Tekang Kbuten 11
11
Là gomongen bè nili yóm tsaptér 10. Yó tulónen hono boluy yó kem tau tehe semfu gu bè yóm tlu tehe kem ngà Nuwa logi.
Yóm hol gónô geta tô hdà le bè Babél
1Yóm tehe yu ekni, tek sotu udél le yó kem tau bè klamangen benwu. 2Tódô le menwu mógów lan le fi dmata kdaw efet le gefet bè yóm tey datal lamang bè Babilun, ne bè yó gónó le menwu. 3Yó sentulón le, mon le, “Lemwót tekuy ne. Na tekuy mò ngom gónô lemwót bè tonok miket,#11:3 Yóm ngom gónô monen yó, lómón tô smintu kmò le du. hékéng tekuy bè ofi anì hol mgemel.” Tahu se, wen ngom gónô nmò le, ne wen dket le du anì hol tilob kesedket le. 4Omin le bud mon du, “Na tekuy hdà yóm tey syudad mung du yóm gónô geta gefet te kmawang anì hol tekuy tótól ne là sekla tekuy ebè klamangen benwu.” Tahu se, nbut le hdà du.
5Omin Dwata yó mnaul elaan nan e hnénég yóm syudad ne yóm gónô geta nbut hdà yó kem tau. 6Yó udélen, monen, “Ngem ni kem tau ni, tek sotu gónó le gu mbut ne tek sotu udél le. Nim nmò le ni, hanà kbuten he. Angat tey dê atul le elem hulin kdaw. Balù kihu angat sensatul le angat gbek le mò du. 7Hyu ke mnaul tekuy ebélê le,” mon Dwata, “na tekuy sentólóng udél le anì là bud le setngón.”
8Tahu se, gotu senkla Dwata lu talak tonok ne là bud gehfu le du yóm syudad tô hdà le. 9Yó boluy le du yóm syudad yó Babél abay se bè yó gónó Dwata semtólóng udél yóm kdéen tau. Lenwóten bè yó ne, gotu senklahen lu e talak tonok.
Yó kem sfu Sém
10Ni se yó kem kun sfu Sém. Timbow deng lewu halayen miwes kogol yóm dunuk, deng lematu ne halay Sém. Bè yóm halay yó, wen ngaen logi boluyen Arpaksad. 11Kogolen bè yó, bud temnù 500 halay Sém ne bud wen kem ngaen logi ne libun.
12Tikóng deng 35 halay Arpaksad wen ngaen logi boluyen Sila. 13Kogolen bè yó, bud temnù 403 halay Arpaksad ne bud wen kem ngaen logi ne libun.
14Tikóng deng 30 halay Sila wen ngaen logi boluyen Ébér. 15Kogolen bè yó, bud temnù 403 halay Sila ne bud wen kem dumu ngaen.
16Tikóng deng 34 halay Ébér wen ngaen logi boluyen Pilig. 17Kogolen bè yó, bud temnù 430 halay Ébér ne bud wen kem ngaen logi ne libun.
18Tikóng deng 30 halay Pilig wen ngaen logi boluyen Ru. 19Kogolen bè yó, bud temnù 209 halay Pilig ne bud wen kem ngaen logi ne libun.
20Tikóng deng 32 halay Ru wen ngaen logi boluyen Sirug. 21Kogolen bè yó, bud temnù 207 halay Ru ne bud wen kem ngaen logi ne libun.
22Tikóng deng 30 halay Sirug wen ngaen logi boluyen Nahor. 23Kogolen bè yó, bud temnù 200 halay Sirug ne bud wen kem ngaen logi ne libun.
24Tikóng deng 29 halay Nahor wen ngaen logi boluyen Tira. 25Kogolen bè yó, bud temnù 119 halay Nahor ne bud wen kem ngaen logi ne libun.
26Tikóng deng 70 halay Tira wen kem ngaen logi boluy le, Abram ne Nahor ne Haran.
Yó kem kun sfu Tira
27Ni se yó kem kun sfu Tira, yóm mà le Abram ne Nahor ne Haran. Yóm Haran, du se mà Lat. 28Matay Haran bè yóm kun syudad boluyen Ur, yóm benwu gónón sut snakuf Babilun. Bè yóm katayen, tolo mowil he Tira yóm maen. 29Myehen Abram, duhen Saray. Ne myehen se ke Nahor, duhen Milka yóm ngà Haran libun. Yó twoli Milka duhen Iska. 30Yóm Saray yehen Abram, atil se kun.
31Bè yóm kdaw yó, yó nmò Tira nwiten Abram yóm ngaen logi, ne Lat yóm téméen, ne Saray yóm towuhen yehen Abram. Tebelen yóm syudad Ur snakuf Babilun, tô mógów etu bè Kanan. Ngang le mò du mógów efet le kól bè yóm syudad boluyen Haran ne bè yó gónó le henek nô. 32Bè yóm knô le bè yó, matay Tira. Ne deng 205 halayen ne bè yóm katayen.
Currently Selected:
Tekang Kbuten 11: tbl
Označeno
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.