Luka 10
10
Yecu ooro jo pyerabiro i kom tic
1Ka man otum, Rwot oyero jo mukene pyerabiro, oorogi ki aryo aryo wek gukwoŋ nyime, me cito i gaŋi ducu ki i kabedo ducu ka ma en kikome bibino iye. 2#Mat 9.37, 38 Owaco botgi ni, “Kac tye dwoŋ, ento lukac aye nok; pi meno wuleg Won poto, wek ocwal lutic ka kac. 3#Mat 10.16 Wucit giwu; nen, acwalowu macalo litino romi i kin orudi. 4#Mat 10.7-14; Mar 6.8-11; Luka 9.3-5 Pe wuwot ki kicaa lim nyo opiro, kadi war; pe wumot ŋat mo i waŋayo. 5Ot ducu ma wudonyo iye, wukwoŋ waco ni, ‘Kuc obed i ot man.’ 6Ka latin me kuc tye kunnu, ci kucwu bibedo i kome; ento ka pe, ci kucwu bidwogo botwu. 7#1 Kor 9.14; 1 Tem 5.18 Wubed i ot meno, kun wucamo dok wumato gin ma gimiyowu, pien latic myero gimiye mucarane. Pe wubed ka kobo i ot ki ot. 8Ka wudonyo i gaŋ mo, ce gijolowu, wucam gin ma giketo i nyimwu; 9wucaŋ lutwo ma tye iye, wutit botgi ni, ‘Ker pa Lubaŋa doŋ onyiko cok botwu.’ 10#Tic 13.51 Ento ka wudonyo i gaŋ mo, ce pe gijolowu, ci wucit i waŋayo me gaŋ meno, wuwac ni, 11‘Wa apwa me gaŋwu ma omoko i tyenwa, wateŋo i komwu; kadi bed kit meno, myero wuŋe man ni, ker pa Lubaŋa doŋ onyiko cok.’ 12#Acak 19.24-28; Mat 11.24; Mat 10.15 Atito botwu ni, i nino meno can pa Codom bibedo twaratwara makato pa gaŋ meno.
Can bipoto i kom gaŋi mogo ma jo ma iye pe guŋut
(Mat 11.20-24)
13 #
Ic 23.1-18; Ejek 26.1–28.26; Joel 3.4-8; Amoc 1.9, 10; Jek 9.2-4 “Ibikoko aŋee, in Korajin! Ibikoko aŋee, in Betecaida! Pien kono yam tic madito me twer ma gitiyo botwu gitiyo i Turo ki Cidon, kono jone guŋut wa con, kun giruko boŋo cola ma gibedo i buru bene. 14Ento can pa Turo ki Cidon bibedo twaratwara i nino me ŋolo kop, makato can ma bipoto i komi. 15#Ic 14.13-15 Ki in Kapernaum, gibitiŋi woko malo i polo? Pe kumeno, gibidwoki woko piny i Lyel.
16 #
Mat 10.40; Mar 9.37; Luka 9.48; Jon 13.20 “Ŋat ma winyowu, noŋo owinyo an, ŋat ma kwerowu, noŋo okwero an; ŋat ma kwera, noŋo okwero ŋat ma oora.”
Dano pyerabiro-nu gudwogo cen
17Dano pyerabiro-nu gudwogo cen ki yomcwiny, kun giwaco ni, “Rwot, wa cen maraco bene guwinyo cikwa pi nyiŋi!” 18En odok iye ni, “Yam aneno Catan kun poto piny nia ki i polo macalo lutkot. 19#Jab 91.13 Nen, doŋ amiyowu twero me nyono twol ki oton, ki me loyo tek ducu pa lakwor; gin mo pe bitimowu marac. 20Kadi bed kumeno cwinywu pe obed yom pi man ni, cen guwinyo cikwu; ento cwinywu obed yom, pien nyiŋwu gicoyo i wi polo.”
Yecu obedo ki yomcwiny
(Mat 11.25-27; 13.16-17)
21I cawa meno Yecu obedo ki yomcwiny i Cwiny Maleŋ kun waco ni, “Apwoyi, Wora, in Rwot me polo ki me lobo, pien ikano lok magi woko ki bot luryeko ki luŋe-piny, ci inyutogi bot litino lukere; iyo, Wora, pien onoŋo ipwoyo kit yo macalo meno. 22#Jon 3.35; Jon 10.15 Jami ducu doŋ Wora otyeko miyogi woko bota; ŋat mo pe ma ŋeyo ni Wod en aŋa, kono Wod keken, dok bene ŋat mo pe ma ŋeyo ni Wod en aŋa, kono Won keken, ki ŋat ma Wod oyero me nyuto Won bote.”
23Yecu olokke bot lupwonnyene, owaco botgi i muŋ ni, “Tye ki gum, dano ma neno gin ma wun wuneno! 24Pien atittiwu ni, lunebi ki luker mapol yam guparo pi neno gin ma wun wuneno, ento pe guneno, ki winyo gin ma wun wuwinyo, ento pe guwinyo.”
Lacamaria maber
25 #
Mat 22.35-40; Mar 12.28-34 Nen, ŋat mo acel lapwony-cik oa malo, otemo i Yecu kun penye ni, “Lapwony, atim aŋo wek alim kwo ma pe tum?” 26Yecu openye ni, “Gicoyo ni ŋo i cik? Ikwano niŋniŋ?” 27#Nwo 6.5; Levi 19.18 Odok iye ni, “Mar Rwot Lubaŋani ki cwinyi ducu, ki tiponi ducu; ki tekki ducu, ki tammi ducu; mar lawoti bene macalo imarre keni.” 28#Levi 18.5 Yecu ogamo doge ni, “Idok iye kakare; tim kit meno, ci ibikwo.”
29Ento dano-nu pi mito loyo kop, openyo Yecu ni, “Lawota aŋa?” 30Yecu odok iye ni, “Yam tye dano mo ma oa ki i Jerucalem, cito piny tuŋ Jeriko, ci orwatte ki luyak; gulunyo boŋŋine ki i kome, gupwode, gucito, guweke kun doŋ cok to. 31Ajwaka mo pa Lubaŋa onoŋo bene tye ka lubo yo meno; ka onene, ci obarre okato ki i ŋete. 32Kit meno Lalevi ka oo i kabedo meno, onene, obarre okato ki i ŋete. 33Ento Lacamaria mo ma onoŋo bene tye ka wot i yo-nu, oo ka ma en tye iye. Ka onene, kica omake i kome. 34Ocito bote, oonyo moo jeituni ki koŋo vino i waŋ rette, otweyo. Lacen okete i wi kanane, otere i ot welo, ogwoke. 35Orwone okwanyo lim, omiyo bot ŋat ma gwoko ot welo, ocike ni, ‘Twoye; gin ducu ma ibimiyo makato, an abiculi ka adwogo.’ 36Aŋa i kin jo adek-ki ma itamo ni obedo lawot dano-nu ma orwatte ki luyak-ki?” 37Odok iye ni, “Ŋat ma otime kicani.” Yecu owacce ni, “In bene cit, icitim kit meno.”
Yecu olimo Marita ki Maliam
38 #
Jon 11.1
Ka gitye ka wot i yo, ci Yecu odonyo i gaŋ mo, ci dako mo ma nyiŋe Marita ojole i ode. 39Yam tye ki laminne nyiŋe Maliam ma obedo ka tyen Yecu kun winyo lokke. 40Ento Marita onoŋo obedo ka canne ki tic mapol; ocito bot Yecu, openye ni, “Ladit, pe iparo ni lamera oweka atye ka tic kena? Wac bote wek okonya.” 41Ento Rwot ogamo ni, “Marita, Marita, ibedo ki tam mapol, cwinyi oŋabbe pi jami mapol, 42ento tye gin acel keken ma mitte. Maliam oyero dul maber ma pe gibikwanyo woko ki bote.”
Currently Selected:
Luka 10: Aco85
Označeno
Deli
Kopiraj
Want to have your highlights saved across all your devices? Sign up or sign in
Acholi Bible © Bible Society of Uganda, 1985.