Wahannisa 5
5
Yesuusa fettii wobbo atstsa fatstsida
1Yinnippa maaqqii, Yesuusa Ayhuduntsi bonchchize baales Yerusalaame qitida. 2Yerusalaame Duro furtsi kale Ibraysxe doonara Beetesayda gaaze teqinttide geenna yene. Ye teqintti yeze hyaatsiti kale kanggizen ke7ize ichchin oge yene. 3[Yinne hyaatsita en7inttizanno naagize] gaama hyargginttizuntsi, qooquntsi, wobbuntsin galla siliduntsi woy7ida. 4[Akkos gayko, fettii fettii tohe Laatstse kiitanchcho geenite wodhdhii hyaatsito en7izane. Hyaatsita en7ize wode tiinii gelide atstse fana aykkide akko hyarggeppa faxane.]#5:4 Fettii fettii zaga maxaafuntsi faydo hyaydzdzis tiino baggiton faydo oyddii gujjoos. 5Yinna besite hyastam osfun bere hyargginttide fettii asi yene. 6Yesuusa ize woy7ide atstsa bi7i, mahi gaama wode hyargginttidanno erii atstsego, «Faxodes koyane?» yagayda.
7Hyargganchchize mahi, «Laatstso, hyaatsita en7inttize wode tana hyaatsite olize asi baaya. Ta gelodes yiyoder melluntsi taappa tiinii gelane» yagayda.
8Yesuusa eego, «Denddii eqqo; ne alggiza tookkii qito» yagayda. 9Atstsay iira faxida; fa alggiza tookkii qitida.
Yinna Sambbata wode hyanida. 10Yinnii gisho, Ayhudunts faxide atstsego, «Hyayno sa7ita Sambbata; neenii ne alggiza tookkizanna woga baaya» yagayda.#Nah. 13:19; Er. 17:21
11Yezin atstsay, «Tana fatstseze, ‹ne alggiza tookkii qito› gayda» yaga7i mahida.
12Un eego, «Nena, ne alggiza tookkii qito gayde E oode?» yaga7i oocida.
13Yezin Yesuusa yinna besite gaama as giddappa deshshi gayde gisho atstsay fana fatstside oode yezako erikaaya. 14Yesuusa suubappa ye atstsa Xoozze Keetstsa denggi, «Hyaychche, ne faxida; hyannippa aadhize iita baz nena yellaame gaar mahi nagara oochchippe» yagayda. 15Yinnippa maaqqii, atstsay hyanggi fana fatstside Yesuusa maaqqizanno Ayhuduntsis ohida.
16Yesuusa yinno Sambbata ode oochchide gisho Ayhudunts Yesuusa baytstse aykkida. 17Yesuusa mahi, «Ta Aday ubba wode oochchane; taanin oochchodes beezane» yagayda.
18Yesuusa Sambbata bonchchikaayze gisho xalaalas maaqqikaayzin Xoozza fa Ade ga7i fana Xoozara wolkkizide gisho Ayhudunts eza wodhodes tiinonnippa mintsii koyda.
Xoozze Na7ay adetits wolqqa
19Yesuusa mahi, «Ta yinttis turo turo gaane; Na7ay faas akkon oochchodes dandda7oos. E fa Aday oochchodera bi7idanno xalaala oochchane. Aday oochchizanno Na7ayin oochchane. 20Aday fa Na7aya kadhize gisho oochchize oocha ubba fa Na7aya beezane. Yin gaama qoppode gaar E hyannippa aadhize oocha fa Na7aya beezoda. 21Aday hyayqqiduntsana hyayqoppa dentsii unttis de7o inggizannigaara Na7ayin fa koyezuntsis de7o inggane. 22Aday Na7ays firddode gaar adetits wolqqa inggidap attin E oonan firddoos. 23Yinno E oochchidanna Asi ubba Adaya bonchchizanni gaar Na7ayan bonchchode fana. Na7aya bonchchoosse ooden Na7aya kiittide Adayan bonchchoos.
24«Ta yinttis turo turo gaane; ta qaaltto si7izes tana kiitteza ammanzes medhina de7o yene. E hyayqoppa de7o fiinggide gisho firddinttoos. 25Ta yinttis turo turo gaane; hyayqqide asuntsi Xoozze Na7ay qaaltto si7ize wode ye7oda; yinnan hyatte. E qaaltto si7ize de7o yessada. 26Aday faas de7o yezanni fana Na7aysin de7o yessade fana inggida. 27Na7ay As Na7a maaqqide gisho Aday Na7ays firddode gaar adetits wolqqa inggida.
28«Booza yezuntsi E qaaltto si7i denddize wode ye7ode gisho hyanne gaama qoppipete. 29Lo77o oochchiduntsi de7o dendddes mahi iita oochchiduntsi firdda ekkodes boozappa denddoda.#Dane. 12:2
Yesuusas markkidhide asuntsana
30«Taanii ta adetitsi wolqqara akko bazin oochchodes dandda7oos. Xoozze taas ohidanni gaar firddane. Taanii tana kiittide koyze baz oochchanep attin ta koyze baz oochchoose gisho ta firddita turo.
31«Taanii ta baz markkidhiko ta markkatitsita turo maaqqoos. 32Ta baz markkidhize melle yene; E ta baz markkidhizanna turo maaqqizanno ta erane.
33«Yin Wahannisago asi kiittin E turis markkidhida.#Waha. 1:19-27; 3:27-30 34Ta yinno yinttis ohizanna, yin attode gaar gaydap attin asi markkatitsi taas koshshin baaya. 35Wahannisa goga gaar eexize foo7o. Yin eerats wode E foo7ite ufayttodes koyda.
36«Yezin taas Wahannisappa aadhize markka yene. Ta oochchode gaar ta Aday taas inggide oochita ta baz markkidhane; Aday tana kiittezanno beezane.
37«Mahin tana kiittide Aden fa ommite ta baz markkidhane. Yin E qaaltto mulo si7ikaaya woy E bishshito bi7ikaaya.#Maato. 3:17; Mar. 1:11; Luqa. 3:22 38E kiittezanno yin ammanoose gisho E qaaltta yin wozintte baaya.
39«Geeshi Maxaafuntsappa medhina de7o denggodebaz yinttis aazin un qurichchane; qaalttan ta baz markkidhane. 40Yezin yin de7o denggodes taago yo7odes koyoos.
41«Asappa taanii bonchcho koyoos. 42Yezin taanii yin wozintte Xoozze siiqo baayzanno erane. 43Taanii ta Aday suntsite yi7ida, yezin tana mokkikaaya. Hyankay fa suntsite ye7iza mokkane. 44Yin fete feteppa bonchcho koyzuntsi, fettii Xoozzeppa ye7ize bonchcho ekkodes koyoosuntsi, wayzi tana ammanodes dandda7ode?
45«Taanii ta Aday tiino yinttana mootizebazi yinttis aazippe. Yinttana mootode yin ufaytti kafize Muse. 46Yin Muse ammanezako E ta baz xaafide gisho tanan ammanodyeshsha. 47Yezikon yin E xaafidanno ammanaanxxiko ta qaaltto wayzi ammanode?» yagayda.
Currently Selected:
Wahannisa 5: OydaNTL
Označeno
Deli
Kopiraj
Want to have your highlights saved across all your devices? Sign up or sign in
The word for the World Ethiopia