Lubaakico N̰amaakeetee Iisa Masi 18
18
Pol kataa geegar ka Korente
1Maa ga keeke ƴiiliɗe, gaa Pol waciɗe min geegar ka Aten, gaa kaatiɗe geegar ka Korente. 2Iŋaa pa, ga waagiki Yawudince kaƴi aɗe maa gu semeetee goo Akilas, gata pa wiyenta kiɗa ta Ponte. Gaa asawɗe ka iŋaa ma daatti tee Pirisil ma ay min kiɗa ta Itali, asan ga tattuwe ka tatta ka Rooma kee Kilod cimme beneyyi gaa gu cimmiy Yawudigee paracco min geegar ka Rooma. Gaa Pol deeɗiy gassa. 3Mileŋ ga lubbiti wagee ma kanco pa, ga nunte ma guta. Guu panaɗɗo tukki ku liyaawi bazzigeyyo. 4Gaa kulla sabit aɗe, meene ta nambiti, ga Pol melewɗo ma Yawudigee o ma Gireknigee aatti girco Yawudigeyyo ka giraaniti ku maa gu amanniɗo kadar ga beneyti Mellayi ay seene.
5Maa ga Silas ma giiti Timote asiɗe min kiɗa ka Maseduwan, ga Pol cappiyyee oko lubbiti, gaa leeɗe pe ka beneyti Mellayi ka. Gaa beneyɗiyo oko Yawudigeyyo kadar ga Iisa ay Masi, gata maa ga Mella aparre. 6Guu Yawudigee pa poociyya beneyti kaaka, guu n̰iliyya. Ay ɗakko appe ga Pol gezerziriyya buruntulle ka kaɗiŋgeetee, gaa beneyyiyyoo gaa: «Kuu masile ay kuŋ melleeco. Naa ɗakko ɗa payya, kayaatu ceereŋ, min meente na kataa pe oko giimi ma ay Yawudigee ɗa.»
7Gaa min iŋaa ga Pol oomiɗe, gaa kaatiɗe girti Titiyus Yustus ma ay Yawudince ɗa, innasoopa ga bakammiya kee ka Mellayi. Girti pa aaye saripti girco Yawudigeyyo ka giraaniti. 8Gaa Kirispus ma ay tattuwe ka girco Yawudigeyyo ka giraaniti duwicca galbanti oko Miltine kee Iisa ma gimtee paracco ku giiri. Guu giimi maani ku geegar ka Korente duwɗiy kulla galbigeeco oko Iisa Masi maa gu giyyiyya beneyti Pol kaaka, guu batisiyɗiy.
9Gaa meene kaƴi ma aandoŋ, ga Miltine kee Iisa asiyyee beneyya ma waano oko Pol gaa: «Addo ɓaya ɗa! Tasawwayooga diiman beneytu. Addo ƴaapa ɗa, 10asan na aaye ma kiita. Lekka ɗa gimu ma gederra ga eesiɗum asan ga aatti geegar keeke pa na lekka giimi maani ma ay kunni.» 11Gaa Pol nuntiɗe ƴila o koyyee bizgiƴi aatti geegar ka Korente. Gaa tasawɗiya beneyti Mellayi oko giimo.
Pol ma guberner Galiyon
12Oko wikinne kaaka pa, ga Galiyon ay guberner ka Akaay maa gi hakuuma ta Rooma n̰akamme. Guu Yawudigee boodiɗe ku maa gu baamiyya Pol. Guu kaatikkiki unco giimi ma caɗaa parlane. 13Guu beneyyiyyoo goo: «Gimu keeke rebellay giimi gu aabaɗɗo Mella, aabido ma sawa ɗa aleŋ ta hukumnigeyyo.» 14Pol ƴa gaa ga beneyyiɗo, gaa Galiyon pa ommiyyee gaa: «Kuŋ Yawudigee, gaa gimu keeke leewitoŋ gaari ku suura e baŋ gi dimmane, na ocokka aɗe na giyyittoŋ. 15A mileŋ ga ma gaari ku meleewo ma gaari ku giraaniti, o ma gaari ku semeyyo o ku hukumnigeetoŋ, ga ay kuŋ melleeco pe ma gakammay gaartoŋ. Naa caɗaa ɗa parlane oko garrarri aleŋ kooko!» 16Gaa Galiyon pa pittiɗiy min were ka caaɗiti parlanti. 17Guu giimi baamiyya Sositen ma ay tattuwe ka ger ka giraaniti ka Yawudigeyyo, guu zondiriyya unco giimi ma caɗaa parlane. Galiyon soopa ƴaape kanti.
Pol yokaa geegar ka Antiyos
18Gaa Pol nuntiɗe ga dummiɗe geegar ka Korente, gaa cappiyyoo oko seneeta ma dowwiy galbigeeco oko Iisa. Gaa kalpiɗe markaba ma ini Pirisil o Akilas, guu kaatiɗe kiɗa ta Sirii. Omma maa ga alɗe kalappa ɗa missa pa, ga Pol surɗica ƴa omma kayaati geegar ka Saŋkerees asan ga halpayye unti Mellayi. 19Guu sarɗe geegar ka Epez. Iŋaa pa, ga Pol deyyo cappa oko Akilas o Pirisil. Gata pa kaate girco Yawudigeyyo ka giraaniti. Gaa deeɗe meela ma Yawudigee. 20Guu Yawudigee kotti pa leeɗiyee goo ga nuntu missa ma guta. Gaa Pol pa poociɗe. 21Maa ga katawɗo pa, ga beneyyiyoo gaa: «Na akkitoŋ yooka ka pe ma meene gaa Mella oyye.»
Gaa kalpiɗe markaba ga ƴiiliɗe min Epez. 22Maa ga Pol sarɗe geegar ka Sezaree, gaa ƴiiliɗe ƴa omma geegar ka Zerizalem salammico giimi ma temekke saananti Iisa Masi. Gaa min iŋaa ga yookiɗe geegar ka Antiyos. 23Gaa iŋaa Antiyos ga nambiɗe wikinne paalta gaa ƴiiliɗe. Gaa tapaɗɗo kiɗaayee ku Galasi o ku Pirizi. Gaa kulla were aɗe maa ga sarɗe, ga beneyyayo beneyyiŋgee oko giimi ma jobokkaa ka Iisa Masi ku maa gu baamicca amannico talta.
Apolos kataa geegar ka Epez o ka Korente
24Gaa lekkiɗo Yawudince kaƴi aɗe maa gu weewiya Alekzandiri ma ase geegar ka Epez. Semeetee pa goo Apolos. Gata pa ibina beneyyi samaane, o ga ibinya samaane beneyti Kitamniti Mellayi. 25Gata gu ɓeleddiya samaane ma gaari ku butulti Miltine kee Iisa. Gaa tasawɗiy ma galbanti paratti o ga garaayoogu saa caraŋ gaartee Iisa. Maa ga ibina soopa ay batisiyti Yaaya. 26Gaa Apolos diiliɗe ga beneyɗiyo ma galbanti kaƴi ka bala ɓayaw aatti girco Yawudigeyyo ka giraaniti. Maa gi Pirisil ma Akilas giyyiyya, guu jooriyya girco gu gaariyeegu payya ta ƴiila gaari ku butulti Mellayi.
27Gaa Apolos aŋkiɗe turguwe ta kiɗa ta Akaay. Gii deeɗiyo daanayo oko seneeto, guu kitipiyyoo maktup oko giimi ma jobokkaa ka Iisa Masi koo ku kiɗa ta Akaay goo gu joobiya samaane. Maa ga sarɗe pa kiɗa ta Akaay, gaa awiyiyyoo ta tirta oko giimi ma dowwiy galbigeeco oko Iisa Masi ma gidaanuwti Mellayi. 28Gaa ma beneyti ka dandal kaaka, ga gaariyyoo unco giimo oko Yawudigeyyo kadar gu gaarco burta. Gaa gemeɗɗiyo ma beneyyi ka Kitamniti Mellayi kadar ga Iisa ay Masi, gata maa ga Mella aparre.
Currently Selected:
Lubaakico N̰amaakeetee Iisa Masi 18: mmy
Označeno
Deli
Kopiraj
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.