От Луки 24
24
Иисусым Уңуваҳтыслъыӷа Туқулъыӷмың
1Сивулиӷми аӷныӷани неделям, уна̄ңупихлъюку, та̄кут аӷнат лъивыҳтыкат кылъқылъюки ята̄ҳқыхкатың нықниҳся̄сит. 2Лъивыӷмун ка̄сялӷӣмың уйӷахлъяк па̄йңаның улъҳитаӷңафтуқ. 3Итыӷа̄сялӷӣмың авӣтыфтуқ югусӣ Атанӷым Иисусым. 4Кукшиқуткумалюку сяматаңа, югык алӣӷаҳтыкак ся̄ӷўитхун, а̄ткӣк ниӷухлъягык. 5Аӷнат алиңрӯӷуткат рыпалъ хинатың сыкытыстыкӣт нунамун, югык а̄птыкӣт: «Сяңан иваӷистык уңувалӷӣмың акулңитни туқукат? 6Хўа̄нъыӷитуқ; уңуваҳсима̄қ туқулъыӷмың. Амынқун сялин Галилеямылъюни уңипа̄ткақыхкаңиси: 7“Иӷныӷа Югым тӯныпыста̄ӷьяҳқақа̄т сыӷлыҳқыстынун қақӯрӣсқылъюку, та̄хкын пиңая̄ни аӷныӷым уңуваҳлъықуқ туқулъыӷмың”».
8Та̄хкын аӷнат нықаңуқӣт Иисусым акузитаңи. 9Лъивыӷмың утыӷниӷлютың тама̄на қамахлъюку а̄пқа̄т қуля ата̄сиқ сӣпнықлъюку апостолытун, иляңитнунлъю малихся̄ҳтыңитнун. 10Та̄кут лъивыҳтыкат Мария Магдалаӷмилъю, Ионналъю, Мариялъю на̄ңа Иаковым, иляңилъю аӷнат. Уңипа̄ткӣт апостолыт тама̄кын пилъыӷның, 11иўырңа апостолыт сюмыӷмыхни тымңи пинилюки пикӣт ынка̄м ухпықумаңилъкаңит. 12Нақамынрақ Петр ныкывлюни лъивыӷмун кытанқукақ. Ка̄сями лъивыӷмун қиныҳтыкақ, ысҳақӣ қӣпаӷара̄ӷина̄т лёныт лъилютың. Та̄хкын агляқақ сюмыҳтаӷа̄ткума̄н Иисус сяматаңа.
Тумыт Эммаусымун Аюқылӷӣт
13Таўани ата̄сими аӷныӷми, ма̄лӷук малихся̄ҳтыкык аӷуляқыхкақ ныңӣҳаӷмун а̄тҳа Эммаус, Иерусалимымың ынтақун қуля атамиқ сӣпнықлъюку километрыңулъӷи. 14Акузиткыхка̄к қамахлъюку тама̄на таўатын пилъық. 15Акузиткумалюку тама̄на пилъық, Иисусым ка̄лъюкык иглыӷалӷусиқакык. 16Иўырңа налъюкыхка̄к кинаңутаңа қаюҳлъяк Кияӷныӷым лӣсюқысныӷилъкаңа. 17Иисусым а̄птыкӣ: «Иглыӷуткылъюку сяңўа̄ акузиткақыстыху?» Аӷулӣқак, ысҳақа̄лютык қивӷуңаҳлъягык. 18Та̄хкын а̄лъҳан, Клеопамың атылгим а̄птыка̄: «Лъңина̄зӣн ля̄лиҳтақ Иерусалимымун налъюкилӷӣ тама̄кын апыӷӣқаның акугўа̄қ?»
19А̄птыкакык: «Сяңўа̄ ся̄?» Кӣмсиқа̄к: «Иисус Назаретыӷмӣ акузикуткақаҳпут. Ӯкналиқистыңуяҳтуқ, қыпҳалъҳилъю, апыҳтуӷилъҳилъю аҳтуӷьяҳқа̄нӷисяҳтут Кияӷныӷмилъю, югнилъю. 20Первосвященнигымталъю, иглыӷутистымталъю тӯныхкақа̄т Римым правителыңанун туқутысқылъюку, ынка̄м қақӯраҳтыстыкақа̄. 21Сиӷимакңуяӷаҳпут лъңанун итымунъақнилюку Израиль. Та̄м ся̄ӷўакун, уна аӷнық пиңайӣтка̄ та̄хкын таўатын пилъыӷмың. 22Иляңита аӷнамта сяӷӣӷаюхсимилъю. Аҳтаӷаӷақа̄лъю лъивыҳлъютың 23авӣлңа̄макаңат Иисусым югусӣ. Тагилютың а̄пҳа̄т яқулгыгның ысҳаӷўа̄лъыҳтың, яқулгык уңипа̄симакаңит аӷнат уңува̄манилюку. 24Та̄хкын иляпут лъивыҳлъютың а̄пҳа̄т таўатыңўа̄қ аӷнат апылъҳистун, иўырңа ысҳалъҳита̄т Иисус».
25Та̄хкын Иисусым пики: «Налъюҳагуси югыгни! Пияқнаҳалык ухпықинақылъыҳтык ӯкналиқистыт акузиткыхкӣтның. 26Пика̄гут Христос икфиқыпыста̄ӷлюни туқулъықнилюку итыӷвагилгами ниӷуҳқылъыӷминун». 27Ынка̄м Иисусым пӣнлӣсиқлъюки игақуқӣт Моисейемлъю, қамахлъютыңлъю ӯкналиқистыт, лӣгикыстыкакык Акузитның Игақыхканың лъңанун аюқылӷӣның.
28Ка̄сяҳтуқат Эммаусымун, Иисус нагныҳсюгниҳқыхкақ. 29Иўырңа иӷлыклъюку пика̄т: «Хўаңкутыгнитын, хўаникунақа̄ мамлыхнақыхкаңа». Ынка̄м ылъкыгниткақ. 30Қаюӷвигыгни ақумылгусиӷлюкык, нықыкшаңлъяқ тугулюку игамсиқаюгвиклъюку Кияӷнық, икутақлъюкык тӯныхкакык. 31Та̄хкын Кияӷныӷым лӣсюқыстыка̄к Иисусыңутаңа, ысҳа̄манӷыхкыныңлъю авӣтқаҳтыкақ. 32Лъмытыгның пикак: «Қа̄мхунқун қуяҳлъяхтукуң алыҳқуӷақңамикуң тумыми, лӣгикыстақңамикуң Акузитның Игақыхканың!»
33Таўаниңинақ югык ныкывлютык утыӷниқак Иерусалимымун. Таўани қырңуӷутңафтут қуля ата̄сиқ сӣпнықлъюку малихся̄ҳтыт, тама̄кутлъю лъңитнилңӯт. 34Ка̄сягмык та̄кут уңипа̄ткӣт малихся̄ҳтыт: «Атанық уңувапыста̄ӷума̄қ туқулъыӷмың! Алӣӷвикума̄лъю Симон!»
35Та̄хкын югык а̄пқа̄т тумымылъютык сяңўа̄ сяка̄таңа, натынлъю лӣсюқылъыҳтың Атанық нықыкшаңлъяқ а̄вгуӷақңагу.
Иисусым Алӣӷвикыхкаңи Малихся̄ҳтыни
36Югык уңипамсюкумалюку таўатын пилъық, Иисус лъңа катам ныкывӷафтуқ акулңитни, пикӣ: «Ныкыхмылъық лъпысинилъи!»
37Упуӷлютың алиңрӯқат, сюмыӷмыхни ысҳа̄нъилютың таӷныӷамың пикат. 38Иўырңа Иисусым а̄птыкӣ: «Сяңафси алиңрӯӷыстык? Сяңан айгуӷистык? 39Ысҳақаҳтыкиқун ӣхынкалъю, итыганкалъю - хўаңаңӯңа. Ся̄флъюңа лӣсимакылъықаҳпысиңа, қаюҳлъяк таӷныӷак кымыкшагитуклъю, ныҳқўа̄ӷитуклъю, ысҳаӷаҳпысиңа хўаңа пилгӯңа».
40Таўатын пилюки Иисусым кылгувикыхкӣ ӣхыминыңлъю, итыгаминыңлъю. 41Иўырңа ухпықңўа̄ӷумаңилъкаңат қаюҳлъяк қуяҳлъягулӷӣтлъю, сяӷӣӷаюхлъягулӷӣтлъю. Ынка̄м а̄птыкӣ: «Хўани сямың ныӷьяҳқистык?» 42Тӯныхка̄т га̄қамың иқалъюгмың, 43тугулюку ныӷыхка̄ ысҳа̄манӷитни.
44Та̄хкын Иисусым пикӣ: «Лъпысинитңулюңа хўатын уңипа̄ткақамси: Сяңўа̄т қамахлъютың хўаңамның аюқылӷӣт игақыхкат апыӷӣӷьяҳқа̄гут, Моисейем Лӣлиҳтӯся̄нилңӯт, ӯкналиқистыт игақыхкӣтңилңӯт, псалмынилңӯтлъю».
45Та̄хкын умьюгӣт лӣгикыстыкӣ Акузитның Игақыхканың. 46Пикӣ: «Хўатын игақыхка̄гуқ: “Христос икфиқыпыста̄ӷьяҳқа̄гуқ, та̄хкын пиңая̄ни аӷныӷым уңувапыста̄ӷьяҳқа̄гуқ туқулъыӷмың”. 47Хўатынлъю игақыхка̄лӷӣ: “Малихся̄ҳтыңи уңипақилъықут А̄тҳакун, пӣнлиӷлютың Иерусалимымың та̄хкын тамаҳа̄нун рамкынун. Уңипа̄сяҳқақӣт авутыҳқылъюки сыӷлыҳқынъанӣсқылъюки Кияӷныӷмун сыӷывутысқылъюки”. 48Лъпыси лӣсимакистыңӯси икфиқылъымнун, туқулъымнун, уңуваҳтыстылъымнун. 49Ынка̄м та̄ўа каяхлъықахка Атама акықусякык лъпысинун. Иўырңа утақӣлӷа̄си ма̄ни Иерусалимыми, кынляңа а̄тысфикылъыҳпысинун аҳтуӷьяҳқа̄нӷилъыӷмың қилягмың памакын».
Иисусым Қилягмун Маюлъҳа
50Та̄хкын аӷуляқуткӣ уявантуляңатун Вифаниям, таўани ӣхыни ныңугулъюки қуястыкӣ. 51Қуясималюки униткӣ, Кияӷныӷым қилягмун маю̄тыстыка̄. 52Таўани манигуӷлюку утыӷниқат Иерусалимымун қуялъылиҳлъяглютың, 53ынка̄м ӣўлың Храмымытақылӷӣт Кияӷнық усюқақыхкаңат.
Currently Selected:
От Луки 24: ess2
Označeno
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.