Mattaayo 9
9
Yeesso etoo sare hanjaawte samaacha
(Marko 2:1-12, Luuka 5:17-26)
1Yeesso koobanhoo kore, beyti Gaalilaaya maahe nokhte ilkerengeetti us fiddiyo irte. 2ꞌDooꞌdoo etoo khannane sar tuumman hanjaawte ilaal kasoosiꞌde, ikeene. Chirri Yeesso saggi ꞌdooꞌdaas usu ikakhuufo arge ka, wihi us etaas sare hanjaawte iyidah, “Inankaaw, aburꞌdowin! Uskeelaah a liikaakutee!”
3Tagaammetoo amurre uus iche waha daagte ka wihi icho uurassicho ka esseen, “Eta a gafe.”
4Yeesso malassicho garte, wihi us worsate, “Mehede mala suuje uurassiin ka idowattaan? 5Mehe maanta ki addan kaꞌdabakhe, chirri an, ‘Uskeelaah a liikaakute,’ iadeeh a ommos an, ‘Kahe soho’ iadeeh? 6Iꞌdaasenyi saggi Ínam Aadam antohi us harrata ka enenyet uskeel ikakuto ikhabo a abattaan.” ꞌDeerka wihi us eti sare hanjaawte iyidah, “Tolosso ilaalaah okkhiche, goob iro!” 7Et la tolossate, goob irte. 8Urur uus waha arge weyti roorro gesse, Waakkhi enenyet antohaas geeddee siiche koolicheen.
Yeesso etoo kooddi goocho Mattaayo layadeeh waha
(Marko 2:13-17, Luuka 5:27-32)
9Yeesso intaas ka orey isohtaayi, etoo Mattaayo layadeeh usuhi meessi kooddi lakagoocho goya fiddiyo arge. Yeesso la, “Isooraahe abattiteey ateeh,” iyidahye, Mattaayo la kahe usu raahe.
10Yeesso min Mattaayo kagolossataayi, ꞌdooꞌdoo kooddi goocho ittaawe ichoow ꞌdooꞌdoo ꞌdooꞌdi uskeel leh liiekkaacho ittaawe yimiyye Yeesso ichoow abattitiis ba leegolossate. 11Farissaayo chirri iche waha agarte ka, wihi iche abattitiis worsatte, “Eti atin iween a iꞌdoh ꞌdooꞌdi kooddi goocho ichoow ki uskeel leh ileegolossata?”
12Yeesso la wihi icho essaan daage, wihi us ilaabe, “ꞌDooꞌdi ilkitárri yowti ki feffeyyan menye a ki khakkhannan. 13Iꞌdaasenyi taba wihi yeeda essi wihiis abda, ‘An soorriyoti at ibihisso menye, atihi ꞌdooꞌdi addan uur inugleysatti iche ꞌdoona.’#9:13 ꞌHoseeya 6:6. A mehe ꞌdooꞌdi an iimiyye an waho, ki ꞌdooꞌdi fiffissan isiekkaacho menye, iꞌdaasenyi a ki uskeel leh.”
Yeesso woroo husub enenyet abcha
(Marko 2:18-22, Luuka 5:33-39)
14ꞌDeerka abatti Yoohanahi Enenyet Baattissiyo Yeesso itimiyye wihi iche worsatte, “A iꞌdohe nah ichoow Farissaayo af ihidanna, iꞌdaasenyi abattitaah af ihidan?”
15Yeesso wihi us ilaabe, “ꞌDooꞌdi mindischo yimiy ma ooyo geeddi eti min disti intaas kijiro menya? Maane a tamiit ti ꞌdooꞌd eti min disti lakakhaato, ꞌdeerka ꞌdooꞌd af hiiti.”
16Yeesso la yeed orey iwoye wihi us yidah, “Et goonankoo dafareete husub gaaddiisti raagane kharradde kadaddabo mele. A mehe goonankaas husub a isinyaama kharradiche la orey isohta. 17Ommolla et farsoti sabiibe husub, urgohi uktoote raagan kachibo mele. Chiꞌicho iꞌda yeeleen, urgo a dowaane, farso khubatta, urgo laka lawaaya. Iꞌdaasenyi farsoti sabiibe husub urgohi uktoote husub on lakachiba. Iꞌdaas ka farso ma khubatti, urgo laka ma dowaan.”
Yeesso inanti bujje sookahcha, makhaabassi khannan samaacha
(Marko 5:21-43, Luuka 8:40-56)
18Yeesso urur leeyyeedaayi, etoo minki weysiite Yaꞌhuud iween yimiyye, ortiis ka jilbo il kaguꞌdde wahte wihi us yidah, “Inanteey toolla dow on bujje, iꞌdaasenyi kaale dahantaah kaꞌdaare, ꞌdee jiro a ꞌhesso.” 19Yeesso tolossate, abattitiis khabaayi makhaabal raahe.
20Chirraas on makhaabassoo khannane geeddi guꞌh tomon ichoow lamma ba diigte Yeesso ꞌdubiis leetimiyye, laddi kabuuꞌdiis ꞌdaarte. 21Uuriche goyaka mehe tidah ya, “Chirri an kabuuꞌdiis on ꞌdaare, a samaada.”
22Yeesso la urgiye makhaabál arge, wihi us iyidah, “Inantaay, aburꞌdowin! Kakhuufnaanki at ikakhuufte a kisamaache.” Makhaabale chirraas on samaatte.
23Chirri Yeesso minki eti minki weysiit iween gele ka, ꞌdooꞌdi indulle afuufo ichoow ururi kowdooti ba arge. 24Wihi us iyidah, “Khar ibaha, iname ma umaatane, iꞌdaasenyi a uꞌdurta.” Icho tuumman la usu kareyteen. 25Chirri urur bahe ka, Yeesso minki iname jiifto gele, inám dahan sookhabte, iche la sookahte. 26Wahaas us yeele ilaas tuumman ka taaꞌheen.
Yeesso ꞌdooꞌdoo lammeenye indo laa samaacha
27Chirra Yeesso intaas kabaho ka, et lamma indo laa usu raahte. Lammache ba riirte, “Ínam Dawuud, uur nah isoonugleyso,” tidah.
28Chirri Yeesso minki us fiddiyo gele ka, reeri kootte lammeenye indo laa laka min leegele. Yeesso chirraakka wihi us worsate, “Atin anihi atin samaacho a rummeysattaan?”
Iche la wihi iche ilaabte, “Aa Kamur.”
29Yeesso ꞌdeerka indohicho ꞌdaare, “Saggi an atin isamaacho a kakhuufteen gone, a atin samaacha,” iyidah. 30Chirraas on indo bahcheen. Yeesso icho weyti tootooche wihi us iyidah, “Etoo kalday laka uus waha aban!” 31Iꞌdaasenyi iche la iratte, wor Yeesso ilaas tuumman ka cheekte.
Yeesso etoo af laa samaacha
32Chirra reeri kootte lammee baho ka, ꞌdooꞌdoo etoo ginna dakhatti yeyyeedin iubaaꞌdan Yeesso ikeene. 33Chirri Yeesso et ginna kabahche ka, eti kootte yeyyeedin iubaaꞌdan yeyyeede, ꞌdooꞌd la weyti girmeeste, “Nah injire wihi iꞌdee ili Issiraayel goyaka ma argin,” yidah.
34Iꞌdaasenyi Farissaayo wihi iche tidah, “Miigti karnati ginnayyoote enenyet ginna kabahcha.”
Gurnaanki Waakh a buure iꞌdaasenyi ꞌdooꞌdi hil haaggicho a koo rucchul
35Yeesso ilkerengeeto ichoow goobab tuumman goya tabe minassichoki weysiite Yaꞌhuud ka ꞌdooꞌd wori Waakh abche. Wori Haaggane dakhi Waakh miinsan icheeke, sugeerre ichoow khannaatte tuumman ꞌdooꞌd kabahche. 36Chirri us urur arge ka, weyti uur inugleeste, a mehe iꞌdi iiyti ersim ikhabin u, a waꞌdwaaꞌdaane, toro la et gargaaro mele. 37ꞌDeerka wihi us abattitiis iyidah, “Gurnaan a buure, iꞌdaasenyi ꞌdooꞌdi hil haaggicho a koo rucchul. 38Maantaka Kamuri gurnaan leh daaha, ꞌdee ꞌdooꞌdi ittaawenye gurnaan soogoocho a sooergo.”
Currently Selected:
Mattaayo 9: rel
Označeno
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.