Apozelɨyara 3
3
Sɨvɨla kayaa'nanyarɨ yavada'galake'nesɨ.
1Pɨgaa' sawɨsɨrɨ tɨri kɨlokɨyagaa' Gotɨyarɨ wɨjahaa' Gotɨyare Angevɨna Pitalyɨ Jonɨjɨ wogi. 2Saba tɨkurya pɨrɨ' “Tɨkurya Nawɨ'nyava,” wo'nɨkevɨ sɨvɨla kayaa'nanyai mudangegaa'daasɨ sarei yɨma'nakei mwaala'. Yuyagaa' tɨkurya savɨna pwara makabeva walamwaaihɨna yadɨvɨ' Gotɨyare Angevɨ widaawadaapiyaraavɨ naanga yɨdaangadelyɨ nɨgwianna. 3Sarei mwaalaka dara wanganake' “O, a'mwe saraai duimanaabɨhɨla!” Daka wɨda' “A'mweraaihi, nɨgwia yanga dɨnyɨjaayɨla!” 4Tɨnna baihana'na yagɨla Pitai wɨda' “Tɨnna dɨnehwangana!” 5Sara kuda' sai yawɨ'na “Nɨgwia nyɨjaayɨkadera.” Yawɨ'na yaka tɨnna wanganna ya'. 6Wangadaasɨ Pitai wɨda' “Nɨmɨ nɨgwia aawa! Kɨrɨ' pɨbwi tewaanyabwi kɨnɨnnakeinyɨ yanga gɨzaavɨma! Naazaretɨ mwaalyai Kɨraazɨtɨya Jizaazare yayavɨna gɨthɨma! Kaanya jamarya!” 7Mi'na wɨdaka gamɨre aangasavɨ maaraka yɨrɨ'bwara'. Yɨrɨ'bwa'daasɨ gamɨre sɨvɨlyɨraalyɨ naba'jangeraalyɨ dɨragɨnya yarai kyɨma'na' 8yɨladɨkwosɨ'naawɨna yaka gannya sɨvɨlyɨraalyɨ daavɨna yaka kaanya gaai yamarina ya'. Kaanya gaai yamaryaka Gotɨyare Angevɨ Pitalyɨ Jonɨjɨ saraalyɨ ye'mwannawɨlaka yamaryada dɨkwosɨ'nada Gotɨyarɨ yɨlaaya maryada mwaalɨna ya'. 9Mwaalɨna yaka kaanya yamaryada Gotɨyarɨ yɨlaaya maryadaasɨ a'mwera bwanganeva 10dara wanganesa' “Ai, a'mwe sai Tɨkurya Nawɨ'nyavɨ walamwaaina yada nɨgwianna nedadei daaka!” Sara deva sahwarɨ yɨma'nakevɨna nɨ'nɨka yadɨvɨ' atɨka maru'na'na ye'.
Gotɨyare Angevɨ Pitai wɨdake'nanyɨra.
11A'mwe sai Pitalyɨ Jonɨjɨ saraarɨ lɨmwadaasɨ a'mwe yuyara atɨka maru'na'dɨvɨ' kumɨnyawɨ yɨhulɨvɨlɨyavɨna bɨna ye'. Gotɨyare Angevɨ yɨhulɨvɨlɨya sa' Solomonɨmɨre yɨhulɨvɨlɨya' wo'nɨkesɨ. 12Bɨna kye' Pitai yuyaraavɨ tɨnna wanganaka wɨda' “Yɨzɨrelɨyaihi, da'na atɨka baa'na maru'na'manɨgava? Baa'na nengamanɨgava? ‘Kɨrɨnnya dɨragɨnyasɨ tewaanyabulyɨ sasara yagɨla a'mwe dai kaanya yamaryaderɨ wɨmwaihɨwaai,’ sara jawɨ'manɨgava! 13Aawa, davwina Evɨraamɨjɨ Aazakɨjɨ Jaikopɨjɨ saraavɨre Gotɨyai nemɨre sɨnnawɨnyaraavɨre Gotɨyai gannya wɨdaayadei, Jizaazarɨ yɨdɨkaavaka gannyaba byaannakerɨ wɨmwaaihake'nesɨ. Sare'na yɨwolya'nesɨ. Gannya wɨdaayaderɨ Romɨyaraavɨre kotɨya'na sarɨmɨ makuna kye' a'mwe Paailatɨ yɨhɨtha' ‘A'mwe tewaanya darɨ wɨla kulayaara'mujɨ wawadelyɨ.’ 14Sara kyɨhɨtha' Paailatɨmyaba ‘Arɨkewɨnyɨ. Sahwai aala!’ wɨdesaihɨlyɨ. Sahwai tewaanyai yɨda'maraangei nayaa yadei kɨrɨ' sarɨmɨ ‘Arɨkewɨnyɨ. Balana!’ wɨdeva Paailatɨmɨ wɨde' ‘Sai balana! A'mwe pwarɨ wɨlya' jaaka!’ A'mwe sai kɨgaa' tamakakei kayaa'nanyalyɨ. 15Sara wɨdɨna yeva Gaalyaburɨne Aaya Kaavɨlyarɨ Romɨyaraavɨna wɨjaavɨna kye' tamakɨna ye'. Mi'na tamakɨna kye' dɨvi Gotɨyai yɨdɨkaavake'na tɨnna wanganolyainaai savɨna yɨhɨzalɨkurakɨvanɨgoi. 16A'mwe dai Jizaazarɨ lɨmwagarakevɨna Jizaazare dɨragɨnya' sahwarɨ yavada'gaimwa'. Yɨthaanyi, tɨnna wangamanɨgasasɨ sɨduta yawɨ'manɨgasasɨ a'mwei sɨvɨla tewaanyaraalyɨyarɨna Jizaazai sara yɨwa'. Naarɨmɨ dɨna ‘Jizaazai dɨragɨnaangelyɨ,’ dɨna yola Jizaazare yaya' a'mwerɨ wɨdɨna kyɨwoi sarɨmɨnyaba dai tewaanna mwaalɨkelyɨ.
17Nya'mweihi, sarɨmɨnyɨna yawɨ'mwa. ‘Juyara sɨduta myawɨri yeva Jizaazarɨ kayaa'na ye'. Sabaaibɨ' kumɨre a'mwe naangera sara ye',’ nɨmɨ sara yawɨ'mwa. 18Yesa'na sɨnnawɨ Gotɨyai pɨropetɨyara wɨ'nawɨjɨwaakyaraavɨre maangengɨ wɨjaa'. Dara dɨnɨ' ‘Gotɨyare Kɨraazɨtɨyai, Gotɨyai dahɨlakyaakerɨ daanga wɨvɨnadelyɨ.’ Sara dɨnɨke'na Jizaazarɨ sara tamake'. Sare'na Gotɨyare yagaala nebulya'na yakesɨra. 19Sarevɨdaa'nyɨ dahaa' sarɨmɨre sɨmunyabwi mudɨkebwi jawɨramaarila! Dɨhɨnyɨwannyɨla! Gotɨyarɨ kudapɨjɨ sahwai sarɨmɨre kayaa'nanya marasɨ'nade'nanyɨ. 20Marasɨ'nojɨ gamɨnyabadaa'nyɨ tewaanyagasa sarɨmɨnyɨ maryasaabathelyɨ. Nabaai sarɨmɨnyɨna Gotɨyai yawɨraka sɨnnawɨ Kɨraazɨtɨyarɨ dahɨlakakerɨ maryasaabathelyɨra Jizaazai. 21Kɨgaakuna Gotɨyai pɨropetɨya tewaanyaraavɨre maangengɨ wɨjaake sara yɨda'nɨke'na ‘Sɨgunyavɨ Jizaazai yemwaaladelyɨra.’ kada' yuya mudɨke yavada'galojɨyagaa'na walaabathelyɨra. 22Jizaazarɨ dahɨlakakerɨna Ne Mozɨzai yɨda'nɨka ‘Nyɨdasaabakabaaibɨ' Naangei sarɨmɨre Gotɨyai sɨrya'mwerajɨyarɨ pɨropetɨyarɨ dahɨlakojɨ sarɨmɨnyɨna wɨdasaabathelyɨra. Sai Gotɨyare yagaala yɨhɨthathelyɨ. Yuya sa mi'na kyɨhɨthozɨ kadɨka wɨ'napɨjɨ sara jideihɨlyɨ. 23Pɨropetɨya sarɨ kurɨnaka gazaizai kadɨka mu'nyɨ kyojɨ Gotɨyare a'mweraayawɨdaasɨ Gotɨyai mu'nyade sarɨ jaapaina yojɨ kayaaka yɨgaladelyɨra.’ 24Ne Mozɨzai sara yɨda'nɨkesɨ. Sara kyɨdava' Gotɨyarɨ wɨ'nawɨjɨwaakadɨvɨta pɨropetɨyara A'mwe Saamyɨwelɨjɨ yuya dɨviyarajɨ sara yɨrɨka daryaavɨ dangɨna nejaa'. 25Gotɨyai sara wɨjaake nelɨmwagarake' pɨropetɨyara nejaata dɨnɨka sarɨmɨnyɨnengɨra. Gotɨyai Ne sɨnnawɨnyaraavɨ naanga wɨjaake' nelɨmwagarake' sarɨmɨnyɨne yagaalyasɨra. Yagaala sa' Gotɨyai Evɨraamɨmɨ wɨjaa' ‘Gɨmɨre yɨsiwiai tewaanna kyojɨ sare'na Kwaakevakɨ jɨlɨkaimɨraaya yuyaraavɨna tewaanya naanga yanga wideinyɨ.’ 26Savɨna Gotɨyai gannya wɨdaayaderɨ dahɨlakaka sɨnnawɨ sarɨmɨnyawɨnna kudasaaba' Jizaazai yɨhɨthɨvanɨ' ‘Gazaigɨzaigɨ gɨmɨre kayaa'nanyabwi jahalya'maka!’ Sara yɨhɨthɨvanɨke' Gotɨyare dɨragɨnya' yɨhɨgaimwagozɨ tewaanya naanga yanga yɨhyadelyɨ.” Pitai sara wɨda'.
Currently Selected:
Apozelɨyara 3: byr
Označeno
Deli
Kopiraj
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.