Zenezi 13
13
Abrã norĩ Loho me, sima isiwãnhizari zahuré zé wasu'u
1Tawamhã Abrã, Ezitu hawi timro ré, duré uburé marĩ tãma ihâimana za'ra ré ma tô watobro. Tahawa, hâiwa nhimire niwĩ Cana'ã na romnhisi u ma tô mo. Ãhã wamhã, te duré Lo isisãnawãi 'ra isiré hã mo. 2Abrã hã isimarĩ pese uptabi di, pozé wasété na hã, ẽtẽ waipo prã prata na hã, duré ẽtẽ waipo pré oru na hã. 3Tahawa, ma tô Bétéu na 'ri nho'õmo nhisi nho'õmoi baba si zâmo, itẽme iwisizéb u. Tawamhã ta hawimhã Bétéu 'rem norĩ 're, Ai na 'ri nho'õmo nhisi 're me, ro ihâimana u ma tô duré zâmo, nimahã na imorĩ'rata na te te sima 'ri iwa isõré mono zéb u. 4Tawamhã duré ẽtẽ za'ra imorĩ'rata na te te aré i'manharĩ 'rata u wisi wamhã, ma tô Uburé Danhib'apito ãma tiwata.
5Tahawa Lo, Abrãhã siré imorĩ ma tô tite pone'ẽrebâ zéré mapure norĩ hã, pone'ẽrebâ zéré uzé norĩ hã, pozé wasété norĩ hã, duré tite romhuri'wa norĩ hã, timro, ti'ra norĩ siré hã te te simro. 6Tane nherẽ, siré 're ihâimana zahuré mono da hã waihu'u õ di, isimizama zahuré sazéb da du ihâimana hã, sadai õ wa. E marĩ wa. Simizama ahâ uptabi zahuré wa. 7Tahawa te Abrãhã nhimizama 'madâ'â'wa norĩ, rom na ãma 're sisada'âbâ za'ra, Loho nhimizama 'madâ'â'wa norĩ me hã. Tô taha wa, te duré zahadu tamemhã cananeu norĩ hã, perizeu norĩ me hã 're hâimana za'ra. 8Tahawa, te nimahã bâtâ na Abrã, Loho ma tinha ãne:
— Wa norĩ hã wasiwapru 'râwibre hã. Tahawa ibâi õ di, wasima iwazahi da hã. Duré ĩnhimizama na romhuri'wa norĩ, asimizama na romhuri'wa norĩ me sima 're isahi za'ra mono da hã, ibâi õ di. 9Tahawa wa za wasima aiwãnhizari ni. Õhõta ro inomro hã ma'ãpé 'madâ'â, rob're za'ẽtẽ uptabi di. Tahawa, ma'ãpé nima niwĩ ro inomro hã asima pisutu! Asimi'e niwĩ aimorĩ da wamhã, wa hã wa za ĩnhimire niwĩmhã mo. Duré asimire niwĩ aimorĩ da hã wamhã, wa hã wa za duré ĩnhimi'e niwĩmhã mo.
10Tawamhã Lo te te 're rob'madâ'â mono wamhã, Zodã na romharé nhisi ma tô 'madâ, 'ri nho'u Zoa na isisi tẽme, pa nho'õmo nhipti ahâ ré ro inomro hã, Uburé Danhib'apito te, rob're iwẽ#13.10 Édẽ na rob're nhisi hã te wasu'u. 're ihâimana mono sine hã, duré Ezitu ãma ti'a iwẽ 're ihâimana mono ne hã. Ãne na romharé iwẽ na ma tô aré 're hâimana, Uburé Danhib'apito, 'ri nho'u Sodoma, Gomora me te te uprosi zahuré wana ré hã. 11Tawamhã Lo, Zodã na romharé nhisi ãma uburé ti'a 're ihâimana mono hã te te sima pisutu wa, ma tô bâtâ pusizém niwĩmhã oto mo. Ãne ma tô oto tahawa, sima aiwãnhizari zahuré. 12Tawamhã Abrã, Cana'ã ti'ai 'remhã ma tô sisa'u zahuré hã 're hâimana u'âsi. Tane nherẽ, Lo hã ma tô ta hawimhã zâmo, ro Sodoma 'rata, 'ri nho'u siwaptõma, ihâimana za'ra wa'wa ẽtẽ siwa'aba ãma, te te sima 'ri nharĩ da, 13a'uwẽ wasété uptabi na si 're ihâimana za'ra mono ãma, tiwasété si 'Re ihâimana u'âsi mono zada, te te 're i'manharĩ za'ra mono zéb ãma.
'Re ihâimana u'âsi mono, Abrãhã ma, te te iropisutuzé wasu'u
14Tawamhã duré Lo morĩ za'u si, te Uburé Danhib'apito, Abrãhã ma tinha ãne:
— Ta hã i'asabzém hawimhã ma'ãpé ro a'madâ'â, hâiwa nhimi'e niwĩmhã, hâiwa nhimire niwĩmhã, bâtâ pusizém niwĩmhã, duré bâtâ zasizém niwĩmhã. 15Ta hã wa za asihudu norĩ ma ropibuma aima tisõ, õne u'â asihudu norĩ nhipti'a na tãma 're hâimana za'ra mono da, ã hã i'ab'madâ'â mono hã. 16Asihudu norĩ hã ti'a zapru ahâ uptabi na 're ihâimana za'ra mono ne, wa za ahâ uptabi na 're hâimana za'ra mono da hã tãma pisutu za'ra. Ti'a zapru hã da te 're isa'rata waihu'u za'ra mono õ ne, duré asihudu norĩ, da te 're isa'rata waihu'u za'ra mono da hã mare di za. 17Tahawa te za ã hã ti'a na hâiwa nhimi'e niwĩmhã, hâiwa nhimire niwĩmhã, bâtâ pusizém niwĩmhã, duré bâtâ zasizém niwĩmhã 're robzabui mono da hã 're aimo, wa hã za te aima sõmri dâ'âsina.
18Tawamhã ãne te te tãma waihu'u wa, Abrã te te sima i'ri nhoré mono zé hã ma tô te te awasihu, te te aza'ré da 'ri hã, rowede iwazéb zahi, Mare na isisi 'rata 're hâimana mono da oto, 'ri nho'u Hebrõ na isisi 'rata 're isa mono ãma. Tame ma tô Abrã, Uburé Danhib'apito ma, ẽtẽ za'ra hã 'manha, ãma iwatazéb da hã.
Currently Selected:
Zenezi 13: xavBP
Označeno
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.