Luka 24
24
İisus diriler
1Haftanın ilk günündä, çin sabaalän, bu karılar /hem başkaları da onnarlan barabar/ geldilär mezarı görmää. Getirdilär kokulu yaaları, ani hazırladıydılar.
2Buldular taşı, mezardan bir tarafa aktarılmış.
3Girdilär içyanına, ama Saabi İisusun güüdesini bulmadılar.
4Açan bilmärdilär, ne yapsınnar, birdän gösterildi onnara iki adam, giiyimni yalabık rubaylan.
5Karılar korktular da erädän baş iilttilär, ama bu adamnar dedilär: «Neçin aarêêrsınız diriyi ölülerin arasında?
6O yok burada, dirildi. Aklınıza getirin, ne sölediydi, açan taa Galileyadaydı.
7O demişti: „Adam Oolu günahkerlerin elinä verilecek, stavroza gerilecek da üçüncü günü dirilecek“».
8Bu karılar aklına getirdilär İisusun laflarını.
9Dönüp mezardan, hepsini bunnarı onbir apostola hem kalan insana söledilär.
10Kim bu haberi getirdi, bunnardı: Mariya Magdalina, İoana, Mariya, İakovun anası, hem kalanı, kim onnarlan barabardı.
11Onnarın lafları apostollara göründü bir masal gibi, onuştan inanmardılar.
12Ama Petri kalktı da kaçtı mezara. Etiştiynän, iildi da baktı içyanına, ama keten çarşaflardan kaarä bişey görmedi. Ondan sora döndü geeri, şaşarak buna, ne oldu.
İisus Emmaus yolunda
13O günü iki üürenici gidärdi bir küüyä, ani adı Emmaus, İerusalimdän altmış stadi#24:13 Altmış stadi – oniki kilometra. uzaklıı.
14Onnar lafedärdi biri-birinnän hepsi için, ne oldu.
15Onnar lafedärkän hem soruşarkan, İisus Kendi yaklaştı onnara, da barabar gittilär.
16Onnarın gözleri kapalıydı, ki tanımasınnar Onu.
17İisus sordu: «Siz, gidärkän, ne lafedersiniz?» Onnar bir kahırlı üzlän durdular.
18Onnardan birisi, adı Kleopa, dedi Ona: «Acaba, sän yalnız mıysın İerusalimdä yabancılardan, kim bilmeer, ne oldu burada bu günnerdä?»
19«Ne oldu?» – sordu İisus. Onnar cuvap ettilär: «Hepsi bunnar oldu İisuslan Nazarettän, Angısı bir büük proroktu lafında hem işindä, Allahın hem bütün insanın önündä.
20Ama bizim büük popazlar hem öndercilär daava kestilär ölümä da stavroza gerdilär Onu.
21Ama biz umutlanardık, ani O kurtaracek İzraili. Da tä büün üçüncü gün, nicä bu oldu.
22Bundan kaarä, birkaç karı aramızdan şaşmaya bizi koydular. Onnar, çin-sabaalän mezara gidip,
23Onun güüdesini bulmadılar. Sora, gelip bizä, söledilär, ani angilleri görmüşlär. Angillär onnara demiş, ani İisus dirildi.
24Kimisi bizdän gittilär mezara da gördülär, ani hepsi bunnar ölä, nicä karılar söledilär, ama Onu görmedilär».
25«Ne fikirsizsiniz siz! – cuvap etti İisus. – Ne zor inanêrsınız prorokların sölediklerini!
26Düşmeer mi, Hristos bölä zeetlensin, sora metinniinä etişsin?»
27Sora başladı Moiseydän hem hepsi proroklardan annatmaa, ne yazılı Onun için Ayoz Yazılarda.
28Yaklaşıp küüyä, nereyi gidärdilär, İisus yapıldı, ani isteer gitmää taa ileri.
29Ama onnar yalvardılar Ona da dedilär: «Kal bizimnän. Gün kauşêr, gecä olêr». O girdi, onnarlan kaldı.
30Sofraya oturduktan sora İisus aldı ekmää, iisözledi, kırdı da verdi üürenicilerä.
31Ozaman açıldı gözleri, da tanıdılar Onu, ama O görünmäz oldu.
32Onnar deyärdilär biri-birinä: «Acaba, yanmardı mı üreemiz, açan O bizä yolda sölärdi hem annadardı Ayoz Yazıları?»
33Onnar hiç oyalanmadılar, kalkıp, geeri İerusalimä döndülär. Orada buldular onbir apostolu hem başka üürenicileri, birerdä toplu,
34angıları sölärdilär biri-birinä: «Hakına, Saabi dirildi, gösterildi Simona».
35Ozaman bu iki üürenici söledilär, ne oldu onnarlan yolda, hem nasıl tanıdılar İisusu, ekmää kırarkan.
İisus gösteriler üürenicilerinä
36Bölä onnar lafedärkän, İisus Kendisi peydalandı aralarında da dedi: «Usluluk sizä!»
37Onnar korktular hem şaştılar, sanıp, ani görerlär bir duh.
38Ama O dedi: «Neçin kahırlanêrsınız hem neçin ikileersiniz üreenizdä?
39Bakın Benim ellerimä hem ayaklarıma. Bän Kendimim, diiyin da bakın, zerä duhun yok eti, ne dä kemii, nicä görersiniz Bendä».
40Açan dedi bu lafları, gösterdi onnara Kendi ellerini hem ayaklarını.
41Onnar sevinmektän hem şaşmaktan inanamardılar kendi gözlerini. Ozaman İisus dedi: «Var mı sizdä burada bişey imää?»
42Onnar verdilär Ona bir parça pişmiş balık /hem bir parça gömeç balı/.
43O aldı da idi onnarın önündä.
44Sora dedi: «Ne sölediydim sizä, açan taa bulunardım sizinnän, ani hepsi, ne var yazılı Moiseyin Zakonunda, prorokların kiyatlarında hem Psalmalarda Benim için, lääzım tamannansın».
45Ozaman açtı onnarın fikirlerini, annasınnar Ayoz Yazıları.
46İisus dedi: «Bölä yazılı, ani lääzım zeetlensin Hristos, ama üçüncü günü dirilsin ölüdän.
47Başlayıp İerusalim kasabasından, lääzım nasaat olsun Onun adınnan hepsi milletlerä, ki pişman olsunnar günahlarından hem baaşlamak kabletsinnär.
48Siz şaatsınız hepsi bu işlerä.
49Bän yollayacam sizä ne adanmış Benim Bobamdan. Siz kalın kasaba içindä, kuvet kabledincä yukardan».
İisus gökä kalkêr
50İisus çıkardı onnarı İerusalimdän Vifaniya küüyünä dooru. Kaldırdı ellerini da iisözledi onnarı.
51Açan iisözlärdi onnarı, ayırıldı onnardan da kalktı gökä.
52Onnar baş iilttilär Ona, sora döndülär İerusalimä büük sevinmäklän.
53Herzaman gidip Ayoz binaya, Allahı metinnärdilär. /Amin./
Currently Selected:
Luka 24: GagNTL
Označeno
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006