Matyu 13
13
Ee Wai Lyandeana Lao Kongali Leamo Doko
1 #
Make 4:1-9; Luku 8:4-8 Yuu gii mendai dokonyaka Jisasa baa anda doko yakinatala, endaki pete lemba dokonya pao petea. 2#Luku 5:1-3Peteamopa endakali longo mendapu ipao kambu piaminosa, baa sipi dokonya pyakalyetala petea. Dokopa endakali kambu doko pitaka endaki pete lemba dokonya kateami. 3Kateaminopa Jisasame pii longo mendapu kongalimi endakali dupa lamaiyoo, “Salapape! Ee pokenge mendeme baanya ee wai lyandala pea. 4Pupala lyandeamopa ee wai yangi dupa kaitininya pao sia. Sia dupa yaka dupa ipupala nao eteami. 5Ee wai yangi dupa kana-kisa yuu kuki singi dupanya pao sia. Sia dupa yuu kuki singi dokonya, pupae langa lea. 6Langa leaka doko, pingi auu pyoo napiamosa, niki popo pyoo tea dokome dupa sapupala kumia. 7Ee wai yangi dupa lyiki tenge palenge dupanya pao sia. Sia dupa langa leaka doko, lyiki tambetambe andapala kui pyambea. 8Ee wai yangi dupa yuu epe dupanya pao sia. Sia dupa andao dii mandipala, yangimi dii 100 lao mandea. Yangimi dii 60 lao mandea. Yangimi dii 30 lao mandea. 9Nambame pii lelyo dutupa endakali kale katenge dupame sepengena” lea.
Kongaliaka Lao Pii Lenge-Lamo Leamino Doko
10 #
Make 4:10-12; Luku 8:9-10 Dokopa disaipolo dupa Jisasa katea dokonya ipupala baa lamaiyoo, “Embame kongaliaka lao endakali dupa pii lamailyino doko, aipuma lelyepe?” leami. 11Dokopa baame dokaitanya pii yanu pyakamaiyoo, “Kingdom kaiti-kisa singi dokonya pii tenge yalo petae dupa masalapale lao nyakama ditilyamo. Dopaka doko, endakali waka dupame masina lao namaiya. 12#Matyu 25:29; Make 4:25; Luku 8:18; 19:26Aipumape, longo lao singi endakali doko baa konda pyoo maita. Maitamopa baa-kisa longoaka seta. Dopaka doko, nasingi endakali doko-kisa kuki seta dutupa baa-kisa nasina lao tange nyokonyeta. 13Endakali dupame lengeme kandelyaminoaka doko, tenge angi dupa kandao nyala naelyamino. Kaleme silyaminoaka doko, tenge angi dupa soo nyala naeyao, masala naeyaowaka pilyamino. Tenge dokonya, nambame endakali dupa kongaliaka lao lamaingi. 14-15#Ais 6:9-10Endakali dopale dupanya lao propesi pii mende Aisaiyame lao pituu, ‘Nyakamame pii kaleme setamiaka doko, tenge angi doko soo nanyetami. Nyakamame lengeme kandatamiaka doko, tenge angi doko kandao nanyetami. Akali tata dakaitame angi doko lengeme kandata, kaleme sepa, moname maseta petala, mona kapilyala naeyamana latala, nyakamanya mona pyakilyoo, kaleme auu pyoo pii nasoo, lenge konjoo pilyamino. Mona kapilyimili doko, nambame dakaita auu pisipulina’ lapae singi doko angi jia. 16#Luku 10:23-24Dopaka doko, nyakamame angi doko lengeme kandao, kaleme soaka pilyamino dokonya, nyakama Goteme auu pisetae. 17Nyakamame kandelyamino dupa, propetapi, endakali tolataepi, longo mendapuame kandamu laka lao masiamiaka doko, angi nakandeami. Pii nyakamame silyamino dupa simu laka lao masiamiaka doko, angi nasiamina lao nambame nyakama kiningi langilyona” lea.
Ee Wai Lyandeana Lao Kongali Leamo Dokonya Tenge Doko
18 #
Make 4:13-20; Luku 8:11-15 “Ee pokenge dokonya lao kongali lalo dokonya dii tambao langilyona salapape: 19Ee wai yangi kaitininya lyandeana lalo dokonya tenge doko dake: Endakali yangimi kingdom kaiti-kisa singi dokonya pii doko sepala tenge angi doko nanyilyaminopa, koo akali doko ipupala, pii Goteme endakali dupanya monanya ee wai joo lyandelya doko nyoo nepenge. 20Ee wai yangi kana-kisa yuu kuki singi dupanya lyandeana lalo dokonya tenge doko dake: Endakali yangimi pii doko sepala, auu kaeyao yapa nyepala, 21gii kuki mendatupa auu pyoo katengema. Dopaka doko, pii doko mambele kenda dupa epelyamopapi, endakali waka dupame dokaita tanda maiyoo koeyasilyaminopapi, pii doko dokaita-kisa pingi pyala naenge dokonyana, dokaita pupae isa pyakengema. 22Ee wai yangi lyiki tenge palenge dupanya lyandeana lalo dokonya tenge doko dake: Endakali yangimi pii doko singimaka doko, muni putiti kaenge mana dokome dokaita minakasilyamopa, yuu dakenya nee kaenge dupame pii doko kui pyapala, dupa-kisa dii namandenge. 23Ee wai yangi yuu epenya lyandeana lalo dokonya tenge doko dake: Endakali yangimi pii doko soo nyepala, yangimi dii 100 lao mandenge, yangimi dii 60 lao mandenge, yangimi dii 30 lao mandengena” lea.
Wita Kainanya Koo Tanu Lyandeamo Dokonya Leamo Doko
24Jisasame kongali pii mende apata dokaita lamaiyoo, “Kingdom kaiti-kisa singi doko, akali mendeme baanya eenya wita wai epe lyandeamo dopale. 25Baanya endakali dupa pitaka palipiaminopa, akali dokonya yandapipi mende ipupala, wita wai lyandatae kaina dupanya koo tanu mendapu lyandatala pea. 26Maitakao wita dupa langa latala andao dii mandeamopa, koo tanu dupa apata langa latala katea. 27Dokopa ee tange dokonya kalai akali dupa baa katea dokonya ipupala baa lamaiyoo, ‘Akali Andake, embanya ee dokonya embame wita wai epe dupa lyandala naeyepe? Aipa petala ee dokonya koo tanu dupa kalyape?’ leami. 28Dopa leaminopa baame dokaita lamaiyoo, ‘Doko akali yandapipi mendeme lyandeana’ lea. Dopa leamopa kalai akali dupame baa lamaiyoo, ‘Naimame dupa yukuu kambu pyala pupale lao masilyipi?’ leami. 29-30Dopa leaminopa baame dokaita lamaiyoo, ‘Daa, koo tanu dupa yukuatiti, wita dupa apata yukutamina, lapota pyasoo andena kaeyalapa. Wambu pita gii dokopa, nee mandyoo mau pingima dupa nambame lamaiyoo, “Koo tanu dupa itatenya soo yangapengena, nyakamame dupa wambao yukuu yaki pyepa. Dopa petala wita dupa nyoo kambu pyatala, nambanya nee setenge anda dokonya setalapa” latona’ leana” lea.
Masete Dii-Pipa Makande Pyoo Kongali Leamo Doko
31 #
Make 4:30-32; Luku 13:18-19 Jisasame kongali pii mende apata dokaita lamaiyoo, “Kingdom kaiti-kisa singi doko, akali mendeme masete dii mende nyepala, baanya eenya lyandeamo dopale. 32Ee wai dupa pitakanya masete dii doko etete yakane. Dopaka doko, lyandataesa langa latala andao, ee wai pokatae waka dupa pitaka ita minatala, ita joo yale jingi. Yale jilyamopa, wangya dupanya yaka ketae paenge dupa ipao anda pingimana” lea.
Yisa-Pipa Makande Pyoo Kongali Leamo Doko
33 #
Luku 13:20-21
Jisasame kongali pii mende apata dokaita lamaiyoo, “Kingdom kaiti-kisa singi doko, enda mendeme yisa mendalapo palao beke tepomanya pyasoo endaki minilyamopa, yisa dokome palao doko pitakanya taeyapala andasingi dopalena” lea.
Kongaliaka Lao Pii Lamaiyamo Doko
34 #
Make 4:33-34
Jisasame endakali kambu dupa pii lamaiya datupa pitaka kongaliaka lao lamaiya. Baame pii lamaiya dupanya mende mee lamaiya naeyao, kongaliaka lao lamaiya. 35#Sam 78:2Baame kongaliaka lao lamaiya dokome, propeta mendeme lao pituu, “Nambame pii dupa kongaliaka lao langito. Yuupa kaitipa dolapo tee pia dokonya pituu, indupa tuu lao, masepae yalo petae katenge dupa nambame lao panatona” lapae singi doko angi jia.
Koo Tanu Lyandeamo Dokonya Tenge Doko
36Jisasame endakali kambu dupa yakinatala, baa andaka kolandea. Dokopa baanya disaipolo dupa ipupala baa lamaiyoo, “Koo tanu eenya katenge dupanya lao kongali laleno dokonya tenge doko naima langi” leami. 37Dopa leaminopa baame dupanya pii yanu pyakamaiyoo, “Ee wai epe lyandeana lalo doko Akalinya Ikiningi doko. 38Ee doko isa yuu dake. Ee wai epe dupa kingdom kaiti-kisa singi dokonya ikiningi dupa. Koo tanu dupa Satanenya ikiningi dupa. 39Yandapipi mendeme koo tanu dupa lyandeana lalo doko Satane doko. Wambu pipenge gii doko yuu etapenge gii doko. Nee mandyoo mau pingima dupa enjele dupa. 40Koo tanu dupa yukuu kambu pyatala, itatenya yangeamili pyoo, yuu etatamo gii dokopa, Satanenya ikiningi dupa yangata. 41Akalinya Ikiningi dokome baanya enjele dupa epena latamopa, dupa ipupala, koo pina lao mapusingipi, Gotenya loo yalengepi, dupa baanya kingdom dokonya nakatena lao yapao nyepala, 42itate popo pyoo tao katenge panda dokonya soo pyandatami. Panda dokonya endakali dupa ee lao, nenge giti-gato lao nao katatami. 43Dokopa endakali tolatae dupa nyakamanya Takangenya kingdom dokonya tii pyoo niki joo tao katatami. Nambame pii lelyo dutupa endakali kale katenge dupame sepengena” lea.
Muni Yalo Petae Dokonya Lao Kongali Leamo Doko
44 “Kingdom kaiti-kisa singi doko dapale: Ee mendenya muni yalo petae kateamopa akali mendeme kandatala, sanga pyambea. Dopa petala baa auu kaeyao andaka pupala, baanya oapi singi dupa pitaka salimi latala, ee doko sambeana” lea.
Kingdom Doko Mamaku-Pipa Makande Pyoo Kongali Leamo Doko
45 “Kingdom kaiti-kisa singi doko dapaleaka: Akali bisinisa pingi mendeme mamaku epe mendapu sambalanya kutao paeya. 46Akali dokome mamaku eteteaka epe, muni andake pupenge mende kutao kandatala, baa andaka pupala, baanya oapi singi dupa pitaka salimi latala, mamaku epe doko sambeana” lea.
Kingdom Doko Umbene-Pipa Makande Pyoo Kongali Leamo Doko
47 “Kingdom kaiti-kisa singi doko dapaleaka: Umbene mende akali mendapuame endaki petenya pyandatala, pisa tata longo mendapu nyiami. 48Umbene doko pisame tumbiamopa, pisa nyingi dupame pyalya lao lembasa nyepala, isa pituu yapeami. Yapapala epe dupa nyoo pengenya mandipala, koo dupa nepeami. 49Dopaka pyoo, yuu etatamo gii dokopa, enjele dupa ipupala, endakali koo pingi dupa endakali tolatae dupanya kainanya nakatena lao yapao nyepala, 50itate popo pyoo tao katenge panda dokonya soo pyandatami. Panda dokonya endakali dupa ee lao, nenge giti-gato lao nao katatamina” lea.
Oapi Enengepi Wambataepi Epe Dupanya Leamo Doko
51Dopa latala Jisasame baanya disaipolo dupa lamaiyoo, “Nyakamame pii datupanya tenge dupa nyilyamipi?” lea. Dopa leamopa dokaitame yanu pyao, “Kamongo, naimame nyilyamanona” leami. 52Dokopa baame dokaita lamaiyoo, “Mosesanya loo mana nyepae mendeme kingdom kaiti-kisa singi dokonya mana nyepala katenge doko, anda tange dopale. Anda tange dokome baanya andaka oapi enengepi, wambataepi, epe setenge dupame kalai pipenge jilyali pyoo minao kalai pingina” lea.
Jisasa Tata Dupame Baa Tungi Napiamino Doko
53 #
Make 6:1-6; Luku 4:16-30 Jisasame kongali pii dutupa lamaiyoo etapala, baa yuu doko yakinatala, 54baanya yuu dokonya pea. Pupala endakali dupa nyakamanya lotuu anda dokonya mana lamaiyamopa, dupa walu lao paka kaeyapala lao pituu, “Akali dakeme masepae epepi, mirakolo pipenge kyetopi dupa anja-tae nyia? 55Akali dake kapenda dokonya ikiningi doko daape? Baanya endangi doko Maria lenge doko daape? Baanya kaiminingi dupa Jemesapi, Josesapi, Saimonepi, Judasapi dutupa daape? 56Baanya pimalenge dupa pitaka naima-pipa napilyamape? Baame pilyamo datupa pitakanya kyeto doko anja-tae nyiape?” leami. 57#Jone 4:44Dopa latala dupame baa maka kaeyapala maita maiyami. Dokopa Jisasame dokaita lamaiyoo, “Propeta mende yuu waka dupanya kalyamopa, endakali dupame baa anda-anda semaingima. Dopaka doko, baanya yuu dokonya kalyamopa, baa tata dupame baa anda-anda semaiya naengemana” lea. 58Dupame baa tungi napiaminosa, baame mirakolo longo yuu dokonya napia.
Currently Selected:
Matyu 13: Enga
Označeno
Share
Copy
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.