लूका 1
1
1अजी थियूफिलूस, बोळाजणा आपणै मांयनै बितेड़ी बातानै मांडबा की कोसिस करी। 2अ सगळी बाता आपानै बे पुगाई जखा आ सगळी बातानै सरूँ घटता देखी। अर जखा बचन को हेलो पाड़बाळा होया। 3इ बजेऊँ मनै लाग्यो क म बी थारै ताँई आ सगळी बातानै सूल मांडू। क्युं क म आ सगळी बातानै सरूआतऊँ सूल परखेड़ो हूँ। 4म चाऊँ, थे आ जाण सको क थानै सीखायड़ी बाता पुक्ता हीं।
यहून्ना बतिस्मो देबाळा का जलम क पेल्याऊँई घोसणा
5यहूदिआ का राजा हेरोद क दिना म याजक समाज का अबिया टोळी का कूणबा मऊँ एक जकरयाह नाम को याजक हो अर बिकी लूगाई इलिसीबा बी हारुण का कूणबा मऊँ ही। 6परमेसर की नजर्या म बे दोन्युई धरमी हा अर बे परबु का सगळा हुकमानै मानबा म खरा हा। 7बाकै कोई आस-ओलाद तो ही कोनी, क्युं क इलिसीबा बांझड़ी ही अर बे दोन्यु बूडा हा।
8एकर जद बो आपकी टोळी का सरा म परमेसर क सामै याजक को काम करर्यो हो। 9जणा याजका की रीत गेल परबु का मनदर म धूप जळाबा ताँई परची गेरी अर परची जकरयाह का नाम निकळी। 10धूप जळाबा क टेम सगळा मिनखा की टोळी भेळी होर बारनै अरदास कर'री ही। 11बि टेम का जकरयाहनै परबु का एक ईस्बर नगरी दुत को दरसाव होयो अर बो दुत धूप जळाबाळी बेदी का दाया नाकै खड़्यो हो 12बि दुतनै देखर जकरयाह धुजगो अर बिऊँ बो बोळो डरगो। 13पण ईस्बर नगरी दुत बिऊँ खयो, “जकरयाह डरै मना थारी अरदास सुणली अर थारी लूगाई इलिसीबा एक छोरानै जलम देसी जिको नाम तू यहून्ना राखजे। 14जिऊँ थे राजी होस्यो अर सागै क सागैई बिकै होबाऊँ ओर बी बोळाजणा राजी होसी, 15परमेसर की नजर्या म बो म्हान होसी अर बो अँगूरी अर नसिली चिजा कदैई कोनी पिसी, अर बो आपकी माँ का पेटऊँई पबितर आत्माऊँ भरेड़ो होसी। 16बो ह जखो इजरायल का घणकराक मिनखानै बाका परबु परमेसर क कनै फेर ल्यासी 17बो एलिआ जंय्यां की सक्ति अर आत्मा म परबु क आगै-आगै चालसी। बो बापा को मन बाका टाबरा कानि मोड़ देसी अर खयो नइ करबाळानै धारमिक्ता की बुदी कानि लेज्यासी अर मिनखानै परबु ताँई त्यार करसी।”
18जणा जकरयाह ह जखो बि ईस्बर नगरी दुतऊँ खयो, “आ बात म कंय्यां मानू? क्युं क म तो बूडो-ठेरो हूँ अर मेरी लूगाई बी बूडी-ठेरी होगी।” 19जणा बो ईस्बर नगरी दुत हो जखो बिऊँ बोल्यो, “म हूँ जिबराइल जखो परमेसर क सामै तण्यो खड़्यो रेह्ऊँ हूँ। अर मनै ईस्बर तनै इ चोखा समचार को हेलो पाड़बा ताँई भेज्यो हो। 20देख तू ह जखो मेरी बातानै साची तो मानी कोनी मेरा बोलेड़ा बचन तो आपका टेम म पूरा होसीई पण मेरी बाता प बिस्वास कोनी करबा की बजेऊँ आ बाता का घटबाळा दिन ताँई तू गुँगो रेह्सी।” 21बठिनै मिनख हा जखा मनदर क बारनै जकरयाहनै उडिकर्या हा अर बा सगळा क ताजूब होर्यो क बिनै अत्तो टेम कंय्यां लागगो 22अर जद बो बारनै आर बाऊँ बोल कोनी सक्यो जणा बे जाणग्या, हो ना हो , ओ मनदर म कोई दरसाव देख्यो ह। बो गुँगो होगो अर इसाराऊँ बात करतो। 23जद मनदर म बिका सेवा का दिन पूरा होगा जणा बो आपकै घरा चलेगो।
24क्युंक दिना पाछै बिकी घरहाळी ही जखी आसऊँ होई। अर पाच म्हेना ताँई घराऊँ बारनैई कोनी निकळी। 25अर अंय्यां बोलरी ही, “मिनखा म मेरी ईज्जत राखबा ताँई, परबु आ दिना म मेर प म्हेर करी ह।”
ईसु का जलम की घोसणा
26-27 #
मत्त 1:18
जद जकरयाह की घरहाळीनै छठो म्हेनो लागर्यो हो। जणा परमेसर जिबराइल ईस्बर नगरी दुतनै गलिल देस का नासरत नगर म एक मरीयम नाम की छोरी क कनै भेज्यो। बा हाल कुंआरी ही। बिकी सगाई दाऊद क कूणबा का युसूफ नाम का एक मिनखऊँ होईड़ी ही। 28ईस्बर नगरी दुत बिकन आर बोल्यो, “राजी रेह, थार प परबु की म्हेर होई ह अर बे थारै सागै ह।” 29आ बचनाऊँ बा घबरागी अर बा सोचबा लागी अंय्यां बोलबा को इको काँई मतबल ह। 30जणा ईस्बर नगरी दुत बिऊँ खयो, “मरीयम डरै मना परमेसर की दया तेरै प होरी ह। 31#मत्त 1:21सुण तू आसऊँ होसी अर एक छोरो जणसी अर तू बिनै ईसु खेर बुलासी। 32बो म्हान होसी अर बो परम-परधान को बेटो खुवासी, परबु परमेसर बानै बडका दाऊद की गद्दि प बिठासी 33अर बो याकूब का कूणबा प सदाई राज करसी, अर बिको राज कदैई कोनी मिटसी।” 34जणा मरीयम ईस्बर नगरी दुतऊँ बोली, “ओ कंय्यां हो सकै ह? हाल तो म कुंआरी हूँ।” 35ईस्बर नगरी दुत खयो, “पबितर आत्मा तेरै प उतरसी अर परम-परधान की सक्ति तनै आपकी ओट म ले लेसी, इ बजेऊँ बो पबितर टाबर परमेसर को बेटो खुवासी, 36सुण तेरी रिस्तेदार इलिसीबानै सगळा बांझड़ी-बांझड़ी बोलता हा, अर आज बा बूडापा म आसऊँ ह अर बिनै ओ छठो म्हेनो लागर्यो ह। 37क्युं क परमेसर ताँई क्युंई अणहोतो कोनी।” 38अर मरीयम बोली, “म परबु की दासी हूँ, थारै खया गेल मेरै सागै होवै।” अर ईस्बर नगरी दुत बिकनऊँ चलेगो।
इलिसीबा क घरा मरीयम को जाबो
39क्युंक दिना पाछै मरीयम त्यार होर बेगीसी यहूदिआ का पहाड़ी इलाका की एक नगरी म चलगी। 40अर जकरयाह क घरा जार बिकाळी लूगाई इलिसीबाऊँ नमस्कार करी। 41जद इलिसीबा क काना म मरीयम को नमस्कार पड़्यो जणा इलिसीबा का पेट को टाबरियो उछळबा लाग्यो अर इलिसीबा पबितर आत्माऊँ भरगी। 42अर जोरऊँ बोली, “तू धरती की सगळी लूगाया म भागहाळी ह अर तेरै पेट को टाबर बी भागहाळो ह। 43मेरो अत्तो बडो भाग? क मेरै परबु की माँ मेरै कनै आई। 44क्युं क थारी उवाज म्हारै काना म पड़ताई म्हारै पेट को टाबरियो राजी होर उछळबा लागगो 45तू भागहाळी ह क्युं क तू परमेसर की खेईड़ी बात प बिस्वास करी क बे पूरी होसी।”
मरीयम का मुंडाऊँ परमेसर को भजन
46जणा मरीयम बोली, “मेरो पिराण परबु की बडाई करै ह। 47अर मेरी आत्मा मनै बचाबाळा परमेसर म राजी ह। 48क्युं क बो आपकी इ गरीबणी दासीनै याद कर्यो ह, अर इ मानऊँ राजी कर्यो ह, क इबऊँ लेर जुग-जुग का मिनख मनै भागहाळी खेसी, 49अत्तो बडो काम सऊँ सक्तिसाली परमेसर मेरै सागै कर्यो ह, इ बजेऊँ बिको नाम पबितर ह। 50अर बिनै मान देबाळा प बाकी दया बाकी पिड्या ताँई रेह्वै ह। 51बो आपका हाताऊँ बडा-बडा काम कर बानै जखा आपका मन म गुमान करता हा निचो दिखायो। 52बे राज करबाळानै गद्दिऊँ तळै पटक्यो अर बोदानै उचो उठायो। 53बो भूखानै चोखी-चोखी चिजाऊँ भर्यापूरा अर धायानै रिता फांका भेज दिओ। 54-55बानै बे बाता याद ही जखी बो आपणा बडका अब्राहम अर बिकी पिडीऊँ करी ही, क म अब्राहम अर बिकी पिडी प सदाई दया करस्युं। अर बे आपका कह्या गेल आपका दास इजरायलनै याद राखर मदद करी।” 56मरीयम करीब तीन म्हेना इलिसीबा क कनै रेह्र पाछी आपकै घरा आगी।
बतिस्मो देबाळा यहून्ना को जलम
57जद इलिसीबा क जापा की घड़ी आई अर बा एक छोरानै जलमी। 58परमेसर बिपै दया दिखाई ह, इ बात को समचार बिका रिस्तेदारानै अर जाणकारानै लाग्यो जणा बे सगळा बिकै सागै खूब राजी होया। 59इकै पाछै आठवा दिन बे सगळा मिनख बि छोरा को नाम काडबा अर बिकी सुन्नत करबा ताँई भेळा होया। बे बिको नाम बिकाळा बापू क नाम प जकरयाह काडबो चावै हा। 60पण बिकाळी माँ बोलपड़ी, “नइ इको नाम तो यहून्ना काडणो ह।” 61जणा बे सगळा बिऊँ बोल्या, “तेरा कूणबा म इ नाम को कोई कोनी।” 62अर इकै पाछै बे बिकाळा बापूनै इसारो कर्यो क इको नाम काँई होणो चाए। 63जणा जकरयाह हो जखो पटी मंगार बिपै बिको नाम यहून्ना मांड दिओ आ देख बे सगळा ताजूब म पड़गा। 64अंय्यां करताई बिकी जीब की आटी खुलगी अर बो परमेसर को गुणगान करबा लाग्यो। 65आ बाता क बजेऊँ आस-पास का रेह्बाळा डरग्या अर आ बाता की चरचा यहूदिआ का पहाड़ी इलाका म च्यारूमेर फेलगी। 66अर जत्ता बी बठै हा बाकै रेह-रेह ओई बिचार होवै हो क, “ओ टाबरियो ह जखो काँई बणसी?” इको कारण ओ ह क इकै सीर प परबु को हात ह।
जकरयाह को भजन
67बिको बाप जकरयाह पबितर आत्माऊँ भरगो अर बो परमेसर कानिऊँ खेबा लागगो, 68“इजरायल का परबु परमेसर की जे हो क बे आपका मिनखा प निगा करी अर बानै छुटायो। 69बे आपका भगत दाऊद का कूणबा मऊँ आपणा ताँई एक पराकरमी छुटकारो करबाळो खड़्यो कर्यो, 70जंय्यां क बे बोळी पेल्याई परमेसर की खेबाळा पबितर मिनखा का मुंडाऊँ खुवा दिआ हा, 71बे म्हानै म्हारा दुस्मनाऊँ अर म्हारूँ नफरत राखबाळा की सक्तिऊँ बचासी। 72बे आपका पबितर करारनै ध्यान म राख्यो ह क बो आपणा बडका प दया करसी। 73आ सोगन बो आपणा बडका अब्राहमऊँ खाई, 74क पक्काई म्हारो छुटकारो म्हारा दुस्मनाऊँ होसी। अर परबु की सेवा करबा ताँई म्हानै कोई डर नइ होवै, 75अर सगळी उमर आपा रोजकी बिकै सामै पबितर अर धरमी रेह्वां। 76ओ मेरा छोरा यहून्ना तू परम-परधान परमेसर की खेबाळो खुवासी। क्युं क तू परबु को गेलो त्यार करबा ताँई बिकै आगै-आगै चालसी, 77अर बानै सीखासी क थारा पाप की माफी मिलबा की बजेऊँ थे बचाया जास्यो। 78अर आपणा परमेसर की बडी दयाऊँ आपणा प छुटकारो देबाळो एक उगता सूरज का च्यानणा की जंय्यां ईस्बर नगरीऊँ चिलकसी। 79जिऊँ बो च्यानणो मोत की छाया म सोबाळा अर अँधकार म जिबाळा प चमकसी अर आपानै स्यांती म लेज्यासी।” 80अंय्यां बो टाबरियो होळ्या-होळ्या सागेड़ो मोट्यार होगो अर आत्मा म बी बढगो, अर इजरायली लोगा क सामै आबा क दिन ताँई बो उजाड़ मई रिह्यो।
Currently Selected:
लूका 1: एस डब्लु वी
Označeno
Deli
Kopiraj

Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved