Лука 22
22
ЯТӀОКӀЫРЭ ТӀУНЭРЭШЪХЬ
Тхьэмэтэ Хэсэшхом хэт тхьэматэхэм Исус тхьагъэпцӀыгъэкӀэ аукӀынэу гухэлъ зэрашӀыгъэр
(Маттэ 26:1-5, 14-16; Марк 14:1-2, 10-11; Иуан 11:45-53)
1Хьалыгъу мыкӀу-мыпшэ зыщашхырэ мэфэшхохэу ӀутӀыжъкӀэ заджэхэрэр#22:1 Хьалыгъу мыкӀу-мыпшэ зыщашхырэ мэфэкӀ мэфэшхохэу ӀутӀыжъкӀэ заджэхэрэр – еплъ 2:41. къэблэгъагъэх. 2Дин пэщэшхохэмрэ Тэурат егъэджэкӀо пащэхэмрэ Исус цӀыфхэм амышӀэу зэрагъэкӀодыщт шӀыкӀэм лъыхъущтыгъэх, сыда пӀомэ, ахэр цӀыфхэм ащыщынэщтыгъэхэти ары. 3Джащыгъум Исус игъогу рыкӀорэ нэбгырэ пшӀыкӀутӀумэ ащыщэу ИскариоткӀэ заджэхэрэ Иудэ ыгу шэйтаныр ихьагъ. 4ЕтӀанэ Иудэ дин пэщэшхохэмрэ Тхьэм иунэшхо икъэрэгъулэхэм япащэхэмрэ адэжь кӀуи, Исус зэраригъэубытыщт шӀыкӀэмкӀэ адэгущыӀагъ. 5Ахэр гушӀуагъэх, ахъщи къыратынэу къагъэгугъагъ. 6Аущтэу Иудэ адишти, цӀыф купышхохэм амышӀэу Исус аригъэубытыным пае, Ӏэрыфэгъу уахътэ паплъэу ыублагъ.
Исус игъогу рыкӀохэрэм ӀутӀыжъ пчыхьэшъхьашхэр зэрагъэхьазырыгъэр
(Маттэ 26:17-25; Марк 14:12-21; Иуан 13:21-30)
7Хьалыгъу мыкӀу-мыпшэ зыщашхырэ мэфэкӀ мэфэшхохэм ащыщэу ӀутӀыжъ шъынэр зыщышӀуаубзын фэе мафэр къэсыгъ. 8Аущтэу зэхъум, Исус Петрэрэ Иуанрэ ыгъэкӀуагъэх, моущтэу ариӀуагъэу: – ШъукӀуи, ӀутӀыжъ пчыхьэшъхьашхэр тшӀыным пае жъугъэхьазыр.
9– Тыдэ щыдгъэхьазырынэу уфая? – къыраӀожьыгъ ахэмэ.
10– ШъукъэдаӀу! – ариӀуагъ Исус. – Къалэм шъузэрэдахьэу, лӀы горэм псы къошын ыхьэу шъурихьылӀэщт. А лӀым ыуж шъуитэу унэу зэрыхьэрэм шъори шъуихьи, 11унэр зием ешъуӀу: «Дин гъэсакӀом къыуеӀо: Сэррэ сигъогу рыкӀохэрэмрэ ӀутӀыжъ пчыхьэшъхьашхэр зыщытшӀыщт хьакӀэщыр тыдэ щыӀа?» 12Джащыгъум унэ зэтетым ышъхьагърэ къатым тетэу гъэкӀэрэкӀагъэ хьэкӀэщышхо шъуигъэлъэгъущт. Ащ зэкӀэри щыжъугъэхьазыр.
13Ахэр етӀанэ кӀохи, Исус къызэрариӀуагъэм тетэу къагъоти, ӀутӀыжъ пчыхьэшъхьашхэр агъэхьазырыгъ.
Зиусхьаным ипчыхьэшъхьашх
(Маттэ 26:26-30; Марк 14:22-26; 1 Кор. 11:23-25)
14Сыхьатыр къызэсым, апостол нэбгырэ пшӀыкӀутӀур игъусэу Исус Ӏанэм пэтӀысхьагъ.
15– Къин сщэчыным ыпэкӀэ, мы ӀутӀыжъ пчыхьэшъхьашхэр къыжъудэсшӀы лъэшэу сшӀоигъуагъ, – ариӀуагъ ахэмэ. 16– Сыда пӀомэ, сэ шъосэӀо, Тхьэм и Тетыгъошхо къэсыгъэу, ӀутӀыжъ мэфэкӀ мэфэшхом къикӀырэр къэшъыпкъэжьыфэ, ӀутӀыжъ пчыхьэшъхьашхэр сшӀыжьыщтэп.
17ЕтӀанэ Исус шъуалъэ къышти, Тхьэм щытхъу фишӀи, къыӀуагъ: – Мыр шъушти, мыщ итым щыщ шъукъыздешъу; 18сыда пӀомэ, сэ шъосэӀо, Тхьэм и Тетыгъошхо къэсыфэ, сэнэшъхьэпсым сешъожьыщтэп.
19ЕтӀанэ Исус хьалыгъур къыштагъ, Тхьэм щытхъу фишӀи, зэгуичи, ахэмэ арити, къыӀуагъ: – Мы хьалыгъур сэ спкъэу шъо сишӀуагъэ шъокӀынэу стыщтыр ары. Шъугу сыкъэжъугъэкӀыжьыным пае, шъушхы.
20Ащ фэдэу пчыхьэшъхьэшхэ ужым шъуалъэр къышти, къыӀуагъ: – Мы шъуалъэм сэнэпсэу итым къикӀырэр зэзэгъыныгъакӀэу Тхьэм ежьыррэ шъоррэ шъуазыфагу дилъхьэрэр ары. А зэзэгъыныгъакӀэр къэзгъэшъыпкъэжьырэр лъэу шъо сишӀуагъэ шъокӀынэу къыскӀэкӀыщтыр ары.#22:20 А зэзэгъыныгъакӀэр къэзгъэшъыпкъэжьырэр лъэу шъо сишӀуагъэ шъокӀынэу къыскӀэкӀыщтыр ары – пэсэрэ зэзэгъыныгъэу Тхьэм ежьыррэ илъэпкъырэ азыфагу дилъхьагъэр къэзгъэшъыпкъэжьыгъагъэр къурмэныпхъэм ылъ арыгъэ. А лъыр цӀыфхэм атыраутхэгъагъ. Еплъ Пегъымбар Мусэ ятӀонэрэ тхылъэу ытхыгъэм 24:7-8. Ащ фэдэу зэзэгъыныгъакӀэу Тхьэм ежьыррэ ицӀыфхэмрэ азыфагу дилъхьагъэр зыгъэшъыпкъэжьыгъэр Исус ылъэу къащым щыкӀэкӀыгъэр ары. А зэзэгъыныгъэм зэритым фэдэу, цӀыф горэм ИсускӀэ шӀошъхъуныгъэ иӀэ хъумэ, мыкӀодэу Тхьэм ар къыгъэнэжьыщт. 21Ау тетыгъо зиӀэхэм сязгъэубытыщтыр сигъусэу мы Ӏанэм пэс. 22ЦӀыф Лъэпкъым ы Къо Тхьэм зэриухэсыгъэм тетэу, дунаим ехыжьыщт, ау тетыгъо зиӀэхэм ар язгъэубытырэр гъогу мыгъо теуцуагъ.
23Исус ар зеӀом, игъогу рыкӀохэрэр зэупчӀыжьхэу аублагъ: – Тэ тщыщэу хэта ар зышӀэн зыгу хэлъыр?
Исус игъогу рыкӀохэрэм ащыщэу анахь инэу алъытэн фаемкӀэ зэрэзэнэкъокъугъэхэр
24Исус игъогу рыкӀохэрэм ащыщэу анахь инэу алъытэн фаемкӀэ зэнэкъокъухэу аублагъ.
25– Дунаим тет пачъыхьэхэр цӀыфхэм апшъэ дэсых, – ариӀуагъ Исус. – Тетыгъор зиӀэхэми шӀу зышӀэхэрэмкӀэ цӀыфхэр зэрагъаджэх. 26Шъо шъузэрэзэфыщытын фаер арэп. Ар мыхъоу, шъуазыфагу анахь иныр цӀыкӀум фэдэ орэхъу, тхьэматэри шъхьагърытым фэдэ орэхъу. 27Хьауми хэта анахь иныр, Ӏанэм пэсыр ара, шъхьагърытыр ара? Ӏанэм пэсыр арыба? Ау шъхьагърытым фэдэу сэ сышъухэт. 28Сэ къин сщэч зэхъуми, сигъусагъэхэр шъоры. 29Сэ тетыгъо сиӀэнэу ся Тэ къызэрэситыгъэм фэдэу, шъори тетыгъо шъуиӀэнэу шъосэты. 30Сэ си Тетыгъошхо къызыскӀэ, сиӀанэ шъупэсэу шъушхэщт, шъуешъощт, Израиль илӀэкъо пшӀыкӀутӀум хьыкум атешъушӀыхьанэу пачъыхьэ тӀысыпӀэхэм шъуатетӀысхьащт.
«Сэ сызыщыщыр умышӀэу къэпӀощт» Исус Петрэ зэрэриӀуагъэр
(Маттэ 26:31-35; Марк 14:27-31; Иуан 13:36-38)
31– Симон, Симон, къэдаӀу. Мэкъу-мэщышӀэм коцымрэ уарзэмрэ зэрэзэхидзыхэрэм фэдэу, шъуигъэунэфыным пае, шэйтаным Тхьэм фитыныгъэ къыӀихыгъ. 32Ау шӀошъхъуныгъэм игъогу утемыкӀынэу Тхьэм сыпфелъэӀугъ. О садэжь къызыбгъэзэжькӀэ, пшыхэм агухэр гъэпытэх.
33– Зиусхьан, сэ сыуигъусэу хьапсым сыкӀощтми, лӀэныгъэм сыӀукӀэщтми, сыфэхьазыр, – къыриӀуагъ Симон Петрэ Исус.
34– Петр, сэ осэӀо, – къыӀожьыгъ Исус, – непэ атакъэр Ӏоным ыпэкӀэ, сызыщыщыр умышӀэу гъогогъуищэ къэпӀощт.
Ахъщалъэр, Ӏалъмэкъыр, чатэр
35– Ахъщалъи Ӏалъмэкъи шъумыӀыгъхэу, цуакъэхэри шъущымыгъхэу шъуздэсэгъэкӀым#22:35 шъуздэсэгъэкӀым – еплъ 10:4., щыкӀагъэ горэ шъуиӀагъа? – ариӀуагъ Исус. – Хьау, щыкӀагъэ зи тиӀагъэп, – къаӀожьыгъ ахэмэ.
36– Ау джы, ахъщалъи Ӏалъмэкъи зиӀэм зыдерэшт, – ариӀуагъ Исус. – Чатэ зимыӀэми ищыгъын кӀыӀутелъ ерэщи, чатэ къерэщэф. 37Сэ шъосэӀо, къысэхъулӀэхэзэ, къэшъыпкъэжьынхэ фае Тхьэм мы игущыӀэ тхыгъэхэр#22:37 Тхьэм игущыӀэ тхыгъэхэр – еплъ Пегъымбар Ешайа тхылъэу ытхыгъэм 53:12.: «Хабзэм текӀыгъэхэм ащыщэу ежь алъытагъ». Сыда пӀомэ, сэ къысэхьылӀагъэу Тхьэм игущыӀэ тхыгъэхэр къэхъу пэтхэшъ ары.
38– Зиусхьан, мары, чатитӀу тиӀ, – къаӀуагъ ахэмэ. – Ар икъущт, – ариӀожьыгъ Исус.
Елеон Ӏуашъхьэм Исус Тхьэм зэрэщелъэӀугъэр
(Маттэ 26:36-46; Марк 14:32-42)
39Исус Ерусалим дэкӀи, ихабзэ тетэу, Елеон Ӏуашъхьэм дэкӀоягъ. Игъогу рыкӀохэри игъусагъэх. 40ЗыдэкӀощт чӀыпӀэм зынэсым, ариӀуагъ: – ПсэкӀодшӀэным шъудимыхьыхынэу Тхьэм шъуелъэӀу.
41ЕтӀанэ Исус зы мыжъо дзыгъо фэдизкӀэ ахэмэ ахэкӀыгъ. ЛъэгонджэмышъхьэкӀэ тӀыси, Тхьэм елъэӀугъ:
42– Сэ ся Т, уфаемэ, мы къин щэчыным ишъуалъэ сэ сӀых. Ау сызыфаер мыхъоу, о узыфаер орэхъу.
43Джащыгъум мэлэӀич горэ уашъом къехи, кӀуачӀэ ригъэгъотынэу къыфэлъэгъуагъ. 44Исус гумэкӀышхом хэтэу, нахь лъэшэу Тхьэм елъэӀугъ. ИпкӀэнтӀэпсхэри лъы ткӀопсхэм афэдэу чӀыгум теткӀощтыгъэх.
45Тхьэм зелъэӀум, Исус къэтэджыжьи, игъогу рыкӀохэрэм адэжь зэкӀожьым, гумэкӀышхо зэряӀэм пае, хэчъыягъэхэу арихьылӀэжьыгъ.
46– Сыд пае шъучъыера? – ариӀуагъ Исус. – Шъукъэтэджи, псэкӀодшӀэным шъудимыхьыхынэу Тхьэм шъуелъэӀу.
Исус зэраубытыгъэр
(Маттэ 26:47-56; Марк 14:43-50; Иуан 18:3-12)
47Исус джыри къэгущыӀэзэ, игъогу рыкӀорэ нэбгырэ пшӀыкӀутӀум ащыщэу Иудэ апэ итэу цӀыф купышхо къэкӀуагъ. Иудэ Исус ебэунэу къыбгъодэхьагъ.
48– Иуд, ЦӀыф Лъэпкъым ы Къо укъызэребэурэмкӀэ тетыгъо зиӀэхэм аубытыщтыр яогъэлъэгъоу ара? – риӀуагъ Исус.
49Исус игъусэхэм къэхъущтым гу зылъатэм, къаӀуагъ: – Зиусхьан, чатэмкӀэ тахэона?
50Исус игъусэхэм ащыщэу зыр дин пэщэшхом иунэӀутым еуи, иджабгъу тхьакӀумэ гуиупкӀыгъ.
51– Икъун! Ыуж икӀ! – къыӀуагъ Исус. ЕтӀанэ унэӀутым ытхьакӀумэ нэси, ыгъэхъужьыгъ.
52Ащ нэужым Исус ежь зыубытынэу къэкӀогъэ дин пэщэшхохэми, Тхьэм иунэшхо икъэрэгъулэхэм япащэхэми, нахьыжъхэми ариӀуагъ: – ХъункӀакӀо горэ шъуубытыщтым фэдэу, чатэхэмрэ умэхэмрэ шъуӀыгъхэу шъукъэкӀуагъа? 53Мафэ къэси Тхьэм иунэшхо сыщышъухэтыгъ, ары шъхьакӀэ сышъуубытыгъэп. Ау джы шъо шъуигъу, мы сыхьатми шӀункӀыгъо бзаджэм тетыгъор ие хъугъэ.
Петрэ Исус зыщыщыр ымышӀэу къызэриӀуагъэр
(Маттэ 26:57-58, 69-75; Марк 14:53-54, 66-72; Иуан 18:15-18, 25-27)
54Аущтэу ахэмэ Исус аубыти, Ӏуащи, дин пэщэшхом иунэ ращагъ. Петрэ чыжьэкӀэ ауж итэу алъыкӀуагъ. 55Щагу гузэгум машӀор рашӀыхьи, къызетӀысэкӀхэм, Петри ахэтӀысхьагъ. 56УнэӀут пшъашъэ горэм Петрэ машӀом пэсэу ылъэгъуи, къызеплъыпэм, къыӀуагъ: – Мыри Исус игъусагъ.
57– Хьау, – къыӀуагъ Петрэ, – ар сшӀэрэп, пшъашъ.
58Зы тӀэкӀу тешӀагъэу нэмыкӀ горэми Петрэ къылъэгъуи, къыӀуагъ: – Ори ахэмэ уащыщ. – Хьау, синыбджэгъу, сэ ахэмэ сащыщэп, – къыӀожьыгъ Петрэ.
59Зы сыхьат фэдиз тешӀагъэу, етӀани зыгорэм теубытагъэу къыӀуагъ: – Щэч хэмылъэу мы лӀыри ащ игъусагъ, сыда пӀомэ, ар Галилей щыщ.
60– Хьау, синыбджэгъу, а зыфапӀорэр сшӀэрэп, – къыӀожьыгъ Петрэ. КъэгущыӀэзэ, ардэдэм атакъэр къэӀуагъ. 61Зиусхьаным зыкъызэригъэзэкӀи, Петрэ еплъыгъ. Джащыгъум Зиусхьаным къыриӀогъэгъэ гущыӀэхэр Петрэ ыгу къэкӀыжьыгъэх: – Непэ атакъэр Ӏоным ыпэкӀэ, сэ сызыщыщыр умышӀэу гъогогъуищэ къэпӀощт.
62Ар ыгу къызэкӀыжьым, Петрэ щагум дэкӀи, лъэшэу гъыгъэ.
Къэрэгъулэхэр Исус зэрэкӀэнэкӀагъэхэр
(Маттэ 26:67-68; Марк 14:65)
63Къэрэгъулэхэр Исус кӀэнакӀэщтыгъэх, еощтыгъэх.
64Исус ынэхэр кӀапхэхи, еупчӀыгъэх: – Упегъымбармэ, хэтми къыоуагъэм ыцӀэ къаӀо!
65Ехъонхэзэ, нэмыкӀ Ӏаджи раӀуагъ.
Исус Тхьэмэтэ Хэсэшхом ыпашъхьэ зэрэращагъэр
(Маттэ 26:59-66; Марк 14:55-64; Иуан 18:19-24)
66Нэф къызэшъым, цӀыфмэ анахьыжъхэри, дин пэщэшхохэри, Тэурат егъэджэкӀо пащэхэри къызэӀукӀэхи, Тхьэмэтэ Хэсэшхом#22:66 Тхьэмэтэ Хэсэшхор – дин Ӏофхэм яхьылӀагъэу хьыкум зышӀэу, анахь тетыгъо зиӀэ хасэу джуртхэм яӀагъэр ары. Тхьэматэ нэбгырэ 70-рэ Тхьэмэтэ Хэсэшхом хэтыгъ. А хэсэшхом итхьэмэтагъэр дин пэщэшхор арыгъэ. Тхьэмэтэ Хэсэшхом загъорэ «СинедрионкӀэ» еджэх. ыпашъхьэ Исус ращагъ.
67– Христосыр орымэ, къытаӀу, – къыраӀуагъ. – Сэ къышъуасӀомэ, шъушӀошъ хъущтэп, – ариӀожьыгъ Исус.
68– Сэри сышъоупчӀымэ, пэгъокӀ къысэшъутыщтэп, сышъутӀупщыжьыщтэп. 69Ау джы щегъэжьагъэу ЦӀыф Лъэпкъым ы Къо лъэкӀышхо зиӀэ Тхьэм иджабгъукӀэ госыщт.
70– Ащыгъум о Тхьэм ури Къоу ара? – къаӀуагъ зэкӀэмэ. – Ары, шъо зэрэшъуӀорэм фэд#22:70 – Ары, шъо зэрэшъуӀорэм фэд, – е – Шъо шъушъхьэкӀэ къэшъоӀо, сызыфэдэр., – ариӀожьыгъ Исус.
71– Сыда нэмыкӀ шыхьат зэрэтищыкӀэгъэжьыр? – къаӀуагъ ахэмэ. – Ежь ижэдэкӀэу зэхэтхыгъэба?
Currently Selected:
Лука 22: AdgNT14
Označeno
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм