Yuhana 4
4
Gà Yesuw nda məkəs gà Samariya duwa
1Gà *Farisa tə tsaraka, gà na ti zezem a Yesuw, dite ka, a tsilwiɓ à tar a a yam a ka, hinne, tə za gà biy Yuhana. 2Tsaatsa ndzer ŋana ka, Yesuw aka tsilwiɓ aɗəm à mburma tsa. Say gà ɓəzla mazazama ŋgat na ti tsilwiɓewa aɗəm à tar a. 3Aləka i təv ana Yesuw a tsaraka dukw ana gà Farisa ata ti tsik ahər a ka, a mah ba ika ahəɗ Yuda ya, à mbìɗ a gər aka ahəɗ Galile. 4Vatwa ana a da a fataya ka, say ndaka ahəɗ Samariya.
5I təv ana a riŋ a de a ya ka, a ndze a kwite duwa ika ahəɗ Samariya, tə zalar Sikar. Kwite ata ka, bise nda gùvàh Zakup ana a vəl a kəla ŋgar Yasufa akahər ata ya. 6Dite sùwà Zakup ana a le ya ka, i fata mbaŋa. Yesuw a ndzeha aà gùva sùwà ata ka, a ndza a bəɗ, aɗaba aka ya ba. Mendze ana ti ndzeha a fataya ka, tits magər pat aka ge.
7-8I dəba ŋa ya, gà ɓəzla mazazama ŋgat tə da a huɗ kwite a mayaha dukw mezime. I təv ana tə da iɗəm a ka, məkəs gà Samariya duwa a daha aka matəfa yam. Yesuw a gwaɗar: «Viliŋ yam, i se a te.» 9Məkəs ata a gwaɗar: «Abaya kər ka, gà Yahuda, wànà meme na ki wiz aà iye a yam, aà iye ana gà Samariya ya?» A tsiker taŋa ka, aɗaba gà Yahuda tə lə̀mawa akaba à ahər nda gà Samariya tsa. 10Yesuw a gwaɗar aaka: «Na mege kà sər dukw ana Mbulum a vile a a mburma ya, dite kà sər iye na i wiz aà kər yam a ka, kər ivaɗ na ki wiz aà iye a yam ana a vile a mesife a mburma ya, dite ka, i vilek a ya.»
11Məkəs ata a gwaɗar: «Əbay, araha sùwà kwitsikw, dite kwets dukw matəfara ŋa iɗəm a tekeɗe, a riŋ aà kər tsəna, ki ŋgeter a yam ata a vile a mesife a mburma ya dze ana, i ŋga ya? 12Batsah tsir kwa Zakup na a le a mər sùwà aaha akahər ata ya. Ŋgat nda gər ŋgar tekeɗe, aka sa iɗəm yam a mbaŋa. Dite gà ɓəza ŋgar nda gà dukw gənaw ŋgar tserdze ibam, tàa sa mbaŋa asa. Dite kər kà dzala ana, kà za Zakup ya, na kər a?» 13Yesuw a gwaɗar aaka: «Wur ana aka sa yam sùwà aaha ya ka, i dəba ŋa ya, yam à kìɗewe a ŋgat asa. 14Ama wur ana aka sa yam ana i viler a ya ka, yam à kiɗ a ŋgat diydiy asa tsa. Aɗaba yam ana i ta viler a ya ka, a ti ne a kamala biye yam ana ùwaɗ ùwaɗ à ŋgìzere a iɗəm a, a viler a mesife ana à ndìv a tsa aà biybiy a.»
15Məkəs ata a gwaɗar asa: «Əbay, kamkam, viliŋ yam ata, dite ka, yam ma ta kiɗ iye asa tsa, dite ka, i tə dara aka sùwà aaha aà matəfa yam diydiy asa tsa te.» 16Yesuw a gwaɗar: «Daha, tə zalaha a zal yak, ka dumara a faha ya.» 17Məkəs ata a gwaɗar aaka: «Zal gà a riŋ tsa.» Yesuw a gwaɗar asa: «Kù gwa zal yak a riŋ tsəka, ndzer. 18Aɗaba kàa da a zal ka, medzige ə̀zləm, dite wele ana kinehe kər i ma ŋgar a tekeɗe, zal yak ɓav tsa asa. Kà tsikiŋ ka, ndzer dukw ŋgar.»
19Məkəs ata a gwaɗar: «Əbay, i sər ka, kər mala məma à guma Mbulum. 20Gà batsah tsir mər gà Samariya ana akahər ata ya, tə dzawa gurmits a bəɗ a Mbulum ka, ika gər kwite aaha, ama kurum gà Yahuda kù gwaɗum, təv mazàmbàɗà à Mbulum ka, i Yeruzalem ɗekɗek ana, meme?» 21Yesuw a gwaɗar aaka: «Daala aaha, gəs dukw ana i tsikik a ya, pat ŋa a dere a ka, mburma ti dze a gurmits a bəɗ a Mbulum i gər kwite aaha, kige tsa i Yeruzalem ɗekɗek tsa. 22Kurum gà Samariya ka, kà sərum wele ana ki dzwìmer a gurmits a bəɗ a nda ndzer tsa. Ama mər gà Yahuda ka, mì sər wele ana mìi dzer a gurmits a bəɗ a. Aɗaba wele ana a mbil a à mburma ya ka, a dere a ka, i təv gà Yahuda ya. 23Ama pat ŋgiɗ a deriŋa, kamala megweɗe ya ka, aka mbər mendzera, ama ka, Mezite Mesife Mbulum a vile a ndzəɗa a mburma aà mazàmbàɗà à Mbulum Tsir gà nda ndzer ŋa nda gəzləŋ ilik, aɗaba a sasar ka, na tì dzer a gurmits a bəɗ kataya ya. 24Mbulum ka, Mezite Mesife, dite gà mburma ana a sàs a tar ti dzer a gurmits a a bəɗ a ka, say ti dzer a ka, nda ndzəɗa Mezìtè Mesife ata nda gəzləŋ ilik.»
25Məkəs ata a gwaɗar: «I sər ka, *Masihu a deriŋa, wele ana tə zalar *Kiristi, mala məmbàlà à mburma ana Mbulum a gwa, i ti slir a kurumehe a ya. Aka dara ka, a ti ɗif a mər a à duwa tserdze.» 26Yesuw a gwaɗar aaka: «Iye ŋa ka, naha i fèfilek a ya.»
27I təv ana tar riŋ ta fèfil a ya ka, gà ɓəzla mazazama ŋgat aaha ndeɗiŋa ya, tàa màra tsara. Ta ŋgat a Yesuw ana tar riŋ ta fèfil a nda məkəs ata ya ka, a ge aà tar kamala sunwa ya. Ama wura ilik ika magər tar a aka wiz aà məkəs ata, aka gwaɗar ka: «Ki yehe a là na i təv ŋgar a?» kige tsa aka wiz aà Yesuw ka: «Aàmala na ki fèfilwim a nda ŋgat a?» tsa.
28Məkəs ata a miyak à dzagwaya ŋgar a fata, a mbəɗ gər a kwite. A daha, a gwaɗa a gà mburma ana i fataya: 29«Dumara, fə̀rum aà wele duwa a ɗemiŋara gà dukw ana i gewa akahər ata tserdze ya, aà are ya kwaŋ. Wànà a ge a ana, Kiristi, mala məmbàlà à mburma ana Mbulum a gwa, i ti slir a kurumehe a ya kəla ya?» 30Gà mburma tə tsaraka kataya tsara ka, ta màhara ba ya, tə da a təv Yesuw ana ŋgat iɗəm a.
31I təv ana ndeɗiŋa, məkəs aaha a da iɗəm a, a huɗ kwite ya ka, gà ɓəzla mazazama Yesuw ta hamar, ta gwaɗar: «Mala medzeŋge mər, zəm dukw mezime aaha zaakwa te.» 32Ama a gwaɗa a tar aaka: «Dukw mezime gà a riŋ pam, na i zim a ya, aɗaba kà sərum tsa.» 33Gà ɓəzla mazazama ŋgat ata tə tsaraka kataya ka, ta gwaɗaba ika magər tar: «Ee, wura aka zlarra dukw mezime ŋgiɗ a kəla ya?»
34Yesuw a gwaɗa a tar: «Dukw mezime gà ka, say mege dukw ana a sàs a wele ana a slərra iye ya, nda mandəva à mege megemir ana a viliŋ a ahər aà mege ya. 35Kurum kù gwaɗum ana, a zeha kiye faɗ ka, ta pele a gà duwa i bəɗ a tsiye. Ama iye ihər i gweɗe a kurum ŋa: Fə̀rum aà gà gùvàh lele, gà wur gà dukw ana iɗəm a, tàa nàhaya, aka ge mipele ide. 36Wele ana a pele a dukw i bəɗ a ka, a ŋget a dukw mayaba ŋgar daga aà kinehe ya, dite a yehe a gər a gà wur gà duwa. Gà dukw ata tserdze ya ka, kamala megweɗe ya ka, gà mburma ana ta ŋget a mesife ana à ndìv a tsa aà biybiy a. Kərga taŋa ya, gà wele ana a slige duwa, nda wele ana a pele a i bəɗ a ka, ta ŋgeye a ba məma. 37Aɗaba bazlam minew ata ti tsik, ta gwa, wele ŋgiɗ a sligiŋa, mìsle ŋgiɗ a pele a i bəɗ a ka, ndzer kaɗəŋ. 38Yàa slər kurum aà məpala dukw i gùvàh ana kurum kà fə̀tum tsiye. Gà mìsle ŋgiɗ na ta fət a, dite kurum ki ŋgeslwim a təv mifìte tar ata.»
39Ama ka, gà Samariya ana i kwite ata ya hinne, ta gəs Yesuw nda gəzləŋ tar, aɗaba ana məkəs ata a gwaɗa a tar: «A ɗemiŋ dukw ana iye i gewa akahər ata tserdze ya» ya. 40Aɗaba taŋa, i təv ana ti ndzeha a təv Yesuw a ka, ta hamar, dite ka, ma ndza i təv tar te. Yesuw a gəs bazlam tar ata kaɗəŋ. A ndza i təv tar ata mehinne sula. 41I huɗ mendze ŋgar ata ya ka, a tsik a tar bazlam Mbulum. Gà mìsle ŋgiɗ hinne, ta gəs ŋgat nda gəzləŋ asa, aɗaba dukw ana a tsik a tar a. 42Ta gwaɗa a məkəs ata: «Mì gəs ŋgat nda gəzləŋ ka, aɗaba dukw ana kà ɗama a mər a ɗekɗek tsa, aɗaba mər tekeɗe, maa tsaraka bazlam ŋgar, dite mì sər ndzer, ŋgat ka, mala məmbàlà à mburma kaɗəŋ.»
Yesuw a mbəl à kəla batsah mala megemir ŋgumna duwa
43Yesuw a ndza i fata mehinne sula ka, a mah ba i fataya, a de a aka ahəɗ Galile ana kwite ŋgar iɗəm a. 44Ama kə̀la ka, Yesuw nda gər ŋgar a gwa: «Ta gis a mala məma à guma Mbulum i kwite ŋgar tsa.» 45Tsaatsa, aləka a ndzeha a Galile ka, gà mburma ana ika ahəɗ ata ya, ta gəs ŋgat nda ahər sula lele, aɗaba tar tekeɗe, tàa da a *megirive Paska ata a Yeruzalem, dite tàa ŋgat a dukw ana Yesuw a ge akahər megirive ata ya mbaŋa.
46Aləka i dəba ŋa ya, Yesuw a mbəɗ riŋ gər a Kana ika ahəɗ Galile i fata, a təv ana a lah mege iɗəm dukw mene aà mburma, a ne à yam dukw makwàsà ŋa həmbasləslsla ya. I təv ana Yesuw a riŋ i fataya ka, batsah mala megemir ŋgumna duwa a riŋ, kəla ŋgar a riŋ ŋgwala tsa i dukw məməta, mahə̀nà ŋa i kwite Kafarnahum, bise nda təv ata. 47A tsaraka, Yesuw ana aka dara i Yuda ya aka ahəɗ Galile ya ka, a daha a təv ŋgar. A hamar, a gwaɗar: «Kamkam, da mbiliŋ à kəla gà duwa a riŋ à mìt a te.»
48Yesuw a gwaɗar aaka: «Ama kurum ka, ki giswim a iye tsa, say na kàa ŋgatum a gà dukw mene aà mburma ana i ge a ya dzekwiŋ.» 49Batsah mala megemir ŋgumna ata a gwaɗar aaka mbaŋa: «Əbay, ŋgulum tama tsara, mbàma aba, tsəka, kəla gà ata a ta mìtiŋa.» 50Yesuw a gwaɗar: «Da a ma, kəla yak a mbiliŋa.» Wele ata a gəs dukw ana a tsiker a tsara, a mah ba, a da a ma kaɗəŋ.
51I təv ana wele ata a de a a ma, aka ndze a ma zukw tsiye ka, gà ɓəzla megemir ŋgar ta ŋgəzlaraha gər aà vatwa. Tə daha, ta gwaɗar: «Kəla yak ka, aka mbəl.» 52A tsam aà tar, a gwaɗa a tar: «Dukuməŋa a ger ŋgulum dze ana, ndeɗime seyiŋ a?» Ta gwaɗar aaka: «A ger ŋgulum ka, ndavana ndaàwa nda ndzemde ilik ŋa.» 53I fataya ka, wetititittè a màra a gər a tsir kəla ata ya kuɗa, tits akahər ana Yesuw a gwaɗar ka, kəla yak a mbil a ya. I dəba ŋa ya gà wele ata nda gà mburma ana i ga i ma ŋgar a tserdze, ta gəs Yesuw nda gəzləŋ.
54Dukw ata a ge ba ka, i dəba na Yesuw a dara ika ahəɗ Yuda ya, a mbəɗ gər aka ahəɗ Galile ya. Taŋa na a ne dukw mene aà mburma ana masula ŋa a ge i fataya.
Currently Selected:
Yuhana 4: gnd
Označeno
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.