Lucas 22
22
Jesústa wanutsinanpaq wilanakushqan
Mateo 26.1-5, 14-16; Marcos 14.1-2, 10-11; Juan 11.45-53
1Tsay witsanqa Levadüraynaq Tantata Mikupäkunan fiesta qalaykunanpaq walka junaqlanami pishiykarqan. Tsay fiestatami Pascua fiesta nipäkuq.#Éxo. 12.1-27; Deut. 16.1-8. 2Tsay junaqkunami mandaq cürakuna y ley yachatsiqkuna Jesústa imanöpa wanutsinanpaqpis wilanakurqan. Itsanqa paypa favornin runakuna sharkunanta mantsakurmi prësu tsaritsiyta mana kamäpakurqantsu.
3Tsay hörami Judas Iscariotipa shonqunman Satanás yaykurqan. Judasqa Jesúspa chunka ishkay discïpulunkunapita jukmi karqan. 4Paymi mandaq cürakunaman y templu täpaq wardiakunapa capitanninkunaman aywaykur nirqan Jesústa imanöpa reqitsinanpaqpis. 5Tsayno niptinmi kushikärishpan pägananpaq nipäkurqan. 6Tsawraqa Judas shuyararqan runakuna mana kashqan höra Jesús kaqman pushananpaq.
Pascua mikuyta discïpulunkunawan Jesús mikushqan
Mateo 26.17-25; Marcos 14.12-21; Juan 13.21-30
7Levadüraynaq Tantata Mikupäkunan fiesta qalaykunan junaqmi Pascuacho mikunanpaq carnishta pishtapäkuq. 8Tsaymi Pedruta y Juanta Jesús kacharqan kayno nir: <<Pascua mikuyta mikunantsipaq kamarikamuy>>.
9Tsawraqa paykuna kayno nir tapurqan: <<¿Maychötaq kamarikamushaq, tayta?>>
10Tsayno niptinmi Jesús kayno nirqan: <<Jerusalénman chayarmi juk runa puyñuwan yakuta apaykaqta taripäkunkipaq. Tsay runapa qepalanta aywapäkunki may wayimanpis chayananyaq. 11Tsaycho wayiyuqta kayno nipäkunki: <¿Mayninchöshi cuartu kaykan discïpulunkunawan Pascua mikuyta Jesús mikunanpaq?> 12Tsayno niptikimi altuscho jatun cuartu kamarishqa kaykaqta rikatsipäkushunkipaq. Tsaycho mikunantsipaq kamarikärinki>>.
13Tsaymi paykuna aywar Jesús nishqannöla taripäkurqan. Tsaychömi Pascua mikuyta kamaripäkurqan.
Santa Cënapita Jesús yachatsishqan
Mateo 26.26-30; Marcos 14.22-26; 1 Corintios 11.23-25
14Mikunanpaq höra chayamuptinnami apostolninkunawan mësaman Jesús jamakurqan. 15Tsaychömi Jesús kayno nirqan: <<Pasaypami munashqä manaraq wanur kay Pascua mikuyta qamkunawan mikuyta. 16Noqa kaynömi nï: Mananami Pascua mikuyta mikushaqnatsu Tayta Dios mandaykashqancho yapay mikunäyaq>>.
17Nirkurnami vïnuyuq väsuta aptarkushpan Tayta Diosta agradëcikur apostolninkunata kayno nirqan: <<Kaypita lapayki upupäkuy. 18Noqa kaynömi nï: Tayta Dios mandaykashqan chayamunanyaq manami vïnuta yapay upushaqnatsu>>.
19Tsaynöpis tantata aptarkur Tayta Diosta yusulpalä nirqan. Tantata pakiparmi kayno nirqan: <<Kayqa cuerpümi kaykan. Kay tantata mikur qamkuna rayku wanushqäta yarpapäkunki>>.
20Tsaynölami mikuyta usharkur vïnuyuq väsuta aptarkur kayno nirqan: <<Kay vïnuqa yawarnïmi kaykan. Qamkuna rayku wanur yawarnïta jichaptïmi Tayta Dios mushuq pactuta ruranqa.#Éxo. 24.8; Jer. 31.31-34. 21Chikimaqnïkunawan prësu tsaritsimänanpaq kaq runapis noqantsiwanmi kay mësacho kaykan. 22Rasunpami Runapa Tsurinqa Tayta Dios munashqannöla nakar wanunqa. Payta prësutsiq runami itsanqa pasaypa kuyapaypaq kanqa>>.
23Tsayno niptinmi juknin jukninpis apostolninkuna tapunakärirqan kayno nishpan: <<¿Mayqantsiraq kaykantsi?>>
Mayqanpis mas mandaq kananpaq nishqan
24Tsaypitanami apostolkuna mas mandaq kayta munar kikinpura rimanakuykarqan. 25Tsaymi Jesús kayno nirqan: <<Nacionkunata mandaq reykunaqa runakunata munashqantami ruratsipäkun. Tsayno mandaqkunataqa ali runa kashqantami nipäkun. 26Qamkunaqa tsayno ama kapäkuytsu. Tsaypa trukanqa munayniyuq karpis wamrano humildi kapäkuy. Mandaq karpis ashmaynöla yanapakuq kapäkuy. 27Shumaq tantiyakäriy. ¿Mësacho jamaqku o mikuy qaraq ashmayku mas mandaq kaykan? ¿Manaku mësacho jamaq mas mandaq? Tsayno kaptinpis noqaqa qamkunacho ashmaynölami kaykä.
28<<Ima nakaycho kaptïpis noqawanmi imaypis qamkuna kashqanki. 29Tsaymi mandaq kanäpaq Papänï churamashqanno qamkunatapis mandaq kanaykipaq churashayki. 30Tsawraqa mandaykashqächo noqawanmi mikunkipaq y upunkipaq. Tsaynöpis trönucho jamapäkunkipaq chunka ishkay trïbu Israel runakunata mandapäkunaykipaqmi>>.
Pedro ñëgananpaq kashqanta Jesús nishqan
Mateo 26.31-35; Marcos 14.27-31; Juan 13.36-38
31Tsaypitami Pedruta Jesús kayno nirqan: <<Simón, Simón, Satanásmi Tayta Diosta manakushqa trïguta shuyshuqno qamkunapa yärakuynikita ushakätsinanpaq. 32Tsaymi Tayta Diosta manakushqä yärakuyniki mana ushakänanpaq. Tsaymi noqaman yapay yärakamarna discïpulu mayikikunata shakyätsinki shumaq yärakamänanpaq>>.
33Tsaymi Pedro kayno nirqan: <<Carcilman apashuptikipis manami kachashaykitsu, tayta. Wanutsishuptikipis qamwanmi wanushaq>>.
34Tsawraqa Jesús kayno nirqan: <<Pedro, noqa kaynömi nï: Kanan tsakay gällu manaraq cantaptinmi kimsa kuti mana reqimashqaykita ninkipaq>>.
Discïpulunkuna kamarikushqa purinanpaq Jesús nishqan
35Tsaypita apostolninkunata Jesús kayno tapurqan: <<Qellayniynaqta, qepiynaqta y lanqiynaqta wilakärinaykipaq kachaptï ¿imalapis pishïshurqaykiku?>>
Tsawraqa paykuna kayno nipäkurqan: <<Manami imapis pishïmarqantsu, tayta>>.
36Tsayno niptinmi Jesús kayno nirqan: <<Kananpitaqa qellaynikitapis qepikitapis apapäkunki. Espädayki mana kaptinqa punchuykita rantikuykur rantipäkuy. 37Noqa kaynömi nï: Tayta Diospa palabrancho noqapaq kayno nirmi qelqaraykan: <Jutsayuq runanömi wanurqan>.#Isa. 53.12. Tsay qelqaraykashqannölami noqata pasamanqa>>.
38Tsawraqa apostolninkuna kayno nipäkurqan: <<Kaycho kaykan ishkay espädakuna, tayta>>.
Tsayno niptin Jesús kayno nirqan: <<¡Churaykuyna!>>
Getsemanícho Jesús manakushqan
Mateo 26.36-46; Marcos 14.32-42
39Tsaypitami Jesús aywarqan cadala aywashqanno Olivos jirkanman. Qepantami discïpulunkunapis aywapäkurqan. 40Tsayman chayaykurnami kayno nirqan: <<Tayta Diosta manakäriy Satanásta ichipänaykipaq>>.
41Tsayno nirkurmi mas washa läduman aywashpan qonqurpakuykur Tayta Diosta manakurqan 42kayno nir: <<Papä, cöpacho winaraykaq castïguykita ama upuykatsilämaytsu.#Sal. 75.8; Isa. 51.17; Jer. 25.15-29. Itsanqa noqa munashqänöqa ama kaykutsuntsu, sinöqa qam munashqaykino kaykulätsun>>.
43[Tsayno lakikur manakuykaptinmi jana patsapita juk ángel shamur shakyätsirqan. 44Fiyupa lakikurmi Tayta Diosta manakurqan südayninpis yawarnöraq pampaman jutushqanyaq.]
45Tsaypita discïpulunkuna kaqman kutiykurmi lakikuypita punukashqa karkaykaqta Jesús tarirqan. 46Tsawraqa Jesús kayno nirqan: <<¡Imanirtaq punurkaykanki! Sharkurkur Tayta Diosta manakäriy Satanásta ichipänaykipaq>>.
Jesústa prësu tsaripäkushqan
Mateo 26.47-56; Marcos 14.43-50; Juan 18.1-11
47Jesús tsayno parlaykaptinmi apostolnin Judas Iscariote chayarqan atska runakuna pushashqa. Nirkurmi Jesúsman witiykur qaqlancho mutsarqan. 48Tsawraqa Jesús kayno nirqan: <<Judas, Runapa Tsurinta ¿mutsaypaku reqitsinki?>>
49Jesústa prësu tsariq shamushqanta tantiyashpanmi discïpulunkuna kayno nirqan: <<Tayta, ¿espädakunawanku qorishaq?>>
50Tsayno nir juk discïpulun mas mandaq cürapa ashmayninpa alawqa kaq rinrinta espädanwan roquriykurqan. 51Tsaymi Jesús kayno nirqan: <<¡Ama tsayta ruraytsu!>> Nirkur tsay ashmaypa rinrinta yataykur aliyätsirqan.
52Jesústa prësu apananpaq shamuqkunami karqan mandaq cürakuna, templu täpaq wardiakunapa capitanninkuna y Israel mayor runakuna. Paykunatami Jesús kayno nirqan: <<¿Imanirtaq suwamannöpis espädaykikunawan y garrutikikunawan shapäkamushqanki? 53Waran waran qamkunawan templu patiucho kaykaptï ¿imanirtaq tsaycho prësu mana tsarimarqaykitsu? Kananmi itsanqa höra chayamushqa Satanáspa munayninta rurapäkunaykipaq>>.
Jesústa Pedro ñëgashqan
Mateo 26.57-58, 69-72; Marcos 14.53-54, 66-72; Juan 18.12-18, 25-27
54Tsawraqa Jesústa prësu tsarirkur mas mandaq cürapa wayinman apapäkurqan. Pedrunami karu qepalanta qatirarqan. 55Sawan rurinchömi ninata ratarkatsir runakuna mashakuykarqan. Tsayman yaykurirmi Pedrupis paykunawan mashakuykarqan. 56Pedro mashakuykaqta rikaykurmi juk ashmay warmi kayno nirqan: <<Kay runapis paywanmi purishqa>>.
57Tsaymi Pedro kayno nirqan: <<¡Imanankitaq, warmi! Tsay runataqa manami reqïtsu>>.
58Maylantanami juk runapis payta rikaykur kayno nirqan: <<Qampis tsay runawan puriqmi kaykanki>>.
Tsayno niptinmi Pedro kayno nirqan: <<¡Imanankitaq, runa! Noqaqa manami paywan imaypis purishqätsu>>.
59Tsaypita juk höratano jukna nirqan: <<Rasunpami kay runaqa paywan purishqa. Galilea runami kanpis>>.
60Tsayno niptinmi Pedro kayno nirqan: <<¡Imanankitaq, runa! ¡Manami musyätsu imapita parlaykashqaykitapis!>>
Pedro tsayno niykaptinmi gällu cantarkurqan. 61Tsay hörami Jesús tikraykur Pedruta rikärirqan. Tsaymi Pedro yarparkurqan Jesús kayno nishqanta: <<Manaraq gällu cantaptinmi kimsa kuti mana reqimashqaykita ninkipaq>>.
62Tsawraqa waqtaman yarqurir pasaypa lakikushpan waqarqan.
Jesústa ashlir maqapäkushqan
Mateo 26.67-68; Marcos 14.65
63Tsaypitanami prësu tsararaq runakuna Jesústa manakaqman churashpan maqapäkurqan. 64Nawinta tsapaparkurmi [laqyapäkurqan] kayno nir: <<Mä nimay pï maqashushqaykitapis>>.
65Tsayno nirmi tukuyta ashlipäkurqan.
Autoridäkuna Jesústa tapushqan
Mateo 26.59-66; Marcos 14.55-64; Juan 18.19-24
66Patsa wararkuptinnami Israel mayor runakuna, mandaq cürakuna y ley yachatsiqkunapis juntakarqan. Paykunapa despächunman chayatsiptinmi Jesústa tapupäkurqan kayno nir: 67<<Mä wilapäkamay. ¿Rasunpaku Tayta Dios kachamushqan Cristo kaykanki?>>
Tsawraqa Jesús kayno nirqan: <<Niptïpis manami criyipäkamankipaqtsu. 68Qamkunaqa tapuptïpis manami contestamankipaqtsu [ni kacharimankipaqtsu]. 69Kananpitaqa Runapa Tsurin munayniyuq Tayta Diospa alawqa kaq nawpanchömi jamaranqa>>.#Sal. 110.1.
70Tsaypita autoridäkuna kayno tapupäkurqan: <<Tsawraqa ¿Diospa Tsurinku kaykanki?>>
Tsayno niptinmi Jesús kayno nirqan: <<Qamkuna nishqaykinölami kaykä>>.
71Tsawraqa nipäkurqan: <<Kikinpis Diospa Tsurin kaykashqanta niykämaptintsiqa ¿imapaqnataq testïgutapis ashishun?>>
Currently Selected:
Lucas 22: qvmB
Označeno
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.