Naanearü ügüchiga 30
30
1Rü yexguma Raqué nüxü̃ icua̱xãchigu nax tama Acóbuaxü̃́ naxãxacüxü̃, rü iyaxãũxãchi naxca̱x nax ngĩeya̱x ga Léaxicatama ãxacüxü̃. Rü yemaca̱x ngĩtexü̃ ngĩgürügü: —Ngẽxguma taxũtáma cuxü̃́ chaxãxacügu rü tá chayu —ngĩgürügü.
2Natürü nüma ga Acóbu rü ngĩmaxã nanuama rü ngĩxü̃ ñanagürü: —¿Ẽ̱xna cuxca̱x rü Tupana chixĩ i chomax? Rü nüma nixĩ i tama cuxü̃ naxãxãcüxẽẽxü̃ —ñanagürü.
3Rü yexguma ga ngĩma rü nüxü̃ ngĩgürügü: —Dücax, ¡rü ngĩmaxã namaxü̃ i ngẽma chauxü̃taxü̃ i Birá! Rü ngẽxguma naxãxacügu i ngĩma rü ñoma choma chaxãxacüxü̃rüxü̃ tátama nixĩ. Rü ngẽmaãcü tá chaxãne —ngĩgürügü.
4-5Rü yemaacü ga Raqué rü Acóbuna ngĩxü̃ imu ga yema ngĩxü̃taxü̃ ga Birá nax ngĩmaxã namaxü̃xü̃ca̱x. Rü nüma ga Acóbu rü ngĩmaxã namaxü̃ rü nüxü̃́ ixãxacü ga ngĩmax.
6Rü yexguma ga Raqué rü ngĩgürügü: —Ñaa buxü̃ rü Dáü̃ tá nixĩ i naéga, erü Tupana rü nüxü̃ naxĩnü i chorü yumüxẽ rü mexü̃ chomaxã naxü nax wüxi i chaune choxna namuxü̃ —ngĩgürügü.
7-8Rü yemawena ga Birá rü wenaxarü Acóbuaxü̃́ ixãxacü. Rü ngĩma ga Raqué rü ngĩgürügü: —Ñaa buxü̃ rü Netarí tá nixĩ i naéga, yerü chaueya̱xmaxã togü tadai, natürü ngĩxü̃ charüporamae —ngĩgürügü.
9Rü yexguma Léa nüxü̃ icua̱xãchigu nax tama wena naxãxacüxü̃, rü Acóbuna ngĩxü̃ imu ga ngĩxü̃taxü̃ ga Chipá nax ngĩmaxã namaxü̃xü̃ca̱x.
10-11Rü yexguma Acóbuaxü̃́ naxãxacügu ga Chipá, rü ngĩgürügü ga Léa: —Tupana choxü̃ narüngü̃xẽxẽ, rü ngẽmaca̱x i ngẽma buxü̃ rü Gáx tá nixĩ i naéga —ngĩgürügü.
12-13Rü yemawena ga Chipá rü wena Acóbuaxü̃́ ixãxacü. Rü yexguma ga Léa rü ngĩgürügü: —Chataãẽxü̃chi. Rü ngẽmaca̱x i ñu̱xma i ngẽma togü i ngexü̃gü rü “itaãẽxü̃chi”, ñanagürügü tá choxü̃. Rü ngẽmaca̱x i ngẽma buxü̃ rü Aché tá nixĩ i naéga —ngĩgürügü.
14Rü wüxi ga ngunexü̃gu ga Rubéü̃ rü naanewa naxũ ga yexguma tríguarü buxgügu. Rü yexma nüxü̃ nayangau ga wüxi ga ori̱x ga mandrágura ga naéga. Rü yema rü naé ga Léaca̱x inayana. Rü yexguma Raqué nüxü̃ da̱u̱xgu ga yema ori̱xgü rü Léaxü̃ ngĩgürügü: —¡Chomaxã nangau i ngẽma mandráguragü i cune cuxca̱x ngéma ne naxü̃! —ngĩgürügü.
15Natürü ga Léa rü ngĩxü̃ ingãxü̃ rü ngĩgürügü: —¿Tama ẽ̱xna cutaãxẽ nax choxna cuyapuxü̃ ya yimá chaute? Rü ñu̱xma rü naétü choxna cunapuxü̃chaü̃ ta i ngẽma chaunearü maü̃dráguragü —ngĩgürügü.
16Rü yema yáuanexü̃gu ga yexguma naanewa ne naxũxgux ga Acóbu rü naxca̱x iyaña ga Léa, rü nüxü̃ ngĩgürügü: —Ñaa chütaxü̃ rü choxü̃ tá cuca erü ngẽma chaunearü maü̃dráguragümaxã marü cuxü̃ chaxütanü —ngĩgürügü. Rü yema chütaxü̃gu ga Acóbu rü Léaxü̃ naca.
17Rü ngĩma ga Léa rü Acóbuaxü̃́ ixãxacü. Rü gumamaxã rü 5 nixĩ ga Acóbu nane, yerü Tupana nüxü̃ naxĩnü ga yema Léaarü yumüxẽ.
18Rü yexguma ga Léa rü ngĩgürügü: —Daa bucü rü Ichacá tá nixĩ i naéga erü Tupana rü choxü̃́ nanaxütanü naxca̱x nax chautena ngĩxü̃ chamuxü̃ i chauxü̃taxü̃ —ngĩgürügü.
19-20Rü yemawena ga Léa rü wenaxarü Acóbuaxü̃́ ixãxacü. Rü gumámaxã rü 6 nixĩ ga ngĩne. Rü yexguma rü ngĩgürügü: —Tupana rü wüxi i mexü̃ i ãmare choxna naxã. Rü ñu̱xma ya yimá chaute rü yexera tá choxü̃ nangechaü̃ erü marü 6 ya nanegü nüxü̃́ changexmaxẽxẽ. Rü ngẽmaca̱x ya daa bucü rü Chaburóü̃gu tá naxãéga —ngĩgürügü.
21Rü yema ngĩwa iyacua̱xcü ga ngĩxacü ga Léa rü inge, rü Dínagu ngĩxü̃ ixüéga.
22Natürü ga Tupana rü ngĩxna nacua̱xãchi ga Raqué, rü nüxü̃ naxĩnü ga ngĩrü yumüxẽ. Rü yemaca̱x ngĩxü̃ naxãxacüxẽxẽ.
23-24Rü yexguma naxãxacügu namaxã ga gumá nüxíraü̃cü ga ngĩne rü ngĩgürügü: —Tupana rü marü choxna nanayaxu ga nax changexacüxü̃ rü naxcha̱xwa chaxãnexü̃. Rü chierüna choxü̃́ nangẽxmagu ya nai ya chaune —ngĩgürügü. Rü yemaca̱x Yúchegu inaxüéga.
Guxchaxü̃gü nügümaxã naxüe ga Acóbu rü Labáü̃
25Rü yexguma Raqué Yúchexü̃ naxíraxẽẽguwena, rü nüma ga Acóbu rü Labáü̃xü̃ ñanagürü: —¡Choxü̃ inge̱x nax wena chauchixü̃aneca̱x chataeguxü̃ca̱x!
26Rü ngẽmaca̱x chanaxwa̱xe i choxna cunamugü i chaunegü rü cho̱xma̱xgü, yerü yemagüca̱x nixĩ ga cuxü̃tawa chapuracüxü̃. Rü cuma rü meama nüxü̃ cucua̱x nax ñuxãcü mea chayanguxẽẽxü̃ ga yema puracü ga cuxü̃́ chaxüxü̃ —ñanagürü.
27Natürü nüma ga Labáü̃ rü nanangãxü̃ rü ñanagürü: —¿Taxũchima cuxü̃́ namexü̃ nax nua chauxü̃tawa cungexmaxü̃? Erü meama nüxü̃ chacua̱x nax cugagu yixĩxü̃ i Cori ya Tupana poraãcü choxü̃ rüngü̃xẽẽxü̃.
28¡Rü chomaxã nüxü̃ ixu i ñuxregu nixĩ i cunaxwa̱xexü̃ nax cuxü̃́ chanaxütanüxü̃! Rü ngẽma cuma naxca̱x ícuca̱xaxü̃ẽ̱xpü̱x tá nixĩ i cuxü̃́ chanaxütanüxü̃ —ñanagürü.
29Rü yexguma ga Acóbu rü nanangãxü̃, rü ñanagürü nüxü̃: —Cuma rü meama nüxü̃ cucua̱x nax ñuxãcü poraãcü cuxü̃́ chapuracüxü̃ rü meama cuxü̃́ nüxna chadauxü̃ ga cuxü̃nagü.
30Rü yema noxretama ga cuxü̃nagü ga cuxü̃́ yexmaxü̃ ga yexguma noxri nua changuxgux, rü ñu̱xma rü poraãcüxüchima cuxü̃́ nimu. Yerü yexguma noxri nua changuxgucürüwa nixĩ ga Tupana ga poraãcü cuxü̃ nangü̃xẽẽxü̃. ¿Natürü ñuxgu tá nixĩ i chauxacügüca̱xicatama chapuracüxü̃? —ñanagürü.
31Rü yexguma ga Labáü̃ rü nüxna nicachigüama rü ñanagürü: —¿Ñuxre nixĩ i cunaxwa̱xexü̃ nax cuxü̃́ chanaxütanüxü̃? —ñanagürü. Rü yexguma ga Acóbu rü nanangãxü̃, rü ñanagürü: —Tama chanaxwa̱xe i choxü̃́ cunaxütanü. Rü choma rü wena tá nüxna chadau i cuxü̃nagü ega curü me yixĩxgu i ñaa tá cumaxã nüxü̃ chixuxü̃.
32¡Rü choxü̃ imucuchi natanügu i cuxü̃nagü nax chayadexechixü̃ca̱x i guxü̃ma i ngẽma carnéruxacügü i wẽxẽxü̃, rü guxü̃ma i cabraxacügü i ãmatüxü̃ rü murutagüxü̃! Rü ngẽmamaxã tá nixĩ i choxü̃́ cunaxütanüxü̃.
33Rü ngẽmaãcü ega yixcüra chauxü̃tawa ícuyada̱u̱xgu i ngẽma choxü̃́ ngẽxmaxü̃ rü nüxü̃ icuyangauxgu i carnéru i cómüxü̃, rüe̱xna cabra i tama ãmatüxü̃, rü ngẽmawa tá nüxü̃ cucua̱x nax cuxü̃́ changĩ́xü̃ —ñanagürü.
34Rü Labáü̃ nanangãxü̃ rü ñanagürü: —Marü name nixĩ i ngẽma nüxü̃ quixuxü̃ —ñanagürü.
35Natürü yematama ngunexü̃gu ga Labáü̃ rü noxrüguama nanamugü ga yema chíbugü ga rütoxechapa̱xagüxü̃, rü yema ixãmatüchapa̱xagüxü̃, rü yema ixãmatüxü̃, rü ñu̱xũchi ga yema cabragü ga rütoxechapa̱xagüxü̃, rü yema ixãmatüchapa̱xagüxü̃ rü ta noxrüguama nanamugü. Rü yema carnérugü ga iwaxüxü̃ rü ta noxrüguama nanamugü. Rü ñu̱xũchi nanegüna nanamugü nax nüxna nadaugüxü̃ca̱x.
36Rü ñu̱xũchi yema Acóbu íyexmaxü̃arü tóxnamana nanagagü ga 3 ga ngunexü̃ naxca̱x ixũxü̃wa. Natürü nüma ga Acóbu rü yema togü ga Labáü̃arü carnérugüna ínadauama.
37-39Natürü ga nüma ga Acóbu rü nanetü ga áramochacüxü ga doxüxü̃, rü arméü̃drochacüxü, rü castañachacüxü ta nidae. Rü ñu̱xũchi nanagáuxtecha̱xmüxü̃gü nax nacótemena̱xãgüxü̃ca̱x rü nawẽ̱xtemena̱xãgüxü̃ca̱x. Rü yemawena ga yema naixchacüxügü ga marü rügáutecha̱xmüxü̃güxü̃, rü yema carnérugü dexáwa ixaxegüxü̃gu nayanu. Rü yexma nixĩ ga yema iyatüxü̃ ga ngexegüxü̃ yaxüxacügüxü̃. Rü yemaca̱x nixĩ ga yexguma tixíraxacügügu rü tixãmatüchapa̱xagüxü̃ yerü yema naixchacüxü ga rügáutecha̱xmüxü̃güxü̃pe̱xegügu tüxü̃ nixüxacügü.
40Rü yemaacü ga Acóbu rü noxrüguama tüxü̃ namugü ga guxema ingexe ga naxü̃nagü. Rü Labáü̃arü yatüxü̃ ga rütoxechapa̱xagüxü̃ rü iwaxü̃pe̱xegu tüxü̃ namugü. Rü yemaacü ga Acóbu rü nüxü̃́ nayexma ga noxrütama ga naxü̃nagü ga Labáü̃arü ixĩgüxü̃arü tóxnaguama mugüxü̃.
41-42Rü yexguma nügü naxüxacügügu ga yema naxü̃nagü ga ingüexüchixü̃ nax naxãxacügüxü̃ca̱x rü Acóbu rü yema nachica ga nawa yaxaxegüxü̃gu nananu ga yema naixmena̱xãgü nax yemaacü nüxü̃ nadaugüxü̃ca̱x ga yexguma nügü naxüxacügügu. Natürü yexguma yema naxü̃nagü ga ixaexüchixü̃ yéma ĩxgu nax naxaxegüxü̃ca̱x rü tama yexma nananu ga yema naixmena̱xãgü. Rü yemaca̱x ga yema naxü̃nagü ga ixaexü̃ rü Labáü̃arü nixĩgü, rü yema ingüexüchixü̃ rü Acóbuarügü nixĩgü.
43Rü yemaacü ga Acóbu rü nimuarü yemaxü̃ã̱x. Rü nimu ga norü carnérugü rü caméyugü rü búrugü rü norü duü̃xü̃gü ga nüxü̃́ puracüexü̃ ga yatüxü̃ rü ngexü̃.
Currently Selected:
Naanearü ügüchiga 30: tcaP
Označeno
Deli
Kopiraj
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.