От Матфея 2
2
Иӷалықыта̄ӷның Лӣткаҳлъягыт Ысҳаӷьяҳтуқаңат Иисус
1Иисус алъхыӷақңан Вифлеемыми Иудеямылңуӷми, Ирод умӣлгулӷӣ. Алъхылъҳан киңуңаның иӷалықыта̄ӷның лӣткаҳлъягыт асиваӷмың ка̄ткат Иерусалимымун. 2А̄пқуӷўа̄қат: «На̄гу таӷнуҳақ алъхылӷӣ умӣлгат Иудеит? Иӷалықыта̄ӷа ысҳа̄ма̄ҳпут асиваӷмылъюку ынка̄м манигуӷьяҳтуӷақаҳпут».
3Умӣлгым Иродым нагақуӷлюку тыхылъҳӣҳлъякақ, қамахтыңъўа̄ӷлютыңлъю Иерусалимыӷмӣт малигулъютың. 4Тахсиқлъиҳтыӷлюки қамахлъюки первосвященнигытлъю, апыҳтуӷикаюгытлъю Лӣлиҳтӯсяның а̄птыкӣ: «Нани Христос алъхыӷьяҳқа̄ўа?»
5Кӣмсиқа̄т: «Вифлеемыми Иудеямылңуӷми. Ӯкналиқистым хўатын игақыхкақа̄:
6“Лъпык Вифлеем, Иудамылңуқ,
иглыӷутистыяхӣтның Иудам укавантылъыҳпига̄нӷитутын,
қаюҳлъяк лъпынун тагинақңӯқ иглыӷутиста,
иглыӷутияҳқақ юмның Израилыӷмӣның”».
7Та̄хкын Иродым аксяқлъюку тахсиқлъиқӣ иӷалықыта̄ӷның лӣткаҳлъягыт, лӣгикналюку қавңақ алӣӷьюхўа̄қа̄таңа иӷалықыта̄қ. 8Та̄хкын пикӣ: «Вифлеемымун аӷуляқлъюси ынңа̄талъ иваҳтыху таӷнуҳақ. На̄лъкыхкуфсигу уңипа̄сяҳтуӷнакыфсиңа, хўаңалъю манигуӷьяҳтуҳлъықақа».
9-10Таўатын умӣлгым пийистың иглыҳтыкат. Ысҳаӷля̄тақа̄т ата̄сиқ та̄на иӷалықыта̄қ асиваӷмылъюку, ынка̄м ынңа̄талъ қуятыҳлъякат. Малихтыка̄т кынляңа аӷулӣлъҳанун таӷнуҳа̄м ныңан қӯлңани. 11Итыӷлютың мыңтыӷамун ысҳақа̄т таӷнуҳақ, на̄ңалъю Мария. Сыгысқуҳқӯлъютың манигуқа̄т. Та̄хкын ақыфтаӷа̄тың қылъпыҳлъюки тунқуқа̄т тунусямың: золотамың, ладанымың, смирнамың.
12Та̄хкын Кияӷныӷым қаваңукун йиткӣ Иродымун утыӷнифқӣта писқылъюки ынка̄м агляқат нунамыхнун алъятхун тумытхун.
Иосифынкут Қималъҳат Египетмун
13Иӷалықыта̄ӷның лӣткаҳлъягыт аӷуляқсята, қаваңукун Атанӷым яқулган алӣӷвиклъюку Иосиф пика̄: «Макылъютын таӷнуҳақлъю на̄ңалъю анагутикык Египетмун. Таўа̄нлъыҳатын утыӷнӣсқылъымнун кынляңа қаюҳлъяк Иродым иваҳтыснақа̄ таӷнуҳақ туқутысналюку».
14Ынка̄м унугми таўани Иосифым макылъюни аӷуляқуткакык таӷнуҳақлъю на̄ңалъю Египетмун. 15Таўа̄нтыкақ кынляңанун Иродым туқулъҳанун.
Ынка̄м апыӷӣқа̄гуқ Атанӷым акузиткыхка̄ ӯкналиқистыкун хўатын:
«Туқлъюқақақа иӷнықа тагисқылъюку Египетмың».
Таӷнуҳаӷның Туқуқулъҳат
16Иродым лӣгиксямигу иӷалықыта̄ӷның лӣткаҳлъягнун пӯҳсиманилюни сякшитыҳлъякақ. Та̄хкын пилъюўаҳтыт каяхтыкӣ Вифлеемымун, увитаңанунлъю туқуқӣсқылъюки қамахлъюки мыкылӷӣҳа̄т алъхынҳаҳаӷның, ма̄лӷугыгнун аюмиқулъыҳтуткалӷӣнун кынляңа. Тама̄кут таӷнуҳа̄т накмикыхкақӣ қаюҳлъяк иӷалықыта̄ӷым алъхылъҳаның ма̄лӷугуҳлъыҳӣк аюмиқулъҳык, иӷалықыта̄ӷның лӣткаҳлъягыт апылъҳитни.
17Таўатын пилъыҳқун ӯкналиқистым Иеремиям ӯкналиқылъҳа апыӷӣқақ:
18«Рамами нагақуқа̄т лыӷаҳлъяга̄тақ.
Рахилыңуфтуқ қиялӷӣ авақутаминун,
рыпалъ илютуҳсяӷьяҳқа̄ҳа̄хпынани,
қаюҳлъяк қамахлъютың туқуляӷа̄ткат».
Иосифынкут Утыӷнилӷӣт Израилмун
19Иосифылъю Египетымылъюки Ирод туқукақ, қаваңукун Атанӷым яқулган алӣӷвикыхка̄ Иосиф 20пика̄: «Макылъютын таӷнуҳақлъю на̄ңалъю утыӷнӣтикык Израилымун, қаюҳлъяк туқутинақсялӷӣт таӷнуҳаӷмың туқуляӷа̄сима̄т». 21Ынка̄м Иосифым макылъюни таӷнуҳақлъю, на̄ңалъю агля̄ткақи Израилмун.
22-23Иўырңа Иосифым нагақуӷлюку нутаӷақ умӣлга Иудеям, Архелайеңунилюку Иродым иӷныӷа, алиңыхкақ таўавык агляныӷмың. Қаваңукун Кияӷныӷым уңипа̄тка̄ Иосиф Иудеитыфқа̄н писқылъюку, ынка̄м Назаретымун агляқат Галилеямылңуӷмун. Тама̄нтыкат ӯкналиқистыт хўатын пилъҳат, апыӷӣӷысқылъюку: «Мессия Назаретыӷмӣңуяҳқа̄гуқ».
Currently Selected:
От Матфея 2: ess2
Označeno
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.