin tee ni chitniuu ya nuu mesa. Te jiñaꞌa ya:
―Vi siun ni ndioo ini san ja vi kaxinio nuu viko pascua yaꞌa ama ka ja kuu san. Chi kaꞌan ndaa san ja ma kaa ka san nuu viko pascua yaꞌa guaa ndee na kenta kiuu ja skunkuu nagua oo nuu viko yaꞌa nuu tatnuni ia Dios ―jiñaꞌa ya.
Yun te ni kiꞌin ya in vasu, te ni ndakuantaꞌu ya nuu ia Dios, te jiñaꞌa ya:
―Vi tnii ni, te vi skaka ni vi koꞌo ni. Chi kaꞌan ndaa san ja ma koꞌo ka san nduxi uva yaꞌa guaa ndee na kenta kiuu ja tatnuni san nuu ñuyiu yaꞌa, saa sakoꞌo ka san ―jiñaꞌa ya.
Yun te ni kiꞌin ya in xtaa vixin ja tu na levadura yiꞌi, te ni ndakuantaꞌu ya nuu ia Dios, te ni taꞌu ya, te ni jiñaꞌa ya ja vi kaa de, te jiñaꞌa ya:
―Yaꞌa kuu yiki kuñu san ja soko san ja jaꞌa in in maa ni. Te vi kaa ni nagua ja vi kondakaꞌan ña ni ―jiñaꞌa ya.
Te suni saa ni ni saꞌa ya jin vasu nuu ni ndiꞌi ni ka jaxini ya. Ni tnii ya vasu yun, te jiñaꞌa ya:
―Nduxi uva yaꞌa kuu niñi san, ja kati ja jaꞌa in in maa ni, ja kokuu in tratu jaa ja tniuyaꞌu san yika kuechi ni.
’Su tee ja xtuu ña jin san, chi ka nukoo jin de nuu mesa yaꞌa. Kaꞌan ndaa san ja sein ja kuu san Seꞌe Teyii, chi ichi yaꞌa ni jani ña ia Dios ja kiꞌin san. Su ndaꞌu ni ka tee ja xtuu ña yaꞌa, chi kanakau tnundoꞌo ndevaꞌa siki de ―jiñaꞌa ya.
Yun te ni ka jinkondee de ka jikan tnoꞌo tnaꞌa de ndee de kaꞌan jin ya.

Te nuu kuee ka, te ni ka tee tnaꞌa de ndee de kuu ja kokuu kaꞌnu ka. Te jiñaꞌa Jesús:
―Tee ka kuu nijaꞌnu ja ka tatnuni nuu in in ñuu, chi ka tenini de ñayiu ja vi saꞌi nagua ka kuini maa de. Te ka kaꞌan de ja vi xnani ña ñayiu ja tee ka chituu ñayiu ñuu ka kuu de. Su ma vi saꞌa maa ni saa, chi in tee kuu kaꞌnu na saꞌa luluu de maa de, te in tee tatnuni na kokuu de na kuinio in tee jinokuechi. Chi ¿ndee tee kuu ja kuu kaꞌnu ka? ¿A tee jinkoo nuu mesa ja kaa de xtaa axi tee jinokuechi? ¿A masu tee jinkoo nuu mesa kuu tee kuu kaꞌnu ka? Su sein, chi suaꞌa jinokuechi san nuu in in maa ni.
’Su maa ni, chi siun ni ka oo ni jin san nuu tnaꞌa san tnundoꞌo. Te yun guaa taa san in tniuu ja vi kotatnuni ni, nagua ni chitniuu ña maa Tata Yua san jin san, nagua ja kiukuei ni nuu tatnuni san ja vi kaa vi koꞌo ni. Te vi jinkoo ni nuu in in mesa ja vi kaꞌndeo kuechi ndiꞌi uxi uu tatatnoꞌo Israel ―jiñaꞌa Jesús.

Yun te jiñaꞌa ya nuu Simón Pedro:
―Simón, ni jikan ña Tachi nuu ia Dios ja koto tnuni ña jin ndiꞌi ni, te kisi ña na kuinio nuu ka sijin triu. Su ni jikantaꞌu san ja jaꞌa ni nuu ia Dios, nagua ja ma ndayuꞌu ni jin tnoꞌo kandija ni. Te nuu na ndajiokuiin ni nuu san, te suni chituu ni sava ka ñayiu ka kandija ja na vi koyutnui nuu san ―jiñaꞌa ya.
Te jiñaꞌa Simón Pedro:
―Jitoꞌo san, sein chi ja ni jakin san anu san ja kondikin ña san kiꞌinkueio vekaa, vi guaa ndee na kuu san jin ni ―jiñaꞌa de.
Yun te jiñaꞌa Jesús:
―Pedro, kaꞌan san ja vi jakuaa vitna, te uni jichi kaꞌan ni ja tu jini ña ni ama ka ja kana liꞌli ―jiñaꞌa ya.

Yun te ni jikan tnoꞌo ña Jesús jin ndiꞌi de:
―Na ni tetniuu ña san ja ni jaꞌankuei ni, ni ka ndakani ni tnoꞌo ia Dios, ¿a nagua ni jaꞌni ña jin ni ja siun vini in ñunu xtaa, te ni in itni xuꞌun, te ni ndijan ni tu nagua ni ka yindaꞌa ni? ―jiñaꞌa ya.
Te ka jiñaꞌa de:
―Tu saꞌun nagua ni jaꞌni ña.
Yun te jiñaꞌa ya:
―Vitna guaa vi saꞌa tuaꞌa ni. Vi kondiso ni ñunu xtaa ni vi itni xuꞌun ni. Te ndee ni tu na yuchi kani nevaꞌa, te vi xiko ni visi soo suꞌnu ni, te vi kuaan ni in nagua ja vi kindaꞌa ni. Chi kaꞌan san ja nini kuu ja skunkuu tnoꞌo yoso nuu tutu ii ja kaꞌan siki maa san: “Ni ka saꞌa ndevaꞌa ña ñayiu na kuinio in tee kueꞌe ndevaꞌa”, kachi tutu ii. Te tnoꞌo yun, chi skunkuu ja jaꞌa san, te saa kokuu ―jiñaꞌa ya.
Yun te ka jiñaꞌa de:
―Jitoꞌo san, yaꞌa ka oo uu yuchi kani ―ka jiñaꞌa de.
Te jiñaꞌa ya:
―Ja ni kuu saa ni. Ma vi kaꞌan ka ni.

Yun te ni kee ya kuaꞌan ya yuku Olivos nagua ni osaꞌa maa ya. Te ni ka jata ndikin ña tee ka skuaꞌa jin ya kuaꞌankuei de. Te nuu ni jinokuei ya jin de yuku yun, te jiñaꞌa ya:
―Vi ndakuatu ni nuu ia Dios nagua ja ma junkuei ni nuu jakueꞌe ―jiñaꞌa ya.
Yun te ni kujioo ya nagua kuaꞌa jika kenta in yuu ndaꞌo. Te ni jinkuiin jiti ya ja ni ndakuatu ya nuu ia Dios, te jiñaꞌa ya:
―Tata Dios, jikantaꞌu san nuu ni ja nuu ja kuini ni, te skaku niꞌnu ña ni nuu tnundoꞌo ja ma kanakau siki san. Su na kokuu nagua kuini maa ni, masu nagua kuini san ―jiñaꞌa ya.
Yun te ni kenta in ia jinokuechi nuu ia Dios ja vaji ichi andivi, ja ndakuñaꞌa ka ya jandakui Jesús. Te ja siun kusuchi ndevaꞌa ini ya, te ni ndakuatu niꞌi ya nuu ia Dios. Yun te ni jinkondee tnaa ya junkuei ndee nuu ñuꞌu na kuinio ja too yuyu niñi. Te nuu ni ndiꞌi ni ndakuatu ya, te kuanoꞌo ya nuu ka oo tee ka skuaꞌa jin ya, te ni nukuꞌun ña ya ja ka kixin de, chi ni skuita ña tnoꞌo suchi ini. Yun te jiñaꞌa ya:
―¿Nau ja saa ka kixin ni? Vi ndakoo ni te vi ndakuatu ni nuu ia Dios nagua ja ma junkuei ni nuu jakueꞌe ―jiñaꞌa ya.

Te vi nini kaꞌan ka Jesús, te ni jinokuei kuaꞌa ñayiu ja vi kakuiko ñai, te yoxnoꞌo tee nani Judas, in tee neꞌu uxi uu tee ka skuaꞌa jin ya. Ni kuyatni de nuu oo Jesús ja tetuyuꞌu ña de. Yun te jiñaꞌa ya:
―Judas, ¿a vi in ja tetuyuꞌu ña ni kuu ja xtuu ña ni jin san ja kuu san Seꞌe Teyii? ―jiñaꞌa ya.
Te ja siun ni ka jini tee ka skuaꞌa jin ya ja ni jinokuei kuaꞌa ñayiu ja vi kakuiko ñai jin ya, te ni ka jikan tnoꞌo ña de:
―Jitoꞌo san, ¿a vi keneꞌe san yuchi kani, te vi kaxin tnaꞌa san jin ñayiu yaꞌa? ―ka jiñaꞌa de.
Yun te ni xtuji in de in tee jinokuechi nuu sutu kuu nijaꞌnu, chi ni kindee de soꞌo lado kuaꞌa tee yun. Yun te jiñaꞌa Jesús:
―Saa ni, ma vi saꞌa ka ni siun ―jiñaꞌa ya.
Te ni tetuu ya ndaꞌa ya soꞌo tee ni tuji yun, te ni nduvaꞌa. Yun te jiñaꞌa ya nuu sutu ka kuu nijaꞌnu vi nuu taka tee ka kuu nijaꞌnu ka jito veñuꞌu, vi nuu tee ka kuu nijaꞌnu maa ñuu ja ni jinokuei de ja vi tnii ña de jin ya:
―¿Nau ja vi yuchi kani vi yutnu ni kekuei jin ni na kuinio ja kuiꞌna kuu san? Te ndiꞌi ni kiuu ni ka oo veñuꞌu kaꞌnu, te tu ni ka tnii ña ni. Su saa kokuu, chi yaꞌa kuu ore maa ni, ja tatnuni jakaꞌnu ja oo ñunee ―jiñaꞌa ya.

Yun te ni ka tnii de ya, te kuaꞌankuei de jin ya veꞌe sutu kuu nijaꞌnu ka. Te Pedro, chi ndikin jika ni de, kuaꞌan de. Te nuu ni jinokuei de, te ni ka xtnaꞌa de ñuꞌu yeꞌe yun, te ni ka jinkoo de ka ndasaa de. Te suni ni jintnaꞌa Pedro, te ni jinkoo de neꞌu nuu ka oo tee yun. Su nuu ni jini ña in ñaꞌa jinokuechi ja nukoo Pedro nuu yuñuꞌu yun, te ni ndiaꞌa guaguaꞌa ña nuu de, te jiñaꞌa ña:
―Tee yaꞌa, chi suni in tee ka jika jin Jesús kuu de ―jiñaꞌa ña.
Su ni tayuꞌu tnoꞌo Pedro, te jiñaꞌa de:
―Tu jini san na tee kuu de ―jiñaꞌa de.
Vi nunuu ni, te ni jini ña inka de, te jiñaꞌa de:
―Roon, suni ka jika ron jin tee yun ―jiñaꞌa de.
Te jiñaꞌa tuku Pedro:
―Ñaꞌa, ma suu san kuu ―jiñaꞌa de.
Te vaa vi ndee nuu in ore, te jiñaꞌa tuku inka de:
―Ja ndaa ja tee yaꞌa, chi suni in tee ka jika jin Jesús kuu de, chi suni in tee ñuu Galilea kuu de ―jiñaꞌa tee yun.
Te jiñaꞌa tuku Pedro:
―Tu jini san na tee ka kaꞌan jin ni ―jiñaꞌa de.
Te vi nini kaꞌan ka Pedro, te ni kana in liꞌli. Yun te ni jionenuu Jesús, ndiaꞌa ya nuu de, te ni ndakankaꞌan de tnoꞌo ni kaꞌan ya nuu de, ja ama ka ja kana liꞌli, te tayuꞌu tnoꞌo de uni jichi ja tu jini ña de. Yun te ni ndee de yeꞌe yun, te ni jaku ndevaꞌa de ja tnaꞌu ini de.

Te ndiꞌi tee ka jito Jesús, ka jaku ndee de ya vi ka kani ña de. Te ni ka jasi de nduchi nuu ya, vi ni ka kani de nuu ya, te ka jiñaꞌa de:
―Kaꞌan, ndeja kuu ja ni kani ña ―ka jiñaꞌa de.
Vi kuakuaꞌa ka tnoꞌo neꞌe ni ka kaꞌan de jin ya.

Te nuu ni tuu, te ni ka ndututu ndiꞌi tee ka kuu nijaꞌnu nuu ñayiu judio, vi sutu ka kuu nijaꞌnu, vi tee ka kaxtnoꞌo Ley Moisés, te ni ka jaka de Jesús kuaꞌankuei jin de nuu junta yun, te ka jiñaꞌa de:
―Vitna te kaꞌan, ¿a suu ron kuu ia ni tetniuu Dios? ―ka jiñaꞌa de.
Te jiñaꞌa ya:
―Visi na kaꞌan san ja suu san kuu, su ma vi kandija ni. Te nuu ja na kakan tnoꞌo ña san in tnoꞌo, te ma vi kaꞌan ni, te ni ma vi siaa ña ni. Su ndee ore vitna, te jinkoo maa san, ja kuu san Seꞌe Teyii, ichi ndaꞌa kuaꞌa Dios, ia ndakui ndevaꞌa ―jiñaꞌa ya.
Yun te ka jiñaꞌa ndiꞌi de:
―Nuu saa, ¿te a Seꞌe ia Dios kuu ron? ―ka jiñaꞌa de.
Te jiñaꞌa ya:
―Maa ni ka kaꞌan ja suu kuu san ―jiñaꞌa ya.
Yun te ka jiñaꞌa de:
―¿Na testiu ka ka jiniuꞌo? Te vi mao ni ka onini tnoꞌo ni kaꞌan de jin yuꞌu de, ja Seꞌe ia Dios kuu de ―ka kachi de.

Terera ku San Lucas 22