Mâk 9
9
1Yesù ə dzày yə̀ aghu nə, “Mə ndzəmə̀ dzìy bə̀ ŋwò, Aghê àliy yiy də fəə nə̀ ghu kî pfə dzə̀ wày nə̀ ghu kə̀ kôʼ yəə Zə̀kìy saʼa aghe ə we yiy nə̀ daʼa kə̀ soŋə̀ kìy.”
Yesù ə ŋwò mwày fyi bə̀
(Matìyò 17.1-13; Lukâs 9.28-36)
2Abù ntsukə tsîy tsə ìntyìfoŋ, Yesù ə nìy kə Pità, nə̀ Dzɛ̂m, nə̀ Dzwan, ŋwò kwoʼ yə̀ nə̀ ghu anə ukàʼ ù dabə wiy, ghu də̀ awote nə̀ noŋə̀ ghu. Yesù ə ŋwò kwuni fyi bə̀ anə səkə ghu, 3Yəə ghu liay yə̂ nəniy, uwe u Yesù wìy ə ŋwò kwuni kə anə səkə ghu, ndzwu tə we tiy ə fə̀mə̀ mwà fyiə bə̀, fə̀m tsìy tsə anə yiə yə wù ə̀ mbyi də wày ani sùw ndzwu tə̀liy tiy tə̀ tə zwu doʼò yəə̂ də̀ tə ghe. 4Tsə̀təndii tə ìti kòʼ yə̀ Èlaydzà nə̀ Musîs ghu dzəŋə̀ nəniy nə̀ Yesù. 5Pità ə dzày yə̀ â Yesù nə̀, “A Àtyi dè, loʼo kə̀ kpe ŋwô yəə a ni muə̀ ate. Ghèe buk kə umfwùə ùti, kə̀mòʼ â wò, kə̀mòʼ awò Musîs, kə̀mòʼ awò Èlaydzà.” 6(Pità ə ba kwu way iyiə yə ù də ani dzày, aŋwòə iwee yiy maa ŋge tsəŋi tsìy fyi ghu.)
7Mbàʼ tiy ə dyaŋi tswi bù kəd na tsə ghu dzə̀m. Dzə̀ ə dzày fyi tswi bə̀ anə mbàʼ tə ghè tə̀, dzìy tsə nə̀, “À wə̀ də̌ wa nam ù tsukə̀ wìy, zuw yə̀ nənìy â we.” 8Ghu dzìy a dyaŋi liay yə̂, kə̀ kâm kôʼ wè ùlìy, ghu kòʼ tsə kə Yesù akə̀lə̀ ghu.
9Yəə ghu dzwoŋi tswi bə̂ nəniy anə ukàʼ, Yesù ə dzày yə̀ a ghu nə, “Kəə gha nì dzîy fyiə ayiə yə ghà kôʼ nəniy awò wù lìy à ki may kə nə̀ Wà Wù mə zɛ̀mə̀ dzoŋi kə anə ipfə.”
10Ghu nùw na təŋ kə iyiə i ghè yə̀ anə iwe i ghu, kwunə bəbə anə iwe ighu nə̀, “Ù myìŋə̀ kìə̀, ani zɛ̀mə̀ ŋwò bə̀ anə ipfə yə?” 11Ghu ə bəb yə̀ â Yesù a we nə, “À də kìə̀ aghê àtyi dee ulàŋ wìy dzîy nəniy nə̀ Èlaydzà kwu ani bù dzə̀ isə awò Kə̀litò ani bù ə?”
12Yesù ə bə̀lì kə ghu nə, “I ndzə̂m də̀ ŋwô a ghii nə̀ Èlaydzà kwu ani bù isə, ù bù byay na tsə ayiə adzə̀m. I sî kàm də məyiə ŋwàʼà K-a-zə̀kìy dziy nə̀ ‘Wà Wù kwu ani ŋge fiy, ghu kiy twe maʼà soʼò we yə?’ 13Mə dziy kwuni dzây bə̂ â ghà nə̀ Èlaydzà maa kwu bù, ghu zəŋi ayiə yə àdzə̀m ghu kə liə ani zəŋi nə̀ we, anə yiə yə i kə twâ doʼò anə ŋwàʼà k-a-zə̀ kwùmə yə̀ nə̀ we.”
Yesù ə zəŋi taw kə wà ùŋəmə̀ ùlìy wìy usîy ùbɛbə wiy kə fyimə we
(Matìyò 17.14-21; Lukâs 9.37-43a)
14Abù ghu bû kway bə̀ nəniy tsə̀təndii tə̀ liy tə, ghu bù kòʼ bə̀ ŋwàâ kə ghù nə̀ àghè tyi dee ulàŋ wìy, ghu dzɛmə̀ na nəniy tsə̀təndii tə, bə̀lə̀ àyiə nə̀ ghu. 15Abù aghû yə̀ kòʼ tsə Yesù, adzwə ŋge zwum ghu, ghu nyəŋ zù twoŋə zuw we. 16Yesù ə bəb tsə â tsə̀təndii tə a ghu nə, “Ghà bələ̀ àyiə kìə̀ nə̀ ghu ə?”
17Wù lìy wîy ə bə̀li fyi kə anə ŋwàâ kə ghù kə̀ nə̀, “A Àtyi dè, Mə mə̀ bû nə̀ wa nam ùŋəmə̀ wìy â wò. Nsìy mə̀bɛbə̀ mìy zəŋə nə̀ ù kə dzəŋì dzə̀. 18Abù ìn kaʼ tsə ani fyimi we, in bòʼò màʼà bə̀ we ambvə̀d, ntsəbə tiy fyiə we anə idzwə, u fələ àsooŋ, tìì dòʼò yə̀. Mə dzây yə̀ nə̀ tsə̀təndii tiə̀ tìy dzwûm fyi yə̂ nsìy mə̀ ghà mə̀, ghu də̂m kê kə.”
19Yesù ə dzày yə̀ a ghu nə, “Ghà kwu dzə̀ way ibɛmə ìliy yiy! Mə kwu ani dòʼò nə̀ ghà anə ghab kə̀ ghaa kiy ə? Mə kwu ani kwù fòŋ anə ghab kə̀ ghaa kiy nə̀ ghà ə? Ghà nîy bû nə̀ wà ù ŋəmə̀ ù ghè wə̀ asə̀ə̀ mìə̀.” 20Ghu nìy bə̀ wa nə. Abù usîy wə̀ kòʼ tsə nəniy Yesù, u təm bə̀ wa nə nə̀ fwàʼ kìy.
U bvə̀ bə̀ a mbvə̀d byiŋə tsə̀, ntsəbə tiy fyiə anə idzwə. 21Yesù bəb yə̀ awò tè wa nə we nə “Idzâŋ yə̀ kə kaʼ zəŋi ani fyimiy we yə?”
Tè wa nə bə̀li kə nə̀, “I kə kaʼ nə̀ ù namə tɛb ə ŋwò.” 22I bê a sòŋə fə̀liy fiy i bòʼò màʼà nyi yə̀ we anə uvə̀lə̀, soŋə fə̀liy fiy anə dzwî, ani wiy màʼà we. Kwoʼ nə̀ mwuli kiy azoŋə̀ ghə̀d wò fây fyi ghə̀d, bəə wò də dzə ani fày.
23Yesù ə bə̀lì kə a we nə “Wò dzìy nə̀ abu mə də dzə? Abu wò kwu dzə ibɛmə yiy anə fôŋ, ayiə dzə̀m ə̀ bwîy ŋwò â wù wə̀ ù kwu nəniy ibɛmə yiy.”
24Tè wa nə dyaŋi dzày tsə anə dzə̂ ìtâw yìy nə̀ “Mə kwu ŋwô ibɛmə anə fòŋ, fàay kə kə ŋwô miə anə ibɛmə yam yə tə̀ i nɛmə kə.”
25Abù Yesù kòʼ nəniy nə̀ ŋwàâ kə aghu kìy nyiə̀ lwe nyiə bə̀ ŋwò, u kwà ùsìy ùbɛbə wə nə̀, “Yə wò zəŋi nəniy wù wə̀ nə̀ ù si də kəkwòʼ, də̀ soʼo kəmwòʼ, fyi ŋwòə bə̀ azoŋə̀ we, ikwu wò nì kàmə̀ nyiə dzwoŋi azoŋə̀ we.”
26Usîy wə̀ ə bwoʼ fyi bə̀ kə̀bòŋ, kwi vuni bə we ani tu ŋwò fyi. Wa nə màŋ tìì dòʼò yə̀ yiə à də̀ wù ùpfə wìy. Ndə̀mə̀ àghè ə dzìy kə nə̀ ù mə pfə. 27Yesù ə kwi tsə we anə ukwe, nìy ŋwò kə we idoŋ. U ŋwò təmi kə nə̀ ìfwe yiy.
28Abù Yesù tsìy nyi yə̂ a ndaw, tsə̀təndii tə we tiy tsoŋə bəbə yə̀ a we nə “A mə̀ də kìə̀ ghě mə̀ də̀mə̀ kê nəniy ani dzwùm fyi usîy ùbɛbə wə ə?”
29U bə̀lì kə ghu nə̀ “À mày kə ìgwùŋì i də nəniy ani dzwùm fyi ndzòʼò ùsìy wə̀. Fyiə kə̀liy kiy way ani dzwùm fyi dzə̀ ndzòʼò ùsìy wə̀.”
Yesù ə kàm dzày fəli yə̀ yəə ù nì pfəə ate
(Matìyò 17.22-23; Lukâs 9.43b-45)
30Yesù ə ŋwò tsə awote nə̀ tsə̀təndii tiy tsìy yə̀ dzəd a mbwòʼ ə̀ Galìlî. Yesù kə liə way nə̀ wù lìy wìy kəli fyi loʼo kə ghu kə də nəniy ate. 31Aŋwòə ù kə tyiə dè ayiə awò tsə̀təndii tə we. U dzày yə̀ a ghu nə, “Ghu kî nìy nyə̀ fyiə ŋwò yə̀ Wà Wù awò àghù yə̀ ghu kî wiy nəniy we. Anə zù fyi ntsukə inti, ù kî zɛ̀mə̀ dzwoŋi bə̀ anə ipfə.”
32Tsə̀təndii tə kə̀ zuw kəli nəway ayiə yə Yesù kə miŋə̀ nəniy. Ghu kə tsəŋə sòʼò ŋwò ani bəb yə̀ imiŋi ghà yə̀ â we.
À tsìy fyi ndiə?
(Matìyò 17.22-23; Lukâs 9.43b-45)
33Ghu ə zù bù a Kàpanùm, abù ghu sî də nəniy a ndaw, Yesù ə bəbə a ghu nə, “Ghàa mə̀ byaŋə̂ fem tə kìə̀ anə dzəd ə?”
34Ghu ə zuw dòʼò yə̀ moŋ, aŋwòə ghu kə byaŋə tə̀fem anə iwè ighu nə̀ à tsìy fyi ndiə. 35Abù Yesù dòʼò tswi tsə nəniy, u twoŋə bə̀ tsə̀təndii tə we, dzày yə̀ a ghu nə abu wù dziy doʼò wè kə̀sə anə uzə ghii, ù kwu ani dòʼò tsə kəgùŋə, ù si faʼa nyiə awò aghè à liy yə. 36Yesù ə nìy na bə̀ ànìsə̀ anə uzə u ghu, myaŋi kəli yə̀ we, dzày tsə nə̀, 37“Wù wə̀ ù ŋgwam na ànìsə̀ yəə à də̌ ù wə̀ ani izəd yam, ù ghî ŋgwam na miə, wù wə̀ ù ŋgwam na nəniy miə, ù kə̀ kaʼi ŋwam na dzə̀ nəway miə, ù ŋgwam na sòʼo wù wə̀ ù twum bə̂ nəniy miə.”
Wù wə̀ ù də dzwə way nə̀ ŋgàŋ, ù taʼ nə̀ ŋgàŋ
(Lukâs 9.49-50)
38Dzwan ə dzày tsə nə̀, “À àtyi dè, ghě mə̀ kòʼ wù lìy wìy ù dzwùmə̀ fyiə nəniy nsìy mə̀bɛbə̀ mìy anə izəd yə̂. Ghè dzây yə̂ nə̀ ù bwi na, aŋwòə ù wày dzə anə dzəŋə kə ŋgàŋ.”
39Yesù ə mee a ghu nə, “Kəə ghà a nì bwi nia dzə̂ we, aŋwòə wù lìy wìy wày dzə ani fàʼ mali tə yiə anə izəd yam, ù kì tswə̀ŋì tsə ù kàm kaʼ tsə ani dzày àyiə àbɛbə yiy azoŋə̀ mìə̀. 40Wù wə̀ ù də̀ dzwə way nə̀ ŋgàŋ ù taʼa nə̀ ŋgàŋ. 41Mə ndzəmə̀ dzìy bə̀ â ghà nə̀ wù wə̀ ù nyə̀ nəniy gha nə̀ bwàm ə̀ mwi bòʼ mìə̀, aŋwòə ghà də aghû yam, ù kì kyilə ŋwò namə kiy.”
Imwâm kòʼ yə̀ i zəŋə nə̀ wù zəŋi ibɛb
(Matìyò 18.6-9; Lukâs 17.1-2)
42Abu wù lìy wìy zəŋi nəniy nə̀ ànìsə̀ ù mòʼ anə nìsə̂ yə̀ ghu bɛmə nəniy â mìə̀ nə̀ ù zəŋi bɛb, ù kpe kə yəə ghu ni kwù tsə itay ìgwuə ì nê yìy anə umwìy u we, ghu zû màʼà yə̂ we anə dzwî ì nè yìy. 43-44Bəə wo kiə̀ kìy zəŋə wô nə̀ wò si zəŋə ibɛb yiy, khǐ màʼa tsə. À dzwàb tsìy fyi â wò ani zù nyi itsâ nə̀ wokiy kəmòʼ, tsìy fyi â wò ani kwu awo àbè wò zû anə uvə̀lə̀.#9.43-44 Ùŋwàʼà ù liy wiy kwu ŋwoə ŋkə̀mə̀ 44. Uze wə u fələ nəniy aghû yiy awo u pfə kòʼò dzə̀ wày, u vələ wə u də nimə kòʼò dzə̀ wày. 45-46Bəə wuu kiə̀ kìy zəŋə wô nə̀ wò si zəŋə ibɛb yiy, khìi màʼa. À dzwàbə̀ â wò ani zù nyi itsâ nə̀ wuu kəmòʼ kìy, tsìy fyi â wò ani kwu awee abè wò zû anə uvə̀lə̀.#9.45-46 Ùŋwàʼà ùliy wiy kwu ŋwoə ŋkə̀mə̀ 46. Uze wə ufələ nəniy aghû yiy awo u pfə kòʼò dzə̀ wày, u vələ wə u də nimə kòʼò dzə̀ wày. 47Abu isə yiə̀ yìy zəŋə nə̀ wò ki zəŋə ayiə àbɛbə yiy, kyali ŋwòə fyi bə. À dzwàb â wò ani zù a lòʼo kə zə̀kìy saʼa nəniy ate nə̀ isə yiy ì mòʼ, tsìy fyi â wò ani kwu asə abè wò zû anə uvə̀lə̀. 48Uze wə u mukə̀ aghê awote, u pfə kòʼò dzə̀ wày, nə̀ u vələ wə u fwuə nəniy awote, u nimə kòʼò dzə̀ wày.
49Zə̀kìy kî zəŋə tsə nə̀ uvələ u nyi yə̂ azoŋə̀ ghù yəə tsòʼ mìy nì nyiə yə̂ anə ufànyiə.
50“Ntsòʼ mìy dzwabə̀ ŋwò. Abu ìŋ kwuni kuŋ fyi tsə, kàmə̀ twabə way, wò də̌ mə̀yə ani zəŋi tsə tə̀ ìn kàm twab ə? Ghà kwu ani də tee à də̀ məntsòʼ, mùə̀ sòʼò anə ibvay nə̀ àghè àdzə̀m.”
Currently Selected:
Mâk 9: isu
Označeno
Deli
Kopiraj
Want to have your highlights saved across all your devices? Sign up or sign in
© CABTAL 2023