Маттэ 9
9
ЯБГЪОНЭРЭШЪХЬ
ЗыӀэпкъ-лъэпкъ узым зэкӀиубытэгъэ лӀы горэ Исус зэригъэхъужьыгъэр
(Марк 2:1-12; Лука 5:17-26)
1ЕтӀанэ Исус къуашъом итӀысхьи, псыхъураем къызэпырыкӀыжьи, икъалэ къэкӀожьыгъ. 2Джащыгъум зыӀэпкъ-лъэпкъ узым зэкӀиубытэгъэ лӀы горэ пӀуаблэм телъэу Исус дэжь къахьыгъ. Исус ахэмэ яшӀошъхъуныгъэ зелъэгъум, зыӀэпкъ-лъэпкъ узым зэкӀиубытэгъэ лӀым риӀуагъ:
– Угу умыгъэкӀоды, сикӀал! УипсэкӀодшӀагъэхэр къыпфэгъугъэх.
3Исус ар къызеӀом, Тэурат егъэджэкӀо пащэхэм ащыщэу заулэмэ агукӀэ аӀуагъ:
– Мы лӀым Тхьэр егъэпцӀы.
4Исус ахэмэ агухэм арылъыр ешӀэти, къыӀуагъ:
– Шъугухэм мыщ фэдэ гукъэкӀ бзаджэхэр сыда зыкӀарылъыр? 5Тара нахь псынкӀагъор, «УипсэкӀодшӀагъэхэр къыпфэгъугъэх» пӀоныр ара, хьауми «Къэтэджи, къэкӀухь» пӀоныр ара? 6Ау къэшъушӀэным пае, ЦӀыф Лъэпкъым ы Къо псэкӀодшӀагъэхэр ыгъэгъунхэу дунаим тетыгъо зэрэщыриӀэр, – джащыгъум Исус зыӀэпкъ-лъэпкъ узым зэкӀиубытэгъэ лӀым риӀуагъ:
– Къэтэджи, уипӀуаблэ къашти, шъуадэжь кӀожь.
7А лӀыр къэтэджи, ядэжь кӀожьыгъэ. 8ЦӀыф купышхохэм ар залъэгъум, агъэшӀэгъуагъ. ЦӀыфхэм ащ фэдэ тетыгъо къязытыгъэ Тхьэми щытхъу фашӀыгъ.
Исус игъогу рыкӀонэу Маттэ къызэреджагъэр
(Марк 2:13-17; Лука 5:27-32)
9Исус нахь чыжьэу кӀозэ, хьакъулахь ахъщэр зыщыхахырэ унэм Ӏусэу, Маттэ зыцӀэ лӀы горэ ылъэгъугъ.
– Сауж къырыкӀу, – риӀуагъ Исус. Маттэ къэтэджи, Исус ыуж ихьагъ.
10ЕтӀанэ Исус Маттэ иунэ щышхагъ. Хьакъулахь ахъщэр хэзыххэрэмрэ псэкӀодышӀэхэмрэ бэ хъухэу къэкӀуагъэхэу, Исусрэ игъогу рыкӀохэрэмрэ адашхэщтыгъэх. 11Фарисейхэм ар залъэгъум, Исус игъогу рыкӀохэрэм араӀуагъ:
– Шъо шъуидин гъэсакӀо хьакъулахь ахъщэр хэзыххэрэмрэ псэкӀодышӀэхэмрэ сыда зыкӀадашхэрэр, зыкӀадешъорэр?
12Ау Исус ар зызэхехым, къыӀуагъ:
– Псаухэр арэп Ӏазэ зищыкӀагъэхэр, сымаджэхэр ары нахь. 13ШъукӀуи, мы гущыӀэхэу Тхьэм къыӀуагъэхэм#9:13 мы гущыӀэхэу Тхьэм къыӀуагъэхэр – еплъ Пегъымбар Хьошеа тхылъэу ытхыгъэм 6:6. къарыкӀырэр къызэжъугъашӀ: «Къурмэныр арэп сызыфаер, гукӀэгъур ары нахь». Сыда пӀомэ, шъыпкъагъэ зиӀэ цӀыфхэм сяджэнэу арэп сыкъызфэкӀуагъэр, псэкӀодышӀэхэр япсэкӀодшӀагъэхэм афыкӀэгъожьынхэм пае, сяджэнэу ары нахь.
Джурт тхьэматэхэр нэкӀым ехьылӀагъэу Исус къызэреупчӀыгъэхэр
(Марк 2:18-22; Лука 5:33-39)
14Джащыгъум Иуан игъогу рыкӀохэрэр Исус дэжь къакӀохи, къыраӀуагъ:
– Тэррэ фарисейхэмрэ бэрэ тэнэкӀы#9:14 тэнэкӀы – агухэмкӀэ фаехэу, ахэм тхьэмафэ къэс мэфитӀо анэкӀыщтыгъ.. О уигъогу рыкӀохэрэм сыда зыкӀамынэкӀырэр?
15– Шъаор ягъусэфэкӀэ, шъаом игъусэхэр шъыгъонхэ алъэкӀына? – ариӀожьыгъ Исус ахэмэ. – Ау шъаор затырахыщт мафэхэр къэкӀощтых. А мафэхэр къызыкӀохэкӀэ, анэкӀыщт.
16– ШэкӀыкӀэм щыщ идэжьын щыгъыныжъым зыми фишӀырэп, сыда пӀомэ, шэкӀыкӀэм щыщ идэжьыным щыгъыныжъыр зэӀитхъынышъ, гъуанэр нахь ин ышӀыщт. 17Джащ фэдэу, сэнэпс шӀыгъакӀэр шъонтыжъхэм арагъахъорэп. Аущтэу ашӀымэ, шъонтхэр къызэготхъынхэшъ, сэнэпсыр къичъыжьыщт, шъонтхэри кӀодыщтых. Сэнэпс шӀыгъакӀэр шъонтыкӀэх зэрагъахъорэр. Джащыгъум тӀури мыкӀодхэу къэнэжьыщтых.
Исус тхьэматэ горэм ыпхъоу лӀагъэр къызэригъэтэджыжьыгъэр; Исус ищыгъын къынэсыгъэ бзылъфыгъэр зэригъэхъужьыгъэр
(Марк 5:21-43; Лука 8:40-56)
18Исус цӀыфхэм а гущыӀэхэр ариӀохэзэ, тхьэматэ горэ къыбгъодахьи, лъэгонджэмышъхьэкӀэ Исус ыпашъхьэ къитӀысхьи, къыӀуагъ:
– Сэ спхъу джыдэдэм лӀагъэ, ау о къакӀуи, пӀэ телъхьи, къэхъужьыщт.
19Джащыгъум Исус къэтэджи, игъогу рыкӀохэрэр игъусэхэу а тхьэматэм дэжь кӀуагъэ.
20Бзылъфыгъэ горэ, илъэс пшӀыкӀутӀу хъугъэу, лъыбэ къыкӀэкӀэу гуӀэщтыгъэ. Ар Исус ыкӀыбкӀэ къекӀуалӀи, ищыгъын цыпэ къынэсыгъ; 21сыда пӀомэ, ыгукӀэ мыщ фэдэу ыӀуагъэти ары: «Исус ищыгъын сынэс къодыеми, сыхъужьыщт».
22Исус зыкъызэригъэзэкӀи, бзылъфыгъэр къызелъэгъум, къыӀуагъ:
– Угу умыгъэкӀоды, сипшъашъ. УишӀошъхъуныгъэ уигъэхъужьыгъ. А сыхьат дэдэм къыщегъэжьагъэу а бзылъфыгъэр хъужьыгъэ.
23ЕтӀанэ Исус тхьэматэм иунэ ихьи, къамылапщэхэри, цӀыф бырсыр купышхори хьэдагъэ къаӀэтэу зелъэгъум, 24къыӀуагъ:
– ШъуикӀ, пшъэшъэжъыер лӀагъэп, мэчъые нахь. Исус ар къызеӀом, къыдэхьащхыгъэх. 25ЦӀыф купышхор зырагъэкӀым, Исус пшъэшъэжъыем кӀэрыхьи, ыӀэ ыубытыгъ, пшъэшъэжъыери къэтэджыгъ. 26А къэхъугъэм икъэбар а хэкум зэкӀэ ис цӀыфхэм зэлъашӀэ хъугъэ.
Исус лӀы нэшъуитӀу зэригъэхъужьыгъэр
27Исус а чӀыпӀэм къызекӀыжьым, лӀы нэшъуитӀу ыуж къихьагъ, къылъыджэхэзэ:
– Даутэ ы Къу#9:27 Даутэ ы Къу – цӀыфхэр мыкӀодхэу Къэзгъэнэжьырэр пачъыхьэ Даутэ илӀакъо зэрэщыщым пае, джуртхэр ащ «Даутэ ы КъокӀэ» еджэх., гукӀэгъу къытфэшӀ!
28ЕтӀанэ Исус унэм зехьэм, а лӀы нэшъуитӀур къыбгъодэхьагъ. Исус ахэмэ ариӀуагъ:
– Ар сэ сшӀэн зэрэслъэкӀыщтымкӀэ шӀошъхъуныгъэ шъуиӀа?
– ШӀошъхъуныгъэ тиӀ, о тхьэматэ, – къыраӀожьыгъ ахэмэ.
29ЕтӀанэ Исус ыӀэхэр ахэмэ анэхэм атырилъхьи, къыӀуагъ:
– Шъо шъушӀошъ зэрэхъугъэм фэдэу къыжъудэрэхъу.
30Исус аущтэу къызеӀом, ахэмэ анэхэр къэплъэжьыгъэх.
– Шъуфэсакъ, мыр зыми ешъумыӀу, – ариӀуагъ Исус, унэшъо пытэ афишӀэу. 31Ау ахэр унэм къызекӀыжьхэм, а къэбарыр хэкум зэкӀэ изы ашӀыгъ.
Исус бзакоу, джынапцӀэ зыхэс лӀы горэ зэригъэхъужьыгъэр
32Исусрэ игъогу рыкӀохэрэмрэ унэм икӀыжьхэ зэхъум, бзакоу, джынапцӀэ зыхэс лӀы горэ цӀыфхэм Исус дэжь къащагъ. 33Исус джынапцӀэр а лӀым зыхефым, лӀы бзэкуагъэр къэгущыӀагъ. Ар залъэгъум, цӀыф купышхом ыгъэшӀагъоу къыӀуагъ:
– Мыщ фэдэ Ӏоф Израиль хэгъэгум тэ ныбжьи щытлъэгъугъэп.
34Ау фарисейхэм аӀуагъ:
– ДжынапцӀэхэм япащэ илъэкӀ ары мы лӀым джынапцӀэхэр цӀыфмэ зэрахифырэр.
Исус цӀыф купышхом ыгу зэрэфэгъугъэр
35Исус зэкӀэ къалэхэри, къуаджэхэри къыкӀухьэщтыгъ. Синэгогухэм цӀыфхэм Тхьэм игущыӀэхэр щаригъашӀэщтыгъ, Тхьэм и Тетыгъошхо ехьылӀэгъэ къэбарышӀури аригъэӀущтыгъ, хэтрэ сымаджи гъойщаий ыгъэхъужьыщтыгъ. 36Мэлахъо зимыӀэ мэл Ӏэхъогъум фэдэу улэугъэхэу, заухъумэжьын амылъэкӀэу цӀыф купышхохэр зелъэгъум, Исус ыгу ягъугъ. 37ЕтӀанэ игъогу рыкӀохэрэм ариӀуагъ:
– Лэжьыгъэр бэ, ау лэжьакӀохэр макӀэх. 38Арышъ, лэжьыгъэр къахыжьыным пае, лэжьакӀохэр къыгъэкӀонхэу лэжьыгъэр зыем шъуелъэӀу.
Currently Selected:
Маттэ 9: AdgNT14
Označeno
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм