Luka 21
21
Sema Vaalu Vile Mi'italonu Lamoli Mulai Noxou Lataua
(Mak 12:41-44)
1Iesu muvikalane'i mukalu xe iou mutelo, la mumaisi'a ta mitema sou lavulavuluti piena mine'e sou mi'italonu lamolii'a sou ulai noxou Lataua no anu taasou lamoli ne. 2La Anu mumaisie sema vaalu vile kalumo ne ie lamoli se kitu'asi, mine'e mi'italonu Leputa#21:2 Leputa ne, ta Iutaia lamolii'a. Lexe ipitanu Leputa 128, la uxali loxo Denalia vile. tamei. 3#2Ko 8:12Xe Iesu mumaisie aloxo ne, la muvikala aloxo 'o, “Eni avikalangengi manina musuku lexe sema vaalu ane 'o ne, ie lamoli se kitu'asi, ia lamoli soxu e ane mileanu ne, anu tatila musuku mo mua'alixu noxi'a ane'i ane mileanu 'o. 4Xo ane'i ane latala e mileanu lamoli ne, ane'i mileanu loxo ne, ia lamolii'a pienanu a uai sio. Ia ane sema vaalu 'o ne, ie mii vile la sou uai uasi. Soxu e mino'u ne, ane mileanu mulai mukalusi ne. Ia vile uai sou iloto la'ilali no anu la uasi.”
Sosovosou Voxo Kaluxusou
(Mat 24:1-14; Mak 13:1-13)
5Xe ta molomolo noxou mose'i mivikalanusou taatani ane muxolu no nano no taasou lalotu tatila noxou Lataua ne aloxo 'o, “Namaisou taatani ano 'o ne, mitulusou no anu lavolavo'o lailaixe mo mitokolomonu no anu mimii lailaixe ane ta mitema milosou Lataua.” Ia Iesu muvikalane'i aloxo 'o, 6#Luk 19:44 “Ngingi ngemaisou taatani e lailaixe 'o, ia ulai ili'i la lavolavo'o ano 'o ne, umomomo sou vile uvoutulo no lataanu menexu vile uasi. Xo tapiena ukalusi ne imamulonu, ka ipeinu ulu'elai no lia.”
7La ane'i mitali'isou Iesu aloxo 'o, “Itema sou ulosixe lavulavu, nini navikalanexi lexe, Talu, la mimii ane ne uxali? Xe sosovo ma'ia uxali tei sou uvikala lamana noxixe lexe mimii ane ne, anu 'aso uxali maninasou?”
8Xe Iesu muavuti, la mukoline'i aloxo 'o, “Ngasaxila'inge laixe, xo loxo 'o io ta mitema ikalavoingengi. Ta mitema tavu'alo ixali, la imoxo'u ualasilo, io ivikala lexe, ‘Eni anu 'a.’ mo ivikala lexe, ‘Voxo kaluxusou anu 'a uxali.’ Ia ngingi ngalomuxa'a uasi. 9No mine ngingi ngalomusou a'alosi'a ta mitema i'oto'oto mo ngalomusou a'alosou tu'utu'umaxu ane uxali no lialia 'o, la nga'olo'olo mo nga'ume mamu. Xo mimii ane ne, anu uxali tei o, ia voxo kaluxusou ne anu a uxali avile ne uasi.”
10Iesu muvikalane'i la aloxo 'o, “Ta mitema sou tuala vile iavuti, la i'oto noxi'a ta mitema sou tuala vile ane va'axu. Mo ta mitema noxou tatananu tuala vile iavuti, la ilo'a ta mitema noxou tatananu tuala vile ane va'axu ne i'oto. 11Xe no xalexalee tuatuala mose'i, la uniuni toxoxa'a ukunikuni mo soli uxali mo pipiena iouiou uxali no tuatuala mo mimii ane nenge ta'umolu ne uxali xe sosovo toxoxa'a molu no opo loxotolo uxali kalumo.
12Ia mimii ane ne uxali uao, la ta mitema itetelisinge sou ivenge mo ane'i ilalingenge no taasou lalotu noxi'a ta Iutaia mo no taasou navunavu mo ilai itulusinge no talaxa'a ta tatananu tuatuala ilo'a ane'i ane isaxila'u tuatuala, xo ngingi ngemulileli. 13No anu vote'i ane ne, la ngingi ngaa'aloxu ualasilo ulai noxi'a. 14#Luk 12:11-12Ia mamu sou ngaxavutala piena tei lexe maasi la ngavikala loxovaa no mine ane'i itali'isinge. 15#Apo 6:10Xo eni melo alosinge lavulavu sou vaikala ane umomomo so ta uluamengi ne ikolinu vaikalamengi mo italoxolingenge uasi. 16#Mat 10:21-22Ia ta maminge ilo'a ta neninge mo ta vivinge ilo'a ta mingemingengi mo ta menexinge ne kalumo i'italongengi ngalai no avo'a ta uluamengi, la ane'i ivenge ngingi mose'i ngasoli. 17Ta mitema ukalusi ne, imasaxainge uasisi manina xo ngingi ta noxilo. 18Ia Lataua usaxila'inge, la sou kisinge laxusou vile umomomo so tasia'uxu uasi. 19Ia loxo ngingi ngatulu pekia'inge, la ngano'u mauli ane kaluxu uasi.
20Ia no mine ngingi ngamaisi'a ta mitema sou 'oto'oto ixalilixu tuala tila ne Ielusalemu, la ngalavu lexe voxo sou ane'i imamulonu tuala ne, anu a mune'e 'alai. 21La sou ane'i ane ixolu no xalee lia tila ne Iutaia ne, i'ume ilai no la'olao'lu mo ane'i ane ixolu no nano ne Ielusalemu ne, i'ume ilai no ale xe ane'i ane ixolu no aleale ne, la i'una no tuala tila ne uasi. 22#Iel 5:29; 46:10; Ose 9:7Xo voxo ano 'o ne sou Lataua ulosi'a ta mitema navunavu loxo mimii latala ane ane'i mikaukavunu no nano no Lavuku Tavuna teinu uxali manina. 23Anu voxo ane ne uxali, la anu voxo masua manina noxi'a ta sema ane opoopone'i ilo'a ane'i ane isusune'i ta 'ili'a sio! Xo tu'utu'umaxu tatila uxali no lialia 'o mo Lataua la'iaxui'a ta mitema ne Ielusalemu, la sou Anu ulosi'a navunavu. 24#Lex 79:1; Pal 11:2Ane'i ta mitema sou 'oto'oto ne, ive'a mose'i no anu laviso mo isoisoli xe ane'i itaxusi'a mose'i sou ipaxelene'i ilai no tuatuala va'ava'axu ukalusi. Ia ta mitema ane ilavusou Lataua uasi ne, imalomaloxo'u tuala tila ne Ielusalemu ne, ulai utalo no anu voxo noxi'a ukalu.
25 # Ais 13:10; Ese 32:7; Ioe 2:31; Pal 6:12-13 No anu voxo ane ne, la sosovo iouiou uxali no anu aso mo so'io ilo'a ta oto. La xasi toxoxu uvausu no luaki mo luluxu, la ta mitema latala no tuatuala no lialia 'o ne, ane'i i'olo'olo mo ixavutala piena. 26Xe ane'i milavu lexe mii ma'ia ane sou uxali no lialia 'o, la sou ane'i mi'ume manina mole ie'i muxalixalili sou ilapau. Xo ta mimii loxo ta oto mo ta'umali ilo'a koi'uxaxai mo tavaivolo no opo loxotolo ikunikuni ukalu. 27#Tan 7:13; Mat 26:64; Pal 1:7No voxo ane ne, la ta mitema imaisou Itema 'Olu mine ulu'e no anu xavi mo lamanaxu toxoxa'a, ia uxolu no anu tamuxala. 28Lexe mimii ane ne usoko sou uxali, la ngaavuti ngatulu mo ngamexi xolangengi utelo sou ngamalei teiteixi, xo Lataua anu 'aso upamaulingengi.”
29Xe Anu muavuti la muvikalane'i no anu vaikala tovola'i vile aloxo 'o, “Ngamaisou ovu lovo vile ilo'a ovuovu tavu'alo. 30No voxo ane ovuovu xolanu uxali xe uxataxata, la ngingi ngalavu lexe voxo sou aso muxali 'alai mukalu. 31Anu aloxo ne, la sou ngingi ngamaisou mimii ane ne uxali, la ngalavu lexe saxisaxila'u noxou Lataua a muxali 'alai mukalu.
32Eni avikalangengi manina musuku aloxo 'o. Ta mitema sou voxo ano 'o isoisoli uao, ia mimii ane eni elemolu lamana noxinge ne, anu uxali. 33Mimii latala teitexi no opo loxotolo mo no lialia 'o ne, ulai la ukalu. Ia vaivaikala noxilo ne umomomo sou ukalu uasi.
34La sou ngingi ngasaxila'inge laixe, xo loxo 'o io opongengi tu'umaxu no anu mimii sou lialia 'o, loxo la'ilali lailaixe mo lexa pekipekia'u xe mimii lailaixe sou vasimenge. Lexe ngingi nga'oxo aloxo ne xe voxo ane ne uxali noxinge, la ngakuluke loxo memee u'amo no anu uoi, 35xo anu uxali noxi'a ta mitema ukalusi ane'i ane ixoxolu no anu lialia 'o. 36Mo ngingi ngaxolu sou ngautiti mo ngakilaka ulai noxou Lataua utotomu, mo sou ngingi ngamomomo sou ngamaxalexu mimii ukalusi ane sou uxali ne mo ngamomomo sou ngatulu no talaxu Itema 'Olu.”
37No voxovoxo utotomu, la Iesu ulolosieixa'a ta mitema lavulavu no anu vaikala noxou Lataua no nano no taasou lalotu tatila noxou Lataua. Ia no 'olo'olovoxo utotomu, la Anu ulai no ale no la'olu e ilemolu lexe Olivu sou uxolu lai ne no 'olovoxo. 38Xe no kakau manina, la ta mitema tavu'alo mukalusi mine'e noxou sou ilolomu noxou no nano no taasou lalotu tatila noxou Lataua.
Currently Selected:
Luka 21: ataNTpo
Označeno
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.