Tekang Kbuten 25
25
Bud kyehen Abraham
1Bè yóm deng katay Sara, bud myehen Abraham. Yó boluy yóm libun bud yehenen, Kitura. 2Wen ngà le, yó boluy le, Simran ne Juksan ne Midan ne Midyan ne Isbok ne Suwa. 3Mngà logi Juksan duhen le Siba lewu le Didan. Yóm kun ból Didan duhen yó kem tau Asurayt ne kem tau Litusayt ne kem tau Liyumayt. 4Yóm kun ngà logi Midyan duhen Ifa ne Éfér ne Hanuk ne Abida ne Ilda. Yó kem tau yó, hono sfu Abraham bè yehenen Kitura.
5Yóm kdê kendengen Abraham gotu tebelen lu bè Isak, yóm ngaen bè Sara. 6Okóm bè yóm tolo klowilen, wen se blayen bè yó kem dumu ngaen bè yó kem dumu yehenen boluy le Hagar ne Kitura. Yó kem ngaen bè Kitura, fen hbenwuhen lu bè yóm benwu fi dmata kdaw, hlayuken lu bè yóm ngaen Isak.
Katay Abraham ne yóm kebeng le du
7,8Deng tey gsengel ne ktuha Abraham bè yóm katayen. Yó kegenen tau, botong lematu bud hitu folò limu halayen. 9Bè yóm katayen, lebeng Isak lewu le Ismaél bè kilib Makpila, bè yóm tonok fi dmata kdaw yóm benwu Mamri, yóm tonok tehe nfun Ifron ngà Suhar, yóm tau Hitayt. 10Yóm tonok ni, deng tehe eles benli Abraham bè yó kem tau Hitayt. Bè yóm kilib yó gónó le lembeng ke Abraham ne tuha libunen Sara. 11Kogol yóm katay Abraham, tey któbóng Dwata ke Isak ne bè yó gónó Isak nô moni bè yóm kokol boluy le du, “Kokol yóm Dwata mowil yóm mton dou.”
Kun ból Ismaél
12Ni se yóm tutul yó kem semfu gu bè Ismaél yóm ngà Abraham bè Hagar, yóm libun hesek Sara lemwót bè Idyip. 13Yó boluy le lenwóten bè yóm hol twogu, Nibayot ne Kidar ne Adbil ne Mibsam 14ne Misma ne Duma ne Masa 15ne Hadad ne Tima ne Jitur ne Nafis ne Kedima. 16Ni kem ngà Ismaél ni, wen sfolò lewu but tau semfu gu bélê le ne là kóen lana boluy le abay se ket benwu gónó le nô ne gónó le gel kmamfù sal boluy le du yóm kul boluy. 17Yó kegen Ismaél tau, lematu bud tlu folò hitu halayen, ominen matay. 18Yó gónó le gel nô kul yó kem kun ból Ismaél, nô le bè blóng yóm benwu Habila ne Sur, bè yóm benwu fi dmata kdaw Idyip bè yóm lan mógów ebè Asirya. Htólóng le bè yó kem dumu ból Abraham.
Ksut Iso ne Jakub
19Ni se yóm tutul yó kem semfu gu bè Isak yóm ngà Abraham. 20Deng fat folò ne halay Isak bè yóm kyehenen ke Ribika yóm ngà Bituél libun. Yóm Bituél tau Aramiyan lemwót bè Misuputamya. Yóm Ribika twoli Laban. 21Lemwót bè yóm là kngà Ribika, yó gónó Isak mni béléen bè Dwata. Ne bnalà Dwata se yóm hni Isak yó, ne mlutut Ribika. 22Lewu yóm bnututen ne gu laan le là deng sut tey sidek alì gel kekdol le lómón ke deng sónmò le sfatay ditu lem blututen. Yó hendem Ribika, “Moen ke lómón ni yóm bnututu?” Yó gónón tódô lemwót snólóken Dwata.
23Yó mon Dwata mò du, “Yóm bnututem yó, lewu le.
Angat wen lewu but benwu tendo sfohon semfu gu bélê le.
Kemgis yóm sotuhen, fen là yóm sotuhen.
Yóm twogu angat baling tóbóng lówó yóm twoli.”
24Na a kól yóm kdawen sut yóm bnutut Ribika, lewu le bede hono logi. 25Yóm ngà gna sut, mló hulô ne yóm kuliten hol lómón yóm nes nbul. Ne yó gónó le moluy du Iso.#25:25 Yó lanen bè udél Hibru yóm boluy Iso, “nbul.”Ne yóm ngà huli sut, yó nmoen bè yóm ksuten hen-get nogoten teked yóm ngà gna sut. Ne yó gónó le moluy du Jakub. 26Ne yóm ngà huli sut, yó nmoen bè yóm ksuten hen-get nogoten teked yóm ngà gna sut. Ne yó gónó le moluy du Jakub.#25:26 Yó lanen bè udél Hibru yóm boluy Jakub, “teked.” Deng nem folò ne halay Isak yóm kwen ngaen.
Kehbalù Iso yóm kwalisen twogu
27Ngangen ne deng le lembang yó kem ngà lewu yó koni. Yó kun kenhulung nmò Iso, tey hulung dmulok, són lem bnes gónóhen nô. Okóm ke Jakub kun, tey menek nawan tódô henek bè gónô le. 28Yóm ngà kun kenbong nawa Isak, duhen Iso, abay se tey móyô mken du yó kem utón dnuloken. Okóm ke Ribika kun, kenbong nawahen Jakub.
29Sotu kdaw yóm igò Jakub tolo tmógó sóbów blangul, kól dmulok se Iso, tey sidek kbitilen. 30Yó monen mò ke Jakub, “Tey deng sidek kbitilu ni, henkenem ou dé yóm hulô tnógóhem yóó.” (Yó se but gónó le miba ke Iso Idom, hulô.)
31Bnalà Jakub se, monen, “Blayu kóm nim ni ke blayem dou yóm kóm kwalis bè ketwogu.”
32Mon Iso se, “Yó sen. Tedu tô muhu du yóm dou kwalis yó ke mohe mom matay lemnus?”
33Ne yó bud mon Jakub mò du, “Nahem smafà dou dé bè yóm keblayem du dou yóm kóm kwalis bè ketwogu.” Tahu se, smafà Iso ne blayen ke Jakub yóm kun kwalis bè ketwogu. 34Omin Jakub yó bemlay du mambang ne sóbów. Mken Iso ne minum, ominen yó bud lemwót. Yó se tehe kmò kehluda Iso du yóm kun kwalis bè ketwogu.
Currently Selected:
Tekang Kbuten 25: tbl
Označeno
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.