Lukah 4
4
Hi paɗibang nakakaya hi Yehu
(Mat. 4:1-11; Mrk. 1:12-13)
1Hi Yehu nabinunya Hangahu Harrina hi Alla ana ɓali waling ta loku Yordan. Na irihuya Hangahu Harrina hi Alla ta maraɗa karah. 2Nouyaka ana kakaya hi paɗibang ta ɗalu patumbulu laɗɗu madeina. Dana malli amang gagananya, ʄiayaka hina karobang.
3Hi paɗibang napanewi lahi Yehu, “Ou aꞌana Alla tekaɗi-Wu? Mupaleawaya nei nawatu kana ʄaʄi pa angu.”
4Nagapiya hi Yehu, “Ta Hurat Ɓakul na matuling, ‘Na tourara da tidi morikmananya walingu ta pa angu.’ ”
5Hi paɗibang nahalaku idi ʄellapayah hi Yehu ta padoungu mareihi ʄaga, ʄaka dapiɗakman, napatekananya naɗeɗina na pinu-tana. 6Hi paɗibang napanewi lahi Yehu, “Ngaladukana na poati, na pareaha enga kuwoa bolluguja, kaɗang kukoli bollujaka ʄaka kuwoanaja agearaya nahakabu atigu. 7Amu mokul karaɗaɗiga nyouwa, ngaladukaɗa kuwoaguja.”
8Hi Yehu nagapiya, “Ta Hurat Ɓakul nama matuling, ‘Mumokulu-karaɗanya hi Moiri Alla ʄaka ʄiapaya napakerimu.’ ”
9Manga hi paɗibangu nahalaku idiya ta koata Yeruhalem, ʄaka natauya ta padoung mareihi ʄaga ta pinu kabungu ɓei Umma Pingi Pahabayangu tou Yahudi, ʄaka hina panewi, “Ou aꞌana Alla tekaɗi-Wu? Muleijung waliyangu. 10Kaɗang einya napatuli ta Hurat Ɓakul, ‘Hi Moiri Alla enga paleawanaja ɗa malaikat kaɗa gata-Gu.’ 11Jaka ‘ɗa malaikat hiɗa kanakuw, ka abi ɗapadukulung ɗa wihim ta watu.’ ”
12Nagapiya hi Yehu, “Ta Hurat Ɓakul nama matuling, ‘Abi mu kakaɗiya hi Moiri Alla.’ ”
13Mengaka hi paɗibang ana kakaya hi Yehu, ɗujaknanyaka hina naɗinya na rahi nama kalung.
Hi Yehu naɓali ta loaɗa Galilea, wali nounaka ana kerang
(Mat. 4:12-17; Mrk. 1:14-15)
14Ta ɗalu binunanya Hangahu Harrina hi Alla hi Yehu ɓalinanyaka ta loaɗa Galilea. Mahoꞌarungnanyaka na lii witi-Na ta loaɗa nou. 15Ɗunna napanunga-papeakang ta umma pingi pakaɓuangu tou Yahudi#4.15 Umma pingi pakaɓuangu tou Yahudi ʄiayak na umma nahawaiɗa ɗa tou Yahudi aɗa bahhaya na Hurat Ɓakul ta Lii Dei, pingi pakaɓua-kawoting, pingi papanunga-papeakang ʄaka pingi paɓotahu palakara. ʄaka ngaladukaɗ ɗa tou ɗahaila pamanopa-Nya.
Hi Yehu daɗa kaꞌamaya ta Naharet
(Mat. 13:53-58; Mrk. 6:1-6)
16Hi Yehu nahalaku ta koata Naharet ta padoungu pingi pamatuana. Ta laɗɗu hangahu ana habayang natou Yahudi,#4.16 Ta laɗɗu hangahu ana habayang natou Yahudi, nahawiɗang, ‘Sabat’. napalanga damman halaku ta umma pingi pakaɓuang. Nadedi kaku bahhaya na Hurat Ɓakul awina, 17ɗa woananya na huratuna na nabi Yehaya. Nawehaya manga hina harongukuya nama hakawoɗuna, nama wina:
18“Na Hangahu Harrina hi Alla einya lahi Nyouwa,
ʄiayaka hina pediwa kaku patomanya na Lii Kalung
ta tou ɗama milla.
Hina paleawawa kaku patomanya ta tou ɗama ta galluha
enga palouhuɗaja,
ʄaka ɗa tou kaboala enga itaɗa,
ɗa tou mawilla enga pahelaɗaja
19ʄaka napatomanya na rahi aminya hi Moiri
ana pamanumaraya na tourara.”
20Hi Yehu natoaɗiya na hurat ʄaka nawoa ɓaliya manga hina ngoɗu. Ngaladukaɗa ɗa tou ɗama ta rongu umma kaɓuanguha ɗapateti-Nya. 21Manga hi Yehu napanewi lahi ɗuɗa, “Ta laɗɗu ya lodungnanyaka nawini naparangumi.”
22Jaka ɗa tou ɗama ranguya nadehana napatiki-Na hiɗa kaɓarraɗenganya napanewina nama kalung. Jiayaka hi wiɗa, “Ana hi Yuhup kaɗiya?”
23Manga hina panewi ɗengaja, “Enga wimi hingung ami tikiganya na hilu padakulung, ‘Mamaringu weikalapa ɗiwu, mupateggahuya na ihi wikimu. Kam woluyay, ta padoungu pingi hawalimu, mearana naparanguma namaʄaʄi ta koata Kapernaum.’ ” 24Hi Yehu wina ʄellapah “Wigugimi, da eimangu nabi napataungu hii ta padoungu pingi hawalin. 25Nounam kami rangu, gananya nahawigung mapaɗeninguya: ta rahina hi nabi Elia hanaɗuga, adana urrang tillu dou nammu wulana ʄaʄinanyaka na karobang malai ta tana Ihrael. Ta rahi nouʄella duku ɗanguha ɗa mawinni ɓalu ta padoungu nou. 26Laka atonouɗina, hi Alla dana paleawamaya hi nabi Elia halaku ta hatou mawinni ɓalu ta tana Ihrael, ʄiaɗinguka paleawa nounanya ta hatou mawinni ɓalu nama einya ta koata Harpat ta loaɗa Hidon. Na mawinni ɓalu nou da tou Ihraelmaya. 27Jaka hanaɗuga ta rahina hi nabi Eliha, duku ɗanguha ɗa tou Ihrael ɗama koaha da eimangu hatou tekka napapateggahuna, ʄiapaya hi Naaman natou Hiria.”
28Aɗa ranguyaka bani tetekkaɗanyaka ngaladukaɗa ɗa tou ɗama eija ta umma pingi pakaɓuangu tou Yahudi. 29Ɗa kiɗi aɗa wurutunya hi Yehu ta habali koata Naharet. Jaka ɗawealaya ta wiwi kealang kama piaku amaʄularu-Nya ta kealang awiɗa. Na koata nou einya ta pinu letina. 30Jiaɗinguka hi Yehu natiwaya natou ɗangu manga hina halaku.
Natou nahatamang waddi tana
(Mrk. 1:21-28)
31Manga hi Yehu nahalaku ta koata Kapernaum ta loaɗa Galilea. Noulau nahakoalaha ɗa tou ta laɗɗu hangahu ana habayang natou Yahudi.#4.31 Ta laɗɗu habayang tou Yahudi, nahawiɗang, ‘Sabat’. 32Ɗa ɓannar ɗenganya ɗapahakoalan kaɗang napatikki-Na ana pawaddi. 33Ta umma pingi pakaɓuang tou Yahudi nou, einya hatou nahatamangu waddi tana nama kawula hawading, 34“Ou Yehu tou Naharet, gahi ami nimiligu, abi ula ɗigama? Pamohu-Mu gam? Kupeagu, a geara-U: Ou papaturana hi Alla!”
35Hi Yehu hina kajoakanya na waddi tana, “Kawannar, mulouhung waling ta tou ya!” Jiayaka na waddi tana hina poꞌahunya natou nou ta hagaɗa ɗa tou ɗangu. Manga hina louhung waling ta tou nou ʄaka dana pamawillamaya.
36Jiayaka ngaladukaɗ ɗa tou hiɗa kaɓarra ɗenganya namaʄaʄi, himeara wiɗa aɗa panewi, “Makullih mamadunguya napatiki-Na! Napanewi-Na mapawaddiya ʄaka nakuaha tekka, na pareahah ɗa waddi tana louhung, ʄiayak hiɗa louhung.” 37Manga mahoꞌarungnanyaka witina hi Yehu ta loaɗa nou.
Hi Yehu napateggahuha ɗa tou ɗangu
(Mat. 8:14-17; Mrk. 1:29-34)
38Hi Yehu ɗujaknanyaka na umma pingi pakaɓuang tou Yahudi nou, halakunanyaka ta ummana hi Himon. Einya na earan mawinni hi Himon nama kadauk wajal ihi, hiɗa kareiya hi Yehu kana tulunya awiɗa. 39Hi Yehu nadedi ta karahana nama kadauk, Na wurutunya na kadaukun hina louhung. Ailolu teggahnanyak manga hina kiɗi ana payeamaja.
40Kaku tama winaka na matalaɗɗu, ɗa tou ɗangu maraiɗajaka ɗa oaliʄaʄiɗ lahi Yehu ɗama matu-matu ngara kadaukuɗa. Jiayaka hi Yehu hina tauya na limma-Na ta pinu ihiɗ ɗama kadauku hatou-hatou ʄaka hina pateggahuha. 41Manga ɗalouhu ʄellang ɗa waddi tana walingu ta tou ɗama kadauku, ʄaka wiɗa, “Ou ʄiawuka Ana Alla.”
Jiaɗinguka hi Yehu nagagutuha ʄaka dana woamaja kaloaga aɗa panewi, kaɗang aɗa peanya a ʄiaya hi Karituh, na Raja nama Pamanumara.
Hi Yehu napatoma ʄellanya na Lii Kalung ta padoungu hawanguk
(Mrk. 1:35-39)
42Ana wehanguka hi Yehu ɗujakunanyaka na koata nou, hina halaku ta padoungu nama kahika. Jiaɗinguka ɗa tou ɗangu ɗa manyera-Nya. Aɗa paregga ɗenga-Nya hiɗa pattu-Ya abi napaɗujakung awiɗa. 43Jiaɗinguka hi Yehu winaja, “Kupatoma ʄellanyah ta padoungu hawanguk na Lii Kalung witina gikineina hi Alla ana papareaha ʄaʄi Raja ta pinu-tana. Kaɗang ʄiaɗiyaka hi Alla hina paleawa-Wa.”
44Wali nounaka hi Yehu hina panunga-papeaka pangalanya na Lii Kalung ta umma pingi pakaɓuangu tou Yahudi ɗama eingu ta haguꞌul loaɗa Yudea.
Currently Selected:
Lukah 4: wnk
Označeno
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.